Yuḥanna 6 - Ṯarifiṯ 2020

Siḏiṯneɣ Ƹisa iticc i xemsaȓaf n iryazen aḏ ccen

¹ Menbaƹd i manaya iruḥ Ƹisa aḏ iẓwa ȓebḥar n Ljalil (qqaren-as i ȓebḥar nni Ṭabarya).

² Ḏfaren-ṯ aṭṭas n yiwḏan wami ẓrin lmuƹjizaṯ nni wami isgenfa imehȓac.

³ Igaƹƹeḏ Ƹisa ɣar uḏrar iqqim ak imeḥḍaren nnes.

⁴ Ȓƹiḏ Ameqqran n Ayṯ-Israʼil war ḏas iqqim ca aḏ d yaweḍ.

⁵ Iysi Ƹisa ṯiṭṭawin nnes yufa ȓɣaci gguren-d ɣares, inna-as i Filippas: "Manis d ɣa nseɣ aɣrum bac aḏasen nuc i yina aḏ ccen?"

⁶ Iqqar-as ammu ḥima aṯ ijarreb ȓaḥeqqac netta issen min ɣa ixḏem.

⁷ Inna-as Filippas: "Meȓa nseɣ-d aɣrum s miyyatayen n ṯpiyyasin n nnuqarṯ, war itqiddi uȓa ḏ ijjen n uremmuz i yijjen."

⁸ Inna-as ijjen zeg imeḥḍaren nnes, netta ḏ Andrus umas n Simƹan Buṭrus:

⁹ "Aqa ij uḥenjir ɣares xemsa n ṯxebbazin n imendi ḏ ṯnayen n iseȓman, walakin manaya war ḏasen itqiddi ca i ȓɣaci-ya."

¹⁰ Inna-asen Ƹisa: "Sɣimeṯ iwḏan-a." Amcan nni mani qqimen ḏinni aṭṭas n arbiƹ u ḏinni can xemsaȓaf n iryazen.

¹¹ Iysi-d Ƹisa aɣrum nni icekkar Arebbi, ifreq-iṯ i yinni iy ḏinni iqqimen. Ammu igga uȓa i iseȓman, ucin-asen ƹlaḥsab min rezzun.

¹² Wami jjiwnen, inna-asen i imeḥḍaren nnes: "Jemƹeṯ iȓeqquzen nni iceṭṭen ḥima war itemḍeyyiƹ walu."

¹³ Wami jemƹen, ufin ṯenƹac n ṯeqrabin ccurent zeg iȓeqquzen nni iceṭṭen x yinni iccin zi xemsa n ṯxebbazin n imendi nni.

¹⁴ Wami ẓrin lmuƹjiza nni iy igga, iwḏan nnan qa ḏ wanita ḏ nnabi ḏ ṣṣaḥ tuɣa d ɣa yasen aḏ yiȓi ḏi ddunect-a.

¹⁵ Issen Ƹisa belli rezzun aṯ arran ḏ azeǧiḏ s bessif. Ikkar yuyur ssenni, iḏweȓ ɣar iḏurar waḥḏes.

¹⁶ Ag uƹecci, hwan-d imeḥḍaren nnes ɣar ȓebḥar.

¹⁷ Nyin ḏi ṯɣarrabut raḥen aḏ qeḍƹen ȓebḥar ɣar ubilaj n Kafernaḥum. Ṯuweḍ-d ǧiȓeṯ u Ƹisa netta ƹaḏ war ɣarsen d yusi.

¹⁸ Ikkar-d akiḏsen ȓebḥar, itṣuḍ arriḥ aṭṭas.

¹⁹ Wami niṯni tuɣa uyuren can xemsa niɣ setta kilumit, ẓrin Ƹisa iggur x iḍaren x waman n ȓebḥar iqarreb-d ɣar ṯɣarrabut, nxeȓƹen s ṯiggwḏi.

²⁰ Inna-asen: "Aqa ḏ nec, war teggwḏem ca."

²¹ Uca qebȓen-ṯ s ȓxaḍar nsen aḏ yaȓi ḏi ṯɣarrabut. Ȓexddenni ṯaɣarrabut ṯuweḍ ɣar ȓbarr mani tuɣa ggin aḏ raḥen.

Siḏiṯneɣ Ƹisa netta ḏ aɣrum n ṯuḏarṯ

²² Ṯiwecca nnes, ȓɣaci nni iqqimen ajemmaḍ i ȓebḥar feqḏen belli tuɣa ḏinni ijjen n ṯɣarrabut waha war t ufin ca. Niṯni ssnen Ƹisa war yuȓi ca ḏi ṯɣarrabut nni, imeḥḍaren nnes uyuren waḥeḏsen.

²³ Ssenni usint-id ṯɣarruba nneɣni zi ṯendint n Ṭabarya ɣar umcan nni mani ccin aɣrum nni mani icekkar Ƹisa Arebbi.

²⁴ Wami ȓɣaci nni war ẓrin ca Ƹisa ḏinni uȓa ḏ imeḥḍaren nnes, nyin uȓa ḏ niṯni ḏi ṯɣarruba uyuren ssenni ruḥen ɣar Kafernaḥum rezzun x Ƹisa.

²⁵ Wami ṯ ufin ɣar ujemmaḍ-in i ȓebḥar nnan-as: "A Lmuƹallim, meȓmi ḏa d tusiḏ ḏanita?"

²⁶ Indeq-d Ƹisa inna-asen: "Aqa tesȓam ȓḥaqq: Kenniw ṯrezzum xafi war iǧi bu wami ṯeẓrim lmuƹjizaṯ, kenniw ṯrezzum xafi wami ṯeccim ṯejjiwnem aɣrum.

²⁷ War xeddmeṯ ca i ȓmakla ixessaren, xeḏmeṯ i ȓmakla itɣiman i ṯuḏarṯ n ȓebda. Ḏ ṯa ḏ ȓmakla ḏawem ɣa yuc Mmis n bnaḏem minzi wanita iḍbeƹ-iṯ Arebbi Babas s ṭṭabaƹ nnes."

²⁸ Nnan-as: "Min itxeṣṣa a negg ḥima a nzemmar a nexḏem ȓexḏayem n Arebbi?"

²⁹ Inna-asen Ƹisa: "Ḏ ṯa ḏ ȓxeḏmeṯ n Arebbi: Aḏ tamnem zi wenni iy d issekk netta."

³⁰ Nnan-as: "Man lƹalama ṯameqqrant iy ɣa ṯeggeḏ at nẓer ḥima azzayek namen? Min ɣa ṯeggeḏ?

³¹ Ḏi ȓexȓa ȓejḏuḏ nneɣ ccin aɣrum nni umi qqaren lmanna mammec d yusa ḏi Lkitab: "

³² Inna-asen Ƹisa: "Aqa tesȓam ȓḥaqq: War iǧi bu ḏ Musa iy ḏawem yucin aɣrum zeg ujenna; Lla, ḏ Baba iy ḏawem iticcen aɣrum n ṣṣaḥ zeg ujenna.

³³ Minzi aɣrum n Arebbi netta ḏ wenni iy d ihewwan zeg ujenna iticc-as ṯuḏarṯ i ddunect."

³⁴ Nnan-as: "Iwa a Siḏi, uc-aneɣ aɣrum-a i ȓebda."

³⁵ Inna-asen Ƹisa: "Nec ḏ aɣrum n ṯuḏarṯ. Wenni iy ɣari d ɣa yasen war itȓizi ƹemmarṣ. Wenni zzayi ɣa yamnen war itfiḏi ƹemmarṣ.

³⁶ Walakin nniɣ-awem: Waxxa ṯeẓrim-ayi kenniw, war timnem ca.

³⁷ Marra min ḏayi d iticc Baba itas-d ɣari. Wenni iy d itasen ɣari war ṯ siggwijeɣ ca.

³⁸ Minzi nec hwiɣ-d zeg ujenna, war iǧi ca aḏ ggeɣ min xseɣ; Lla, hwiɣ-d aḏ ggeɣ min ixes wenni iy ḏayi d issekken.

³⁹ Min ixes wenni iy ḏayi d issekken? Ixes belli zi marra min ḏayi yuca war ḏayi itweddar uȓa ḏ ijjen, aṯen d sekkareɣ ḏi Nhar Aneggaru.

⁴⁰ Min ixes Baba? Ixes belli kuȓ wenni iẓrin Mmis yumen zzayes, aɣares ṯiȓi ṯuḏarṯ n ȓebda nec aṯiḏ sekkareɣ ḏi Nhar Aneggaru."

⁴¹ Bḏan israʼiliyen nni tceṯcan zzayes wami ḏasen inna qa nec ḏ aɣrum iy d ihwan zeg ujenna.

⁴² Nnan: "Wanita, ma war iǧi ca ḏ Ƹisa ḏ mmis n Yusef niɣ? Neccin nessen babas ḏ yemmas, mammec ɣa yini qa nec hwiɣ-d zeg ujenna?"

⁴³ Inna-asen Ƹisa: "War tceṯcam ca jarawem.

⁴⁴ War izemmar uȓa ḏ ijjen aḏ d yas ɣari illa meȓa s lʼiḏen n Baba iy ḏayi d issekken, nec aṯiḏ sekkareɣ ḏi Nhar Aneggaru.

⁴⁵ Ammu iy yura ijjen zi lʼanbiya: Marra uw iy s isȓin i Baba aḏ iȓmeḏ zzayes ataf aɣari d yas.

⁴⁶ War iǧi uȓa ḏ ijjen iẓra Baba illa wenni iy d yusin zi Arebbi, ḏ netta ig iẓrin Baba.

⁴⁷ Aqa tesȓam ȓḥaqq: Wenni iy ɣa yamnen aɣares ṯiȓi ṯuḏarṯ n ȓebda.

⁴⁸ Nec ḏ aɣrum n ṯuḏarṯ.

⁴⁹ Ȓejḏuḏ nwem ccin aɣrum n ujenna ḏi ȓexȓa, waxxa amenni mmuṯen.

⁵⁰ Min iƹna uɣrum iy d ihwan zeg ujenna bac wenni iy ṯ ɣa iccen war itmetti ca?

⁵¹ Aqa ḏ nec ḏ aɣrum iddaren iy d ihwan zeg ujenna. Marra wenni ɣa iccen zeg uɣrum-a aḏ iddar i ȓebda. Aɣrum-a iy ticceɣ nec ḏ ddat inu ḥima aḏ teddar ddunect-a."

⁵² Israʼiliyen nni menɣen jarasen nnan: "Mammec ɣa igg wanita aḏaneɣ yuc ddat nnes at necc?"

⁵³ Inna-asen Ƹisa: "Aqa tesȓam ȓḥaqq: Meȓa war ṯeccim ca ddat n Mmis n bnaḏem war ṯsessem ca iḏammen nnes, aḏ tiȓi war ɣarwem bu ṯuḏarṯ ḏeg yixef nwem."

⁵⁴ Inna-asen: "Wenni ɣa iccen ddat inu aḏ isew iḏammen inu, aɣares ṯiȓi ṯuḏarṯ i ȓebda nec aṯiḏ sekkareɣ ḏi Nhar Aneggaru.

⁵⁵ Minzi ddat inu ḏ ȓmakla n ṣṣaḥ, iḏammen inu ḏ ṯisessi n ṣṣaḥ.

⁵⁶ Marra wenni ɣa iccen ddat inu aḏ isew iḏammen inu, ataf aḏ iqqim ḏayi, nec ḏayes.

⁵⁷ Mammec iy ḏayi d issekk Baba iddaren u nec ddareɣ zi Baba, amenni wenni ḏayi ɣa iccen azzayi iy iddar.

⁵⁸ Ṣafi, ḏ wanita ḏ aɣrum iy d ihwan zeg ujenna. War iǧi ca am ȓejḏuḏ nwem iy ccin aɣrum nni umi qqaren lmanna menbaƹd mmuṯen; Lla, wenni ɣa iccen zeg uɣrum-a aḏ iddar i ȓebda."

⁵⁹ Manaya inna-ṯ Ƹisa ḏi ṯemziḏa wami tuɣa iseȓmaḏ ḏeg ubilaj n Kafernaḥum.

Awaȓen n ṯuḏarṯ n ȓebda aqaṯen ɣar Siḏiṯneɣ Ƹisa

⁶⁰ Aṭṭas zeg imeḥḍaren nnes wami sȓin manayenni nnan qa awaȓ-a iqseḥ war iǧi wi ṯ ɣa iqebȓen.

⁶¹ Iƹȓem Ƹisa s wuȓ nnes qa imeḥḍaren nnes tceṯcan inna-asen: "Ma s manaya iy zi ḏawem iteqqes ȓḥaȓ?

⁶² Y meȓa ṯeẓrim Mmis n bnaḏem itwarfeƹ ɣar mani iqqim ḏ amezwaru?

⁶³ Arruḥ n Arebbi ḏ netta iseddaren. Min iǧan ḏ bnaḏem war ineffeƹ i walu. Awaȓen iy ḏawem nniɣ, ḏaysen arruḥ ḏ ṯuḏarṯ.

⁶⁴ Walakin ḏaywem yinni war itimnen ca." Minzi Ƹisa issen zeg umezwaru yinni ḏaysen war itimnen ca ḏ wenni iy ṯ ɣa izzenzen.

⁶⁵ Inna-asen: "S manaya nniɣ-awem: War izemmar uȓa ḏ ijjen aḏ d yas ɣari illa meȓa s lʼiden n Baba."

⁶⁶ Zi ȓweqṯ nni semḥen ḏayes aṭṭas n imeḥḍaren nnes, war kis qqimen ca gguren akiḏes.

⁶⁷ Indeq-d Ƹisa inna-asen i ṯenƹac n arrusul iy kis iǧan: "Uȓa ḏ kenniw, ma ṯexsem aḏayi ṯsemḥem?"

⁶⁸ Inna-as Simƹan Buṭrus: "A Siḏi, min iƹna wenni mani ɣa nraḥ? Cek ɣarek awaȓen n ṯuḏarṯ n ȓebda.

⁶⁹ Qa neccin numen, nessen qa cek ḏ Lƹaḍim n Arebbi."

⁷⁰ Inna-asen Ƹisa: "Nec iy kenniw ixḍaren s ṯenƹac iḏwem, walakin ijjen zzaywem ḏ Ibȓis."

⁷¹ Manaya iqqar-iṯ x Yahuḏa mmis n Simƹan Isxaryuṭi liʼanna ḏ wanita iy ṯ ɣa izzenzen u netta ḏ ijjen zi ṯenƹac n arrusul.