Titus 2 - Ṯarifiṯ 2020

Ȓuṣiyaṯ ƹlaḥsab ȓmuminin

¹ Amma cek, seȓmaḏ min imunen ak ttaƹlim nican.

² Yinni imɣaren aḏaysen yiȓi lmaƹqul, aḏ iȓin mweqqrin, aḏ ḥekmen x ṯnefsiyṯ nsen, aḏ iȓin nican ḏi lʼiman ḏ ȓemḥibbeṯ ḏ ṣṣbar.

³ Ṯinni imɣaren ƹaweḏ aḏ ƹiccent ƹlaḥsab lʼiman, war ḏaysent tiȓi bu nnamima, war tebliyint ca aṭṭas s binu. Aḏ sȓemḏent min iǧan ḏ aṣebḥan.

⁴ Amenni aḏ rebbant ṯimɣarin ṯimezyanin ḥima aḏ texsent iryazen nsent ḏ ṯarwa nsent,

⁵ aḏ ḥekment x ṯnefsiyṯ nsent aḏ iȓint ṣfant, aḏ ggent ccɣeȓ ḏi ṯeddarṯ nsent, aɣarsent yiȓi wuȓ ḏ acemȓaȓ, aḏ ṭaƹent i iryazen nsent ḥima awaȓ n Arebbi war itwaƹeyyib ca.

⁶ Ammu ƹaweḏ in-asen i iḥenjiren aɣarsen yiȓi ȓaƹqeȓ nsen.

⁷ Ḏi marra ṯimesȓayin aɣarsen ṯiȓiḏ cek ḏ lmiṯal s lḥasanaṯ iy teggeḏ. Ttaƹlim nnec sexḏem-iṯ s ṣṣaraḥa ḏ lmaƹqul

⁸ ḏ yijjen n wawaȓ ḏ ṣṣaḥ war ḏayes bu ȓƹib. Ammu ac seḏḥan yinni ḏac itƹarraḍen minzi war ɣarsen min xaneɣ ɣa inin.

⁹ Isemɣan aḏ ṭaƹen i ayṯbab nsen ḏi kulci, axasen arḍan, war ḏasen teggen ca ṯaɣennant,

¹⁰ war tacaren ca ayṯbab nsen bac aḏ ssnen belli niṯni ḏaysen marra ttiqeṯ bac s marra ibriḏen aḏ zewwqen lʼiman n Arebbi iy ḏaneɣ isnejmen.

¹¹ Cuf, arḍa n Arebbi itmeḍhar-asen-d i marra iwḏan itawi-ṯen ɣar mani ɣa twasnejmen.

¹² Arḍa-ya itrebba-yaneɣ a nenkar ccarr ḏ ccehawaṯ n ddunect-a, a nƹic ḏi zman-a a neḥkam x ṯnefsiyṯ nneɣ aḏayneɣ yiȓi lmaƹqul ḏ lʼiman

¹³ u neccin ɣir netraja lʼamal nni itwabarken iƹni Nhar nni iy ḏayes d ɣa ṯmeḍhar lƹaḍama n Arebbi Ameqqran ḏ Umsenjem nneɣ Ƹisa Lmasiḥ.

¹⁴ Netta iṣeddeq xaneɣ ixef nnes ḏ ijjen n lfidya x marra ccarr nneɣ u ƹaweḏ bac aḏ issiṣfa ijjen n ccaƹb i yixef nnes ataf aḏ iȓin nnes mujudin aḏ ggen lḥasanaṯ.

¹⁵ Siweȓ x ṯmesȓayin-a, zeyyar x ȓmuminin nehha-ṯen s marra ssulṭa. War tejja ḥadd ac iseḥqar.