Yuḥanna 19 - Ṯarifiṯ 2020

Israʼiliyen rezzun aḏ ṣellben Siḏiṯneɣ Ƹisa

¹ Yuwi Bilaṭus Ƹisa ḥima aṯ uwṯen ȓƹaskar s usɣun.

² Muḏen-as ijjen n ttaj n isennanen ggin-as-ṯ x uzeǧif nnes. Ggin xas aseȓham ḏ azeggwaɣ.

³ Tqerraben ɣares ccaṯen-ṯ s iseqqiȓen, qqaren-as ssalam ay azeǧiḏ n Ayṯ-Israʼil.

⁴ Iffeɣ-d ƹaweḏ Bilaṭus inna-asen: "Xzareṯ, aḏawem ṯiḏ sufɣeɣ ḥima aḏ tessnem belli nec war ḏayes ufiɣ bu can ttuhmeṯ."

⁵ Ssenni iffeɣ Ƹisa ɣar barra s ttaj nni n isennanen ḏ useȓham nni azeggwaɣ. Inna-asen Bilaṭus: "Haqa bnaḏem nni."

⁶ Wami ṯ ẓrin arruyas n ȓfuqaha ḏ iƹessasen, tƹeyyaḍen s jjheḏ qqaren-as: "Ṣelleb-iṯ! Ṣelleb-iṯ!" Inna-asen Bilaṭus: "Ysim-ṯ kenniw ṣellbem-ṯ, nec war ḏayes ufiɣ bu can ttuhmeṯ."

⁷ Arrin xas israʼiliyen nnan-as: "Ɣarneɣ ijjen n ȓqanun. Ƹlaḥsab ȓqanun nni itxeṣṣa aḏ immeṯ minzi netta itarra ixef nnes ḏ Mmis n Arebbi."

⁸ Wami isȓa Bilaṭus awaȓ-a iggweḏ ktar.

⁹ Yuḏef ƹaweḏ ɣar ȓeqṣar nnes inna-as i Ƹisa: "Manis cek?" Ƹisa war xas yarri ca.

¹⁰ Inna-as Bilaṭus: "Ma war kiḏi ṯessiwiȓeḏ ca? Ma war ṯessineḏ belli ɣari jjheḏ aḏac ḍeȓqeɣ niɣ ac ṣellbeɣ?"

¹¹ Indeq-d Ƹisa inna-as: "War ɣarek bu jjheḏ xafi illa meȓa immuc-ac zi Arebbi. Ƹlaḥsab manaya, wenni iy ḏayi d yuwin ɣarec, ɣares ddnub ktar zzayek."

¹² Ssenni irezzu Bilaṭus aḏas iḍȓeq. Walakin israʼiliyen tƹeyyaḍen s jjheḏ qqaren: "Meȓa ṯḍeȓqeḏ i uryaz-a ataf war ṯeǧiḏ ca ḏ ameddukeȓ n Qayṣar. Marra wenni itarran ixef nnes ḏ azeǧiḏ netta ḍed i Qayṣar."

¹³ Wami isȓa Bilaṭus awaȓ-a isufeɣ Ƹisa, iqqim Bilaṭus x ȓkursi n ȓeḥkam ḏeg yijjen n umcan qqaren-as S wawaȓ n israʼiliyen qqaren-as

¹⁴ Nhar nni ḏ jjemƹa ɣar jwayeh n ṯenƹac, sewjaḏen i Ȓƹiḏ Ameqqran. Inna-asen Bilaṭus i israʼiliyen: "Haqawem azeǧiḏ nwem."

¹⁵ Walakin tƹeyyaḍen s jjheḏ qqaren: "Ysi-ṯ ysi-ṯ, ṣelleb-iṯ!" Inna-asen Bilaṭus: "Ma aḏ ṣellbeɣ azeǧiḏ nwem?" Arrin xas arruyas n ȓfuqaha nnan-as: "War ɣarneɣ bu uzeǧiḏ illa Qayṣar!"

¹⁶ Ssenni isellem-asen-ṯ ḥima aṯ ṣellben x ṣṣalib, ysin Ƹisa.

Irumaniyen tṣellaben Siḏiṯneɣ Ƹisa x ṣṣalib

¹⁷ Iffeɣ Ƹisa yarbu ṣṣalib s yixef nnes iruḥ ɣar yijjen n umcan qqaren-as S wawaȓ n israʼiliyen qqaren-as

¹⁸ Mani ṯ ṣellben, ṣellben akiḏes ṯnayen nneɣni, ssa ḏ ssa, Ƹisa ḏi ȓwesṭ.

¹⁹ Yura Bilaṭus ḏeg ijjen n ṯeȓwiḥet, iggi-t ɣar uzeǧif n Ƹisa x ṣṣalib ṯura ḏayes: <Ƹisa zi Naṣira, azeǧiḏ n Ayṯ-Israʼil.>

²⁰ Ṯaȓwiḥet nni ɣrin-t aṭṭas n israʼiliyen minzi amcan mani iy ṣellben Ƹisa yuḏes ṯandint. Ṯaȓwiḥet nni tuɣa ṯura s Lƹibriya ḏ Latiniya ḏ Ṯyunaniṯ.

²¹ Nnan-as arruyas n ȓfuqaha n israʼiliyen i Bilaṭus: "War tari ca, Ari: "

²² Inna-asen Bilaṭus: "Nec min uriɣ, qa uriɣ-ṯ."

²³ Wami ȓƹaskar ṣellben Ƹisa, ysin arruḍ nnes bḍan-ṯ x arbeƹa n ṯseqqar kuȓ aƹeskri iysi ṯasɣarṯ nnes. Ysin ƹaweḏ čammir, čammir nni iṣneƹ-iṯ uḏerraz.

²⁴ Nnan i wayawya, War ṯ netcarrig ca, axas negg lqurƹa bac a nessen wi ṯ ɣa iysin. Ammu ikemmeȓ wawaȓ n Lkitab: U ḏ manaya iy ggin ȓƹaskar.

²⁵ Zzaṯ i ṣṣalib n Ƹisa ṯbedd yemmas ḏ xačes ḏ Maryam ṯamɣarṯ n Krifas ḏ Maryam ṯamagdaliṯ.

²⁶ Wami iẓra Ƹisa yemmas ibedd akiḏes umeḥḍar nni iy xas iƹizzen aṭṭas, inna-as: "A yemma, aqaṯ ḏin mmim!"

²⁷ Inna-as ƹaweḏ i umeḥḍar nni: "Aqat ḏin yemmac!" Ssenni yuwi-t umeḥḍar nni ɣar ṯeddarṯ nnes.

Ȓmewṯ n Siḏiṯneɣ Ƹisa

²⁸ Menbaƹd i manaya issen Ƹisa belli kuȓci ikemmeȓ, inna: "Aqayi ffuḏeɣ." S wawaȓ nni iffeɣ min d yusin ḏi Lkitab.

²⁹ Ḏinni ijjen n uɣerraf iccur s waman uḍiȓ ḏ isemmamen. Sɣeḍṣen spunxa ḏeg waman uḍiȓ nni, ggin-t x ukeccuḍ ucin-as-t ɣar uqemmum nnes.

³⁰ Wami iqqas Ƹisa aman nni, inna: "Itwakemmeȓ!" Isaḏar azeǧif nnes, isellem buḥbeȓ nnes.

³¹ Iwqeƹ manayenni iḍennaṭ n Ȓƹiḏ Ameqqran. X manaya israʼiliyen ttaren-as i Bilaṭus aḏasen rzen iḍaren i yinni itwaṣellben aḏ d sehwan ddat nsen zi ṣṣalib. Ggin-asen amenni ḥima war tɣimi ddat nsen x ṣṣalib ḏi nhar n ssebṯ n lƹibada minzi nhar n ssebṯ nni ḏ ameqqran aṭṭas.

³² Usin-d ȓƹaskar rzin iḍaren i umezwaru ḏ wis ṯnayen iy kiḏes itwaṣellben.

³³ Wami ruḥen ɣar Ƹisa, war ḏas rzin bu iḍaren minzi ufin-ṯ immuṯ.

³⁴ Walakin ijjen zi ȓƹaskar nni icukk-iṯ ɣar uɣezḏis nnes s yijjen n ukeccuḍ ḏayes ṯicceṭ n wuzzeȓ, uzzȓen-d zzayes ḏeɣya iḏammen ḏ waman aṭṭas.

³⁵ Wenni iẓrin manayenni icheḏ xas, u min icheḏ nican iy iǧa. Issen belli min iqqar ḏ lḥaqiqa u icehheḏ bac azzayes ṯamnem uȓa ḏ kenniw.

³⁶ Iwqeƹ manaya ḥima aḏ ikemmeȓ min d yusin ḏi Lkitab:

³⁷ Ṯusa-d ḏeg yijjen n lʼaya nneɣni:

Yusef ḏ Nikudim neṭṭȓen Siḏiṯneɣ Ƹisa

³⁸ Menbaƹd i manaya, ijjen qqaren-as Yusef zi ṯendint n Arimatya iruḥ ittar-as i Bilaṭus aḏ iysi ddat n Ƹisa. Netta Yusef ḏ ameḥḍar n Ƹisa walakin war d isbeyyen ca ixef nnes iggweḏ zeg israʼiliyen. Wami iqbeȓ Bilaṭus, iruḥ Yusef iysi ddat n Ƹisa.

³⁹ Yusa-d uȓa ḏ Nikudim, aryaz nni tuɣa ig iggin zziyara ijjen n ṯwaȓa s ǧiȓeṯ ɣar Ƹisa. Ȓexxu yuwi-d akiḏes ca n texliṭa ḏayes arbeƹa u ṯȓaṯin kilu n murr ḏ ukeccuḍ n lƹud teggen-t israʼiliyen i yinni immuṯen.

⁴⁰ Ssenni ysin ddat n Ƹisa keffnen-t s ȓecfen ḏ lƹiṭar nni, mammec teggen israʼiliyen i yinni immuṯen.

⁴¹ Ḏeg umcan nni mani ṣellben Ƹisa ḏinni ijjen n jarda. Ḏi jarda nni ḏayes ijjen n unḍeȓ ḏ jḏiḏ igga am yifri, war ḏayes inḍiȓ ḥadd.

⁴² Nhar nni tuɣa ḏ jjemƹa, israʼiliyen sewjaḏen i nhar n ssebṯ n lƹibada. X manayenni neḍȓen Ƹisa ḏeg yifri nni n unḍeȓ minzi yuḏes.