Lukas 14 - Riang

Yesuhz seuk neum ihz a kaang Pharise

¹ Naeh kaai seu ngihz sinz hawkz, Yesuhz lan suamz kaaiz bimz a kaang ihz mawh Pharise, ihz keui pao yawt Hnhz thatz baaiz.

² A diz maang ihz tihz cawng phutz hawkz naeh boh aacz ngaai Hnhz.

³ Yesuhz maanyz Pharise boh ihz mawz kyaamz keui nahz, “Seuk neum ihz kaai seu ngihz sinz ne anz tawiz traz Moses haz, nam haz?”

⁴ Keuiz daz keuh nam rawhz. Yesuhz teu hnhz cih aez moh rak rae plawiz hnhz lan.

⁵ Yesuhz maanyz thaengz keuh, “Kaai seu ngihz sinz ne beuk pehz maang kuanz ihz nam anz kaw meuk keui klaez tuhz lu ne anz maang ihz nam leh lae haz?”

⁶ Keuh kaw nam caang tawpz naehz.

Yak lomz trawng

⁷ Yesuhz awlz khaekz truz suamz keui ras leh ti raan trawng ne leh mony pung taek daz keuh nahz,

⁸ “Meuz ihz paangz pehz pawiz kopz ku ne yak khahz keu dez ti raan trawng. Doz hnhz caang paangz mok tang ihz mawh lak daehz.

⁹ Ihz paangz ne daz pehz nahz, ‘Aez keuh keu dez tawz pehz ne raez.’ Doz pehz bawnz klez ihz, sitz moh ti raan daelz ne.

¹⁰ Meuz ihz paangz pehz ne lan keu dez tawiz ti raan daelz keui raez. Meuz tahz kaang pehz phraeoz ne daz, ‘Raen, truz keu dez ti raan trawng raez.’ Pehz kaw bawnz mawk mael aacz ngaai khaekz.

¹¹ Ihz mok lomz trawng keui ngaz klaez daelz, ihz mok lomz daelz keui ngaz moh trawng.”

¹² Yesuhz lao tahz kaang nahz, “Meuz mih raak ihz suamz kaaiz bimz ne, yak raak kuanz bohz, kuanz mai, ceu kheuz boh ihz maang an thatz daehz. Kawp daz keuh ngaz paangz mial mih rae tawpz kez cuz boh.

¹³ Meuz mih raenz pawiz ne, raak ihz phaanz, ihz yam seu plaakz, ihz nam krang boh ihz ngaai lapz keui.

¹⁴ Kawp daz keuh nam phrawz bawnz kez cuz mih, Phraz Pen Caoh ngaz phrawz aez mih eunz kraao ihz keu sangz keui meu rae imz tui.”

Pung taek pawiz longz

¹⁵ Ihz hawkz keu dez suamz boh a pheunz ne ngarz Yesuhz lao rae daz, “Ihz bawnz kut suamz tuhz pawiz prih Phraz Pen Caoh ne naeh an rak.”

¹⁶ Yesuhz mial daz hnhz nahz, “Maang ihz hawkz raenz pawiz mawh longz, paangz ihz heungz baaiz.

¹⁷ Meuz seum suamz keui peun tan mok ne hnhz cao kuanz leng daehz khahz raak khaekz daz, ‘Truz leuk raez, a wa peun tan klawhz meoz keuiz.’

¹⁸ Keuiz daz keuh hacz aamz cih ti lao mok. Hawkz daz, ‘Ohz a wa yal ti sraakz, lo lan temz yawt, teungz mah ohz raez.’

¹⁹ Thaengz hawkz samz daz, ‘Ohz a wa yal meuk hanz seungz, lo caam yawt daehz eunz, teungz mah ohz raez.

²⁰ Thaengz hawkz kaw daz, ‘Ohz taamz leh yah, ohz nam caang lan.’

²¹ Kawp ceun diz kuanz leng weng lao tahz daehz nahz ceun diz. Tahz kaang an diz kaw sunz ca, lao kuanz leng daz, ‘Khahz raak ihz tawiz reung dengz tawiz prawng keui raamz rip, raak ihz phaanz, ihz yam seu plaakz, ihz ngaai lapz boh ihz nam krang keui.’

²² Kuanz leng mial truz daz, ‘Ohz a wa cih ceun mih lao, keuiz daz lukz keui yeung lawnz.’

²³ Tahz hnhz kaw lao kuanz leng daehz nahz, ‘Lan tuhz prih tawiz reung dengz longz, tawiz reung dengz lan sraakz maar keui rae nap ihz truz raez, aez ihz neuk tuhz kaang ohz.

²⁴ Ohz lao mih, ihz an ohz paangz aacz keu diz nam bawnz cim yawt seu tuhz kaaiz pawiz ohz keuiz.’”

Yaeh taan penz teu paez

²⁵ Naeh seu laehz wungz ihz heungz keui lan tawiz Yesuhz, Hnhz waaiz cu keuh rae lao keuh,

²⁶ “Ihz truz cu Ohz keui, beuk keuh rak paz boh mah, yah boh kuanz, mai boh seum bohz, rak toz daehz leuz Ohz kaw nam theukz penz teu paez Ohz.

²⁷ Beuk nam baekz lakz klawngz klaengz daehz truz tawiz Ohz kaw, nam theukz penz teu paez Ohz.

²⁸ Tuhz pehz ne beuk maang ihz ngaz cih khrengz pao yawt mawh longz kaw, anz ngaz nam keu dez nap yawt teuk aacz langz, ngaz hacz seu naeh?

²⁹ Beuk nam anz ceun diz, hnhz cih nam omz wa, cih taw ti tam cawng pan ne, ihz awlz keui ngot keulz hnhz.

³⁰ Keuh ngaz daz, ‘Hnhz an ni naeh taw seun teungz pan, nam caang teuk wa leui.’

³¹ Khunz ngaz tiukz siukz ne, anz te nam keu dez wonz yawt teuk aacz, siukz daehz seu sawngz ne anz ngaz kreng bawnz siukz ihz aarz sawngz?

³² Beuk hnhz nam kiungz pae kaw hnhz ngaz cao ihz taangz toz daehz lan teuk ngang aacz meuz ihz yeung naeh yaan ne.

³³ Naeh ceun khuz an diz, beuk pehz nam cunz phrihz phrahz daehz hacz aamz kaw nam caang penz teu paez Ohz.

Suakz nam taap

³⁴ Suakz rak baaiz. Keuiz daz beuk nam taap leui kaw cih seu naez cih aez taap mial?

³⁵ Nam rak seum sapz sraakz nam anz kaw nam rak seum cih keu tehz. Wiurz thengz thaz nawk pan. Ihz maang keu tiakz keui, aez hnhz ngarz.”