Ȓexḏayem 28 - Ṯarifiṯ 2020

Arrasul Bulus ḏi ṯeyzirṯ n Malṭa

¹ Wami nenjem nuweḍ ɣar ȓbarr, nufa isem n ṯeyzirṯ nni qqaren-as Malṭa.

² Ibarbariyen n ṯmurṯ nni ggin ḏayneɣ ȓxir aṭṭas. Reḥben zzayneɣ marra, ceƹƹȓen-aneɣ ṯimessi minzi tuɣa ṯesmeḍ ƹaweḏ iccaṯ unẓar.

³ Bulus ijmeƹ-d ikeccuḍen, wami ṯen isers ḏi ṯmessi iffeɣ-d ijjen n ufiɣer zi ȓeḥmu, iqqes-as iȓseq-as ḏeg ufus.

⁴ Wami ẓrin ibarbariyen fiɣer iȓseq ḏeg ufus n Bulus, nnan jarasen: Nican aryaz-a wanita inɣa can yijjen. Arebbi nneɣ umi qqaren war ṯ ijji ca aḏ iddar waxxa injem zi ȓebḥar.

⁵ Walakin Bulus inḍar fiɣer nni ḏi ṯmessi war ḏas iwqiƹ walu.

⁶ Ibarbariyen nni trajan ma aḏ yuff wa ima ḏeɣya aḏ iwḍa aḏ immeṯ. Wami ṯ rajan aṭṭas twaȓan-ṯ war ḏas iwqiƹ walu, ibeddeȓ array nsen nnan wanita ḏ can yijjen zi arebbiṯen nneɣ!

⁷ Ȓbarr-a wanita yuḏes ɣar ca n ṯmura n arrayes n ṯeyzirṯ nni, netta qqaren-as Publiyus. Irḥeb zzayneɣ, isnewjew-aneɣ ikarem-aneɣ ṯeȓtiyyam.

⁸ Babas n Publiyus itnezbar ḏi ṯassuṯ ihȓec s ṯmessi itazzeȓ-as uƹeddis. Iruḥ ɣares Bulus ɣar uxxam nnes iẓẓuǧ, isers xas ifassen nnes isgenfa-ṯ.

⁹ Iwqeƹ manayenni, senni usin-d ɣares imehȓac n ṯeyzirṯ nni marra isgenfa-ṯen Bulus.

¹⁰ Weqqaren-aneɣ ucin-aneɣ aṭṭas n ṯmesȓayin. Wami nekkar a neffeɣ ḏeg uɣarrabu, ḏebbaren-aneɣ-d ȓqecc nni iy neḥḏaj.

Arrasul Bulus itaweḍ ɣar ṯendint n Ruma

¹¹ Menbaƹd i ṯeȓt chur, ngaƹƹeḏ ḏeg yijjen n uɣarrabu zi Iskandariya tuɣa iseƹḏu ȓmecta ḏi ṯeyzirṯ nni. Aɣarrabu nni x uɣembub nnes ḏayes lʼaṣnam semman-ṯen

¹² Nuweḍ ɣar ṯendint n Saraqusa neqqim ḏayes ṯeȓtiyyam.

¹³ Ssenni nruḥ ḏeg uɣarrabu ɣar ṯendint n Riǧew. Ṯiwecca nnes ikkar-d ijjen n arriḥ zi ljanub, nhar wis ṯeȓtiyyam nuweḍ ɣar ȓmuyi n Butisuli.

¹⁴ Nufa ḏinni ȓebƹaḍ n ayṯmaṯneɣ, ƹarḍen-aneɣ a neqqim akiḏsen sebƹiyyam. Amenni iy nuweḍ ɣar ṯendint n Ruma.

¹⁵ Ɣarsen ȓexbar ɣar ayṯmaṯneɣ ḏi Ruma nusa-d, ffɣen-d aḏaneɣ d ȓqan ḥetta ɣar Ssuq n Wabyan u ḥetta ɣar Ṯraṯa n Ṯuḏrin n imsafaren. Wami ṯen iẓra Bulus, icekkar Arebbi itwacejjeƹ.

¹⁶ Nuḏef ṯandint n Ruma, ismeḥ-as ȓmexzen i Bulus aḏ izḏeɣ waḥḏes akiḏes iqqim ijjen n uƹaskari axas iƹesses.

Arrasul Bulus itbeccar ḏi ṯendint n Ruma

¹⁷ Ṯeƹḏu ṯeȓtiyyam, iȓaɣa-d Bulus x imeqqranen n Ayṯ-Israʼil. Wami d munen inna-asen: "Ay ayṯma, nec war ggiɣ walu ḍed i ccaƹb nneɣ niɣ ḍed i lƹadaṯ n ȓejḏuḏ nneɣ. Waxxa amenni ṭṭfen-ayi ḏi Lquds sellmen-ayi i ifassen n arrumanus.

¹⁸ Niṯni ggin-ayi lʼistijwab, xsen aḏayi ḍeȓqen minzi war xafi ufin bu can ttuhma iy xef sḏaheǧeɣ ȓmewṯ.

¹⁹ Wami Ayṯ-Israʼil ƹarrḍen qa war ufiɣ illa aḏ stanfeɣ ddaƹweṯ inu ɣar Lmalik Qayṣar. Walakin nec war ggiɣ bu can ttuhma x lʼumma inu.

²⁰ Iḏen x manaya ttareɣ-kenniw akenniw ẓreɣ akiḏwem ssiwȓeɣ. Aqa ƹlaḥsab lʼamal n Ayṯ-Israʼil iy twaceddeɣ s ssensȓeṯ-a."

²¹ Nnan-as: "War ḏaneɣ d ṯuwiḍ xak uȓa ḏ ijjen n ṯebrat zi jwayeh n Yahuḏiya. Zeg yinni iy d yusin zi ayṯmaṯneɣ ssenni war ḏaneɣ issiweȓ ḥadd xac, war xak inni ḥadd ȓƹib.

²² Walakin nexs aḏac nṣennet lʼafkar nnec minzi nessen aṭṭas n yiwḏan ḏi mkuȓ amcan tƹarraḍen i ȓḥizeb-a wanita."

²³ Ttafqen aḏ meȓqen ijjen n nhar, tmarnin-d inneɣni usin-d ɣares aṭṭas iḏsen ɣar ṯeddarṯ mani iqqim Bulus. Ibḏa itḥeddaṯ-iṯen zi ṣbaḥ aȓ wami d yuweḍ uƹecci netta icehheḏ s ȓmulk n Arebbi, ixes aṯen iseqneƹ s Ccariƹa n Musa ḏ Lkutub n lʼanbiya x Ƹisa.

²⁴ Ȓebƹaḍ zzaysen qtanƹen s min inna, ȓebƹaḍ zzaysen war uminen ca.

²⁵ Niṯni war mesfhimen ca ak wayawya. Qbeȓ ma aḏ ffɣen ssenni, inna-asen Bulus awaȓ-a ḏ aneggaru: "Arruḥ iqeddsen inna ȓḥaqq i ȓejḏuḏ nwem s yiȓes n nnabi Icaƹya, inna:

²⁶

²⁷ Ȓaḥeqqac ccaƹb-a, uȓawen nsen ḏewȓen am uzru, ƹȓayen war tesȓin walu, qqnen ṯiṭṭawin nsen. Ḥima war twiȓin s ṯiṭṭawin nsen, war tesȓin s imejjan nsen, war fehhmen s wuȓawen nsen, aɣari d ḏewȓen aṯen sgenfiɣ.>

²⁸ Iwa itxeṣṣa aḏ tessnem uȓa ḏ yinni war iǧin ca ḏ israʼiliyen Arebbi aṯen isenjem, niṯni aḏas sȓen."

²⁹ {Wami inna awaȓ-a, ffɣen Ayṯ-Israʼil zzayes temnaqaren s jjheḏ jarasen.}

³⁰ Iqqim Bulus ƹamayen ḏi ṯeddarṯ nni itxeǧas ȓekra netta s yixef nnes. Itreḥḥab s yinni iy ɣares d igguren marra.

³¹ Itḥeddaṯ-iṯen s ȓmulk n Arebbi, iseȓmaḏ x Siḏiṯneɣ Ƹisa Lmasiḥ s yijjen n zƹameṯ ḏ lḥurriya.