Ȓexḏayem 27 - Ṯarifiṯ 2020

Itraḥ arrasul Bulus ɣar ṯendint n Ruma

¹ Wami umaren aḏaneɣ ssekken ḏeg uɣarrabu ɣar ṯmurṯ n Iṭalya, sellmen Bulus ḏ ȓebƹaḍ n imeḥbas akiḏes ijjen n uƹaskari ḏ ameqqran n arrumanus qqaren-as Yulyus. Netta yusa-d zi ȓƹaskar nni umi qqaren

² Ngaƹƹeḏ ḏeg yijjen n uɣarrabu itraḥen ḏi ȓweqṯ nni zi ȓmuwyi n Adramit ɣar ȓmuyawaṯ n lʼiqlim n Asya. Iruḥ akiḏneɣ Aristarxus, netta zi Ayṯ-Masidunya zi ṯendint n Salunik.

³ Ṯiwecca nnes, wami nuweḍ ɣar ṯendint n Ṣayda igga ȓxir Yulus ḏi Bulus ijji-ṯ aḏ iraḥ ɣar imeddukaȓ nnes bac aḏayes thillan.

⁴ Ssenni neffeɣ nruḥ ḏeg uɣarrabu ḏi jjiheṯ nni mani ihedden ȓebḥar n ṯeyzirṯ n Qubruṣ, minzi arriḥ iccaṯ-aneɣ-d ɣar uɣembub nneɣ.

⁵ Wami neƹḏu ȓebḥar nni iy iǧan zzaṯ i lʼiqlim n Kilikya ḏ lʼiqlim n Pamfilya, nuweḍ ɣar ṯendint n Mira ḏi lʼiqlim n Likya.

⁶ Yufa ḏinni uƹaskari nni ameqqran ijjen n uɣarrabu yusa-d zi ṯendint n Iskandariya itraḥ ḏi ȓweqṯ nni ɣar ṯmurṯ n Iṭalya, isney-aneɣ ḏayes.

⁷ Aṭṭas n wussan neccin iggur zzayneɣ uɣarrabu walakin yuyur ɣir cwayt n ubriḏ waha, menbaƹd neƹḏu ṭṭarf i ṯendint n Kanidus. Wami arriḥ war ḏaneɣ ijji ca a nkemmeȓ x ubriḏ nni, neƹḏu swadday n ṯeyzirṯ n Krit jjiheṯ n Qabu n Salmun.

⁸ S bezzez nuggur ṭṭarf ṭṭarf n ȓbarr menbaƹd nuweḍ ɣar yijjen n umcan qqaren-as <Ȓmarsaṯ Ṯiṣebḥanin> netta yuḏes i ubilaj n Lisya.

^9-10 Ussan n Ȓƹiḏ ṣafi ƹḏun, tuɣa neƹḍeȓ aṭṭas n ȓweqṯ ḥetta wami iḏweȓ usafar nneɣ ḏi ȓebḥar ḏayes lxaṭar. Ikkar Bulus iƹȓem-asen inna-asen: "A siyaḏi, qa nec twaȓiɣ asafar nneɣ aḏ yiȓi ḏ ijjen n lmuṣiba ḏ ijjen n ṯxessarṯ ḏ ṯameqqrant, maci ɣir aɣarrabu ḏ sseȓƹaṯ waha, walakin ƹaweḏ uȓa ḏ ṯuḏarṯ nneɣ."

¹¹ Walakin aƹaskari nni ameqqran war ḏas iggi ca array i Bulus, igga array i bab n uɣarrabu ḏ arrayes nnes.

¹² Lʼianna ȓmarsa nni ḏ ṯaƹeffant bac aḏayes seƹḏun ȓmecta ḏinni. X manaya azyen ameqqran ggin aḏ uyuren ssenni ḏeg uɣarrabu, tmennan aḏ awḍen ɣar ubilaj n Finikes aḏayes seƹḏun ȓmecta. Nettaṯ ḏ ijjen n ȓmarsa ḏi ṯeyzirṯ n Krit teḍhur ɣar ljanub ḏ ccamal ḏi jjiheṯ n lɣarbi.

Lƹaṣifa ḏi ȓebḥar

¹³ Wami d iṣuḍ ijjen n arriḥ ifsus zi ljanub, itɣir-asen ufin min rezzun. Sgaƹƹḏen-d aȓiyzim n uɣarrabu ruḥen ḏi ȓebḥar ṭṭarf i ȓbarr n ṯeyzirṯ nni n Krit.

¹⁴ Walakin menbaƹd cwayt ikkar-d ijjen n arriḥ ijheḏ ihwa-d zi ṯeyzirṯ nni, arriḥ nni qqaren-as

¹⁵ Lƹaṣifa nni ṯuwi aɣarrabu, wami war nzemmar ca a nuyur ɣar zzaṯ nejja aɣarrabu nni aṯ yawi arriḥ.

¹⁶ Nnuffar zi arriḥ wami neƹḏu swadday n yijjen n ṯeyzirṯ ḏ ṯamezyant qqaren-as Kawda. Izeyyar xaneɣ aṭṭas ȓḥaȓ walakin nrekken ṯaɣarrabut n lʼiɣaṯa,

¹⁷ nesgaƹƹeḏ-it-id ɣar uɣarrabu. Ixeddamen cedden aɣarrabu s iseɣwan swadday bac war itrezzi ca. Wami ggwḏen aɣarrabu aḏ yuyur aḏ innaɣ ḏeg yijḏi n ȓebḥar n Surt, sehwan-d ȓeqȓuƹ uɣarrabu jjin arriḥ aṯ yawi.

¹⁸ Ṯarni lƹaṣifa nni, ṯiwecca nnes bḏan neṭṭaren sseȓƹaṯ ḏi ȓebḥar.

¹⁹ Nhar wis ṯeȓtiyyam nḍaren ȓqecc uɣarrabu ḏi ȓebḥar s ifassen nsen.

²⁰ Ṯeqqim amenni lƹaṣifa nni, aṭṭas n wussan war neẓri ṯfuct uȓa ḏ yiṯran. Neccin ḏeg uneggaru nefqeḏ lʼamal belli a nenjem.

²¹ Wami kkin aṭṭas n ȓweqṯ war ccin ca aɣrum, ikkar Bulus inna-asen: "Ay iryazen, maƹlik ḏayi ṯeggim array war ṯeffiɣem ca zi ṯeyzirṯ n Krit, ataf qa war xawem ṯekki ca tamara-ya niɣ ḏ ṯxessarṯ-a.

²² Ȓexxu tettareɣ zzaywem aḏ tiȓim ḏ iryazen aqa war itmetti ḥadd zzaywem, ɣir aɣarrabu-ya aḏ irez waha.

²³ Cuf, ǧiȓeṯ-a ṯanita qa ṯmeḍhar-ayi-d ijjen n lmalaʼika n Arebbi, Arebbi wenni umi xeddmeɣ netta ḏ bab inu.

²⁴ Ṯenna-ayi lmalaʼika nni: A Bulus, war teggweḏ ca! Wa labud aḏ tbeddeḏ ɣar Lmalik Qayṣar. Xzar ƹaweḏ, yinni iy kiḏec itsafaren marra isenjem-iṯen Arebbi akiḏec."

²⁵ Inna-asen Bulus: "Iwa iȓiṯ ḏ iryazen! Qa nec tamneɣ zi Arebbi min ḏayi inna aḏ yiȓi qa aḏ yiȓi.

²⁶ Walakin labud aḏ innaɣ uɣarrabu-ya ɣar ṭṭarf n can ṯeyzirṯ."

²⁷ Ḏi ǧiȓeṯ nni wis arbeƹṭacar yum neccin ƹaḏ nuggur nweddar ḏi ȓebḥar n Wadriyatiki, ɣar uzyen n ǧiȓeṯ tɣir-asen i ixeddamen n uɣarrabu qa tqerraben ɣar ȓbarr.

²⁸ Ƹbaren ȓaǧeɣ n ȓebḥar ufin sebƹa u ṯȓaṯin mitru. Ṯeƹḏu cwayt n ȓweqṯ, ƹaweḏ ƹbaren ufin ɣir sebƹa u ƹicrin mitru.

²⁹ Ggwḏen aɣarrabu aḏ iȓqef izra, nḍaren zi puppa n uɣarrabu arbeƹa n iȓiyzam qqimen tẓaǧan bac aḏ iṣbeḥ ȓḥaȓ.

³⁰ Ixeddamen n uɣarrabu wami rezzun aḏ arewȓen zzayes, sehwan ṯaɣarrabut n lʼiɣaṯa ɣar waman sneƹmiȓen axmi xsen aḏ nḍaren iȓiyzam zi pruba uɣarrabu.

³¹ Inna-as Bulus i uƹaskari nni ameqqran ḏ ȓƹaskar nni akiḏes: "Meȓa war qqimen ca ixeddamen-a ḏeg uɣarrabu, war ṯzemmarem ca aḏ tnejmem."

³² Ȓexddenni ȓƹaskar qessen iseɣwan n ṯɣarrabut n lʼiɣaṯa jjin-teṯ axasen ṯbeƹƹeḏ.

³³ Wami ibḏa aḏ iṣbeḥ ȓḥaȓ, ikkar Bulus ittar zzaysen marra aḏ ccen ca n ȓḥajeṯ inna-asen: "Ṯeƹḏu arbeƹṭacar yum trajam waha ṯeǧuzem, war ṯeccim walu.

³⁴ Ȓexxu tettareɣ zzaywem aḏ teccem can ȓḥajeṯ bac aḏ teqqimem ṯeddarem, war iweṭṭi uȓa ḏ ijjen n uzuṭṭu zeg uzeǧif nwem."

³⁵ Wami inna awaȓ-a, ikkar iysi-d aɣrum icekkar Arebbi zzaṯsen marra, irez-iṯ ibḏa itett-iṯ.

³⁶ Cejjƹen marra iḏsen ccin.

³⁷ Neccin lƹadad nneɣ ḏeg uɣarrabu miyytayen u setta u sebƹin n yiwḏan.

³⁸ Wami ccin jjiwnen, nḍaren irḏan ḏi ȓebḥar bac aḏ sfessen aɣarrabu.

³⁹ Wami d iṣbeḥ ȓḥaȓ, twaȓan ca n ṯmurṯ niṯni war t ssinen ca. Ẓrin ijjen n lxalij ḏinni, cceṭṭ nnes ḏayes ijḏi. Ggin aɣares sqarrben aɣarrabu meȓa zemmaren-as.

⁴⁰ Qeḍwen iȓiyzam jjin-ṯen ḏi ȓebḥar, serxun iseɣwan iy zi twarekknen dmamaṯ. Sgaƹƹḏen ȓeqȓaƹ n zzaṯ i arriḥ itṣuḍen, wejjhen ɣar ȓbarr.

⁴¹ Walakin aɣarrabu ikka ḏeg yijjen n uyeddim n yijḏi ḏi ȓwesṭ n waman innuɣ ḏayes ḏinni. Pruba nnes ṯennuɣ mliḥ war tenhezzi ca. Puppa nnes ṯebḏa trezza ccaṯen-t ȓemwaj.

⁴² Ȓƹaskar nwan aḏ nɣen imeḥbas bac war zzaysen itƹummi ḥadd aḏ yarweȓ.

⁴³ Walakin aƹaskari nni ameqqran ixes aḏ isenjem Bulus, isbedd-iṯen x min xsen aḏ ggen. Yumar yinni issnen aḏ ƹummen aḏ neḍwen ḏ imezwura ḥima aḏ ffɣen ɣar ȓbarr.

⁴⁴ Inneɣni aṯen ḏfaren x ṯfeȓwin niɣ x ṯeȓwiḥin uɣarrabu. Amenni iy ggin bac aḏ ffɣen marra iḏsen ɣar ȓbarr aḏ nejmen.