Ȓexḏayem 18 - Ṯarifiṯ 2020

Arrasul Bulus ḏi ṯendint n Kurinṯ

¹ Menbaƹd iffeɣ Bulus zi ṯendint n Utina iruḥ ɣar ṯendint n Kurinṯ.

^2-3 Yufa ḏinni ijjen n uʼisraʼili netta ḏ mmis n lʼiqlim n Punṭus qqaren-as Akilas. Netta tuɣa yusa-d ḏeg wussan nni zi ṯmurṯ n Iṭalya netta ḏ ṯemɣarṯ nnes umi qqaren Priskila. Liʼanna Lmalik Kludyus tuɣa yumar x marra Ayṯ-Israʼil aṯen sufɣen zi Ruma. Iruḥ Bulus ɣar Wakilas ḏ Priskila aṯen iẓer. Iqqim akiḏsen, ixeddem akiḏsen minzi niṯni ȓxeḏmeṯ nsen ḏ icten teggen iqiḍan.

⁴ Mkuȓ nhar n ssebṯ n lƹibada Bulus itemnaqac ak Ayṯ-Israʼil ḏ iyunaniyen ḏi ṯemziḏa bac aṯen iseqneƹ.

⁵ Wami d ixḍeȓ Silas ḏ Timutawus zi lʼiqlim n Masidunya, ibḏa Bulus ixeddem ɣir s ttebcir u ṣafi, icehheḏ i Ayṯ-Israʼil belli Ƹisa netta ḏ Lmasiḥ.

⁶ Wami bḏan tƹarraḍen-as tbuṣaren xas, imseḥ arruḍ nnes am yijjen n chaḏeṯ xasen inna-asen: "Iḏammen nwem x yirawen nwem, qa nec tberriɣ azeǧif inu zzaywem. Ssa aȓ ṯsawent aḏ raḥeɣ ɣar yinni war iǧin ca zi Ayṯ-Israʼil."

⁷ Iffeɣ-d ssenni iruḥ ɣar ṯeddarṯ n yijjen n uryaz iƹebbḏen Arebbi qqaren-as Titus Yustus, ṯaddarṯ nnes aqat ṭṭarf i ṯemziḏa nni.

⁸ Ȓefqih n ṯemziḏa nni qqaren-as Krispus, yumen s Siḏiṯneɣ netta ḏ marra ȓeḥbab nnes. Xarebbi n yiwḏan zi ṯendint n Kurinṯ wami sȓin i wawaȓ n Bulus, umnen twaṭehharen s waman.

⁹ Ijjen n ǧiȓeṯ yuḥa-yas-d Siḏi Arebbi i Bulus inna-as: "War teggweḏ ca, siweȓ war stuka ca.

¹⁰ Nec aqayi akiḏec, cek war c itḍarri ḥadd zeg yinni xak d ɣa ihejmen minzi nec ɣari aṭṭas n ccaƹb inu ḏi ṯendint-a."

¹¹ Iqqim ḏinni Bulus ƹam u sett-chur iseȓmaḏ netta awaȓ n Arebbi i yiwḏan.

¹² Walakin ḏi ȓweqṯ nni n Galyun lƹamil n lʼiqlim n Uxaya, munen israʼiliyen hejmen x Bulus uwin-ṯ ɣar lmaḥkama.

¹³ Nnan aryaz-a isqenneƹ iwḏan aḏ ƹebḏen Arebbi ḍed i ȓqanun.

¹⁴ Wami ƹȓayen aḏ issiweȓ Bulus ikkar lƹamil Galyun inna-asen i israʼiliyen nni: "Maƹlik ṯceṯcam x can n ccarr niɣ x can n ljarima ḏ ṯaƹeffant, ataf ɣarwem ȓḥaqq aɣarwem ṣennṭeɣ.

¹⁵ Walakin manaya ḏ lxilaf jarawem kenniw ḏeg wawaȓen ḏ yisemawen ḏ ccariƹa nwem. Ḥellem manaya nniṯ jarawem. Bȓa ma aḏ iȓiɣ nec ḏ ȓqaḍi x ṯmesȓayin-a jarawem."

¹⁶ Ssenni yuzzeȓ-d xasen zi lmaḥkama.

¹⁷ Kkaren marra iḏsen ṭṭfen Sastin ȓefqi n ṯemziḏa n Ayṯ-Israʼil uwṯin-ṯ zzaṯ i lmaḥkama. Galyun netta war ṯ icqi ca manayenni qaƹ.

Iteƹqab Arrasul Bulus ɣar Wanṭakya

¹⁸ Iqqim ƹaḏ Bulus aṭṭas n wussan ḏi ṯendint n Kurinṯ. Ssenni imsafaḍ x ayṯmas ḏinni, inya ḏeg uɣarrabu iruḥ ɣar Surya akiḏes Priskila ḏ Wakilas. Tuɣa iḥeff Bulus acewwaf nnes ḏi ȓemwiyi umi qqaren Kanɣarya minzi tuɣa xas ȓƹaheḏ iy igga ak Siḏi Arebbi.

¹⁹ Uwḍen ɣar ṯendint n Ufasus, ijja Bulus ḏinni Priskila ḏ Wakilas, ssenni yuḏef ɣar ṯemziḏa bac aḏ imnaqac ak israʼiliyen.

²⁰ Ttaren zzayes israʼiliyen-a aḏ iqqim ƹaḏ ktar walakin netta yugi.

²¹ Wami xasen imsafaḍ inna-asen qa meȓa ixes Arebbi, ƹaḏ aḏ d ƹeqbeɣ. Ssenni inya ḏeg uɣarrabu iffeɣ zi ṯendint nni n Ufasus.

²² Wami yuweḍ ɣar ṯendint n Qayṣariya, igaƹƹeḏ ɣar Lquds iseǧem x jmaƹeṯ n ȓmuminin, ssenni yuyur ɣar ṯendint n Wanṭakya.

²³ Wami iy ḏayes ikka can ȓweqṯ, iffeɣ iƹḏu ḏi jwayeh n Galaṭya ḏ jwayeh n Frijya itegg uȓ ḏeg imeḥḍaren nni iy iǧan ḏinni marra.

Apulus itbeccar ḏi ṯendint n Ufasus ḏ lʼiqlim n Uxaya

²⁴ Ijjen n uʼisraʼili qqaren-as Apulus netta ixȓeq ḏi ṯendint n Iskandariya, yusa-d ɣar ṯendint n Ufasus. Netta ifsus ḏeg wawaȓ iɣra aṭṭas ḏi Lkutub.

²⁵ Aryaz-a iȓmeḏ x ubriḏ n Siḏiṯneɣ, issawaȓ s jjheḏ ḏ ameqqran, iseȓmaḏ nican x Ƹisa. Walakin issen ɣir x uṭehhar nni n waman ig isexḏem nnabi Yaḥya.

²⁶ Ibḏa issawaȓ ḏi ṯemziḏa n Ayṯ-Israʼil s zƹameṯ. Sȓin-as Priskila ḏ Wakilas, uwin-ṯ akiḏsen ɣar ṯeddarṯ nsen bḏan sfehhamen-ṯ ḥsen x ubriḏ n Arebbi.

²⁷ Wami ixes Apulus aḏ isafer ɣar lʼiqlim n Uxaya, cejjƹen-ṯ ayṯmas urin-asen ijjen n ṯebrat i imeḥḍaren nni n ḏinni bac azzayes reḥben. Wami yuweḍ ɣar lʼiqlim nni iƹawen aṭṭas yinni yumnen s arḍa n Arebbi.

²⁸ Liʼanna netta itemnaqac s jjheḏ ak israʼiliyen zzaṯ i yiwḏan, niṯni war zemmaren ca aṯ jawben nican minzi isbeyyen-asen-d awaȓen zi Lkutub belli netta Ƹisa ḏ Lmasiḥ.