Yuḥanna 17 - Ṯarifiṯ 2020

Siḏiṯneɣ Ƹisa itẓaǧa ƹlaḥsab imeḥḍaren nnes aḏ iȓin ḏ ijjen

¹ Wami issiweȓ Ƹisa x manaya, iysi ṯiṭṭawin nnes ɣar ujenna inna: "A Baba, ṯuweḍ-d ȓweqṯ. Semɣar Mmic ḥima ac isemɣar.

² Minzi ṯuciḏ-as jjheḏ x kuȓ bnaḏem ḥima aḏ yuc ṯuḏarṯ n ȓebda i marra yinni iy ḏas ṯuciḏ.

³ Ṯuḏarṯ n ȓebda ḏ ṯa iƹni ac ssnen belli cek ḏ Arebbi nican waḥḏec, aḏ ssnen ƹaweḏ Ƹisa Lmasiḥ iƹni wenni iy ṯessekkeḏ.

⁴ Nec semɣareɣ-c ḏa ḏi ṯmurṯ, kemmȓeɣ ȓxeḏmeṯ iy ḏayi ṯuciḏ.

⁵ Semɣar-ayi ȓexxu akiḏec a Baba s lƹaḍama nni tuɣa ɣari wami ǧiɣ akiḏec qbeȓ ma aḏ tiȓi ddunect.

⁶ Sbeyyneɣ-d isem nnec i imeḥḍaren-a iy ḏayi ṯuciḏ zi ddunect-a. Cek ṯeǧiḏ ḏ bab nsen qbeȓ, ṯuciḏ-ayi-ṯen qa ṭaƹen i wawaȓ nnec.

⁷ Ȓexxu ssnen belli marra min ḏayi ṯuciḏ yusa-d zi ɣarek.

⁸ Minzi nec ssiwḍeɣ-asen awaȓ iy ḏayi ṯuciḏ, niṯni qebȓen-ṯ. Ssnen ḏ ṣṣaḥ belli nec zi ɣarek iy d usiɣ, umnen ƹaweḏ belli ḏ cek iy ḏayi d issekken.

⁹ Tettareɣ ƹlaḥsab i niṯni. War tettareɣ ca ƹlaḥsab i ddunect-a; Lla, tettareɣ ƹlaḥsab i yinni iy ḏayi ṯuciḏ minzi niṯni nnec.

¹⁰ Kuȓci min ɣari, ɣarek. U kuȓci min ɣarek, ɣari. Nec twasemɣareɣ zzaysen.

¹¹ War tɣimiɣ ca nec ḏi ddunect, aḏ qqimen niṯni ḏayes u nec ggureɣ-d ɣarec. A Baba Amqeddes, ḥḍa-ṯen s yisem nnec iy ḏayi ṯuciḏ ḥima aḏ iȓin ḏ ijjen am neccin.

¹² Wami kiḏsen ǧiɣ, ḥefḍeɣ xasen s yisem nnec iy ḏayi ṯuciḏ. Ḥḍiɣ-ṯen, uȓa ḏ ijjen ma iweddar ɣir wenni tuɣa iweddaren ḥima aḏ ikemmeȓ min iqqar Lkitab.

¹³ Ȓexxu ggureɣ-d ɣarek. Ssawaȓeɣ awaȓen-a u nec ƹaḏ aqayi ḏi ddunect ḥima aɣarsen ṯiȓi ȓefraḥeṯ inu ṯekmaȓ.

¹⁴ Ssiwḍeɣ-asen awaȓ nnec i imeḥḍaren inu, niṯni ƹiffen-ṯen yiwḏan minzi war ǧin ca zi ddunect-a amecnaw nec war ǧiɣ ca zi ddunect.

¹⁵ Nec war ḏac tettareɣ ca aṯen ṯsufɣeḏ zi ddunect-a; Lla, tettareɣ-ac aṯen teḥḍiḏ zi ccarr.

¹⁶ Niṯni war ǧin ca zi ddunect, amecnaw nec war ǧiɣ ca zi ddunect.

¹⁷ Ṣeffa-ṯen s lḥaqiqa, awaȓ nnec netta iy iǧan ḏ lḥaqiqa.

¹⁸ Mammec ḏayi ṯessekkeḏ cek ɣar ddunect, uȓa ḏ nec ssekkeɣ-ṯen ɣar ddunect.

¹⁹ Nec ṣeffiɣ ixef inu x ssabab nsen ḥima aḏ twaṣeffan uȓa ḏ niṯni ƹaweḏ s lḥaqiqa.

²⁰ War tettareɣ ca ƹlaḥsab i niṯni waha, tettareɣ ƹlaḥsab i yinni iy ɣa iqebȓen awaȓ nsen ḥima aḏ amnen zzayi.

²¹ Ḥima aḏ iȓin marra ḏ ijjen a Baba, am cek aqac ḏayi nec aqayi ḏayek. Ḥima aḏ iȓin niṯni ƹaweḏ ḏ ijjen ḏayneɣ. Ḥima aḏ amnen yiwḏan qa ḏ cek iy ḏayi d issekken.

²² Nec uciɣ-asen lƹaḍama iy ḏayi ṯuciḏ ḥima aḏ iȓin ḏ ijjen am neccin ḏ ijjen.

²³ Cek aqac ḏayi nec aqayi ḏaysen, ḥima aḏ munen aḏ iȓin ḏ ijjen. Ḥima aḏ ssnen yiwḏan qa cek ṯessekkeḏ-ayi-d ɣar imeḥḍaren-a, tḥibbiḏ-ṯen amecnaw mammec ḏayi tḥibbiḏ nec.

²⁴ A Baba, yina ḏayi ṯuciḏ xseɣ aḏ iȓin akiḏi mani ma ǧiɣ nec ḥima aḏ ẓren lƹaḍama inu iy ḏayi ṯuciḏ minzi cek ṯḥibbeḏ-ayi qbeȓ ma aḏ tiȓi ddunect.

²⁵ A Baba iǧan nican, ddunect war c ṯessin ca walakin nec qa ssneɣ-c. Yina akiḏi ssnen qa ṯessekkeḏ-ayi-d cek.

²⁶ Nec sbeyyneɣ-asen-d isem nnec u ƹaḏ aṯ sbeyyneɣ ḥima aḏaysen ṯiȓi ȓemḥibbeṯ nni iy zi ḏayi tḥibbiḏ, aḏaysen iȓiɣ nec s yixef inu."