Yuḥanna 3 - Ṯarifiṯ 2020

Siḏiṯneɣ Ƹisa iseȓmaḏ x ubriḏ n jḏiḏ

¹ Tuɣa iǧa ijjen n uryaz qqaren-as Nikudim zi ȓḥizeb n ifarrisiyen. Netta ḏ ijjen zi lḥukkam n Ayṯ-Israʼil.

² Yusa-d ɣar Ƹisa s ǧiȓeṯ inna-as: "A Lmuƹallim, neccin nessen belli cek ḏ amseȓmaḏ iy d yusin zi Arebbi. War izemmar uȓa ḏ ijjen aḏ igg can lmuƹjizaṯ zi min teggeḏ cek illa meȓa kiḏes Arebbi."

³ Indeq-d Ƹisa inna-as: "Aqa tesȓiḏ ȓḥaqq: War izemmar uȓa ḏ ijjen aḏ iẓer ȓmulk n Arebbi illa meȓa ixȓeq-d ḏ jḏiḏ."

⁴ Inna-as Nikudim: "Mammec ɣa igg bnaḏem aḏ d ixȓeq ḏ jḏiḏ meȓa iwsar? Ma izemmar aḏ yaḏef ƹaweḏ ḏeg uƹeddis n yemmas aḏ d ixȓeq ḏ jḏiḏ?"

⁵ Inna-as Ƹisa: "Aqa tesȓiḏ ȓḥaqq: Meȓa can yijjen war d ixȓiq ca s waman ḏ Arruḥ n Arebbi, war izemmar aḏ yaḏef ḏi ȓmulk n Arebbi.

⁶ Min itwaxeȓqen zi ddat, nettaṯ ḏ ddat. Min itwaxeȓqen zi Arruḥ n Arebbi, netta ḏ arruḥ.

⁷ Meȓa nniɣ-ac itxeṣṣa-kenniw aḏ d txeȓqem ḏ jḏiḏ, war tƹejjib ca.

⁸ Arriḥ itṣuḍ mani ixes netta. Aḏ tesȓiḏ i ṣṣut nnes, walakin war ṯessineḏ ca manis d ikka uȓa ḏ mani ɣa iraḥ. Ammu iy ggin marra yinni itwaxeȓqen s Arruḥ n Arebbi."

⁹ Inna-as Nikudim: "Mammec manaya?"

¹⁰ Yarra xas Ƹisa inna-as: "Iwa ṯseȓmaḏeḏ cek Ayṯ-Israʼil war ṯfehhimeḏ ca manaya?

¹¹ Aqa tesȓiḏ ȓḥaqq: Neccin nessawaȓ zi min nessen, ncehheḏ s min neẓra, walakin kenniw war ṯeqbiȓem ca chaḏeṯ nneɣ.

¹² Meȓa ssiwȓeɣ ɣarwem x ṯmesȓayin n ṯmurṯ kenniw war timnem ca, mammec ɣa ṯamnem meȓa ssiwȓeɣ-awem x ṯmesȓayin n ujenna?

¹³ Uȓa ḏ ijjen ma yuȓi ɣar ujenna illa wenni d ihwan zeg ujenna, netta ḏ Mmis n bnaḏem.

¹⁴ Amecnaw mammec isbedd Musa fiɣer n neḥḥas x ṯeḥnact ḏi ȓexȓa, ammu itxeṣṣa aḏ itwasbedd Mmis n bnaḏem ḏeg ujenna.

¹⁵ Marra wenni zzayes ɣa yamnen aɣares ṯiȓi ṯuḏarṯ i ȓebda."

¹⁶ Wami iḥibb Arebbi ddunect-a, ihḏa-yas Mmis aweḥḏani ḥima wenni zzayes ɣa yamnen war ifenni ca aɣares ṯiȓi ṯuḏarṯ n ȓebda.

¹⁷ Arebbi war d issekk ca Mmis ɣar ddunect ḥima aḏ iḥaseb iwḏan; Lla, issekk-iṯ-iḏ ḥima azzayes isenjem iwḏan.

¹⁸ Wenni zzayes itamnen ataf war itwaḥasab ca. Wenni war zzayes itimnen ca aqa itwaḥasab minzi netta war yumin ca zeg yisem n Mmis n Arebbi aweḥḏani.

¹⁹ Ḏ wa ḏ lḥukem iy xas ɣa yiȓin: Nnur yusa-d ɣar yiwḏan, yiwḏan xsen ṯaǧest ḥsen zi nnur minzi teggen ccarr.

²⁰ Marra wenni iteggen min iǧan ḏ aƹeffan itƹiffa nnur, war ɣares d itis ca ɣar nnur ḥima war tnefḍiḥent ca ȓefƹayeȓ nnes.

²¹ Wenni ixeddmen nican aḏ d yas ɣar nnur. Ammu aḏ d iban belli ȓexḏayem nnes itegg-iṯent i Arebbi.

Nnabi Yaḥya icehheḏ belli Siḏiṯneɣ Ƹisa imɣar x kuȓci

²² Menbaƹd i manaya Ƹisa ḏ imeḥḍaren nnes usin-d ɣar ṯmurṯ n Yahuḏiya iqqim akiḏsen ḏinni, itṭehhar i yiwḏan s waman.

²³ Uȓa ḏ Yaḥya itṭehhar i yiwḏan s waman ḏi Ȓƹunṣar n Nun ḏi ṭṭarf n ṯendint n Salim minzi ḏinni aman aṭṭas. Tasen-d ḏinni yiwḏan ḥima aṯen iṭehhar.

²⁴ (Iwqeƹ manaya qbeȓ ma aḏ ggen Yaḥya ḏi ȓeḥbes.)

²⁵ Iwqeƹ lxilaf jar imeḥḍaren n Yaḥya ḏ yijjen n uʼisraʼili x mammec ɣa yiȓi ȓuḍu.

²⁶ Usin-d ɣar Yaḥya nnan-as: "A Lmuƹallim, wenni tuɣa akiḏec iǧan ajemmaḍ i yiɣzar n Lʼurdun u cek ṯcehḏeḏ xas, netta itṭehhar i yiwḏan s waman gguren ɣares marra."

²⁷ Inna-asen Yaḥya: "War izemmar bnaḏem aɣares ṯiȓi can ṯmesȓayṯ meȓa war ḏas d tusi ca zi Arebbi.

²⁸ Kenniw s yixef nwem ṯcehḏem qa nniɣ-awem: Nec war ǧiɣ ca ḏ Lmasiḥ; Lla, twassekkeɣ-d qbeȓ i netta.

²⁹ Wenni ɣar ṯeǧa ṯsȓiṯ, netta ḏ muȓay. Awzir n muȓay iƹni wenni itbeddan zzaṯes itsȓa-yas, netta ifarreḥ aṭṭas i wawaȓ n muȓay. Ammu uȓa ḏ nec farḥeɣ aṭṭas.

³⁰ U labud netta aḏ imɣar, nec aḏ neqṣeɣ."

³¹ Wenni iy d itasen zeg ujenna, netta imɣar x kuȓci. Walakin wenni iy d itasen zi ṯmurṯ netta zi ṯmurṯ, issawaȓ amecnaw iwḏan n ṯmurṯ. Wenni iy d itasen zeg ujenna, netta imɣar x kuȓci.

³² Icehheḏ zi min iẓra ḏ min isȓa, walakin chaḏeṯ nnes war t iqebbeȓ uȓa ḏ ijjen.

³³ Wenni iqebbȓen chaḏeṯ nnes, ataf itḥaqqeq belli Arebbi ḏ lḥaqiqa ig iǧa.

³⁴ Wenni iy d issekk Arebbi issawaȓ s wawaȓ n Arebbi minzi iticc-as Arruḥ nnes bȓa ȓeqyas.

³⁵ Babas iƹizz xas Mmis, igga-as kuȓci ḏeg ufus nnes.

³⁶ Wenni itamnen zi Mmis ataf ɣares ṯuḏarṯ n ȓebda. Wenni war itṭiƹin ca i Mmis, ataf war ɣares bu ṯuḏarṯ axas iɣḍeb Arebbi."