Yuḥanna 15 - Ṯarifiṯ 2020

Siḏiṯneɣ Ƹisa netta ḏ aẓwar n ȓefraḥeṯ nneɣ

¹ "Nec ḏ ṯzayarṯ uḍiȓ ḏ ṣṣaḥ. Baba ḏ bab n ṯzayarṯ uḍiȓ.

² Kuȓ akeccuḍ iy d iffɣen zzayi war itirew ca izekkunen n uḍiȓ aṯ iqess Baba. U kuȓ akeccuḍ ig itarwen izekkunen n uḍiȓ aṯ izbar ḥima aḏ d yarni izekkunen nneɣni.

³ Kenniw ḏ imenqawiyen ḏeg useȓmeḏ iy ḏawem nniɣ.

⁴ Qqimeṯ ḏayi, nec aḏ qqimeɣ ḏaywem. Amecnaw akeccuḍ nni war izemmar aḏ yarew izekkunen zeg yixef nnes illa meȓa iqqim ḏi ṯzayarṯ, uȓa ḏ kenniw war ṯzemmarem ca illa meȓa ṯeqqimem ḏayi.

⁵ Nec ḏ ṯzayarṯ uḍiȓ, kenniw ḏ ikeccuḍen. Wenni itɣiman ḏayi u nec tɣimiɣ ḏayes, ataf netta aḏ yarew izekkunen n uḍiȓ aṭṭas ȓaḥeqqac kenniw bȓa zzayi war ṯzemmarem aḏ teggem walu.

⁶ Meȓa can yijjen war iqqim ca ḏayi, ataf aḏ imenḍar ɣar barra amecnaw ikeccuḍen yuzɣen, aṯen smunen aṯen ggen ḏi ṯmessi aḏ cemḍen.

⁷ Meȓa ṯeqqimem ḏayi ṯeggim zeg wawaȓ inu, ataf min ma ṯettarem aɣarwem yiȓi.

⁸ Aḏ tarwem izekkunen aṭṭas, aḏ tiȓim ḏ imeḥḍaren inu. S manaya itwasemɣar Baba.

⁹ Nec tḥibbiɣ-kenniw amecnaw mamc ḏayi itḥibba Baba. Iȓiṯ ḏi ȓemḥibbeṯ inu.

¹⁰ Meȓa ṯxeddmem zi ȓuṣiyaṯ inu, ataf aḏ tiȓim ḏi ȓemḥibbeṯ inu amecnaw mamc ggiɣ nec zi ȓuṣiyaṯ n Baba aqayi ḏi ȓemḥibbeṯ nnes.

¹¹ Nniɣ-awem manaya ḥima aḏ tiȓi ḏaywem ȓefraḥeṯ inu, ḥima aḏ tiȓi ȓefraḥeṯ nwem ṯƹemmar.

¹² Ȓuṣiyeṯ inu ḏ ṯanita: <Ḥibbeṯ ayawya mammec kenniw tḥibbiɣ nec.>

¹³ War ḏinni bu ȓemḥibbeṯ ktar zi ṯenni n bnaḏem aḏ iṣeddeq ṯuḏarṯ nnes ƹlaḥsab imeddukaȓ nnes.

¹⁴ Meȓa teggem ȓuṣiyaṯ inu, ataf kenniw ḏ imeddukaȓ inu.

¹⁵ War iqqim ƹaḏ aḏawem semmiɣ ixeddamen minzi axeddam war issin ca min itegg uweqqaf nnes. Kenniw aḏawem semmiɣ imeddukaȓ inu minzi nniɣ-awem marra min sȓiɣ zi Baba.

¹⁶ Maci ḏ kenniw iy ḏayi ixḍaren; Lla, ḏ nec iy kenniw ixḍaren. Kellfeɣ-kenniw ḥima aḏ traḥem aḏ tarwem izekkunen, ḥima izekkunen nwem aḏ qqimen i ȓebda. Ammu, aḏawem yuc Baba marra min ḏas ɣa ṯettarem ƹlaḥsab isem inu.

¹⁷ Ḏ ṯa ḏ ȓuṣiyeṯ inu, iƹni aḏ tḥibbem ayawya.

Siḏiṯneɣ Ƹisa isezƹam imeḥḍaren nnes

¹⁸ Meȓa ddunect tƹiffa-kenniw, fekkareṯ qa nec ṯƹiff-ayi qbeȓ i kenniw.

¹⁹ Maƹlik kenniw zi ddunect-a, iȓi kenniw ṯƹizzem x ddunect-a. Walakin kenniw war ṯeǧim ca zi ddunect. Nec ixḍareɣ-kenniw zi ddunect-a, s manayenni tƹiffa-kenniw ddunect.

²⁰ Fekkareṯ ḏeg wawaȓ iy ḏawem nniɣ iƹni axeddam war iǧi ca ḏ ameqqran zeg uweqqaf nnes. Meȓa ƹeddben-ayi, ataf akenniw ƹeddben. Meȓa sȓin i wawaȓ inu, ataf aḏ sȓen ƹaweḏ i wawaȓ nwem.

²¹ Niṯni teggen-awem manaya marra x ssabab n yisem inu minzi war ssinen ca wenni iy ḏayi d issekken.

²² Maƹlik war d usiɣ ssiwȓeɣ akiḏsen, ataf war ɣarsen bu ȓmuƹṣiyeṯ. Walakin ȓexxu war ɣarsen bu lƹuder x ȓmuƹṣiyeṯ nsen.

²³ Wenni iy ḏayi itƹiffan, ataf itƹiffa uȓa ḏ Baba ƹaweḏ.

²⁴ Maƹlik war xḏimeɣ akiḏsen lmuƹjizaṯ war ṯent ixḏim uȓa ḏ ijjen illa nec, ataf war ɣarsen bu ȓmuƹṣiyeṯ. Walakin ȓexxu niṯni ẓrin lmuƹjizaṯ inu ƹiffen-ayi nec uȓa ḏ Baba.

²⁵ Manaya iwqeƹ ḥima aḏ ikemmeȓ wawaȓ ig yurin ḏi ccariƹa nsen wami inna

²⁶ Aḏ d yas Lmuƹawin iƹni Arruḥ n lḥaqiqa. Aḏawem ṯiḏ ssekkeɣ nec zi Baba u netta iffeɣ-d zi Baba. Xmi d ɣa yas, axafi icheḏ.

²⁷ Aḏ tcehḏem uȓa ḏ kenniw ƹaweḏ minzi aqa kenniw akiḏi zeg umezwaru."