Yuḥanna 13 - Ṯarifiṯ 2020

Siḏiṯneɣ Ƹisa isiriḏ iḍaren n imeḥḍaren nnes

¹ Qbeȓ i Ȓƹiḏ Ameqqran, netta Ƹisa issen qa ȓweqṯ nnes ṯuweḍ-d aḏ imutti zi ddunect-a ɣar Babas. Netta iḥibb yinni iǧan akiḏes ḏi ddunect, iḥibb-iṯen aȓ uneggaru.

² Qbeȓ amensi tuɣa Ibȓis iɣarr Yahuḏa mmis n Simƹan Isxaryuṭi ḥima aḏ izzenz Ƹisa.

³ Tuɣa Ƹisa issen qa Babas igga-as kuȓci ḏeg ifassen nnes, yusa-d zi Arebbi aḏ iḏweȓ ɣar Arebbi.

⁴ Ikkar x umensi ikkes čammir nnes, iysi ijjen n umendiȓ iṣṣar ixef nnes.

⁵ Ifarreɣ-d aman ḏi ṯbeqqiṯ ibḏa isiriḏ iḍaren n imeḥḍaren nnes, imseḥ-asen s umendiȓ mizi iṣṣar ixef nnes.

⁶ Wami d yusa ɣar Simƹan Buṭrus inna-as i Ƹisa: "Ma cek a Siḏi aḏayi ṯsirḏeḏ iḍaren inu?"

⁷ Inna-as Ƹisa: "Cek ȓexxu war ṯefhimeḏ ca min xeddmeɣ, zi ssa aȓ ṯsawent ƹaḏ aḏ tfehmeḏ manaya."

⁸ Inna-as Buṭrus: "Iḍaren inu ƹemmarṣ aṯen ṯsirḏeḏ." Inna-as Ƹisa: "Meȓa war ḏac sirḏeɣ, war ṯzemmareḏ ca aḏ tiȓiḏ ḏ ameḥḍar inu."

⁹ Inna-as Simƹan Buṭrus: "A Siḏi, war iǧi ca aḏayi ṯsiȓḏeḏ iḍaren inu waha, aḏayi tsiȓḏeḏ uȓa ḏ ifassen inu ḏ uzeǧif inu."

¹⁰ Inna-as Ƹisa: "Lla, wenni isiriḏen bȓa ma aḏ isireḏ ƹaweḏ. Aḏ isireḏ iḍaren nnes waha minzi netta qaƹ ḏ amenqawi. Kenniw marra ḏ imenqawiyen illa ijjen."

¹¹ Netta issen wenni iy ṯ ɣa izzenzen. S manayenni inna kenniw war ṯeǧim ca marra ḏ imenqawiyen.

¹² Wami ḏasen isireḏ iḍaren nsen, igga čammir nnes iqqim ƹaweḏ inna-asen: "Ma ṯfehmem min ḏawem ggiɣ?

¹³ Kenniw ṯeqqarem-ayi a Lmuƹallim niɣ a Siḏi, kenniw ɣarwem ȓḥaqq minzi nican qa ḏ nec.

¹⁴ Meȓa nec ig iǧan ḏ Siḏiṯwem u ḏ Lmuƹallim nwem sirḏeɣ-awem iḍaren nwem, itxeṣṣa uȓa ḏ kenniw aḏ tsirḏem iḍaren i wayawya.

¹⁵ Ggiɣ-awem ammu ḥima aḏ teggem min ggiɣ nec.

¹⁶ Aqa tesȓam ȓḥaqq: Axeddam war iǧi ca ḏ ameqqran zeg uweqqaf nnes. Amsexxar war iǧi ca ḏ ameqqran zeg wenni iy ṯiḏ issekken.

¹⁷ Ȓexxu ṯessnem manaya, ssaƹḏ nwem meȓa ṯeggim min ḏawem nniɣ.

¹⁸ Nec war ssiwiȓeɣ ca xawem marra, nec ssneɣ ug ixḍareɣ. Ȓexxu labud aḏ ikemmeȓ min d yusin ḏi Lkitab:

¹⁹ Sxebbareɣ-kenniw s manaya qbeȓ ma aḏ iwqeƹ, xmi ɣa iwqeƹ ataf aḏ tamnem qa ḏ nec ig iǧan.

²⁰ Aqa tesȓam ȓḥaqq: Wenni iqebbȓen wenni iy d ɣa ssekkeɣ, aqa iqbeȓ-ayi. Wenni ḏayi iqebbȓen, aqa iqebbeȓ uȓa ḏ wenni iy ḏayi d issekken."

²¹ Wami inna Ƹisa manaya, ixeyyeq ḏi nnefs nnes inna-asen-t nican: "Aqa tesȓam ȓḥaqq: Ijjen zzaywem aḏayi izzenz."

²² Imeḥḍaren nnes xzaren ḏeg wayawya war ssinen wenni mixef issawaȓ.

²³ Ḏinni ijjen n umeḥḍar nnes iƹizz xas x Ƹisa aṭṭas, netta iqqim ak uɣezḏis nnes.

²⁴ Iceyyar-as Simƹan Buṭrus inna-as: "Sseqsa-ṯ min iƹna wenni mixef issawaȓ."

²⁵ Imeyyeȓ ɣar Ƹisa inna-as: "A Siḏi, min iƹna?"

²⁶ Inna-as Ƹisa: "Aḏ ssisneɣ areqquz-a n uɣrum, wenni umi ɣa ṯ uceɣ ḏ netta." Issisen areqquz nni n uɣrum, yuca-as-ṯ i Yahuḏa mmis n Simƹan Isxaryuṭi.

²⁷ Wami iṭṭef areqquz nni n uɣrum Yahuḏa ȓexddenni yuḏef-iṯ Cciṭan. Inna-as Ƹisa: "Ḏeɣya, egg min ɣa ṯeggeḏ."

²⁸ War ifhim uȓa ḏ ijjen zeg yinni iy ḏin iḥḍaren x min ḏas inna.

²⁹ Tɣiȓ-asen i ȓebƹaḍ qa inna-as aḏ iseɣ min ḥḏajen ḏi Ȓƹiḏ niɣ aḏ iṣeddeq x imesƹan minzi Yahuḏa mkellef x ucemmus n tmenyaṯ.

³⁰ Wami iṭṭef areqquz nni n uɣrum ṣafi iffeɣ. Ȓexddenni ṯuweḍ-d ṯmeddiṯ.

Siḏiṯneɣ Ƹisa iseȓmaḏ ijjen n ȓuṣiyeṯ ḏ jḏiḏ

³¹ Wami iffeɣ Yahuḏa inna Ƹisa: "Ȓexxu itwasemɣar Mmis n bnaḏem, itwasemɣar s Mmis uȓa ḏ Arebbi.

³² Meȓa Arebbi itwasemɣar s Mmis, ataf aṯ isemɣar ƹaweḏ Arebbi ḏeg yixef nnes, u ḏeɣya aṯ isemɣar.

³³ A ṯarwa inu, ṯeqqim ḏrust n ȓweqṯ bac aḏ iȓiɣ akiḏwem. Axafi ṯrezzum. Min nniɣ nec i israʼiliyen aḏawem t iniɣ ȓexxu i kenniw: Mani ɣa raḥeɣ nec, war ṯzemmarem ca aḏ d tasem ḏinni.

³⁴ Ȓexxu ticceɣ-awem ijjen n ȓuṣiyeṯ ḏ jḏiḏ: Ḥibbeṯ ayawya. U ḥibbeṯ ayawya mammec kenniw ḥibbeɣ nec.

³⁵ Meȓa kenniw tḥibbim ayawya, ataf aḏ ssnen marra qa kenniw ḏ imeḥḍaren inu."

³⁶ Inna-as Simƹan Buṭrus: "Mani ɣa ṯraḥeḏ a Siḏi?" Inna-as Ƹisa: "Mani ɣa raḥeɣ nec, ȓexxu war ṯzemmareḏ ca aḏayi ṯeḏfareḏ ḏinni. Walakin ƹaḏ aḏayi d ṯeḏfareḏ."

³⁷ Inna-as Buṭrus: "A Siḏi, mayemmi war zemmareɣ ca ac ḏfareɣ ȓexxu? Nec axak ṣeddqeɣ ṯuḏarṯ inu!"

³⁸ Indeq-d Ƹisa inna-as: "Ma ḏ ṣṣaḥ axafi ṯṣeddqeḏ ṯuḏarṯ nnec? Aqa tesȓiḏ ȓḥaqq: Aḏayi ṯenkareḏ ṯȓaṯa n ṯwaȓaṯin qbeȓ ma aḏ idden uyaziḍ."