Ȓexḏayem 16 - Ṯarifiṯ 2020

Itmun Timutawus ak arrasul Bulus ḏ Silas

¹ Yuweḍ Bulus ɣar ṯendint n Dirba ḏ ṯendint n Listra, yufa ḏinni ijjen n umeḥḍar qqaren-as Timutawus. Yemmas nettaṯ ḏ ṯaʼisraʼiliṯ ḏ ȓmumna, babas ḏ ayunani.

² Ayṯmaṯneɣ iy iǧan ḏi ṯendint n Ikunya ḏ Listra ssiwȓen mliḥ x Timutawus.

³ Igga-as ṭṭahareṯ Bulus wami ixes aṯ yawi akiḏes. Igga-as amenni ƹlaḥsab israʼiliyen iǧan ḏeg imucan nni niṯni marra ssnen belli babas ḏ ayunani.

⁴ Xmi iggur Bulus ḏ imeddukaȓ nnes zeg ubilaj ɣar ubilaj iqqar-asen ȓuṣiyaṯ nni ṯinni iy ggin arrusul ḏ imeqqranen n jmaƹeṯ n ȓmuminin ḏi Lquds ḥima aṯent ḏfaren yiwḏan.

⁵ Amenni ṯijumaƹ n ȓmuminin tejhiḏent ḏi lʼiman, kuȓ nhar yarenni lƹadad nsent.

Lwaḥi nni iy d ihwan zi Arebbi i Bulus ḏi ṯendint n Traws

⁶ Bulus ḏ imeddukaȓ nnes kkin x jwayeh n Frijya ḏ Galaṭya, war ṯen ijji ca Arruḥ iqeddsen aḏ beccaren s wawaȓ n Arebbi ḏi lʼiqlim n Asya.

⁷ Wami uwḍen ɣar lḥudud n Misya, qeǧben aḏ aḏfen lʼiqlim n Biṯinya walakin war ṯen ijji ca Arruḥ n Ƹisa.

⁸ S manaya semḥen ḏi Misya hwan ɣar ṯendint n Traws.

⁹ Ḏi ǧiȓeṯ nni ihwa-d ijjen n lwaḥi x Bulus iẓra ḏayes ijjen n uṯarras zi lʼiqlim n Masidunya ibedd itṭalab-iṯ iqqar-as zwa-d ɣarneɣ ɣar Masidunya ƹawen-aneɣ.

¹⁰ Wami ṣafi iẓra lwaḥi nni Bulus, nekkar neccin nsewjeḏ ḥima a nsafer ȓexddenni ɣar lʼiqlim n Masidunya. Nefhem belli Arebbi itȓaɣa-d xaneɣ aṯen nbeccar s Lʼinjil ḏinni.

Arrasul Bulus ḏ Silas tbeccaren ḏi ṯendint n Filippi

¹¹ Ssenni nsafer ḏeg uɣarrabu zi ṯendint n Traws, nruḥ nican ɣar ṯendint n Samutrakya. Ṯiwecca nnes nruḥ ɣar ṯendint n Niyapulis.

¹² Ssenni nruḥ ɣar Filippi, nettaṯ ḏ ijjen n ṯendint ṯusa-d ḏi lwilaya ṯamezwarut n lʼiqlim n Masidunya, staƹmaren-teṯ irumaniyen. Neqqim ḏinni ḏi ṯendint nni ȓebƹaḍ n wussan.

¹³ Ḏi nhar n ssebṯ n lƹibada neffeɣ zi ṯewwarṯ n ṯendint nruḥ ɣar ṭṭarf n yiɣzar, tɣiȓ-aneɣ a naf ḏinni ijjen n umcan n ṯẓaǧiṯ. Neqqim nessawaȓ ak ṯemɣarin nni iy nufa ḏinni imunen.

¹⁴ Akiḏsent ḏinni ijjen n ṯemɣarṯ ṯesȓa-yaneɣ qqaren-as Lidya. Nettaṯ zi ṯendint n Ṯiyatra ṯeznuza ṯcuqqet nni iy iɣȓan llun nnes ḏ llila, ṯƹebbeḏ Arebbi. Irzem-as Siḏi Arebbi uȓ nnes bac aḏ tṣenneṭ i wawaȓ n Bulus.

¹⁵ Wami ṯetwaṭehhar s waman nettaṯ ḏ ȓeḥbab nnes, ṯettar zzayneɣ ṯenna-aneɣ: "Araḥem-d ɣar ṯeddarṯ inu qqimem akiḏi iƹni meȓa ṯteyyqem belli nec umneɣ zi Siḏi Arebbi." Ṯḥeccem-aneɣ nettaṯ aȓ wami neqbeȓ.

Arrasul Bulus ḏ Silas twaḥebbsen ḏi ṯendint n Filippi

¹⁶ Ijjen n nhar wami nruḥ ɣaȓ umcan nni mani tẓaǧan yiwḏan, ṯmeȓqa akiḏneɣ ijjen n ṯismeɣṯ nettaṯ ḏ ṯakehhant tawi-d s ssiḥer nnes aṭṭas n tmenyaṯ i ayṯbab nnes.

¹⁷ Tbaƹ-aneɣ-d neccin ḏ Bulus tƹeyyaḍ ṯeqqar qa iryazen-a ƹebbḏen Arebbi Yuƹȓan, tbeccaren-kenniw s ubriḏ iy zi ɣa ṯnejmem!

¹⁸ Ṯegga manayenni aṭṭas n nhuraṯ, Bulus war ḏas iƹjib bu ȓḥaȓ. Ineqȓeb-d ɣares inna-as i jjenn nni iy ḏayes: "Nec tamareɣ-cek ƹlaḥsab isem n Ƹisa Lmasiḥ azzayes ṯeffɣeḏ." Ȓexddenni iffeɣ jjenn nni zzayes ḏeg umcan.

¹⁹ Ayṯbab n ṯismeɣṯ nni wami ufin ṯawwarṯ n lmanda nsen ṣafi ṯbelleƹ xasen, kkaren ṭṭfen Bulus ḏ Silas jarren-ṯen ɣar ssaḥa ɣar lḥukkam.

²⁰ Qeddmen-ṯen ɣar lḥukkam nnan-asen: "Iryazen-a ḏ israʼiliyen teggen-aneɣ ȓfawḍa ḏi ṯendint.

²¹ Seȓmaḏen lƹadaṯ war nzemmar ca aṯent neqbeȓ niɣ azzaysent nexḏem minzi neccin ḏ irumaniyen."

²² Ȓexddenni munen ȓɣaci hejmen x Bulus ḏ Silas, lḥukkam nni cerrgen-asen arruḍ umaren xasen bac aḏasen ucen aƹmuḏ.

²³ Uwṯin-ṯen aṭṭas s uƹmuḏ nḍaren-ṯen ḏi ȓeḥbes. Nnan-as i lḥaris n ȓeḥbes ƹess xasen mliḥ.

²⁴ Wami isȓa netta awaȓ-a, iruḥ iggi-ṯen ɣar ḏaxeȓ qaƹ n ȓeḥbes iqqen-iṯen zeg iḍaren nsen ɣar ikeccuḍen iḏeqȓen.

²⁵ Ɣar ȓwesṭ n ǧiȓeṯ Bulus ḏ Silas tẓaǧan tɣennajen izȓan i Arebbi, tesȓan-asen imeḥbas.

²⁶ Ƹlaɣafla iwqeƹ ijjen n zzinzal ḏ ameqqran aȓ wami nhezzen uȓa ḏ dsasaṯ n ȓeḥbes. Nurzment ṯewwura nnes marra, ƹaweḏ nufsȓent-asen snaseȓ i imeḥbas marra.

²⁷ Wami d ifaq lḥaris n ȓeḥbes zeg yiḍeṣ yufa ṯiwwura n ȓeḥbes nurzment tɣiȓ-as imeḥbas nni arewȓen, ijbeḏ-d ssif ḥima aḏ ineɣ ixef nnes.

²⁸ Iȓaɣa-yas-d Bulus s jjheḏ inna-as: "Lla! Ɣarek aḏ tḍarreḏ ixef nnec, qa neccin ƹaḏ aqaneɣ ḏa marra iḏneɣ!"

²⁹ Inna lḥaris n ȓeḥbes ceƹƹȓem ȓefnaraṯ. Iruḥ itazzeȓ ɣar Bulus ḏ Silas isejjeḏ-asen ɣar iḍaren nsen ibḏa iterjiji.

³⁰ Isufeɣ-iṯen-d inna-asen: "A siyaḏi, min ɣa ggeɣ bac aḏ nejmeɣ?"

³¹ Nnan-as: "Amen zi Siḏiṯneɣ Ƹisa aḏ tnejmeḏ cek ḏ ȓeḥbab nnec."

³² Bḏan tbeccaren-ṯ netta ḏ marra ȓeḥbab nnes s wawaȓ n Siḏiṯneɣ.

³³ Ḏi ṯsaƹƹat nni s ǧiȓeṯ, yuwi-ṯen lḥaris n ȓeḥbes imseḥ-asen ijarriḥen. Ȓexddenni itwaṭehhar s waman netta ḏ marra ȓeḥbab nnes.

³⁴ Yuwi-ṯen ɣar ṯeddarṯ nnes yuca-asen aḏ ccen. Ifareḥ netta ḏ marra ȓeḥbab nnes minzi umnen zi Arebbi.

³⁵ Wami d iṣbeḥ ȓḥaȓ, lḥukkam ssekken imxazniyen ɣar lḥaris n ȓeḥbes nnan-as: Ḍȓeq-asen i iryazen-a!

³⁶ Lḥaris ixebbar Bulus inna-as qa umaren-kenniw lḥukkam aḏ twaḍeȓqem. Ṣafi ffɣeṯ, ruḥeṯ ḏi ȓehna!

³⁷ Inna-asen Bulus i imxazniyen nni: "Uwṯin-aneɣ zzaṯ i yiwḏan bȓa ȓqanun nḍaren-aneɣ ḏi ȓeḥbes, walakin neccin ɣarneɣ ljinsiya n Ruma. Ȓexxu niṯni, ma rezzun aḏaneɣ sufɣen war d itarri ḥadd ȓexbar?" Inna-asen: "Lla, itxeṣṣa aḏ d asen lḥukkam nni s yixef nsen aḏaneɣ sufɣen!"

³⁸ Imxazniyen nni ruḥen ƹawḏen-asen awaȓ-a i lḥukkam, lḥukkam nni nxeȓƹen wami ssnen belli Bulus ḏ Silas ḏ irumaniyen.

³⁹ Usin-d ɣarsen tettaren zzaysen aḏasen samḥen, sufɣen-ṯen zi ȓeḥbes ttaren zzaysen aḏ ffɣen zi ṯendint.

⁴⁰ Wami ffɣen zi ȓeḥbes ruḥen ɣar ṯeddarṯ n Lidya. Ẓrin ḏinni ayṯmaṯsen cejjƹen-ṯen, ssenni uyuren.