Ȓexḏayem 22 - Ṯarifiṯ 2020

¹ "Ay ayṯma ay imɣaren, ṣennṭeṯ-ayi mliḥ ȓexxu bac aḏ ḏafƹeɣ x yixef inu!"

² Wami sȓin i Bulus issawaȓ s lluɣa lƹibriya uca qeḍƹen ȓḥess. Inna-asen:

³ "Nec ḏ aʼisraʼili xeȓqeɣ ḏi ṯendint n Ṭarsus ḏi lʼiqlim n Kilikya, walakin nec ymiɣ ḏi ṯendint-a ḏanita. Ɣriɣ ɣar iḍaren n lʼustad Gamlil twarebbiɣ s ccariƹa n ȓejḏuḏ nneɣ mammec ḏaneɣ ṯweṣṣa ṯa s ṯa kuȓci. Rezzuɣ aḏ ggeɣ lwajib ak Arebbi s wuȓ inu mamc ṯrezzum aḏ teggem kenniw marra nhara.

⁴ Nec tuɣa tƹeddabeɣ yinni iḏfaren abriḏ-a ḥetta wami mmuṯen. Ṭṭfeɣ iryazen ḏ ṯemɣarin ggiɣ-ṯen ḏi ȓeḥbes.

⁵ Arrayes n ȓfuqaha ḏ marra Jmaƹeṯ n imeqqranen n Ayṯ-Israʼil niṯni ḏ ȓechuḏ x manayenni. Ucin-ayi arruxṣaṯ aṯent ssiwḍeɣ ɣar ayṯmaṯsen ḏi ṯendint n Dimaceq. Ruḥeɣ ḏinni aḏ ṭṭfeɣ iwḏan n ubriḏ-a aṯen d awiɣ ɣar Lquds bac aḏ twaƹaqben.

⁶ Nec tuɣa ggureɣ ḏeg ubriḏ qarrbeɣ ɣar Dimaceq, tuɣa ƹȓayen ḏ azyen n nhar. Ƹlaɣafla inneḍ-ayi-d ijjen n nnur itceƹciƹ zeg ujenna.

⁷ Wḍiɣ ɣar ṯmurṯ sȓiɣ i yijjen n ṯmijja ṯeqqar-ayi-d: A Cawul a Cawul, mayemmi ḏayi tƹeddabeḏ?

⁸ Nniɣ-as nec: Min ṯeƹniḏ cek a Siḏi? Inna-ayi Nec ḏ Ƹisa zi Naṣira ḏ wenni iy tƹeddabeḏ.

⁹ Yinni kiḏi iǧan ẓrin nnur nni walakin war fhimen ca i ṯmijja n wenni iy kiḏi d issawaȓen.

¹⁰ Nniɣ-as nec: Min ɣa ggeɣ a Siḏi? Inna-ayi Siḏiṯneɣ: Kkar aḏef ɣar Dimaceq, aḏac itwanna ḏinni marra min yurin aḏ teggeḏ.

¹¹ Nnur nni tuɣa itseqsiq ijheḏ xafi, ḏewȓeɣ war twiȓiɣ walu. Ṭṭfen-ayi zeg ufus inu yinni kiḏi iǧan, ssiwḍen-ayi ɣar Dimaceq.

^12-13 Yusa-d ɣari ḏinni ijjen qqaren-as Anas. Netta ḏayes ddin, itṭaƹa i ccariƹa. Ssawaȓen xas mliḥ marra israʼiliyen iy zeddɣen ḏi Dimaceq. Ibedd-d zzaṯi inna-ayi: Ay uma Cawul, ȓexxu aḏ tḏewȓeḏ aḏ twaȓiḏ! Ȓexddenni genfiɣ twaȓiɣ netta.

¹⁴ Inna-ayi: Arebbi n ȓejḏuḏ nneɣ ixḍar-icek netta bac aḏ tessneḏ min ixes, aḏ twaȓiḏ s ṯiṭṭawin nnec axeddam nnes ṣṣaliḥ aḏ tṣennṭeḏ i yijjen n wawaȓ zeg uqemmum nnes.

¹⁵ Cek axas ṯiȓiḏ ḏ ccaheḏ ɣar marra iwḏan ƹlaḥsab min ṯeẓriḏ ḏ min ṯesȓiḏ.

¹⁶ Y ȓexxu min trajiḏ? Kkar aḏ twaṭehhareḏ s waman, sireḏ zi ȓmuƹṣiyaṯ nnec xmi ɣa ṯȓaɣiḏ x yisem nnes.

¹⁷ Wami ḏewȓeɣ ɣar ṯendint n Lquds tẓaǧiɣ ḏi ṯemziḏa ṯameqqrant, ihwa-d xafi ijjen n lwaḥi.

¹⁸ Ẓriɣ Siḏiṯneɣ inna-ayi: Kkar ffeɣ ḏeɣya zi Lquds minzi chaḏeṯ nnec xafi war t qebbȓen ca.

¹⁹ Nniɣ-as: A Siḏi, niṯni ssnen belli tuɣa traḥeɣ zi ṯemziḏa ɣar ṯemziḏa tḥebbaseɣ ccaṯeɣ yinni zzayek yumnen.

²⁰ Ḥḍareɣ nec wami sizzȓen iḏammen n Stifan wenni xak icehhḏen. Wafqeɣ x ȓmewṯ nnes, ḥḍiɣ-asen uȓa ḏ arruḍ n yinni iy ṯ inɣin.

²¹ Inna-ayi Siḏi: Ruḥ, cek ac ssekkeɣ ɣar imucan ggwjen aṭṭas, ɣar yinni war iǧin ca zi Ayṯ-Israʼil."

²² Sȓin mliḥ i Bulus ḥetta aȓ wami inna awaȓ-a aneggaru. Ȓexddenni snekkaren xas ṯɣuyyeṯ nnan: Mḥaṯ aryaz-a zi ddunect-a, war isḏiheǧ ca aḏ iqqim ƹaḏ iddar!

²³ Snekkaren ṯɣuyyeṯ, neṭṭaren izeǧuba nsen, zzuzzaren ṯaƹejjact ɣar ujenna.

²⁴ Ikkar arrayes n ȓƹaskar yumar aḏ siḏfen Bulus ɣar lqecla, aṯ uwṯen s usɣun aḏas ggen lʼistijwab mayemmi xas snekkaren ṯɣuyyeṯ qaƹ ammu.

²⁵ Wami ṯ cedden bac aṯ uwṯen, inna-as Bulus i umeqqran n ȓƹaskar ibedden ḏinni: "Ma qanuni aḏ tuwṯem ijjen n bnaḏem s usɣun ɣares ljinsiya n arrumanus meȓa war xas ṯḥekkimem ca?"

²⁶ Wami isȓa umeqqran nni n ȓƹaskar manayenni, iruḥ ɣar arrayes n ȓƹaskar inna-as: "Min teggeḏ cek ammu? Qa aryaz nni ɣares ljinsiya n arrumanus!"

²⁷ Yusa-d arrayes nni inna-as: "In-ayi cek, ma ɣarek ljinsiya n arrumanus?" Yarra xas Bulus: "Wah, nec aqat ɣari."

²⁸ Inna-as arrayes nni: "Qa nec sɣiɣ ljinsiya inu s waṭṭas n tmenyaṯ." Inna-as Bulus: "Nec xeȓqeɣ-d zzayes."

²⁹ Ȓexddenni beƹƹḏen xas ḏeɣya yinni ixsen as ggen lʼistijwab. Iggweḏ waxxa ḏ arrayes nni wami issen belli icedd ijjen ɣares ljinsiya n arrumanus.

Arrasul Bulus zzaṯ i Jmaƹeṯ n lḥukkam n Ayṯ-Israʼil

³⁰ Ṯiwecca nnes, irezzu arrayes nni n ȓƹaskar aḏ issen mayemmi Ayṯ-Israʼil tahamen Bulus, iruḥ yumar arruyas n ȓfuqaha ḏ marra Jmaƹeṯ n lḥukkam n Ayṯ-Israʼil aḏ munen. Ȓexddenni isufeɣ-d Bulus yuwi-ṯ-iḏ ɣarsen isbedd-iṯ zzaṯsen.