Lukas 1 - Riang

Seun teungz mony reu ma

¹ Khunz Theophilus aez, ceun ihz tang heungz keui khatz phawmz taemz maaiz mok lawng an keunyz truz peur lah ehz.

² Keuh taemz tawiz an ihz awlz tawiz tuhz keutz ngaai boh ihz rawz plaez reu oiz rak ehz nahz lawng an diz thaz meuz seun teungz ne,

³ ohz kaw caet yawt rak rak hacz aamz thaz meuz seun teungz rae,

⁴ ohz thaang rak seum taemz mok aez mih nahz, aez mih mas rak rak an mih a wa sawnz leh keui.

Yohn tahz teuk sruz ngaz keut

⁵ Co khunz Herot upz peung prih Yio ne maang saangz longz hawkz mus hnhz daz Sekhariah, an naeh tuhz cumz ceu beunz Abiyah. Mus yah hnhz daz Elisabet, hnhz kaw naeh kheuz Aaron.

⁶ Kaar tahz yah naeh ihz keu sangz aacz ngaai Phraz Pen Caoh, cih tawiz sinz boh traz Phraz Cen Cen thanz paw nam maang ti nae.

⁷ Elisabet naeh keun nyah manz rae kaar nam maang kuanz, kaar a wa thao tang keu aarz.

⁸ Naeh seu seu ngihz maen meuz cumz Sekhariah cih kaanz tuhz wat ne,

⁹ klaez ceu kawk hnhz tucz naam sa hawm tawz khrengz tuhz wat Phraz Pen Caoh, tawiz thungz caam saangz longz.

¹⁰ Meuz phangz hnhz tucz naam sa hawm ne ihz keui suz tawngz boh thaz nawk.

¹¹ Meuz diz luat teu maan kaang raaoz Phraz Cen Cen paw truz ceng plaez hnhz nahz, plaakz takz kaaiz khrengz tucz naam sa.

¹² Meuz Sekhariah awlz hnhz ne rawhz khranz rawhz doz.

¹³ Keuiz daz teu maan kaang raaoz daz hnhz nahz, “Yak doz raez, Sekhariah! Phraz Pen Caoh a wa ngarz mih suz tawngz. Yah mih Elisabet ngaz maang kuanz keur meh, mih bawnz peuk mus hnhz Yohn.

¹⁴ Meuz hnhz keut ne mih kaw ngaz pyaw, ihz keui kaw ngaz seuz.

¹⁵ Kuanz mih ngaz penz kuanz mawh myaat aacz ngaai Phraz Cen Cen. Hnhz nam tiangz omz seu pit boh meoz cawc, neuk tang Khuanz Seu Ngamz thaz meuz yeung naeh tuhz klungz mah daehz.

¹⁶ Hnhz ngaz aacz plaak plaai kheuz Israel keui truz cu Tahz daehz Phraz Pen Caoh.

¹⁷ Hnhz lan aacz Caoh Phraz ceun khuanz boh taanz khoz ihz taangz phraz Eliyas. Hnhz ngaz cih aez paz boh kuanz teur maen mial daehz, ihz nam teuk ngarz keui aez waaiz mial tuhz pinya reung dengz keu sangz rae aez ihz raenz peun tan mok meuz Phraz Pen Caoh truz.”

¹⁸ Sekhariah kaw daz teu maan kaang raaoz nahz, “Ohz cih seu naez caang mas lawng an ni? Ohz kaw a wa thao, yah ohz kaw a wa cahz.”

¹⁹ Teu maan kaang raaoz daz, “Ohz naeh Kabriel, ohz ceng aacz ngaai Phraz Pen Caoh, Phraz Pen Caoh phuhz ohz truz lao mih nahz reu oiz rak an ni.

²⁰ Mih nam yum mony reu ma an ohz lao. Kawp ceun diz seu ni mih ngaz ahz taw phraeoz penz truz lawng an ni. Keuiz daz an ohz lao ne meuz kraao a wa phraeoz kaw ngaz penz.”

²¹ Meuz ceun diz ihz keui ngawm Sekhariah, sangz tang hnhz moh tuhz wat ceu nawhz baaiz.

²² Meuz hnhz lae truz ne hnhz nam caang upz rae, ihz keui kaw mas hnhz a wa awlz pyatik tuhz wat. Hnhz plaez keuh nahz tihz daehz, nam caang upz hawkz hawkz.

²³ Kraao hnhz cih kaanz tuhz wat a wa peun ne, hnhz weng moh lang kaang.

²⁴ Nam paw moh ceu nawhz, yah hnhz keun meur rae nam lae thaz nawk kaang hanz kiarz ne,

²⁵ hnhz daz mial daehz, “Seu ni Phraz Cen Cen yawt ohz, leh thengz an nam rak kaai ohz.”

Lawng Tahz Yesuhz ngaz keut

²⁶ Meuz Elisabet keun meur bawnz tualz kiarz ne, Phraz Pen Caoh phuhz teu maan kaang raaoz Kabriel lan weng Nasaret tuhz prih Kalile.

²⁷ Hnhz lao Mari an naeh trawsz teuk rac, a wa teur khaam tang keur meh hawkz, mus hnhz daz Yosep, an naeh kheuz khunz Dawit.

²⁸ Teu maan kaang raaoz tak Mari daz, “Aez reung dengz rak naeh kaai mih se kamz, keun nyah an bawnz mawk mael aez! Phraz Pen Caoh naeh kawmz mih.”

²⁹ Mari kaw meun kawp mony reu ma teu maan kaang raaoz lao rae wonz daz an ni naeh seu naez nawz.

³⁰ Teu maan kaang raaoz daz hnhz nahz, “Yak doz, Mari, mih a wa trohz phawmz Phraz Pen Caoh.

³¹ Mih ngaz maang kuanz keur meh, mih bawnz peuk mus Hnhz Yesuhz.

³² Hnhz ngaz mawh myaat, bawnz raak Hnhz naeh Kuanz Phraz Pen Caoh an trawng dutz. Tahz an naeh Phraz Pen Caoh ngaz aez Hnhz penz khunz ceun paz daehz Dawit.

³³ Hnhz ngaz upz peung kheuz Israel cen cen, prih Hnhz kaw nam dutz seu pawk.”

³⁴ Mari daz teu maan kaang raaoz nahz, “Cih seu naez penz bawnz, ohz naeh trawsz teuk rac?”

³⁵ Teu maan kaang raaoz mial daz, “Khuanz Seu Ngamz ngaz cur cu kaai mih rae taanz khoz Phraz Pen Caoh an trawng dutz ngaz cu mih. Kawp ceun diz, kuanz ihz an seu ngamz ne bawnz peuk mus Kuanz Phraz Pen Caoh.

³⁶ Yawt luz, kuanz mai pehz Elisabet, ihz daz hnhz naeh keun nyah manz, a wa thao ne kaw ngaz maang kuanz keur meh, seu ni hnhz keun meur bawnz tualz kiarz.

³⁷ An Phraz Pen Caoh cih nam penz bawnz ne nam maang naehz.”

³⁸ Mari daz, “Ohz naeh kuanz leng Phraz Pen Caoh! Aez ohz naeh ceun mih lao.” Teu maan kaang raaoz kaw praasz hnhz.

Mari khahz keulz Elisabet

³⁹ Nam paw moh ceu nawhz, Mari rip lan cu weng kaai rang tuhz prih Yio.

⁴⁰ Hnhz kut tuhz kaang keuh Sekhariah rae tak Elisabet.

⁴¹ Meuz Elisabet ngarz Mari tak daehz ne kuanz ngaak an naeh tuhz klungz ne teuk dawtz, Elisabet neuk tang Khuanz Seu Ngamz

⁴² rae daz Mari nahz reus usz usz, “Mih bawnz reung dengz rak Phraz Pen Caoh leuz keun nyah hacz aamz, kuanz ihz an mih ngaz maang kaw bawnz reung dengz rak.

⁴³ Kawp naehz rae ohz bawnz kez cuz mah Tahz ehz truz keulz ohz?

⁴⁴ Meuz ohz ngarz reus mih tak ohz ne kuanz ngaak an naeh tuhz klungz ohz seuz phawmz rae teuk dawtz.

⁴⁵ Phraz Cen Cen aez reung dengz rak a mih kawp daz mih yum kaai mony reu ma an Hnhz mok keu tih ne ngaz penz mawn.”

Mony ngawk Mari lupz phrawz

⁴⁶ Mari daz, “Kingz keu nuasz ohz lupz phrawz Phraz Cen Cen.

⁴⁷ Khuanz ohz seuz tuhz Tahz Khyawt ohz Phraz Pen Caoh.

⁴⁸ Kawp daz Hnhz tang ohz naeh kuanz leng Daehz an klaez daelz. Seu ni lan ihz hacz aamz ngaz raak ohz naeh keun nyah an bawnz reung dengz rak Phraz,

⁴⁹ kawp Phraz Pen Caoh an kyahz lak ihz ne cih aez an rak seum sangz ohz nahz. Mus Hnhz seu ngamz.

⁵⁰ Kaai ihz an doz suamz Hnhz keui Hnhz teur yawng co pliz co placz lan.

⁵¹ Hnhz leh tihz daehz plaez taanz khoz, teuk praasz a kyaam ihz lomz trawng keui.

⁵² Hnhz teuk klaez khunz thaz plaang daehz rae phrawz aez ihz daelz keui raw trawng.

⁵³ Hnhz damz ihz coh nguat keui nahz seum suamz an rak rae aez ihz maang keui nahz tihz maat.

⁵⁴ Hnhz kawr kuanz leng Daehz Israel, tawiz mony reu ma Hnhz mok tawz tahz kok ehz ne Hnhz tang lo teur yawng se se ihz Daehz.

⁵⁵ Phraz Cen Cen yawt phraeoz Abraham boh ceu kheuz hnhz se se ceun Daehz lao mok.”

⁵⁶ Mari moh kawmz Elisabet kraao waiz kiarz kaw weng mial kaang daehz.

Yohn tahz teuk sruz keut truz

⁵⁷ Kraao Elisabet maang kuanz a wa phraeoz ne keut kuanz keur meh.

⁵⁸ Ihz rim kaang keuh boh ceu kheuz kuanz mai keui ngarz Phraz Cen Cen teur yawng leuz leuz kaai hnhz rae keuh hacz aamz seuz tawiz hnhz.

⁵⁹ Meuz a wa bawnz tahz seu ngihz ne ihz keui truz aez kuanz ngaak nahz an saetz cawkz hurz. Keuh ngaz peuk mus kuanz ihz nahz mus paz an daz Sekhariah.

⁶⁰ Keuiz daz Elisabet daz, “Nam anz! Peuk mus hnhz Yohn eu.”

⁶¹ Ihz keu diz kaw daz, “Tuhz kheuz pehz ne nam maang mus Yohn.”

⁶² Keuh kaw leh tihz cawng maanyz paz kuanz ihz, ngaz peuk mus kuanz ihz nahz naehz.

⁶³ Sekhariah kaw maanyz leh saang punz hawkz. Hnhz taemz daz, “Mus hnhz naeh Yohn.” Ihz keu diz kaw teur aacz daehz sangz baaiz.

⁶⁴ Meuz diz luat Sekhariah aangz mony daehz, taakz hnhz kaw keu ceum, upz mial rae lupz phrawz Phraz Pen Caoh.

⁶⁵ Ihz moh rim keuh hacz aamz kaw teur aacz daehz doz baaiz, lawng keu diz hacz aamz kaw sirz lan tawiz pukz tuhz prih Yio.

⁶⁶ Ihz an ngarz an rak seum sangz keui teur daz, “Kuanz ihz ne ngaz naeh seu naez ez?” Keuh mas taanz khoz Phraz Cen Cen naeh kawmz hnhz.

Sekhariah lao taangz phraz

⁶⁷ Sekhariah, an naeh paz kuanz ihz kaw neuk tang Khuanz Seu Ngamz rae lao taangz phraz daz,

⁶⁸ “Phraz Cen Cen, an naeh Phraz kheuz Israel ne aez naeh an rak se kamz! Hnhz ngaz truz khyawt ihz Daehz.

⁶⁹ Hnhz aez Tahz khyawt an taanz khoz mawh, aez paw tuhz ceu kheuz kuanz leng Daehz khunz Dawit.

⁷⁰ Meuz diz neungz Phraz Cen Cen aez keu tih tawiz mony reu ma ihz taangz Daehz an seu ngamz,

⁷¹ ta khyawt leh ehz thaz raan su ehz boh tuhz tihz ihz ceuh ehz.

⁷² Hnhz teur yawng ihz keu daehz keu daepz ehz rae, aez keuh tang traz seu ngamz an Daehz prawm mok.

⁷³ Hnhz teung kaao keu tih tahz kok ehz Abraham nahz aez ehz lawt thaz raan su daehz,

⁷⁴ cih yak aez ehz doz rae caang cih kuanz leng Daehz.

⁷⁵ Aez ehz seu ngamz boh keu sangz aacz ngaai Daehz tang co ehz.

⁷⁶ Mih naeh kuanz Ohz, bawnz raak mih ihz taangz phraz an trawng dutz. Mih bawnz lan aacz Phraz Cen Cen rae ngaz meu rae reung dengz Hnhz.

⁷⁷ Mih ngaz lao ihz Phraz Pen Caoh keui mas Hnhz plawiz lawt reung dengz kawi rae ngaz khyawt keuh.

⁷⁸ Reung dengz yaw boh reung dengz rak Phraz Pen Caoh ne thang aasz kaai ehz, naeh ceun seu ngihz thaangz thaz kaang raaoz.

⁷⁹ Thang sapz tang kaai ihz moh tuhz poiz reung dengz yam rae thang plaez keuh nahz reung dengz nimz.”

⁸⁰ Kuanz ihz kaw mawh truz, thaz khuanz hnhz kaw krang truz. Hnhz moh tuhz ruk plaangz klaacz thonz taw ihz mas hnhz saang raang peur lah kheuz Israel.