Ȓexḏayem 21 - Ṯarifiṯ 2020

Arrasul Bulus itsafar ɣar ṯendint n Lquds

¹ Wami xasen d nuyur ssenni, nenya ḏeg uɣarrabu nruḥ nican ɣar ṯeyzirṯ n Kus. Ṯiwecca nnes nuweḍ ɣar ṯeyzirṯ n Rudus. Ssenni nuyur ɣar ṯendint n Batara.

² Nufa ḏinni ijjen n uɣarrabu itraḥ ɣar jwayeh n Finiqya, nenya ḏayes nuyur.

³ Ṯmeḍhar-aneɣ-d ṯeyzirṯ n Qubruṣ x uẓeȓmaḍ nneɣ. Neƹḏu-t, nruḥ ɣar Surya neḍra ḏi ṯendint n Ṣur minzi aɣarrabu itxeṣṣa aḏ isers sseȓƹaṯ ḏinni.

⁴ Wami nerzu x imeḥḍaren, nufi-ṯen ḏinni neqqim akiḏsen sebƹiyyam. Ƹlaḥsab min ƹeȓmen niṯni zi Arruḥ, qqaren-as i Bulus war tgaƹƹaḏ ca cek ɣar ṯendint n Lquds.

⁵ Wami ḏaneɣ ṯeqḍa ḏinni ȓweqṯ nneɣ nekkar neffeɣ bac a nsiɣi x usafar nneɣ. Marra imeḥḍaren ruḥen akiḏneɣ ɣar barra n ṯendint s ṯemɣarin nsen ḏ ṯarwa nsen, nerkeƹ x ifadden nneɣ x yijḏi n ȓebḥar neẓẓuǧ.

⁶ Wami nemsafaḍ xasen nenya ḏeg uɣarrabu, niṯni rewwḥen ɣar ṯuḏrin nsen.

⁷ Ssenni nsiɣi x usafar nneɣ ḏi ȓebḥar zi ṯendint nni n Ṣur nexḍeȓ ɣar ṯendint n Baṭlaymus. Nseǧem x ayṯmaṯneɣ ḏinni, neqqim akiḏsen ijjen n nhar.

⁸ Ṯiwecca nnes nruḥ ɣar ṯendint n Qayṣariya nuḏef neqqim ḏi ṯeddarṯ n lmubcir Filippas. Netta ḏ ijjen zi sebƹa n ṣṣaḥaba n arrusul n Lquds.

⁹ Netta ɣares arbeƹa n ṯḥenjirin ḏ ṯiƹzriyin ssawaȓent s min ƹeǧment zi Arebbi.

¹⁰ Wami neqqim akiḏsen can wussan, yusa-d ɣarneɣ ijjen n nnabi zi Yahuḏiya qqaren-as Ɣabus.

¹¹ Iqarreb-d ɣarneɣ iysi aḥezzam n Bulus, icedd iḍaren ḏ ifassen i yixef nnes inna: "Iqqar Arruḥ iqeddsen: Ammu israʼiliyen n Lquds aḏ qqnen bab n uḥezzam-a, aṯ sellmen i yinni war iǧin ca zi Ayṯ-Israʼil."

¹² Neccin ḏ yiwḏan wami nesȓa manaya nḥeccem Bulus bac war itriḥ ca ɣar ṯendint n Lquds.

¹³ Inna-aneɣ: "Min kenniw yuɣin? Mayemmi iy ḏayi ṯeḥfarem ḏeg wuȓ s imeṭṭawen nwem? Nec aqayi mujud maci aḏayi qqnen waha. Nec aqayi mujud aḏ mmṯeɣ ḏi Lquds ƹlaḥsab isem n Siḏiṯneɣ Ƹisa!"

¹⁴ Wami nufa neccin war ṯ nseqniƹ ca, nesqar nenna: Min ixes Siḏi Arebbi aṯ igg ḏ wenni netta!

¹⁵ Menbaƹd ȓexddenni, nsewjeḏ ixef nneɣ a ngaƹƹeḏ ɣar ṯendint n Lquds.

¹⁶ Uwin-aneɣ can n imeḥḍaren zi ṯendint n Qayṣariya bac a nnewjew ɣar yijjen n bnaḏem qqaren-as Mnasun netta zi ṯendint n Qubruṣ. Netta zeg imeḥḍaren imezwura.

Arrasul Bulus itemseȓqa ak arrasul Yaƹqub

¹⁷ Wami nuweḍ ɣar Lquds, reḥḥben zzayneɣ ayṯmaṯneɣ s ȓefraḥeṯ.

¹⁸ Ṯiwecca nnes yuḏef akiḏneɣ Bulus ɣar arrasul Yaƹqub, ḥḍaren ḏinni marra imeqqranen n jmaƹeṯ n ȓmuminin.

¹⁹ Iseǧem xasen Bulus, iƹaweḏ-asen ṯa s ṯa inna-asen min igga Arebbi x ufus nnes jar yinni war iǧin ca zi Ayṯ-Israʼil.

²⁰ Wami sȓin i manayenni, ḥemḏen Arebbi nnan-as i Bulus: "Cuf ay umaṯneɣ mecḥaȓ n uȓufaṯ n israʼiliyen iy yumnen! Marra iḏsen rezzun aḏ ggen lwajib ƹlaḥsab ccariƹa nneɣ.

²¹ Itwanna-yasen zaƹma cek ṯseȓmaḏeḏ marra israʼiliyen iy zeddɣen ḏi lxarij aḏ semḥen ḏi Musa, ṯeqqareḏ-asen war ṭehhareṯ ca i ṯarwa nwem, war ḏeffareṯ ca lƹadaṯ nneɣ.

²² Bȓa ccekk aḏ sȓen qa cek illa ṯusiḏ-d. Iwa, mammec ɣa negg?

²³ Iḏen, min ḏac ɣa nini egg-iṯ. Cuf, ɣarneɣ arbeƹa n iryazen ggin ȓƹaheḏ ak Siḏi Arebbi.

²⁴ Awi yina xeǧes xasen axmi ɣa ṯeggem marra kenniw ȓuḍu nni aṣebḥan bac niṯni aḏ ḥeffen aḏ ḏewȓen ḏ iqeccura. Ammu aḏ ssnen marra min xak itwannan war iǧi bu ḏ ṣṣaḥ. Cek s yixef nnec ṯḏeffareḏ ccariƹa nneɣ.

²⁵ Walakin ƹlaḥsab ȓmuminin nni war iǧin ca zi Ayṯ-Israʼil, nura-yasen ṯabrat numar-iṯen aḏ beƹƹḏen x lmakla itwaqeddmen i lʼaṣnam, ḏ iḏammen, ḏ min itwajeyyfen, ḏ lfasad."

²⁶ Ṯiwecca nnes yuwi Bulus iryazen nni akiḏes, igga ȓuḍu nni aṣebḥan akiḏsen. Yuḏef ɣar ṯemziḏa ṯameqqrant aḏ iƹȓem ȓfuqaha x ȓweqṯ iy ḏi ɣa kemmȓen nhuraṯ nni iqqimen x uṣeffi nsen, iƹni ȓweqṯ iy ɣa qeddmen ȓfuqaha dbiḥaṯ i arbeƹa-ya.

Teṭṭfen Arrasul Bulus ḏi ṯemziḏa ṯameqqrant

²⁷ Wami ƹȓayen aḏ kemmȓen sebƹa nni n nhuraṯ n ȓuḍu, can israʼiliyen zi lʼiqlim n Asya ẓrin Bulus ḏi ṯemziḏa ṯameqqrant samaren xas marra ȓɣaci nni temzaḥamen xas.

²⁸ Snekkaren ṯɣuyyeṯ qqaren: "Ay iryazen n Ayṯ-Israʼil! Qa aryaz-a wenni iseȓmaḏen iwḏan marra ḏi mkuȓ amcan irezzu aḏ ƹarrḍen ccaƹb nneɣ ḏ ccariƹa nneɣ ḏ umcan-a nneɣ! Ƹaweḏ isiḏef-d iyunaniyen ɣar ṯemziḏa ṯameqqrant, isexnaz amcan-a muqeddes."

²⁹ Nnan manayenni minzi tuɣa ẓrin akiḏes ḏi ṯendint ijjen n bnaḏem qqaren-as Trifumu zi Ayṯ-Ufasus, itɣiȓ-asen Bulus isiḏef-iṯ ɣar ṯemziḏa ṯameqqrant.

³⁰ Ṯekkar ȓfawḍa ḏi ṯendint marra. Kkaren yiwḏan nni uzzȓen ɣar Bulus ṭṭfen-ṯ, jarren-ṯ zi ṯemziḏa ṯameqqrant ɣar barra ȓexddenni bellƹen ṯiwwura.

³¹ Wami rezzun aṯ nɣen, yuweḍ ȓexbar ɣar arrayes n ȓƹaskar n arrumanus ṯekkar ijjen n ȓfawḍa ḏi Lquds marra.

³² Iruḥ netta ḏeɣya yuwi akiḏes ȓƹaskar ḏ imeqqranen nsen yuzzeȓ ɣarsen. Israʼiliyen wami ẓrin arrayes ḏ ȓƹaskar nnes, bedden war qqimen ca ƹaḏ ccaṯen Bulus.

³³ Iqarreb arrayes nni ɣar Bulus iṭṭef-iṯ, yumar aṯ qqnen s ṯnayen n snaseȓ. Isseqsa xas inna-asen: Wanita min iƹna ḏ min igga?

³⁴ Ȓɣaci nni snekkaren ṯɣuyyeṯ kuȓ ijjen min iqqar. Wami arrayes nni war ifhim ca nican man ssabab n ssdaƹ nni, yumar aṯ siȓin ɣar lqecla.

³⁵ Wami yuweḍ Bulus ɣar ddruj, arbun-ṯ ȓƹaskar siȓin-ṯ ƹlaḥsab amenɣi nni n yiwḏan.

³⁶ Minzi ḏeffaren-ṯ snekkaren ṯɣuyyeṯ qqaren ysim xaneɣ wanita!

Arrasul Bulus itḏafaƹ x yixef nnes

³⁷ Wami ƹȓayen aḏ siḏfen Bulus ɣar lqecla nni, inna-as i arrayes n ȓƹaskar: "Smeḥ-ayi ac iniɣ ijjen n wawaȓ." Inna-as arrayes nni i Bulus: "Mammec teggeḏ cek ṯessawaȓeḏ ṯayunaniṯ?

³⁸ Ma war ṯeǧiḏ ca cek ḏ amiṣri nni iy iggin lfitna ḏi ȓiyyam nni wami ṯsuyureḏ arbeƹaȓaf n lʼirhabiyen ɣar ȓexȓa?"

³⁹ Inna-as Bulus: "Lla, nec ḏ aʼisraʼili, ljinsiya inu zi ṯendint maƹrufa n Ṭarsus ḏi lʼiqlim n Kilikya. Tettareɣ zzayec aḏayi ṯsemḥeḏ aḏ ssiwȓeɣ ak yiwḏan-a."

⁴⁰ Wami iy ṯ ijja arrayes n ȓƹaskar aḏ issiweȓ, ibedd Bulus x ddruj iceyyar-asen s ifassen nnes. Niṯni sqaren, issiweȓ akiḏsen s lluɣa lƹibriya inna-asen: