Yuḥanna 7 - Ṯarifiṯ 2020

Siḏiṯneɣ Ƹisa itgaƹƹaḏ s ṯnufra ɣar ṯendint n Lquds

¹ Menbaƹd i manaya Ƹisa iggur zeg umcan ɣar umcan ḏi ṯmurṯ n Ljalil. Itbeƹƹaḏ zi ṯmurṯ n Yahuḏiya minzi israʼiliyen nni rezzun xas aṯ nɣen.

² Iqarreb-d ijjen n ȓƹiḏ n Ayṯ-Israʼil umi qqaren <Ṯinwaȓin.>

³ Nnan-as ayṯmas zeg yemmas: "Uyur ssanita, ruḥ ɣar ṯmurṯ n Yahuḏiya ḥima uȓa ḏ imeḥḍaren nnec aḏ ẓren man ȓexḏayem iy ṯxeddmeḏ.

⁴ War iǧi ḥadd ixeddem can ṯmesȓayṯ s ṯnufra meȓa irezzu aṯ ssnen. Meȓa teggeḏ ṯimesȓayin-a, smeḍhar-d ixef nnec i ddunect."

⁵ Ayṯmas s yixef nsen war uminen ca zi Ƹisa.

⁶ Inna-asen Ƹisa: "Ȓweqṯ inu ƹaḏ war d tuwiḍ ca ḥima aḏ raḥeɣ, walakin kenniw aḏ traḥem ḏi ayyi ȓweqṯ.

⁷ Ddunect war ṯzemmar ca akenniw ṯƹiff, nec tƹiffa-ayi ddunect minzi cehhḏeɣ qa ȓexḏayem n ddunect-a ḏ ṯiƹeffanin.

⁸ Gaƹƹḏeṯ kenniw ɣar ȓƹiḏ, nec war tgaƹƹiḏeɣ ca ɣar ȓƹiḏ-a minzi ȓweqṯ inu ƹaḏ war d tuwiḍ."

⁹ Wami ḏasen inna awaȓ-a iqqim ḏi ṯmurṯ n Ljalil.

¹⁰ Walakin wami gaƹƹḏen ayṯmas ɣar ȓƹiḏ, menbaƹd igaƹƹeḏ uȓa ḏ netta. Igga axmi innuffar, war d ismeḍhar ca ixef nnes.

¹¹ Rezzun xas israʼiliyen ḏi ȓƹiḏ nnan manis ikka uryaz nni?

¹² Aṭṭas ig itwecwicen zi ȓɣaci xas qqaren netta ḏ aryaz n ȓxir. Walakin inneɣni zzaysen qqaren lla, isxarriq xaneɣ waha.

¹³ Walakin uȓa ḏ ijjen war xas issiweȓ s jjheḏ s ṯiggwḏi zeg imeqqranen nni n Ayṯ-Israʼil.

¹⁴ Wami iƹḏu uzyen zi ȓƹiḏ, igaƹƹeḏ Ƹisa ɣar ṯemziḏa ṯameqqrant n Ayṯ-Israʼil iseȓmaḏ ḏinni.

¹⁵ Israʼiliyen ḏehcen nnan: "Mammec igga netta issen min ḏaysen ḏi Lkutub u netta war iɣri ca?"

¹⁶ Inna-asen Ƹisa: "Min seȓmaḏeɣ war iǧi bu inu, aseȓmeḏ-a n wenni iy ḏayi d issekken.

¹⁷ Wenni ixsen aḏ igg zi min ixes Arebbi ataf aḏ issen aseȓmeḏ-a inu ma zzayi niɣ zi Arebbi.

¹⁸ Wenni issawaȓen zi ɣares irezzu lƹaḍama i yixef nnes. Wenni irezzun lƹaḍama n wenni iy ṯiḏ issekken, qa netta ḏayes lḥaqiqa war ḏayes bu ȓɣecc.

¹⁹ Ḏ Musa iy ḏawem yucin ccariƹa, niɣ? Walakin uȓa ḏ ijjen zzaywem ma itegg zi ccariƹa nni. Iwa, mayemmi ṯexsem aḏayi ṯenɣem?"

²⁰ Nnan-as ȓɣaci: "Ma ḏayek jnun cek niɣ? Uw irezzun ac ineɣ?"

²¹ Inna-asen Ƹisa: Ggiɣ lmuƹjiza, ṯḏehcem kenniw marra.

²² Cuf, ijja-awem-d Musa ṭṭahareṯ u ṭṭahareṯ-a war ṯeǧi bu zi Musa lla, zi ssalaf ṣṣaliḥin. X manaya kenniw waxxa ḏi nhar n ssebṯ n lƹibada tṭehharem i iḥarmucen.

²³ Meȓa ṯsemmḥem iḥarmucen aḏ ṭehharen ḏi nhar n lƹibada ḥima war txilifem ca Ccariƹa n Musa, ma tƹaṣṣabem xafi wami sgenfiɣ ijjen n bnaḏem qaƹ ḏi nhar n lƹibada?

²⁴ Iwa, war tḥasabeṯ ca xafi ammu waha, ḥasbeṯ s ȓḥaqq."

Siḏiṯneɣ Ƹisa itcerraḥ manis netta ḏ mani ɣa iraḥ

²⁵ Ȓebƹaḍ zi ṯendint n Lquds nnan, ḏ wanita imken iy irezzun aṯ nɣen niɣ lla?

²⁶ Iwa xzareṯ, issawaȓ bȓa ma aḏ isnuffar ixef nnes war ḏas qqaren walu. Imken ssnen arruyas belli ḏ wanita iǧan ḏ Lmasiḥ?

²⁷ Walakin xmi d ɣa yas Lmasiḥ uȓa ḏ ijjen war itessen manis netta. Wanita lla, neccin nessen manis netta.

²⁸ Ikkar Ƹisa itxaṭab s jjheḏ ḏi ṯemziḏa ṯameqqrant n Ayṯ-Israʼil iseȓmaḏ-iṯen iqqar-asen: "Ma ḏ ṣṣaḥ ṯessnem-ayi manis nec, niɣ min ƹniɣ? War d usiɣ ca s yixef inu lla. Wenni ḏayi d issekken ɣares lḥaqiqa! Kenniw war ṯ ṯessinem ca.

²⁹ Nec ssneɣ-ṯ minzi nec zzayes u ḏ netta iy ḏayi d issekken."

³⁰ Ȓexddenni rezzun aṯ ṭṭfen, walakin war xas isers fus ḥadd zzaysen minzi ȓweqṯ nnes ƹaḏ war d tuwiḍ.

³¹ Innama, aṭṭas zi ȓɣaci nni umnen zzayes. Nnan: "Ma aḏ d yas ƹaḏ ca n Lmasiḥ aḏ igg lmuƹjizaṯ ktar zi ṯina itegg wanita?"

³² Arrin-d ȓexbar ifarrisiyen belli ȓɣaci twecwicen xas x ṯmesȓayin nni. Uca kkaren arruyas n ȓfuqaha ḏ ifarrisiyen ssekken iƹessasen bac aṯ ṭṭfen.

³³ Inna Ƹisa: "Nec akiḏwem qqimeɣ ḏrust n ȓweqṯ, ssenni aḏ ƹeqbeɣ ɣar wenni ḏayi d issekken.

³⁴ Axafi ṯerzum war ḏayi tifem ca. War ṯzemmarem aḏ d tasem mani ɣa iȓiɣ nec."

³⁵ Mseqsan israʼiliyen jarasen nnan: "Mani ɣa iraḥ wanita war ṯ ntif ca? Ma aḏ iraḥ ɣar israʼiliyen iy itemzeǧaƹen ḏi ṯmura n iyunaniyen bac aḏ iseȓmeḏ iyunaniyen?

³⁶ Min ixes aḏ yini wawaȓ-a ig inna? Iƹni "

Siḏiṯneɣ Ƹisa netta ḏ Lmasiḥ

³⁷ Ḏi nhar aneggaru ameqqran zi ȓƹiḏ nni, ikkar ibedd Ƹisa itxaṭab s jjheḏ inna: "Meȓa iffuḏ ḥadd, itxeṣṣa netta aḏ d yas ɣari aḏ isew.

³⁸ Mammec inna Lkitab x wenni zzayi ɣa yamnen: Azzayes azzȓen iɣezran n waman iseddaren."

³⁹ Manaya inna-ṯ x Arruḥ iqeddsen iy ɣa iqebȓen yinni zzayes yumnen. Arruḥ iqeddsen ƹaḏ war ṯiḏ yuci ca minzi Ƹisa ƹaḏ war itwarfeƹ ca.

⁴⁰ Sȓin ȓebƹaḍ n ȓɣaci i wawaȓen n Ƹisa nnan: "Ḏ wanita ḏ ṣṣaḥ ḏ nnabi iy qqaren aḏ d yas."

⁴¹ Inneɣni nnan: "Netta ḏ Lmasiḥ." Walakin ȓebƹaḍ zzaysen nnan: "Ma aḏ d yas Lmasiḥ zi ṯmurṯ n Ljalil?

⁴² Inna Lkitab aqa Lmasiḥ aḏ d yas zi ddurriṯ n Dawed, iƹni zi Bayt Laḥem zi dcar manis d yusa Dawed."

⁴³ X manaya iwqeƹ lxilaf jar ȓɣaci nni ḏi ssabab nnes.

⁴⁴ Ȓebƹaḍ rezzun aṯ ṭṭfen, walakin war xas isers fus ḥadd zzaysen.

⁴⁵ Ƹeqben-d iƹessasen ɣar ifarrisiyen ḏ arruyas n ȓfuqaha. Ssiwȓen ak iƹessasen nni nnan-asen: "Mayemmi war ṯiḏ tuwim?"

⁴⁶ Nnan-asen iƹessasen: "Ƹemmarṣ war issiweȓ can n bnaḏem ammec issawaȓ uryaz-a!"

⁴⁷ Nnan-asen ifarrisiyen i iƹessasen: "Ma twaxeḏƹem uȓa ḏ kenniw zzayes?

⁴⁸ Ma ṯufim can yijjen zi arruyas niɣ ḏ ifarrisiyen yumen zzayes?

⁴⁹ Yak ȓɣaci nni war ssinen ca Ccariƹa n Musa, yinni aqaṯen menƹuȓin iy ǧan."

⁵⁰ Ikkar ijjen zi arruyas-a, netta tuɣaṯ qbeȓ iruḥ ɣar Ƹisa qqaren-as Nikudim, inna-asen:

⁵¹ "Ma ccariƹa nneɣ ṯḥekkem x yij n bnaḏem qbeȓ ma ṯ nẓer niɣ a nessen min itegg?"

⁵² Nnan-as: "Ma cek ƹaweḏ zi ṣḥab n Ljalil? Rzu ḏi Lkutub xzar, uȓa ḏ ijjen n nnabi war d yusi ca zi ṯmurṯ n Ljalil."

{Siḏiṯneɣ Ƹisa ismeḥ i yijjen n ṯemɣarṯ ṯeffeɣ abriḏ}

⁵³ Ssenni iruḥ kuȓ ijjen ɣar ṯeddarṯ nnes.