Matta 3 - Ṯarifiṯ 2020

Nnabi Yaḥya isewjaḏ abriḏ i Lmasiḥ

¹ Ḏi ȓweqṯ nni imeḍhar-d Yaḥya, itṭehhar i yiwḏan s waman itbeccar-iṯen ḏi ȓexȓa n Yahuḏiya.

² Iqqar-asen: "Tubem, aqa yuḏes-d ȓmulk n ujenna."

³ X Yaḥya ig inna nnabi umi qqaren Icaƹya ḏeg yijjen n zman: <Ṯmijja tȓaɣa ḏi ȓexȓa ṯeqqar: Swejḏeṯ abriḏ i Siḏi Arebbi, ggem ibriḏen nnes nican.>

⁴ Yaḥya arruḍ nnes xeḏmen-ṯ s cƹar n uȓɣem, x nneṣṣ nnes ijjen n uḥezzam n yiȓem. Itett ṯmurɣi ḏ ṯamment ṯaḥurrect.

⁵ Tasen-d ɣares imezḏaɣ n ṯendint n Lquds ḏ yinni n Yahuḏiya amen-ṯekmaȓ ḏ marra yinni iy d innḍen i yiɣzar n Lʼurdun.

⁶ Teƹtarafen s ȓmuƹṣiyaṯ nsen, Yaḥya itṭehhar-iṯen s waman ḏeg yiɣzar n Lʼurdun.

⁷ Walakin wami iẓra Yaḥya belli aṭṭas n ȓfuqaha ḏ ifarrisiyen ḏ iṣadduqiyen tasen-d ɣares ḥima aṯen iṭehhar s waman inna-asen: "Ya ṯarwa n ifiɣeran, wi ḏawem iƹeȓmen aḏ tarewȓem zi lɣaḍab n Siḏi Arebbi iy d ɣa yasen?

⁸ Meȓa ṯtubem ḏ ṣṣaḥ, ggeṯ ȓexḏayem ṯiṣebḥanin.

⁹ Maci aḏ tinim ḏi nnefs nwem qa neccin ḏ ṯarwa n Brahim u ṣafi. Meȓa ixes Arebbi ṯarwa n Brahim, ataf aḏ iysi izra-ya aṯen yarr ḏ ṯarwa n Brahim!

¹⁰ Aqa caqur iwjeḏ ḥima aḏ iqess iẓewran n ȓcejjur. Mkuȓ ṯacejjarṯ iy war itirwen ca min iǧan ḏ aṣebḥan ataf aḏ twaqess aḏ tmenḍar ḏi ṯmessi.

¹¹ Nec tṭehhareɣ-kenniw s waman bac aḏ tubem, walakin wenni iy d ɣa yasen menbaƹd i nec, netta ijheḏ xafi. War sḏihiǧeɣ ca aḏas ysiɣ uȓa ḏ ṯisiȓa nnes. Netta akenniw iṭehhar s Arruḥ iqeddsen ḏ yiȓesawen n ṯmessi.

¹² Ɣares ṯazzarṯ ḏeg ufus ḥima aḏ izuzzar ṯaffa nnes qaƹ, aḏ ismun ṯiḥebba n yirḏan aṯent igg ḏi ṯesrafṯ. Min war ineffƹen ca aṯ issecmeḍ ḏi ṯmessi iy war ixessin ƹemmarṣ."

Nnabi Yaḥya itṭehhar i Siḏiṯneɣ Ƹisa s waman

¹³ Ssenni yusa-d Ƹisa zi ṯmurṯ n Ljalil ɣar yiɣzar n Lʼurdun bac aṯ iṭehhar Yaḥya s waman.

¹⁴ Walakin Yaḥya yugi inna-as: "Nec itxeṣṣa cek iy ḏayi ɣa iṭehharen, u cek ṯusiḏ-d ɣari?"

¹⁵ Indeq-d Ƹisa inna-as: "Ɣir qbeȓ ȓexxu, ḏ manaya ig iǧan nican ḥima aḏ ikemmeȓ marra min ixes Siḏi Arebbi." Uca iqbeȓ Yaḥya.

¹⁶ Wami itwaṭehhar Ƹisa iffeɣ-d ȓexddenni zeg waman nni. Aqa inurzem-as-d ujenna iẓra Arruḥ n Arebbi ihewwa-d igga am yijjen n ṯeḏbirṯ ṯmars-d xas.

¹⁷ Ssenni iȓaɣa-d ijjen n ṣṣut zeg ujenna inna-d: "Wa ḏ Memmi iƹizzen, nec farrḥeɣ zzayes."