Matta 24 - Ṯarifiṯ 2020

Lƹalamaṯ n ȓfana n ddunect

¹ Iffeɣ Ƹisa zi ṯemziḏa ṯameqqrant ibeƹƹeḏ ssenni cwayt. Qarrben-d ɣares imeḥḍaren nnes ḥima aḏas seḍharen ȓebni n ṯemziḏa ṯameqqrant.

² Indeq-d Ƹisa inna-asen: "Ma twaȓam qaƹ manaya? Aqa tesȓam ȓḥaqq: War ḏa itɣimi ijjen n uzru x unneɣni, marra manaya aḏ inehḏem."

³ Wami iqqim Ƹisa ḏeg Uḏrar n Zzitun, qarrben-d ɣares imeḥḍaren nnes waḥeḏsen nnan-as: "Ini-yaneɣ cek, meȓmi ɣa iwqeƹ manaya? Min ṯeƹna lƹalama nni xmi d ɣa ṯaseḏ cek, ḏ ȓefna n zman?"

⁴ Ijaweb-iṯen Ƹisa inna-asen: "Ḥḍam ixef nwem ḥima war kenniw ixeddeƹ ḥadd.

⁵ Aṭṭas iy d ɣa yasen s yisem inu zaƹma aḏ inin qa nec ḏ Lmasiḥ! Aḏ xeḏƹen aṭṭas n yiwḏan.

⁶ Xmi ɣa ṯesȓam x lḥurub ḏ ȓexbar n lḥurub war teggwḏem ca, labud zi manaya. Walakin ddunect-a ƹaḏ war ṯfenni ca.

⁷ Dduwla aḏ tehjem x dduwla, lmemlaka aḏ tehjem x lmemlaka. Aḏ yiȓi jjuƹ aḏ iwqeƹ zzinzal ḏeg waṭṭas n imucan.

⁸ Marra manaya aḏ yiȓi amecnaw ȓeḥriq amezwaru n ṯemɣarṯ itarwen.

⁹ Ssenni akenniw sellmen yiwḏan ḥima akenniw ƹeddben, akenniw nɣen. Marra dduwal akenniw ƹiffen ƹlaḥsab isem inu.

¹⁰ Aṭṭas iy ɣa ikfaren zeg yinni iy yumnen. Aḏ zzenzen ayawya, aḏ ƹiffen ayawya.

¹¹ Aḏ d meḍharen aṭṭas n yiwḏan aḏ arren ixef nsen ḏ lʼanbiya, aḏ xeḏƹen aṭṭas n yiwḏan.

¹² Aḏ tenqes ȓemḥibbeṯ jar yiwḏan minzi aḏ ikṯar ccarr.

¹³ Walakin wenni ɣa iṣbaren ɣar uneggaru ataf aḏ injem.

¹⁴ Lʼinjil n ȓmulk n Arebbi axas ḥeddṯen yiwḏan ḏi marra ṯimura n ddunect ḥima aɣarsen ṯiȓi chaḏeṯ xafi. Ȓexddenni iy d ɣa yas ȓefna.

¹⁵ Xmi ɣa ṯeẓrem , netta itbedda ḏeg umcan iqeddsen, iƹni mixef issiweȓ nnabi Danyal (A fhem a wenni iɣrin manaya!),

¹⁶ ȓexddenni yinni iǧan ḏi ṯmurṯ n Yahuḏiya itxeṣṣa aḏ arewȓen ɣar iḏurar.

¹⁷ Wenni ɣa yiȓin x ṯzeqqa nnes itxeṣṣa-as war ihewwi ca ɣar ṯeddarṯ ḥima aḏ iysi can ȓḥajeṯ.

¹⁸ Wenni ɣa yiȓin ḏeg umarjeƹ itxeṣṣa-as war iteƹqib ca ɣar ṯeddarṯ aḏ iysi čammir nnes.

¹⁹ Ya tamara x ṯemɣarin iy ɣa yiȓin s iƹeddisen ḏeg wussan nni, ḏ ṯinni issuṭuḍen!

²⁰ Ttareṯ i Arebbi bac war tarewwȓem ca ḏi ȓmecta niɣ ḏi nhar n lƹibada.

²¹ Ḏi ȓweqṯ nni ataf aḏ tewqeƹ ijjen n tamara ḏ ṯameqqrant iy war iweqiƹen ƹemmarṣ zeg wami ṯeǧa ddunect-a aȓ ȓexxu, u ƹemmarṣ aḏ tewqeƹ ƹaweḏ.

²² Maƹlik Siḏi Arebbi war isenqis ca ḏi ȓiyyam nni n tamara-ya iy d ɣa yasen, ataf war inejjem uȓa ḏ ijjen. X ssabab n yinni ixḍar Arebbi, ataf aḏ isenqes ȓiyyam nni iy d ɣa yasen.

²³ Ssenni meȓa inna-awem can yijjen: Xzarem! Aqaṯ ḏanita Lmasiḥ! Niɣ, Aqaṯ ḏiha! War ṯ tamnem ca.

²⁴ Aqa aṭṭas iy d ɣa imeḍharen s ixarriqen aḏ inin aqa nec ḏ Lmasiḥ niɣ nec zi lʼanbiya. Aḏ ggen lmuƹjizaṯ ḏ ṯimeqqranin ḏ ȓaƹjayeb zaƹma ḥima aḏ xeḏƹen iwḏan. Maƹlik zemmaren iȓi xeḏƹen uȓa ḏ yinni ixḍar Arebbi.

²⁵ Xzarem! Aqa nec ƹeȓmeɣ-awem x manaya qbeȓ ma aḏ iwqeƹ.

²⁶ Meȓa nnan-awem: Xzarem, aqaṯ ḏi ȓexȓa! War traḥem ca ḏinni. Niɣ meȓa nnan-awem: Xzarem, aqaṯ ɣar ḏaxeȓ ḏeg ixammen! War ṯen tamnem ca.

²⁷ Aqa xmi d ɣa yas Mmis n bnaḏem ataf aḏ yiȓi amecnaw assam iy d iteffɣen zi ccarq itceƹƹaȓ ɣar lɣarb.

²⁸ Mani ǧan imurḍas, ḏinni ig itmunen ibaɣeriwen.

²⁹ Menbaƹd i tamara n ȓiyyam nni, ȓexddenni ṯfuct aḏ teḏweȓ ḏ ṯaǧest, ṯaziri war ticc bu ṯfawṯ. Iṯran aḏ d wḍan zeg ujenna, yinni ijehḏen ḏeg ujenna aṯen isenhezz Arebbi.

³⁰ Uca aḏ tmeḍhar lƹalama n Mmis n bnaḏem ḏeg ujenna, ȓexddenni iy ɣa ḥeznent marra ṯiqebbaȓ n ṯmurṯ. Aḏ ẓrent Mmis n bnaḏem ihewwa-d ḏeg useynu n ujenna s lƹaḍama ḏ jjheḏ nnes imɣaren.

³¹ Aḏ iṣuḍ ijjen n zzammar ḏ ameqqran, aḏ d issekk lmalaʼikaṯ nnes ɣar arbeƹa n imucan n ṯmurṯ manis d itekk arriḥ: zi ccarq ḏ lɣarb ḏ ljanub ḏ ccamal. Aḏ d ismun yinni ixḍar zi ȓaḥedd n ujenna aȓ ȓaḥedd nnes nneɣni.

³² Ȓemḏem ijjen n ȓmaƹna zi ṯcejjarṯ n ṯazarṯ. Ɣir ȓefruƹ nnes aḏ ḥebbben aḏ ggen ṯifray, ataf aḏ tessnem yallah anebḏu iqarreb-d.

³³ Amenni uȓa ḏ kenniw. Xmi ɣa ṯeẓrem marra ṯimesȓayin-a itewqiƹen ataf aḏ tessnem illa manaya yuḏes-d, aqaṯ zzaṯ i ṯewwarṯ.

³⁴ Aqa tesȓam ȓḥaqq: War tmettin yiwḏan n ȓweqṯ-a aȓ ɣa iwqeƹ marra manaya.

³⁵ Aḏ ifna ujenna ḏ ṯmurṯ, walakin awaȓen inu war fennin ca ƹemmarṣ.

³⁶ Cuf, nhar nni niɣ ṯsaƹƹat nni war t issin uȓa ḏ ijjen, lla lmalaʼikaṯ ḏeg ujenna uȓa ḏ Mmis. Issen-it ɣir Baba waḥḏes.

³⁷ Amecnaw mamc iwqeƹ ḏi ȓiyyam nni n Nuḥ, amenni iy ɣa iwqeƹ xmi d ɣa iḏweȓ Mmis n bnaḏem.

³⁸ Yiwḏan ḏi ȓweqṯ nni qbeȓ i ṭṭufan, tuɣa tetten, sessen, meǧcen twasmeǧacen, ḥetta aȓ nhar wami yuḏef Nuḥ ḏeg uɣarrabu.

³⁹ War fṭinen ca aȓ wami d yusa ṭṭufan isɣareq-iṯen marra. Ammu iy ɣa iwqeƹ xmi d ɣa iḏweȓ Mmis n bnaḏem.

⁴⁰ Aḏ iȓin ṯnayen n iryazen ḏeg umarjeƹ, ijjen aḏ imeysi ijjen aḏ iqqim.

⁴¹ Aḏ iȓint ṯnayen n ṯemɣarin ḏi ṯsirṯ ḥerrint ṯiḥebba, icten aḏ tmeysi icten aḏ teqqim.

⁴² X manaya faqem baƹda, qa war ṯessinem ca meȓmi d ɣa iḏweȓ Siḏiṯwem.

⁴³ Itxeṣṣa-awem aḏ tessnem manaya: Mȓi bab n ṯeddarṯ issen ṯsaƹƹat iy ḏi d ɣa yas uceffar, iȓi iqqim ifaq ḥima war ṯ itijji ca aḏ d yaḏef ṯaddarṯ nnes.

⁴⁴ X manaya, swejḏem ixef nwem minzi Mmis n bnaḏem aḏ d yas ḏeg yijjen n ṯsaƹƹat war ṯ trijim ca.

Iȓim ṯewjḏem xmi d ɣa iḏweȓ Siḏiṯwem

⁴⁵ Min iƹna uxeddam iy iǧan ḏ amiɣis, ḏayes ȓaman? Netta ḏ wenni ig itkellaf siḏes aḏasen yuc macca i ixeddamen nnes ḏi ȓweqṯ nican.

⁴⁶ Ssaƹḏ n uxeddam nni, xmi d ɣa iḏweȓ siḏes aṯ yaf ixeddem.

⁴⁷ Aqa tesȓam ȓḥaqq: Axeddam nni aṯ ikellef siḏes x marra agȓa nnes.

⁴⁸ Walakin axeddam nni meȓa ḏ aƹeffan inewwa belli siḏes aḏ iƹḍeȓ war d itis ca,

⁴⁹ ataf aḏ ibḏa iccaṯ ixeddamen aḏ icc aḏ isew aḏ yiȓi ak iskayriyen waha.

⁵⁰ Uca aḏ d yas siḏes n uxeddam nni ḏeg yijjen n nhar war ṯ inwi ca, ḏeg yijjen n ṯsaƹƹat war t issin ca.

⁵¹ Aṯ iqess ḏ iwezwizen aṯ inḍar ḏeg umcan n lmunafiqin, ḏinni iy ɣa iȓin imeṭṭawen ḏ uɣeẓẓaẓ n ṯeɣmas.