Ȓexḏayem 13 - Ṯarifiṯ 2020

Ȓmuminin ssekken-d Barnaba ḏ Cawul aḏ beccaren

¹ Ḏi jmaƹeṯ n ȓmuminin ḏi ṯendint n Wanṭakya ḏinni lʼanbiya ḏ imseȓmaḏen. Niṯni ḏ Barnaba, ḏ Simƹan wenni umi qqaren Abercan, ḏ Luqyus zi Lqurina, ḏ Manahen wenni ig irebban ak uzeǧiḏ Hirudus zi ṯemẓi nnes, ḏ Cawul.

² Wami ƹebbḏen Siḏi Arebbi tẓumman, inna-asen Arruḥ iqeddsen: Ḥuzem-ayi-d Barnaba ḏ Cawul i ȓxeḏmeṯ nni umi ṯen ixḍareɣ.

³ Wami ẓummen ẓẓuǧen, ȓexddenni sersen xasen ifassen nsen ssekken-ṯen.

⁴ Issekk-iṯen Arruḥ iqeddsen ruḥen ɣar ṯendint n Sulukya. Ssenni safaren ḏeg uɣarrabu ɣar ṯeyzirṯ n Qubruṣ.

⁵ Wami uwḍen ɣar ṯendint n Salamis bḏan tbeccaren s wawaȓ n Arebbi ḏi ṯemziḏawin n Ayṯ-Israʼil, itƹawan-iṯen Yuḥanna nni.

⁶ Uyuren ḏi ṯeyzirṯ nni amen-ṯekmaȓ aȓ wami uwḍen ɣar ṯendint n Pafus. Ufin ḏinni ijjen n useḥḥar netta ḏ aʼisraʼili yarra ixef nnes ḏ nnabi qqaren-as Benyacuƹ.

⁷ Itiȓi ak lƹamil wenni umi qqaren Sarjyus Bulus. Lƹamil nni netta ḏ ijjen n uryaz ḏ amiɣis, iȓaɣa-d i Barnaba ḏ Cawul ixes aḏas sȓemḏen awaȓ n Arebbi.

⁸ Walakin iƹarreḍ-asen useḥḥar nni Benyacuƹ (wenni umi qqaren s ṯyunaniṯ Ulimas). Netta irezzu aḏ isbeƹƹeḏ lƹamil x lʼiman.

⁹ Ikkar Cawul iƹni Bulus iccur s Arruḥ iqeddsen ixzar ḏeg useḥḥar nni mliḥ;

¹⁰ Inna-as: "Cek ḏ mmis n Ibȓis. Cek ḏ ȓaƹḏu n qaƹ min iǧan nican, ṯeccureḏ s lḥila ḏ ṯeḥraymect! Ma ƹaḏ ṯrezzuḏ aḏ tƹewwjeḏ ibriḏen iy iǧan nican n Siḏi Arebbi?

¹¹ Ssa aȓ ṯsawent Siḏi Arebbi aqaṯ ḍeḏ nnec, aḏ tḏarɣȓeḏ ataf war ṯẓerreḏ ca ṯfawṯ n ṯfuct aȓ yijjen n lmudda." Ȓexddenni ṯekka-as-d ṯacbabṯ i useḥḥar nni x ṯiṭṭawin itwaȓa ṯaǧest, iqqim itenneḍ ḏinni irezzu wi ṯ ɣa isgewwḏen s ufus.

¹² Iẓra manayenni lƹamil ȓexddenni yumen, iqqim iḏehhec s ttaƹlim n Siḏiṯneɣ.

Bulus ḏ Barnaba tbeccaren ḏi Wanṭakya ḏ Pisidya

¹³ Inya Bulus ḏ imeddukaȓ nnes ḏeg uɣarrabu, ruḥen zi ṯendint nni n Pafus ɣar ṯendint n Barja ḏi Pamfilya. Ismeḥ ḏaysen ḏinni Yuḥanna iḏweȓ-d ɣar Lquds.

¹⁴ Niṯni ffɣen zi ṯendint n Barja ruḥen ɣar ṯendint n Wanṭakya ḏi jwayeh n Pisidya. Uḏfen qqimen ḏi ṯemziḏa n Ayṯ-Israʼil ḏi nhar n ssebṯ.

¹⁵ Menbaƹd i ṯɣuri zi Lkutub n Ccariƹa n Musa ḏ lʼanbiya, ssekken arruyas n ṯemziḏa awaȓ nsen i Barnaba ḏ Cawul nnan-asen: "Ay ayṯma, meȓa ɣarwem can wawaȓ iy zi ɣa ṯcejjƹem ccaƹb-a, inim-asen-ṯ."

¹⁶ Ikkar iceyyar-asen Bulus s ufus inna-asen: "Ay iryazen n Ayṯ-Israʼil ay yinni iteggwḏen Arebbi, ṣennṭeṯ.

¹⁷ Fa Arebbi iy iǧan x ccaƹb n Ayṯ-Israʼil ixḍar netta ȓejḏuḏ nneɣ, yarni lƹadad nsen wami niṯni tuɣa zeddɣen ḏi Miṣra. Isufeɣ-iṯen ssenni s jjheḏ nnes.

¹⁸ Ṯumma iṣbar akiḏsen ḏeg uƹeṣṣay nsen can arbeƹin sna ḏi ṣṣaḥra.

¹⁹ Ṯumma iqḍa x sebƹa n ȓegnus ḏi ṯmurṯ n Kanƹan, ṯamurṯ nni iswarṯ-it i ȓejḏuḏ nneɣ.

²⁰ Marra manayenni ikka xasen ijjen arbeƹmiyya u xemsin sna. Ṯumma igga xasen ȓquḍaṯ aȓ ȓweqṯ nni n nnabi Ṣamwil.

²¹ Ṯumma ttaren-as i Arebbi aɣarsen yiȓi ijjen n uzeǧiḏ nsen, ssenni yuca-asen Cawul mmis n Qays zi Ayṯ-Benyamin. Iḥkem xasen netta arbeƹin iseggwusa.

²² Ṯumma ikkes-iṯ Arebbi, yarra Dawed ḏ azeǧiḏ xasen. Icheḏ xas inna qa ufiɣ Dawed mmis n Yassa netta ḏ ijjen n uryaz iqbeȓ ȓxaḍar inu aḏ igg marra min xseɣ.

²³ Ṯumma zi ddurriṯ n Dawed issekk-d Arebbi Ƹisa ɣar Ayṯ-Israʼil iƹni wenni iy ṯen ɣa isnejmen, mammec ṯen iwƹeḏ zi qbeȓ.

²⁴ Qbeȓ ma aḏ iraḥ ɣarsen Ƹisa, tuɣa ḏinni Yaḥya itbeccar marra ccaƹb n Ayṯ-Israʼil ḥima aḏ tuben aḏ twaṭehharen s waman.

²⁵ Wami Yaḥya ƹȓayen aḏ ikemmeȓ ȓxeḏmeṯ nnes inna-asen: Min ḏayi tarrim kenniw? Qa nec war ǧiɣ ca ḏ wenni iy trajam! Menbaƹd i nec aḏ d yas ijjen war sḏihiǧeɣ aḏas fesyeɣ uȓa ḏ ifiȓan n ṯsiȓa iqqen ḏeg iḍaren nnes."

²⁶ Inna-asen Bulus: "Ay ayṯma, a ṯarwa n Brahim, ay yinni iteggwḏen Arebbi! Qa ḏ neccin umi d issekk Arebbi awaȓ-a iy zi ɣa nenjem.

²⁷ Qa imezḏaɣ n Lquds ḏ arruyas nsen war ƹqiȓen ca Ƹisa-ya, war fhimen ca awaȓen n lʼanbiya ḏi Lkutub iy qqaren ḏi ṯemziḏawin zi ssebṯ ɣar ssebṯ. Wami ḥekmen x Ƹisa s ȓmewṯ ffɣen-d wawaȓen nni iy nnan lʼanbiya.

²⁸ Waxxa war ufin uȓa ḏ ijjen n ssabab iy zi ɣa xas ḥekmen s ȓmewṯ, walakin ttaren i Bilaṭus aṯ ineɣ.

²⁹ Wami ggin marra min tuɣa xas urin lʼanbiya, sehwan-ṯ-iḏ zi ṯeḥnact sersen-ṯ ḏeg unḍeȓ.

³⁰ Walakin Arebbi isekkar-iṯ-iḏ zi ȓmewṯ.

³¹ Ṯumma imeḍehhar-d Ƹisa ḏeg waṭṭas n nhuraṯ i yinni tuɣa igaƹƹḏen akiḏes zi ṯmurṯ n Ljalil ɣar ṯendint n Lquds. Ȓexxu yina iǧan ḏ ȓechuḏ nnes ɣar ccaƹb.

^32-33 Fa neccin netbeccar-ikenniw s manaya. Iƹni Arebbi wami d isekkar Ƹisa zi ȓmewṯ ṣafi ikemmeȓ min zi tuɣa iwƹeḏ ȓejḏuḏ nneɣ, ikemmeȓ-iṯ akiḏneɣ neccin iǧan ḏ ṯarwa nsen. Aqa yura ḏi Lkitab n Zzabur ḏeg yizȓi wis ṯnayen: Aqa cek ḏ Mmi, nhara nec ḏewȓeɣ ḏ Babac.

³⁴ Fa Arebbi isekkar-d Ƹisa zi ȓmewṯ iƹni ƹemmarṣ aḏ ikiccew. Amenni iqqar Lkitab:

³⁵ Amenni iqqar ƹaweḏ Lkitab:

³⁶ Liʼanna Dawed ḏi zman nnes wami ikemmeȓ min ixes Arebbi ṣafi immuṯ, itwanḍeȓ ṭṭarf i ȓejḏuḏ nnes ṣafi ikiccew.

³⁷ Walakin wenni d isekkar Arebbi zi ȓmewṯ netta lla war ikiccew ca.

^38-39 Iḏen ay ayṯma, rezzuɣ aḏ tessnem s wawaȓ-a belli s Ƹisa-ya iy zi ɣa twaɣfarent ȓmuƹṣiyaṯ. Marra wenni zzayes ɣa yamnen as twaɣfarent marra ȓmuƹṣiyaṯ nnes; Lɣufran-a wanita war izemmar ca aḏ yiȓi s Ccariƹa n Musa.

⁴⁰ Iwa ḥḍaṯ ixef nwem bac war ḏawem itewqiƹ ca min urin lʼanbiya:

⁴¹ Xzareṯ a yinni itbuṣaren, tƹejjbeṯ fnaṯ. Ḏi ȓiyyam nwem aḏ ggeɣ can ṯmesȓayin waxxa ixebbar-ikenniw ḥadd zzaysent, war ṯ timnem ca."

⁴² Wami kkaren Bulus ḏ Barnaba aḏ d ffɣen zi ṯemziḏa nni n Ayṯ-Israʼil, ttaren zzaysen yiwḏan nni aḏasen ḥeddṯen s manayenni nhar n ssebt iy d ɣa yasen.

⁴³ Wami d teffɣen zi ṯemziḏa, ḏfaren-ṯen aṭṭas n israʼiliyen ḏ yinni iseȓmen ḏi ddin n Ayṯ-Israʼil iy teggwḏen Arebbi. Bulus ḏ Barnaba ssiwȓen akiḏsen cejjƹen-ṯen ḥima aḏ arnin ḏi arḍa n Arebbi.

⁴⁴ Wami d ṯuweḍ sebṯ nni, munen ƹȓayen marra ayṯbab n ṯendint ḥima aḏ ṣennṭen i wawaȓ n Siḏi Arebbi.

⁴⁵ Ayṯ-Israʼil wami ufin ȓɣaci aṭṭas bḏan ḥessḏen aṭṭas arrusul bḏan tƹarraḍen i wawaȓ n Bulus, tukkaren-ṯ.

⁴⁶ Bulus ḏ Barnaba nnan-asen s yijjen n zƹameṯ: "Neccin tuɣa itxeṣṣa aḏawem nessiweȓ i kenniw ḏ imezwura s wawaȓ n Arebbi. Wami ṯugim, ṯḥekmem x yixef nwem belli kenniw war ṯesḏiheǧem ca ṯuḏarṯ n ȓebda, ȓexxu qa neccin a nraḥ ɣar yinni war iǧin ca zi Ayṯ-Israʼil.

⁴⁷ Liʼanna Siḏi Arebbi iweṣṣa-yaneɣ inna-aneɣ: "

⁴⁸ Yinni war iǧin ca zi Ayṯ-Israʼil wami sȓin min inna Bulus, farḥen ḥemmḏen i wawaȓ n Siḏi Arebbi. Umnen marra yinni ixḍar Arebbi i ṯuḏarṯ n ȓebda.

⁴⁹ Intacar wawaȓ n Siḏi Arebbi ḏi ṯmurṯ nni marra.

⁵⁰ Walakin israʼiliyen samaren ṯimɣarin iy ḏaysent ddin ɣarsent lmartaba, ƹaweḏ samaren imeqqranen n ṯendint. Teggen ssabab i yiwḏan ḥima aḏ ƹeddben Bulus ḏ Barnaba uca uzzȓen xasen zi jjiheṯ nni.

⁵¹ Kkaren Bulus ḏ Barnaba mesḥen ṯaƹejjact zeg iḍaren nsen am yijjen n chaḏeṯ xasen, ruḥen ɣar ṯendint n Ikunya.

⁵² Imeḥḍaren iǧan ḏinni ccuren s ȓefraḥeṯ ḏ Arruḥ iqeddsen.