Ȓexḏayem 11 - Ṯarifiṯ 2020

Arrasul Buṭrus itxebbar jmaƹeṯ n ȓmuminin ḏi Lquds

¹ Menbaƹd, arrusul ḏ uwmaṯen yinni iǧan ḏi Yahuḏiya sȓin qa uȓa ḏ yinni war iǧin ca zi Ayṯ-Israʼil qebȓen awaȓ n Arebbi.

^2-3 Wami igaƹƹeḏ Buṭrus ɣarsen ɣar Lquds ȓexddenni kkaren ȓmuminin nni n Ƹisa yinni iticcen lhimma aṭṭas i ṭṭahareṯ ccin-ṯ s ȓhemm nnan-as: "Mayemmi ṯuḏfeḏ ɣar ṯeddarṯ n yinni war iṭehharen ca ṯecciḏ akiḏsen aɣrum?"

⁴ Ibḏa Buṭrus itfessar-asen ṯa s ṯa inna-asen:

⁵ "Nec wami tuɣa ǧiɣ ḏi ṯendint n Yafa tẓaǧiɣ yuḥa-ayi-d Arebbi, ḏi lwaḥi nni shewwan-d zeg ujenna ɣar ṯmurṯ ijjen n ȓḥajeṯ ṯegga am ṯcuqqet ḏ ṯameqqrant twacedd zi ṯɣemmura nnes s arbeƹa ṯusa-d ɣari.

⁶ Xzareɣ ḏayes mliḥ ufiɣ lḥayawanaṯ igguren x arbeƹa n iḍaren ḏ ȓuḥuc ḏ min itenḥuruḏen x uƹeddis ḏ yijḍaḍ n ujenna.

⁷ Ṯumma sȓiɣ i yijjen n ṯmijja ṯeqqar-ayi: Kkar a Buṭrus, ɣareṣ, ecc!

⁸ Nniɣ-as: Lla walu a Siḏi! Nec ƹemmarṣ war ggiɣ ḏeg uqemmum inu min iǧan ḥram niɣ mekruh.

⁹ Ṯendeq-d ṯmijja nni zeg ujenna wis marrṯayen ṯenna-ayi: Cek war tḥarram ca min iḥeǧeȓ Arebbi yarri-ṯ ḥalal!

¹⁰ Iwqeƹ-ayi manayenni ṯȓaṯa n ṯwaȓaṯin, ssenni inejmeƹ kuȓci ɣar ujenna.

¹¹ Ḏi ṯsaƹƹat nni bedden ṯȓaṯa n iryazen ɣar ṯeddarṯ nni mani ǧiɣ ḏ anewji, twassekken-d ɣari zi ṯendint n Qayṣariya.

¹² Ṯumma iweṣṣa-ayi Arruḥ n Arebbi inna-ayi ruḥ akiḏsen bȓa ma aḏaysen ṯcekkeḏ. Uwiɣ akiḏi setta-ya n yayṯma, nuḏef ɣar ṯeddarṯ n Kurninyus.

¹³ Iƹaweḏ-aneɣ netta mammec iẓra ijjen n lmalak ibedd-d ḏi ṯeddarṯ nnes inna-as: Sekk iryazen ɣar ṯendint n Yafa aḏ d awin ssenni Simƹan umi qqaren Buṭrus.

¹⁴ Aḏac yini awaȓen iy zi ɣa ṯnejmeḏ cek ḏ marra ayṯbab n ṯeddarṯ nnec.

¹⁵ Ṯumma wami bḏiɣ ssawaȓeɣ, yusa-d Arruḥ iqeddsen ihwa-d xasen mammec xaneɣ d ihwa ḏeg umezwaru.

¹⁶ Fekkareɣ-d min inna Siḏiṯneɣ wami inna qa Yaḥya iṭehhar i yiwḏan s waman, kenniw qa aḏ twaṭehharem s Arruḥ iqeddsen.

¹⁷ Iwa meȓa yuca-asen Arebbi i niṯni amecnaw min ḏaneɣ yuca i neccin wami numen zi Siḏiṯneɣ Ƹisa Lmasiḥ, min ƹniɣ nec bac aḏ ƹarrḍeɣ i Arebbi?"

¹⁸ Yinni iḥḍaren wami sȓin i wawaȓ-a, sqaren ḥemḏen Arebbi nnan: "Xyar, uȓa ḏ yinni war iǧin ca zi Ayṯ-Israʼil yuca-asen Arebbi ttuba aɣarsen ṯiȓi ṯuḏarṯ!"

Jmaƹeṯ n ȓmuminin iǧan ḏi ṯendint n Wanṭakya

¹⁹ Ƹlaḥsab aƹeddeb nni iy iweqƹen wami itwaneɣ Stifan, ȓmuminin kuȓ ijjen mani iruḥ: ijjen iruḥ aȓ Finiqya, ijjen iruḥ aȓ Qubruṣ, ijjen iruḥ aȓ Wanṭakya. War tbecciren ḏinni ḥadd s wawaȓ n Arebbi illa israʼiliyen.

²⁰ Walakin ȓebƹaḍ n iryazen zi Qubruṣ ḏ Lqurina usin-d ɣar Wanṭakya bḏan ssawaȓen ak iyunaniyen tbeccaren-ṯen s Siḏiṯneɣ Ƹisa.

²¹ Siḏi Arebbi aqaṯ akiḏsen, aṭṭas n yiwḏan umnen ḏewȓen-d ɣar Siḏiṯneɣ.

²² Yuweḍ ȓexbar-a ɣar jmaƹeṯ n ȓmuminin ḏi Lquds, kkaren ssekken Barnaba ɣar Wanṭakya.

²³ Wami d yuweḍ, yufa mammec ṯen ibarek Arebbi. Ifareḥ ibḏa itcejjaƹ-iṯen marra bac aḏ qqimen ḏeg ubriḏ n Siḏiṯneɣ s marra uȓawen nsen.

²⁴ Barnaba netta ḏ ijjen n uryaz ḏ aṣebḥan iccur s Arruḥ iqeddsen itamen aṭṭas, xarebbi n yiwḏan umnen zi Siḏiṯneɣ.

²⁵ Iruḥ Barnaba ɣar ṯendint n Ṭarsus irezzu x Cawul.

²⁶ Wami ṯ yufa yuwi-ṯ-iḏ akiḏes ɣar ṯendint-a n Wanṭakya. Seƹḏun ƹam ikmaȓ ak jmaƹeṯ n ȓmuminin, seȓmaḏen aṭṭas n yiwḏan. Ḏanita ḏi Wanṭakya-ya iy twasemman imeḥḍaren ṯwaȓa ṯamezwarut s

²⁷ Ḏi ȓiyyam nni hwan-d can n lʼanbiya zi Lquds ɣar Wanṭakya.

²⁸ Ikkar ijjen zzaysen qqaren-as Ɣabus, ixbar i ȓmuminin ḏinni s min ḏas inna Arruḥ n Arebbi. Inna-asen qa aḏ iwqeƹ ijjen n buheyyuf ḏ ameqqran x ṯmurṯ marra (u ḏ ṣṣaḥ iwqeƹ manayenni ḏi ȓweqṯ n Lmalik Qayṣar Kludyus).

²⁹ Kkaren imeḥḍaren tafqen jarasen kuȓ ijjen zzaysen aḏ ssekken cwayt n lmuƹawana ƹlaḥsab ṯizemmar nsen ɣar ayṯmaṯsen ig izeddɣen ḏi Yahuḏiya.

³⁰ Amenni iy ggin jarasen, ucin lmuƹawana nni i Barnaba ḏ Cawul at ssiwḍen i imeqqranen n jmaƹeṯ n ȓmuminin iy iǧan ḏinni.