Ȓexḏayem 25 - Ṯarifiṯ 2020

Arrasul Bulus itestanaf ddaƹweṯ nnes ɣar Lmalik Qayṣar

¹ Fastus netta iḏweȓ ḏ Lwali ḏi lʼiqlim. Wami ṯeƹḏu ṯeȓtiyyam igaƹƹeḏ zi ṯendint nni n Qayṣariya ɣar ṯendint n Lquds.

^2-3 Arruyas n ȓfuqaha ḏ imeqqranen n Ayṯ-Israʼil qeddmen-as ttuhmaṯ nsen ḍed i Bulus. Ḥeccmen-ṯ ttaren zzayes aḏasen igg ȓxaḍar nsen bac aṯiḏ yawi ɣar Lquds walakin niṯni wejjḏen-as i Bulus bac aṯ nɣen ḏeg ubriḏ nni.

⁴ Inna-asen Lwali qa Bulus aqaṯ ḏi ṯendint n Qayṣariya ḏ ameḥbus, ȓexxu nec aḏ ḏewȓeɣ ḏinni.

⁵ U labud akiḏi raḥen zzaywem ȓebƹaḍ n imeqqranen nwem. Meȓa ixḍa uryaz nni ḏi can ȓḥajeṯ, qeddmem-ayi-d ttuhmaṯ iy ɣarwem ḍed nnes ḏinni.

⁶ Iqqim Fastus ḏi Lquds ma ṯmeniyyam ma ƹecriyyam, menbƹad ihwa ɣar Qayṣariya. Ṯiwecca nnes, igga ljelsa ḏi lmaḥkama yumar aḏas d awin Bulus.

⁷ Wami d iḥḍar ḏinni, munen-d xas israʼiliyen nni iy d yusin zi Lquds. Tahamen-ṯ s waṭṭas n ṯmesȓayin iy wƹarent walakin war ɣarsen bu ddalil.

⁸ Ibḏa Bulus itḏafaƹ x yixef nnes inna: "Nec war xḍiɣ ca ḏi manayenni, niɣ ḏi Ccariƹa n Ayṯ-Israʼil niɣ ḏi ṯemziḏa ṯameqqrant niɣ ḏi Lmalik Qayṣar."

⁹ Walakin Lwali Fastus irezzu aḏ igg ȓxaḍar i Ayṯ-Israʼil uca inna-as i Bulus: "Ma ṯexseḏ aḏ tgaƹƹḏeḏ ɣar ṯendint n Lquds axak ḥekmeɣ ḏinni nec x ttuhmaṯ-a?"

¹⁰ Inna-as Bulus: "Nec aqayi beddeɣ ḏi lmaḥkama-ya n Lmalik Qayṣar, itxeṣṣa ḏa iy ɣa twaḥakmeɣ. Qa Ayṯ-Israʼil war ḏaysen xḍiɣ ca, mammec ṯessneḏ cek.

¹¹ Meȓa xḍiɣ iƹni ggiɣ can ȓḥajeṯ sḏaheǧeɣ xas ȓmewṯ war zemmareɣ azzayes arewȓeɣ. Walakin meȓa ttuhmaṯ-a iy xafi qeddmen war ǧint ca ḏ ṣṣaḥ, uȓa ḏ ijjen ma ɣares ȓḥaqq aḏayi isellem i niṯni. Nec testanafeɣ ddaƹweṯ inu ɣar Lmalik Qayṣar."

¹² Lwali Fastus issiweȓ ak imcawaren nnes uca inna-as i Bulus: "Meȓa cek ddaƹweṯ nnec ṯestanfeḏ-t ɣar Qayṣar, qa ɣar Qayṣar iy ɣar ɣa ṯraḥeḏ."

Fastus issawaȓ ak uzeǧiḏ Aɣribas x lqaḍiya n Bulus

¹³ Ƹḏun ȓebƹaḍ n wussan, yusa-d uzeǧiḏ Aɣribas akiḏes učmas Brinka ɣar ṯendint n Qayṣariya bac aḏ seǧmen x Lwali Fastus.

¹⁴ Wami ḏinni iy qqimen aṭṭas n wussan, issiweȓ Fastus ak uzeǧiḏ x lqaḍiya n Bulus. Inna-as: "Ḏanita ijjen n uryaz ijji-ṯ Filikes ḏ ameḥbus.

¹⁵ Wami ruḥeɣ nec ɣar Lquds qeddmen-ayi-d ttuhmaṯ arruyas n ȓfuqaha ḏ imeqqranen n Ayṯ-Israʼil, ttaren zzayi axas ḥekmeɣ x lmujrim.

¹⁶ Nniɣ-asen: Ƹlaḥsab lƹada n arrumanus war tsellimen ḥadd ḥetta aḏ imqabaȓ ak yinni iy xas iggin ttuhma, aɣares ṯiȓi lfurṣa aḏ iḏafeƹ x yixef nnes.

¹⁷ Iḏen, ṯiwecca nnes munen-d ḏanita qa ggiɣ ljelsa nnes ḏi lmaḥkama. Tuɣa war ƹeṭṭaȓeɣ ca, umareɣ bac aṯiḏ awin.

¹⁸ Kkaren ssiwȓen yinni xas iqeddmen ttuhmaṯ, ufiɣ ttuhmaṯ nni iy ggin ḍed i Bulus war ǧint ca ḏ can ljarimaṯ iy tuɣa xseɣ aḏ ssneɣ nec.

¹⁹ Lla, menɣen akiḏes x can ṯmesȓayin ḏi ddin nsen ḏ yijjen n uryaz qqaren-as Ƹisa, qa immuṯ walakin Bulus iqqar lla netta iddar!

²⁰ Wami weddareɣ nec war ufiɣ mammec ɣa beḥṯeɣ ḏi ṯmesȓayin-a, nniɣ-as i Bulus: Ma aḏ traḥeḏ ɣar Lquds axak ḥekmeɣ ḏinni x ttuhmaṯ-a?

²¹ Bulus yugi, ikkar istanef ddaƹweṯ nnes ɣar Qayṣar. Umareɣ nec aḏ iqqim ḏ ameḥbus aȓ ṯ ɣa ssekkeɣ i Lmalik Qayṣar."

²² Inna-as uzeǧiḏ Aɣribas i Fastus: "Nec s yixef inu xseɣ aḏas ṣennṭeɣ i uryaz-a." Inna-as Fastus: "Ṯiwecca aḏas ṯṣennṭeḏ."

Arrasul Bulus zzaṯ i uzeǧiḏ Aɣribas

²³ Ṯiwecca nnes, wami d yusa uzeǧiḏ Aɣribas ḏ Brinka s yijjen n ccan ḏ ameqqran, uḏfen ɣar uxxam ḏ ameqqran n uyraw akiḏes arruyas n ȓƹaskar n arrumanus ḏ imeqqranen n ṯendint. Ȓexddenni yumar Fastus uwin-d Bulus.

²⁴ Inna Fastus: "A si azeǧiḏ Aɣribas ḏ iryazen iḥḍaren akiḏneɣ marra! Aqa twaȓam aryaz-a zzaṯwem xas iy ḏayi qeddmen ttuhmaṯ marra lʼumma n Ayṯ-Israʼil ḏi Lquds uȓa ḏanita ḏi Qayṣariya. Snekkaren xas ṯɣuyyeṯ qqaren labud wanita war itɣimi ca ƹaḏ aḏ iddar!

²⁵ Nec war xas ufiɣ bu can ȓḥajeṯ isḏaheǧ xas ȓmewṯ. Wami istanef ddaƹweṯ nnes ɣar lmalik Qayṣar, xseɣ aɣares ṯ ssekkeɣ.

²⁶ Walakin nec war xas ufiɣ bu can n ttuhma nican ḥima aḏas t ariɣ i si Lmalik Qayṣar. S manaya seḥḍareɣ-ṯ-iḏ zzaṯwem, xaṣṣatan cek a si azeǧiḏ Aɣribas, bac meȓa ṯeggim-as lʼistijwab aḏ ssneɣ min xas ɣa ariɣ.

²⁷ Nec twaȓiɣ maci maƹqul aḏ ssekkeɣ can umeḥbus bȓa ma aḏ ariɣ ttuhmaṯ iy xas qeddmen."