Ȓexḏayem 10 - Ṯarifiṯ 2020

Arrasul Buṭrus ḏ Kurninyus

¹ Ḏi ṯendint n Qayṣariya tuɣa ḏinni ijjen n uryaz qqaren-as Kurninyus. Netta ḏ ijjen n uƹaskari ḏ ameqqran n arrumanus aqaṯ ḏeg yijjen n lfirqa n ȓƹaskar umi qqaren

² Ḏayes ddin iteggweḏ Arebbi, netta ḏ marra ayṯbab n ṯeddarṯ nnes. Itegg ȓxir aṭṭas ḏeg yinni iḥḏajen, war ixeṭṭi ca ṯẓaǧiṯ nnes.

³ Ijjen n nhar ɣar ṯȓaṯa uƹecci, iẓra nican ḏi lwaḥi ijjen n lmalak n Arebbi itaḏef-d xas itȓaɣa-yas-d: "A Kurninyus."

⁴ Ixzar ḏayes Kurninyus mliḥ iggweḏ inna-as: "A siḏi, min ṯrezzuḏ?" Inna-as lmalak nni: "Qa ṯẓaǧiṯ nnec ḏ ṣṣaḏaqa nnec aqa iqbeȓ-iṯent zzayek Arebbi, netta qa ifqeḏ-icek.

⁵ Sekk ȓexxu iryazen ɣar ṯendint n Yafa aḏac d awin ijjen n bnaḏem isem nnes Simƹan umi qqaren Buṭrus.

⁶ Aqaṯ ḏ anewji ɣar yijjen n bu-yiȓemawen qqaren-as Simƹan, ṯaddarṯ nnes aqat x ṭṭarf n ȓebḥar."

⁷ Wami iruḥ lmalak nni iy kis d issiwȓen, iȓaɣa-d i ṯnayen zeg ixeddamen nnes ḏ yijjen n uƹaskari ḏayes ddin, itiȓi ȓebda akiḏes.

⁸ Iƹaweḏ-asen marra min iweqƹen, issekk-iṯen ɣar ṯendint n Yafa.

⁹ Ṯiwecca nnes, yinni itwassekken zi Kurninyus ɣar ṯendint n Yafa wami ƹȓayen aḏ awḍen ḏinni, yuȓi Buṭrus ɣar ṯzeqqa ɣar uzyen n nhar aḏ iẓẓaǧ.

¹⁰ Iǧuz aṭṭas ixes aḏ icc. Wami ƹaḏ sewjaḏen-as mecca yuḥa-yas-d Arebbi ḏi lwaḥi.

¹¹ Iẓra ajenna inurzem shewwan-d zzayes ɣar ṯmurṯ ijjen n ȓḥajeṯ ṯegga am ṯcuqqet ḏ ṯameqqrant twacedd zi ṯɣemmura nnes s arbeƹa.

¹² Ḏayes marra lḥayawanaṯ igguren x arbeƹa n iḍaren ḏ min itenḥuruḏen x uƹeddis ḏ yijḍaḍ n ujenna.

¹³ Ṯendeq-d ijjen n ṯmijja ṯenna-as: "Kkar a Buṭrus, ɣareṣ, ecc!"

¹⁴ Inna-as netta: "Lla walu a Siḏi! Nec ƹemmarṣ ma cciɣ min iǧan ḥram niɣ mekruh."

¹⁵ Ṯendeq-d ṯmijja nni wis marrṯayen ṯenna-as: "Cek war tḥarram ca min iḥeǧeȓ Arebbi yarri-ṯ ḥalal!"

¹⁶ Iwqeƹ manaya ṯȓaṯa n ṯwaȓaṯin, ssenni ṯnejmeƹ ṯcuqqet nni ṯeḏweȓ ɣar ujenna.

¹⁷ Iqqim Buṭrus itxemmam itƹejjeb ḏi ȓmaƹna n lwaḥi-ya iy iẓra, ȓexddenni iryazen nni iy d issekk Kurninyus ufin ṯaddarṯ n Simƹan bedden ɣar ṯewwarṯ nnes.

¹⁸ Ȓaɣan nnan: "Simƹan wenni umi qqaren Buṭrus, ma aqaṯ ḏinni ḏ anewji?"

¹⁹ Buṭrus ƹaḏ itxemmam ḏi lwaḥi nni inna-as Arruḥ n Arebbi, "Qa ṯȓaṯa n iryazen rezzun xak.

²⁰ Kkar hwa ɣarsen, ruḥ akiḏsen bȓa ma aḏaysen ṯcekkeḏ qa ḏ nec iy ṯen d issekken."

²¹ Ihwa-d Buṭrus ɣar iryazen nni inna-asen, "Aqa ḏ nec iy xef ṯrezzum. Mayemmi ɣari d ṯusim?"

²² Nnan-as: "Qa neccin issekk-aneɣ-d Kurninyus ijjen n uƹaskari ḏ ameqqran n arrumanus. Netta ḏ ijjen n uryaz nican iteggweḏ Arebbi, tweqqaren-ṯ marra ȓqum n Ayṯ-Israʼil. Inna-as ijjen n lmalak n Arebbi: Sekk ɣar Buṭrus, aḏ d yas ɣar ṯeddarṯ nnec aḏas ṯṣennṭeḏ min ḏac ɣa yini."

²³ Ikkar Buṭrus isiḏef-iṯen ɣar ḏaxeȓ isnewjew-iṯen. Ṯiwecca nnes iruḥ akiḏsen Buṭrus. Munen akiḏes ȓebƹaḍ n ayṯmas zi ṯendint n Yafa.

²⁴ Farwicca nnes yuweḍ Buṭrus ɣar ṯendint n Qayṣariya. Itraja-ṯen ḏinni Kurninyus, akiḏes ȓebƹaḍ n ȓeḥbab nnes ḏ ȓebƹaḍ n imeddukaȓ nnes iy d iƹareḍ.

²⁵ Wami yuweḍ Buṭrus ɣar ṯeddarṯ nni, iffeɣ-d ɣares Kurninyus iwḍa-yas ɣar iḍaren nnes isejjeḏ-as.

²⁶ Isbedd-iṯ Buṭrus x iḍaren inna-as: "Lla, kkar bedd. Qa nec ḏ bnaḏem am nec am cek."

²⁷ Yuḏef Buṭrus issaweȓ akiḏes yufa ḏinni aṭṭas n yiwḏan munen.

²⁸ Inna-asen: "Qa ṯessnem belli israʼiliyen ɣarsen ḥram aḏ xellṭen ak ȓbarrani niɣ aḏ aḏfen ṯaddarṯ nsen. Walakin Arebbi isfahem-ayi-d qbeȓ war qqareɣ i ḥadd qa cek ḥram niɣ mekruh.

²⁹ Wami ḏayi d ṯȓaɣim usiɣ-d bȓa ma aḏ iniɣ lla. Akenniw sseqsiɣ, mayemmi ɣari d ṯessekkem?"

³⁰ Indeq-d Kurninyus inna-as: "Qa nec arbeƹiyyam zeg wami ɣar ṯȓaṯa uƹecci am ȓweqṯ-a, tuɣa tẓaǧiɣ ḏi ṯeddarṯ inu. Ƹlaɣafla ibedd-d zzaṯi ijjen n uṯarras ɣares arruḍ itceƹciƹ.

³¹ Iqqar-ayi-d: A Kurninyus! Qa Arebbi istajeb-ac i ṯẓaǧiṯ nnec, ṣṣaḏaqa nnec ifekkar ḏayes.

³² Sekk ɣar ṯendint n Yafa, awi-d Simƹan wenni umi qqaren Buṭrus. Aqaṯ ḏinni ḏ anewji ḏi ṯeddarṯ n yijjen n bu-yiȓemawen qqaren-as Simƹan x ṭṭarf n ȓebḥar.

³³ Iwa x manaya iy ɣarek d ssekkeɣ ḏeɣya, ṯeggiḏ mliḥ wami d ṯusiḏ. Neccin ȓexxu marra aqaneɣ neḥḍar zzaṯ i Arebbi bac a nṣenneṭ marra minzi cek iweṣṣa Siḏi Arebbi."

³⁴ Ibḏa Buṭrus issawaȓ inna-asen: "Ḏ ṣṣaḥ twaȓiɣ Arebbi war itegg ca s wuḏemawen jar yiwḏan.

³⁵ Arebbi iqebbeȓ iwḏan zi mkuȓ ȓgens yinni iy ṯ iteggwḏen teggen min iǧan nican.

³⁶ Ṯessnem Arebbi issekk-d awaȓ nnes ɣar Ayṯ-Israʼil itbeccar-iṯen s Lʼinjil n ȓehna s Ƹisa Lmasiḥ, netta ḏ Siḏiṯneɣ n marra iwḏan.

^37-38 Kenniw qa ṯessnem min iweqƹen ḏi marra ṯamurṯ n Yahuḏiya. Aqa nnabi Yaḥya tuɣa itbeccar iwḏan ḥima aḏ twaṭehharen s waman. Ssenni zi ṯmurṯ n Ljalil ibḏa Ƹisa naṣiri itbeccar, iccur-iṯ Arebbi s jjheḏ ḏ Arruḥ iqeddsen. Netta itraḥ zeg umcan ɣar umcan itegg ȓxir isgenfa marra yinni itƹeddab Ibȓis minzi Arebbi aqaṯ akiḏes.

³⁹ Neccin ḏ ȓechuḏ x marra min itegg Ƹisa ḏi ṯmurṯ n Ayṯ-Israʼil ḏ ṯendint n Lquds. Nɣin-ṯ wami ṯ refƹen x ṯeḥnact.

⁴⁰ Nhar wis ṯeȓtiyyam isekkar-iṯ-iḏ Arebbi zi ȓmewṯ ismeḍhar-iṯ-iḏ.

⁴¹ Maci ismeḍhar-iṯ-iḏ Arebbi i marra ccaƹb; Lla, ismeḍhar-iṯ-iḏ i ȓechuḏ iy ixḍar zi qbeȓ iƹni neccin iy kiḏes iccin iy kiḏes iswin wami d ikkar zi ȓmewṯ.

⁴² Neccin iweṣṣa-yaneɣ Ƹisa a nbeccar ccaƹb, a necheḏ belli Arebbi ixḍar-iṯ aḏ iḥaseb yinni iddaren ḏ yinni immuṯen.

⁴³ Marra lʼanbiya cehhḏen xas nnan qa marra yinni zzayes ɣa yamnen aḏ twaɣfarent ȓmuƹṣiyaṯ nsen s yisem nnes."

⁴⁴ Wami ƹaḏ issawaȓ Buṭrus ḏi manaya, yusa-d Arruḥ iqeddsen ihwa-d x marra yinni itesȓan i wawaȓ nnes.

⁴⁵ Ȓmuminin zeg Ayṯ-Israʼil iy d yusin ak Buṭrus qqimen tƹejjben wami ufin Arruḥ iqeddsen itwafeyyeḍ uȓa x yinni war iǧin ca ḏ israʼiliyen.

⁴⁶ Ȓaḥeqqac sȓin-asen ssawaȓen s lluɣaṯ war iǧin bu nsen ḥemmḏen Arebbi. Uca inna Buṭrus:

⁴⁷ "Ma ḏinni can bnaḏem iy ɣa isbedden iwḏan-a bac war tetwaṭehhiren ca s waman? Yina immuc-asen Arruḥ iqeddsen am neccin am niṯni!"

⁴⁸ S manaya iweṣṣa-ṯen Buṭrus aḏ twaṭehharen s waman ƹlaḥsab isem n Ƹisa Lmasiḥ. Ssenni ttaren zzayes akiḏsen iqqim can wussan.