Ȓexḏayem 14 - Ṯarifiṯ 2020

Bulus ḏ Barnaba tbeccaren ḏi ṯendint n Ikunya

¹ Ḏi ṯendint n Ikunya uḏfen Bulus ḏ Barnaba s ṯnayen iḏsen ɣar ṯemziḏa n Ayṯ-Israʼil, umnen aṭṭas n israʼiliyen ḏ iyunaniyen s ttebcir nsen.

² Walakin israʼiliyen iy yugin aḏ amnen samaren yinni war iǧin ca zi Ayṯ-Israʼil x ayṯmaṯneɣ, ƹemmaren-asen azeǧif.

³ Bulus ḏ Barnaba qqimen ḏinni aṭṭas n ȓweqṯ tbeccaren s Siḏiṯneɣ s yijjen n zƹameṯ. Igga Siḏiṯneɣ lmuƹjizaṯ ḏ lburhanaṯ x ifassen n Bulus ḏ Barnaba bac aḏ isbeyyen awaȓen nni iy tbeccaren x arḍa n Siḏiṯneɣ ḏ ṣṣaḥ.

⁴ Mesfraqen ayṯbab n ṯendint-a n Ikunya x ṯnayen. Ȓebƹaḍ iḏsen aqaṯen ak israʼiliyen, ȓebƹaḍ iḏsen aqaṯen ak arrusul.

⁵ Kkaren israʼiliyen ḏ yinni war iǧin ca zi Ayṯ-Israʼil tafqen ak arruyas nsen bac aḏ ƹedden x arrusul aṯen rejmen s uzru.

^6-7 Arrin-d ȓexbar arrusul, arewȓen ɣar ṯendint n Listra ḏ ṯendint n Dirba ḏ marra jwayeh iy ḏasent d yuḏsen tbeccaren ḏinni ḏi lwilaya n Likawniya.

Rejjmen arrasul Bulus s uzru ḏi ṯendint n Listra

⁸ Ḏi ṯendint n Listra ḏinni ijjen n uryaz ḏ anecruf mmuṯen-as iḍaren, zeg wami d ixȓeq ƹemmarṣ ma yuyur.

⁹ Itsȓa i wawaȓ n Bulus. Ixzar ḏayes mliḥ Bulus, yufa ḏayes lʼiman iy zi ɣa igenfa.

¹⁰ Iȓaɣa-d s yijjen n ṯmijja ṯejheḏ inna-as: "Kkar, bedd nican x iḍaren nnec!" Ȓexddenni inexḍef ibḏa iggur.

¹¹ Wami ẓrin ȓɣaci nni min igga Bulus, ƹeyyḍen s lluɣa n Liqunya nnan qa arebbiṯen ḏewȓen ḏ iwḏan hwan-d ɣarneɣ!

¹² Semman-as i Barnaba , semman-as i Bulus liʼanna ḏ Bulus ig itbeccaren aṭṭas.

¹³ Yusa-d ȓemqeddem n lʼaṣnam Zafas wenni ig itiȓin ḏi zzawyiṯ zzaṯ i ṯendint, yuwi-d iyenduzen yuwi-d ṯiqebbiḍin n nwar ɣar ṯewwura n ṯendint, ixes netta ḏ ccaƹb aḏasen qeddmen dbiḥeṯ i Barnaba ḏ Bulus.

¹⁴ Arrusul nni iƹni Barnaba ḏ Bulus wami sȓin awaȓ nni kkaren cerrgen arruḍ nsen. Uḏfen ḏi ȓwesṭ n yiwḏan ƹeyyḍen nnan-asen:

¹⁵ "Ay iryazen, mayemmi teggem manaya? Qa neccin ḏ iwḏan waha am kenniw am neccin kif-kif. Nuwi-awem-d ijjen n wawaȓ ḏ aṣebḥan bac aḏ tbeƹƹḏem i ṯmesȓayin-a war ineffƹen ca, aḏ tḏewȓem ɣar Arebbi iddaren iy d ixeȓqen ajenna ḏ ṯmurṯ ḏ ȓebḥar ḏ marra min ḏaysen.

¹⁶ Ḏi zmanaṯ iƹḏun, Arebbi ijja marra ȓegnus aḏ ḏfaren ibriḏen iy xsen.

¹⁷ Walakin Arebbi isbeyyan-awem-d ixef nnes s min ixeddem, iƹni itegg ȓxir iticc-awem anẓar zeg ujenna ḏ ṯfeǧaḥṯ ḏi ȓweqṯ nnes. Iteccar-awem uȓawen nwem s ȓefraḥeṯ."

¹⁸ S wawaȓ-a Bulus ḏ Barnaba sbedden-ṯen, walakin ȓɣaci nni qesḥen s waṭṭas ƹȓayen qeddmen-asen dbiḥeṯ.

¹⁹ Menbaƹḏ usin-d can israʼiliyen zi Wanṭakya ḏ Ikunya tsamaren ȓɣaci nni, arejmen Bulus s uzru jarren-ṯ barra i ṯendint tɣiȓ-asen immuṯ.

²⁰ Walakin wami xas munen imeḥḍaren, ikkar-d iddar wa ssenni yuḏef ɣar ṯendint. Ṯiwecca nnes iffeɣ ak Barnaba iruḥ ɣar ṯendint n Dirba.

Teƹqaben-d ɣar ṯendint n Wanṭakya ḏi Surya

²¹ Beccaren ḏi ṯendint nni n Dirba, arrin aṭṭas n yiwḏan ḏ imeḥḍaren. Ssenni ḏewȓen ɣar ṯendint n Listra ḏ Ikunya ḏ Wanṭakya.

²² Ggin uȓ ḏeg imeḥḍaren nni, cejjƹen-ṯen bac aḏ arnin ḏi lʼiman nsen. Qqaren-asen: U labud axaneɣ ṯekk aṭṭas n tamara bac neccin ȓmuminin a naḏef ḏi ȓmulk n Arebbi.

²³ Bulus ḏ Barnaba ixḍaren imeqqranen ḏi mkuȓ jmaƹeṯ n ȓmuminin ȓexddenni ẓẓuǧen, ẓummen, jjin-ṯen ḏeg ufus n Siḏi Arebbi iy zi umnen.

²⁴ Ssenni ƹḏun x jwayeh n Pisidya, uwḍen ɣar jwayeh n Pamfilya.

²⁵ Wami tbeccaren s wawaȓ n Arebbi ḏi ṯendint n Barja, ƹḏun ɣar ṯendint n Waṭalya.

²⁶ Wami kemmȓen ȓxeḏmeṯ nni ḏinni, ƹeqben ssenni ḏeg uɣarrabu ɣar ṯendint n Wanṭakya manis d usin qbeȓ, zi manis twakellfen s ȓxeḏmeṯ nni s arḍa n Arebbi.

²⁷ Wami uwḍen ḏinni, smunen jmaƹeṯ n ȓmuminin ƹawḏen-asen marra min igga Arebbi x ufus nsen ḏ mammec irzem-asen ṯawwarṯ n lʼiman i yinni war iǧin ca zi Ayṯ-Israʼil.

²⁸ Seƹḏun aṭṭas n ȓweqṯ ḏinni ak imeḥḍaren.