Ȓexḏayem 20 - Ṯarifiṯ 2020

Arrasul Bulus aqaṯ ḏi Lyunan ḏ lʼiqlim n Masidunya

¹ Ṯkemmeȓ ȓfawḍa nni, menbaƹd Bulus iȓaɣa-d x imeḥḍaren icejjeƹ-iṯen. Ssenni imsafaḍ xasen, iruḥ isafer ɣar lʼiqlim n Masidunya.

² Itcejjaƹ imeḥḍaren ḏinni s waṭṭas n wawaȓen. Wami iƹḏu ḏi jwayeh nni, yuweḍ ɣar Lyunan

³ ikka ḏinni ṯeȓt-chur. Wami ƹȓayen aḏ iney Bulus ḏeg uɣarrabu aḏ iraḥ ɣar Surya, ciṭṭnen israʼiliyen bac aṯ nɣen. X manaya netta igga aḏ iƹqeb x ubriḏ n Masidunya.

⁴ Isafer akiḏes Supatrus mmis n Piru zi ṯendint n Birya, ḏ Aristarxus ḏ Sakundus niṯni zi ṯendint n Salunik, ḏ Ɣayus zi ṯendint n Dirba, ḏ Timutawus ḏ Tuciq ḏ Trifumu niṯni zi lʼiqlim n Asya.

⁵ Yina izwaren-aneɣ trajan-aneɣ ḏi ṯendint n Traws.

⁶ Wami iƹḏu Ȓƹiḏ n Ṯefḍirṯ, nenya ḏeg uɣarrabu neffeɣ zi ṯendint n Filippi. Menbaƹd i xemsiyyam neḏfar-iṯen ɣar ṯendint n Traws, neqqim ḏinni sebƹiyyam.

Arrasul Bulus isekkar-d ijjen n uḥenjir zi ȓmewṯ

⁷ Ḏeg wass amezwaru n simana nmun neccin a necc aɣrum, issiweȓ Bulus ak yiwḏan. Iqqim issawaȓ aȓ uzyen n ǧiȓeṯ minzi ṯiwecca nnes inwa aḏ isafer.

⁸ Ḏinni aṭṭas n ȓeqnaḏeȓ ḏi ṯɣurfat nni mani nmun.

⁹ Ḏinni ijjen n uḥenjir qqaren-as Yutikus iqqim netta x ṯenharṯ n ṯburjat. Iȓha Bulus itemharwaḍ, aḥenjir nni iṭṭef-iṯ yiḍeṣ iɣelleb xas yiḍeṣ nni uca iwḍa zi ṯȓaṯa n ṭṭbaqaṯ aȓ ṯmurṯ ufin-ṯ immuṯ.

¹⁰ Ihwa-d Bulus yuḍaȓ ɣares iysi-iṯ-iḏ s ifassen. Inna-asen: War teggwḏem ca, aqa iƹqeb-as-d buḥbeȓ nnes.

¹¹ Iruḥ Bulus igaƹƹeḏ sennej, irza aɣrum icca. Issiweȓ aṭṭas aȓ wami ḏ ȓefjar ikkar yuyur.

¹² Iwḏan nni twacejjƹen aṭṭas wami aḥenjir nni srewwḥen-ṯ iddar.

Arrasul Bulus itsafar zi Traws ɣar Militus

¹³ Itafeq Bulus akiḏneɣ bac neccin a nsafer ɣar ṯendint n Wassus ḏeg uɣarrabu netta aḏ d yas x iḍaren, menbaƹd a nemseȓqa ḏinni aṯ nesney akiḏneɣ ḏeg uɣarrabu.

¹⁴ Wami xaneɣ d iḥreṯ ḏi ṯendint n Wassus, nesney-iṯ-iḏ akiḏneɣ ḏeg uɣarrabu nruḥ ɣar ṯendint n Mitilini.

¹⁵ Ssenni nsafer ḏeg uɣarrabu, ṯiwecca nnes nuweḍ ɣar ṯeyzirṯ n Kiyus. Wis ṯeȓtiyyam nuweḍ zzaṯ i ṯeyzirṯ n Samus. Wis arbeƹiyyam nuweḍ ɣar ṯendint n Militus.

Arrasul Bulus itemsafaḍ x imeqqranen n ȓmuminin

^16-17 Zi ṯendint nni n Militus issekk Bulus ɣar ṯendint n Ufasus iȓaɣa-d x imeqqranen n jmaƹeṯ n ȓmuminin bac aɣares d asen. Tuɣa igga Bulus aḏ ikk x ȓebḥar x uɣezḏis n ṯendint n Ufasus ig iǧan ḏi lʼiqlim n Asya bac war itƹeṭṭaȓ ca ḏinni. Itqeǧiq bac aḏ yaweḍ ḏeɣya ɣar ṯendint n Lquds imken qbeȓ i Ȓƹiḏ n nhar wis xemsin.

¹⁸ Wami ɣares d usin imeqqanen nni inna-asen: "Kenniw qa ṯessnem mammec tƹiceɣ marra ȓweqṯ nni iy tuɣa akiḏwem qqimeɣ, zi nhar nni amezwaru iy d uḏfeɣ ɣar Asya.

¹⁹ Xeddmeɣ i Siḏi Arebbi bȓa ttakebbur, s imeṭṭawen inu kkint xafi ȓemḥayen wami xayi ciṭṭnen israʼiliyen.

²⁰ War zzaywem snuffareɣ walu, nec txebbareɣ-kenniw s marra min kenniw ɣa inefƹen. Seȓmaḏeɣ-awem-ṯ zzaṯ i yiwḏan u ƹaweḏ zi ṯeddarṯ ɣar ṯeddarṯ.

²¹ Ƹeǧmeɣ i israʼiliyen ḏ iyunaniyen bac aḏ tuben ɣar Arebbi aḏ amnen s Siḏiṯneɣ Ƹisa.

²² Nec nhara ggureɣ ɣar ṯendint n Lquds ḏ Arruḥ iy ḏayi itawin ḏinni, war ssineɣ min ḏayi ɣa iweqƹen.

²³ Innama, ḏi mkuȓ ṯendint iƹeǧem-ayi-d Arruḥ iqeddsen qa itraja-ayi ȓeḥbes ḏ tamara.

²⁴ Walakin war ticceɣ bu lhimma i ṯuḏarṯ inu. Nec aḏ kemmȓeɣ minxef d usiɣ ḏ ȓxeḏmeṯ iy zi ḏayi ikellef Siḏiṯneɣ Ƹisa, iƹni aḏ cehḏeɣ x L'injil n arḍa n Arebbi.

²⁵ Ȓexxu kenniw umi beccareɣ s ȓmulk n Arebbi ssneɣ nec belli uȓa ḏ ijjen zzaywem ma aḏ iẓer aɣembub inu ssa aȓ ṯsawent.

²⁶ X manaya qqareɣ-awem nec zi nhara tberriɣ ixef inu zeg iḏammen nwem marra.

²⁷ Liʼanna nec war zzaywem snuffareɣ walu zi marra min inewwa Arebbi aṯ igg.

²⁸ Ḥḍaṯ ixef nwem. Ḥḍaṯ ṯḥimerṯ nwem, ṯenni iy zi kenniw ikellef Arruḥ iqeddsen. Arewseṯ jmaƹeṯ n ȓmuminin n Arebbi qa netta iseɣ-it s iḏammen nnes.

²⁹ Cuf, ssneɣ xmi ɣa uyureɣ nec aḏ d aḏfen jarawem can n wuccanen iwƹaren war reḥḥmen ca ṯḥimerṯ.

³⁰ Ƹaweḏ zzaywem aḏ d meḍharen can iṯarrasen aḏ sƹewwjen lḥaqiqa ḥima aḏ jarren ɣarsen imeḥḍaren.

³¹ Iwa iȓiṯ ƹlabal! War tettum ca nec ṯeȓt-snin iy kiḏwem kkiɣ, qqimeɣ tweṣṣiɣ mkuȓ ijjen zzaywem ǧiȓeṯ ḏ wass s imeṭṭawen inu.

³² Ay ayṯma, ȓexxu axawem weddiɣ, iȓiṯ ag Arebbi ḏ wawaȓen n arḍa nnes. Awaȓen-a ḏaysen ṯizemmar aḏawem ucen jjheḏ aḏawem ucen ȓwarṯ ak marra ȓmuminin ṣṣaliḥin.

³³ Nec ƹemmarṣ war ḍmiƹeɣ i yixef inu can n ddheb niɣ ḏ nnuqarṯ niɣ ḏ warruḍ n can ḥadd.

³⁴ Kenniw ṯessnem nec tuɣa xeḏmeɣ s ifassen inu bac aɣari yiȓi min ḥḏajeɣ nec ḏ min ḥḏajen yinni akiḏi.

³⁵ S marra manaya smeḍhareɣ-awem-d mammec itxeṣṣa-yaneɣ a nexḏem mliḥ bac a nƹawen yinni iḥḏajen. A nfekkar ḏeg wawaȓ n Siḏiṯneɣ Ƹisa iy inna: Ssaƹḏ n wenni iticcen ktar zeg wenni iqebbȓen."

³⁶ Wami inna Bulus ṯimesȓayin-a, irkeƹ x ifadden ḏ yinni marra netta iẓẓuǧ.

³⁷ Ḏerrƹen-as i Bulus bḏan tseǧamen xas, trun marra iḏsen.

³⁸ Xeyyqen aṭṭas s wawaȓ nni iy ḏasen inna war ṯẓerrem ca aɣembub inu ssa aȓ ṯsawent. Ssenni uwin-ṯ ɣar uɣarrabu.