Yuḥanna 1 - Ṯarifiṯ 2020

Awaȓ n Arebbi netta ḏ nnur netta ḏ ṯuḏarṯ

¹ Ḏeg umezwaru iǧa wawaȓ. Awaȓ nni iǧa ak Arebbi. Awaȓ nni ḏ netta ig iǧan ḏ Arebbi.

² Ḏeg umezwaru iǧa ak Arebbi.

³ Zzayes iy d ixȓeq Arebbi marra, u bȓa awaȓ nni war tiȓi uȓa ḏ ijjen n ṯmesȓayṯ zi min d ixȓeq.

⁴ Ḏayes iy ṯeǧa ṯuḏarṯ, u ṯuḏarṯ nni nettaṯ ḏ nnur i yiwḏan.

⁵ Nnur nni itceƹciƹ ḏi ṯaǧest, ṯaǧest nni war ḏas ṯzemmar.

⁶ Yusa-d ijjen n uryaz issekk-iṯ-iḏ Arebbi qqaren-as Yaḥya.

⁷ Netta yusa-d ḏ ccaheḏ ḥima aḏ icheḏ i nnur, ḥima s chaḏeṯ nnes aḏ amnen marra iwḏan.

⁸ Netta Yaḥya war iǧi ca ḏ nnur; Lla, yusa-d aḏ icheḏ i nnur,

⁹ iƹni nnur nni nican tuɣa d itasen ɣar ddunect-a aḏ iceƹceƹ x kuȓ bnaḏem.

¹⁰ Nnur nni tuɣa iǧa ḏi ddunect. Waxxa ḏ netta ig iggin ddunect, ayṯbab n ddunect war ṯ ssinen ca.

¹¹ Yusa-d ɣar ṯmurṯ nnes, ayṯbab n ṯmurṯ nnes war ṯ qbiȓen ca.

¹² Yinni iy ṯ iqebȓen umnen zzayes zeg yisem nnes, yuca-asen netta ṯizemmar ḥima aḏ ḏewȓen ḏ ṯarwa n Arebbi.

¹³ Yina war d xȓiqen ca ƹlaḥsab ddurriṯ uȓa ƹlaḥsab min texs ddat uȓa ƹlaḥsab ȓxaḍar n uryaz; Lla, ḏ Arebbi iy ṯen d ijjin.

Awaȓ n Arebbi netta ḏ Siḏiṯneɣ Ƹisa Lmasiḥ

¹⁴ Awaȓ-a iḏweȓ ḏ bnaḏem, izḏeɣ jaraneɣ. Neccin neẓra lƹaḍama ɣares iǧan, lƹaḍama-ya ṯeǧa ɣar Mmis waḥḏes n Babas. Netta iccur s arḍa ḏ lḥaqiqa.

¹⁵ Icheḏ xas Yaḥya, itberraḥ inna: "Ḏ wa iy xef tuɣa ssiwȓeɣ nniɣ-awem aḏ d yas ijjen menbaƹd i nec, walakin netta imɣar xafi minzi tuɣaṯ qbeȓ ma aḏ iȓiɣ nec."

¹⁶ S lbaraka nnes ṯameqqrant ibarek-aneɣ marra s arḍa x arḍa.

¹⁷ Ccariƹa n Ayṯ-Israʼil ṯemmuc x ufus n Musa. Arḍa ḏ lḥaqiqa niṯenti usint-id x ufus n Ƹisa Lmasiḥ.

¹⁸ Uȓa ḏ ijjen war iẓri Arebbi ƹemmarṣ. Mmis waḥḏes ig iǧan ḏeg wuȓ n Babas ḏ netta iy ḏaneɣ d ismeḍharen Siḏi Arebbi.

Nnabi Yaḥya isewjaḏ abriḏ i Lmasiḥ

¹⁹ Ḏ ṯa ḏ chaḏeṯ n Yaḥya wami ɣares d ssekken israʼiliyen can n ȓfuqaha ḏ can n ccurfa n Ayṯ-Lawi zi ṯendint n Lquds ḥima aṯ sseqsan nnan-as min ṯeƹniḏ cek?

²⁰ Yaḥya war inkar ca ixef nnes, iƹtaref-asen inna-asen: "Nec war ǧiɣ ca ḏ Lmasiḥ."

²¹ Nnan-as: "Y min ṯeƹniḏ, ma ḏ nnabi Ilyas?" Inna-asen: "Maci ḏ nec." Nnan-as: "Cek, ma ḏ nnabi iy qqaren aḏ d yas?" Inna-asen: "Lla."

²² Nnan-as: "Y cek, min ṯeƹniḏ? Ḥima a naf min ɣa nini i yinni iy ḏaneɣ d issekken, min ṯeqqareḏ x yixef nnec?"

²³ Yarra xasen s wawaȓ n nnabi umi qqaren Icaƹya inna qbeȓ: "Nec ḏ ṯmijja itȓaɣan ḏi ȓexȓa ṯeqqar: Swejḏeṯ abriḏ nican i Siḏi Arebbi."

²⁴ Yinni iy ɣares d issekken niṯni zi ȓḥizeb n ifarrisiyen.

²⁵ Nnan-as: "Meȓa cek war ṯeǧiḏ ca ḏ Lmasiḥ niɣ ḏ Ilyas niɣ ḏ nnabi iy d ɣa yasen, mayemmi cek tṭehhareḏ i yiwḏan s waman?"

²⁶ Indeq-d Yaḥya inna-asen: "Nec tṭehhareɣ i yiwḏan s waman, walakin ḏanita ijjen ḏi ȓwesṭ nwem war ṯ ṯessinem ca.

²⁷ Ḏ netta iy d ɣa yasen menbaƹd i nec, war sḏihiǧeɣ aḏas fesyeɣ uȓa ḏ ifiȓan n ṯsiȓa nnes."

²⁸ Marra manaya iwqeƹ ḏeg ubilaj n Bayt Ƹanya ajemmaḍ i yiɣzar n Lʼurdun mani ig itṭehhar Yaḥya i yiwḏan s waman.

Nnabi Yaḥya icehheḏ x Siḏiṯneɣ Ƹisa ḏ Mmis n Arebbi

²⁹ Ṯiwecca nnes Yaḥya itwaȓa Ƹisa iggur-d ɣares, inna: "Xzarzeṯ, ḏ win ḏ Izmar n Arebbi iy ɣa ikksen ȓmuƹṣiyeṯ x yiwḏan marra.

³⁰ Ḏ win iy xef tuɣa ssiwȓeɣ nniɣ-awem: Aḏ d yas menbaƹd i nec ijjen n uryaz, walakin netta imɣar xafi minzi tuɣaṯ qbeȓ ma aḏ iȓiɣ nec.

³¹ Tuɣa nec s yixef inu war ṯ ssineɣ ca min iƹna, walakin usiɣ-d aḏ ṭehhareɣ i yiwḏan s waman ḥima aḏasen d iban netta i Ayṯ-Israʼil."

³² Yaḥya icheḏ xas inna: "Ẓriɣ Arruḥ n Arebbi ihwa-d zeg ujenna igga am yijjen n ṯeḏbirṯ ṯmars x Ƹisa.

³³ Tuɣa nec war ṯ ssineɣ ca min iƹna, walakin ḏ Arebbi iy ḏayi d issekken aḏ ṭehhareɣ i yiwḏan s waman, netta inna-ayi: Wenni ɣa ṯeẓreḏ ihwa-d xas Arruḥ imars xas, ḏ netta iy ɣa iṭehharen i yiwḏan s Arruḥ iqeddsen.

³⁴ Nec ẓriɣ manaya s yixef inu, cehhḏeɣ xas belli netta ḏ Mmis n Arebbi."

Imeḥḍaren imezwura n Siḏiṯneɣ Ƹisa

³⁵ Ṯiwecca nnes ƹaweḏ ibedd ḏinni Yaḥya ak ṯnayen n imeḥḍaren nnes.

³⁶ Wami yufa Ƹisa iƹḏu ssenni inna-asen: "Xzarem, ḏ win ḏ Izmar iy d issekk Arebbi."

³⁷ Kkaren ṯnayen nni n imeḥḍaren wami ḏas sȓin issawaȓ x Ƹisa, ḏfaren-ṯ.

³⁸ Ineqȓeb Ƹisa ɣar ḏeffar yufi-ṯen ḏfaren-ṯ-iḏ inna-asen: "Min trezzum?" Nnan-as: "A Ravi, mani tiȓiḏ?" (Awaȓ-a Ravi ixes aḏ yini Lmuƹallim.)

³⁹ Inna-asen: "Araḥem-d aḏ texzarem." Ruḥen akiḏes ẓrin mani itiȓi. Ṯsaƹƹat ƹȓayen ḏ arbeƹa n uƹecci, ssenni sensen akiḏes nhar nni.

⁴⁰ Ijjen zi ṯnayen nni n imeḥḍaren qqaren-as Andrus, umas n Simƹan Buṭrus, isȓa i wawaȓ n Yaḥya iḏfar Ƹisa.

⁴¹ Ȓexddenni yufa umas Simƹan inna-as nufa Lmasiya. (Awaȓ-a Lmasiya ixes aḏ yini Lmasiḥ.)

⁴² Issiweḍ-iṯ-iḏ ɣar Ƹisa. Wami ṯ iẓra Ƹisa inna-as: "Cek ḏ Simƹan mmis n Yuḥanna, zi ssa aȓ ṯsawent aḏac tȓaɣan Ṣifas." (Awaȓ-a Ṣifas ixes aḏ yini Buṭrus.)

⁴³ Ṯiwecca nnes Ƹisa ixes aḏ iraḥ ɣar ṯmurṯ n Ljalil. Iruḥ yufa ijjen qqaren-as Filippas inna-as: "Ḏfar-ayi-d!"

⁴⁴ Filippas netta zi Bayt Ṣayda, abilaj n Andrus ḏ Buṭrus.

⁴⁵ Filippas yufa ijjen qqaren-as Naṯnahil inna-as: "Nufa wenni iy xef yura Musa ḏi ccariƹa, mixef urin Lkutub n Lʼanbiya. Netta ḏ Ƹisa zeg ubilaj n Naṣira ḏ mmis n Yusef."

⁴⁶ Inna-as Naṯnahil: "Min iṣebḥan zi Naṣira!?" Inna-as Filippas: "Araḥ-d, aḏ texzareḏ."

⁴⁷ Ƹisa iẓra Naṯnahil iggur-d ɣares inna: "Wanita nican zi Ayṯ-Israʼil, war ḏayes bu ixarwiḍen."

⁴⁸ Inna-as Naṯnahil i Ƹisa: "Minzi ḏayi ṯessneḏ?" Inna-as Ƹisa: "Ẓriɣ-c swadday i ṯcejjarṯ n ṯazarṯ, qbeȓ ma c d iȓaɣa Filippas."

⁴⁹ Inna-as Naṯnahil i Ƹisa: "A Lmuƹallim, qa cek ḏ Mmis n Arebbi, cek ḏ azeǧiḏ n Ayṯ-Israʼil."

⁵⁰ Inna-as Ƹisa: "Ma ṯumneḏ wami c nniɣ ẓriɣ-c swadday i ṯcejjarṯ n ṯazarṯ?" Inna-as: "Ƹaḏ aḏ teẓreḏ ktar zi manaya.

⁵¹ Aqa tesȓam ȓḥaqq: Aḏ teẓrem ajenna innurzem, lmalaʼikaṯ n Arebbi taȓint hewwant-id x Mmis n bnaḏem."