Ȓexḏayem 12 - Ṯarifiṯ 2020

Arrasul Buṭrus inejjem zeg ufus n Lmalik Hirudus

¹ Ḏi ȓweqṯ nni, azeǧiḏ Hirudus ibḏa itƹeddab ȓebƹaḍiṯ zi jmaƹeṯ n ȓmuminin.

² Netta yumar uca nɣin s ssif Yaƹqub umas n Yuḥanna.

³ Wami yufa manayenni iƹjeb-asen i Ayṯ-Israʼil ikkar iṭṭef uȓa ḏ Buṭrus. Ḏi ȓiyyam n Ȓƹiḏ n Ṯefḍirṯ iy ḏi iwqeƹ manayenni.

⁴ Iṭṭef-iṯ iggi-ṯ ḏi ȓeḥbes, isellem-iṯ i arbeƹa n lfirqaṯ n ȓƹaskar aṯ ḥḍan, mkuȓ lfirqa ḏayes arbeƹa. Inwa axas iḥkem zzaṯ i ccaƹb menbaƹd i Ȓƹiḏ Ameqqran.

⁵ Tƹessasen x Buṭrus ḏi ȓeḥbes, jmaƹeṯ n ȓmuminin tettaren xas i Arebbi.

⁶ Ǧiȓeṯ nni iy ḏi d ɣa iṣebbeḥ Hirudus aḏ iḥkem x Buṭrus zzaṯ i ccaƹb, tuɣa Buṭrus iṭṭeṣ jar ṯnayen n ȓƹaskar icedd s ṯnayen n snaseȓ. Ȓƹaskar nneɣni ɣar ṯewwarṯ tƹessasen x ȓeḥbes.

⁷ Ȓexddenni ṯmeḍhar-d ḏinni ijjen n lmalaʼika n Siḏi Arebbi, itceƹciƹ-d ijjen n nnur ḏi ȓeḥbes. Lmalaʼika nni ṯuwṯa Buṭrus ɣar uɣezḏis nnes ṯesfaq-iṯ-iḏ ṯenna-as: "Kkar ḏeɣya!" Uca snaseȓ nni fesyent zeg ifassen nnes.

⁸ Ṯenna-as lmalaʼika nni: "Kkar ḥezzem, qqen ṯisiȓa nnec." Igga Buṭrus min ḏas ṯenna. Ṯenna-as ƹaweḏ: "Egg azeǧab nnec, ḏfar-ayi-d."

⁹ Ikkar Buṭrus iffeɣ iḏfar-it, war issin ca min tegg lmalaʼika nni ma ḏ ṣṣaḥ ma lla, itɣir-as yuḥa-yas-d Arebbi.

¹⁰ Ƹḏun x uƹessas amezwaru ḏ wis ṯnayen. Uwḍen ɣar ṯewwarṯ n ȓeḥḏiḏ ṯenni itawin ɣar ṯendint, ṯerzem waḥḏes ffɣen. Ȓexddenni wami gguren ḏeg yijjen n zzenqeṯ ṯesmeḥ ḏayes lmalaʼika nni.

¹¹ Ḏinni iy d yarra Buṭrus ȓbaȓ nnes inna: "Ȓexxu ssneɣ manaya ḏ ṣṣaḥ qa issekk-ayi-d Siḏi Arebbi lmalaʼika nnes, isenjem-ayi-d zeg ifassen n Hirudus ḏ marra min xsen aḏayi ggen Ayṯ-Israʼil."

¹² Wami ifṭen ḏi manaya, iruḥ ɣar ṯeddarṯ n Maryam yemmas n Yuḥanna umi qqaren Marqus, tmunen ḏinni aṭṭas n yiwḏan tẓaǧan.

¹³ Buṭrus tuɣa isqerqub ḏi ṯewwarṯ n barra, ṯruḥ ɣares ijjen n ṯxeddant qqaren-as Ruda aḏas terzem.

¹⁴ Wami ṯeƹqeȓ awaȓ n Buṭrus ṯfareḥ aṭṭas, walakin qbeȓ ma aḏ terzem ṯawwarṯ ṯeƹqeb-d ɣarsen ṯuzzeȓ ṯenna-asen qa Buṭrus aqaṯ ɣar ṯewwarṯ isqerqub.

¹⁵ Nnan-as: "Ma ṯbuhȓiyeḏ niɣ?" Walakin nettaṯ metʼakkeda belli min ṯenna nican. Nnan-as: "Waqila wanita ḏ buḥbeȓ n Buṭrus waha."

¹⁶ Iqqim Buṭrus isqerqub ƹaḏ ḏi ṯewwarṯ. Wami ḏas rezmen ufin-ṯ ḏ netta, qqimen tƹejjben.

¹⁷ Iqqar-asen s ufus stukaṯ, ssenni iƹaweḏ-asen mammec iy ṯ isufeɣ Siḏi Arebbi zi ȓeḥbes. Inna-asen: "Xebbarem Yaƹqub ḏ ayṯmaṯneɣ s min iweqƹen." Iffeɣ iruḥ ɣar yijjen n umcan nneɣni.

¹⁸ Wami iṣbaḥ ȓḥaȓ iwqeƹ ijjen n umenɣi ḏ ameqqran jar ȓƹaskar manis ikka Buṭrus.

¹⁹ Hirudus issekk axas rzun, war ṯ yufi ca. Wami ḏasen igga lʼistijwab i iƹessasen nni, yumar aṯen nɣen. Ssenni iffeɣ uzeǧiḏ Hirudus zi ṯmurṯ n Yahuḏiya iruḥ ɣar ṯendint n Qayṣariya iqqim ḏinni.

Ȓmewṯ n uzeǧiḏ Hirudus

²⁰ Tuɣa iɣḍeb x imezḏaɣ n ṯendint n Ṣur ḏ ṯendint n Ṣayda. Kkaren imezḏaɣ nni rezzun aḏ meṣȓaḥen ak uzeǧiḏ Hirudus liʼanna lmakla nsen tekk-d zi ṯmurṯ n uzeǧiḏ. Ttaren-as manaya wami ruḥen mesfhamen ak Blastus iǧan netta ḏ naʼib n Hirudus.

²¹ Ḏeg yijjen n ȓmunasaba, ikkar Hirudus irsa arruḍ iy teggen izeǧiḏen iqqim x lƹarc ibḏa istexṭab x imezḏaɣ n ṯmurṯ nni.

²² Kkaren niṯni ƹeyyḍen s jjheḏ qqaren: "Cek ṯmijja nnec am yijjen zi arebbiṯen maci am bnaḏem!"

²³ Ȓexddenni ijjen n lmalaʼika n Siḏi Arebbi ṯsehȓec Hirudus wami war iḥmiḏ ca Arebbi. Ɣeẓẓen-ṯ imiɣziwen immuṯ netta.

²⁴ Walakin awaȓ n Arebbi itentacer netta yarenni.

²⁵ Barnaba ḏ Cawul ḏewȓen-d zi Lquds wami kemmȓen ȓxeḏmeṯ nsen, uwin-d akiḏsen Yuḥanna umi qqaren Marqus.