Matta 23 - Ṯarifiṯ 2020

Ȓefḍiḥaṯ n imseȓmaḏen n ccariƹa ḏ ȓḥizeb n ifarrisiyen

¹ Issiweȓ Ƹisa ak imeḥḍaren nnes ḏ yiwḏan

² inna-asen: "Imseȓmaḏen n ccariƹa ḏ ȓḥizeb n ifarrisiyen qqimen-as i Musa x ȓkursi nnes, iƹni seȓmaḏen ccariƹa nnes.

³ X manaya, teggeṯ marra min ḏawem qqaren, xeḏmem zzayes. Walakin war teggem ca am niṯni, mayemmi? Liʼanna niṯni war teggen ca min qqaren.

⁴ Tceddan ȓeḥmeȓ iḏeqȓen iqesḥen x yiwḏan ḥima aṯ arbun, walakin war tḥiḏin ca ȓeḥmeȓ nni uȓa s uḍaḍ nsen.

⁵ Marra min teggen ḥima aɣarsen xzaren yiwḏan. Teggen ȓeḥruz ḏ imeqqranen, arennin ṯicȓuȓin i izeǧaben nsen.

⁶ Texsen imucan imezwura ḏi ȓefruḥ ḏ ṯemziḏawin.

⁷ Texsen axasen seǧmen ḏi ȓeswaq aḏasen ȓaɣan yiwḏan: A siḏiṯneɣ.

⁸ Walakin kenniw, war tejjam ḥadd aḏawem iȓaɣa: A siḏiṯneɣ. Ȓaḥeqqac kenniw marra ḏ awmaṯen ɣarwem ijjen n Siḏiṯwem.

⁹ War tȓaɣam i ḥadd ḏi ṯmurṯ: A babaṯneɣ. Ȓaḥeqqac ɣarwem ɣir ijjen n Babaṯwem aqaṯ ḏeg ujenna.

¹⁰ War tejjam ḥadd aḏawem iȓaɣa: Ay amseȓmaḏ. Ȓaḥeqqac ɣarwem ɣir ijjen n Umseȓmaḏ, netta ḏ Lmasiḥ.

¹¹ Ameqqran jarawem itxeṣṣa aḏ yiȓi ḏ axeddam nwem.

¹² Wenni isemɣaren ixef nnes, ataf aḏ yiȓi ḏ amezyan. Wenni isemzayen ixef nnes, ataf aḏ yiȓi ḏ ameqqran.

¹³ Ya ȓefḍiḥeṯ nwem ay imseȓmaḏen n ccariƹa ḏ ȓḥizeb n ifarrisiyen, a lmunafiqin! Teqqnem ṯawwarṯ n ȓmulk ujenna x yiwḏan. Kenniw war tiḏfem, war tejjim wi ɣa yaḏfen.

¹⁴ {Ya ȓefḍiḥeṯ nwem ay imseȓmaḏen n ccariƹa ḏ ȓḥizeb n ifarrisiyen, a lmunafiqin! Tettem i ṯajjaȓin marra min ɣarsent. Tesmeḍharem-d ixef nwem tẓaǧam aṭṭas ḥima aḏ tbeyynem i yiwḏan belli ṯṣebḥem aṭṭas zaƹma. X manayenni aḏ twaƹaqbem ktar.}

¹⁵ Ya ȓefḍiḥeṯ nwem ay imseȓmaḏen n ccariƹa ḏ ȓḥizeb n ifarrisiyen, a lmunafiqin! Tekkem marra ȓebḥar ḏ ȓbarr ḥima aḏ tjarrem can yijjen ɣar ddin nwem. U xmi iy kiwem ɣa yiȓi, tarrim-ṯ isḏaheǧ ṯimessi marrṯayen ktar zi min ṯesḏaheǧem kenniw.

¹⁶ Ya ȓefḍiḥeṯ nwem, ay iḍarɣaȓen itjarran iwḏan! Ṯeqqarem: War ṯseggwi walu ṯjaǧiṯ s ṯemziḏa ṯameqqrant, walakin wenni ɣa ijjaǧen s ddheb n ṯemziḏa ṯameqqrant itxeṣṣa axas ikemmeȓ x ṯjaǧiṯ nnes.

¹⁷ Ay ifɣaȓ ay iḍarɣaȓen, min iseggwan ktar? Ma ḏ ddheb ma ḏ ṯamziḏa ṯameqqrant ig yucin lqima i ddheb?

¹⁸ Ṯeqqarem ƹaweḏ: War ṯseggwi walu ṯjaǧiṯ s ȓmeḏbaḥ, walakin wenni ɣa ijjaǧen s dbiḥaṯ iǧan x ȓmeḏbaḥ, itxeṣṣa axas ikemmeȓ x ṯjaǧiṯ nnes.

¹⁹ Ay iḍarɣaȓen, min iseggwan ktar: Ḏ dbiḥaṯ niɣ d ȓmeḏbaḥ iticcen lqima i dbiḥaṯ?

²⁰ X manaya, wenni itjaǧan s ȓmeḏbaḥ, itjaǧa zzayes ḏ marra min xas.

²¹ Wenni itjaǧan s ṯemziḏa ṯameqqrant, itjaǧa zzayes ḏ Arebbi iy t izeddɣen.

²² Wenni itjaǧan s ujenna, itjaǧa s lƹarc n Arebbi ḏ wenni xas iqqimen.

²³ Ya ȓefḍiḥeṯ nwem, ay imseȓmaḏen n ccariƹa ḏ ȓḥizeb n ifarrisiyen, a lmunafiqin! Ticcem ȓaƹcur uȓa x naƹnaƹ ḏ uwram ḏ ȓcemmun, walakin war tehtimim ca min iǧan muhim qaƹ ḏi ccariƹa iƹni ȓḥaqq ḏ arraḥmeṯ ḏ lʼiman. Lla, itxeṣṣa-awem aḏ tehtamem s manaya bȓa ma tettum ȓaƹcur.

²⁴ Ay iḍarɣaȓen itjarran iwḏan! Tṣeffim izi zi min ṯsessem, ṯesɣeǧayem aȓɣem!

²⁵ Ya ȓefḍiḥeṯ nwem ay imseȓmaḏen n ccariƹa ḏ ȓḥizeb n ifarrisiyen, a lmunafiqin! Kenniw ṯsiriḏem mliḥ ȓkas ḏ ṭebṣi ɣar barra, walakin ɣar ḏaxeȓ aqa ccuren s ṯukkarḏa ḏ ṭṭmaƹ!

²⁶ Ay afarrisi aḍarɣaȓ, ḏ amezwaru sireḏ ȓkas ɣar ḏaxeȓ ḥima aḏ yiȓi isireḏ ɣar barra.

²⁷ Ya ȓefḍiḥeṯ nwem ay imseȓmaḏen n ccariƹa ḏ ȓḥizeb n ifarrisiyen, a lmunafiqin! Kenniw amecnaw imeḍȓan ibeyyḍen s jjir. Tmeḍharen ṣebḥan ɣar barra, walakin niṯni ccuren ɣar ḏaxeȓ s yixsan ḏ marra min yareccan.

²⁸ Amenni kenniw iy tmeḍharem i yiwḏan nican iy ṯeǧam ɣar barra, walakin ɣar ḏaxeȓ ṯeccurem s nnifaq ḏ ȓmuƹṣiyaṯ.

²⁹ Ya ȓefḍiḥeṯ nwem ay imseȓmaḏen n ccariƹa ḏ ȓḥizeb n ifarrisiyen, a lmunafiqin! Kenniw ṯbennam imeḍȓan n lʼanbiya, ṯƹeddȓem imrabeḏen n ȓmuminin.

³⁰ Ṯeqqarem: Maƹlik neǧa ḏi ȓweqṯ n ȓejḏuḏ nneɣ ataf war kiḏsen nsizzeȓ ca iḏammen n l'anbiya.

³¹ X manayenni ṯcehhḏem x yixef nwem belli kenniw ḏ ṯarwa n yinni inɣin lʼanbiya.

³² Iwa, kemmȓeṯ kenniw x min bḏan ȓejḏuḏ nwem!

³³ Ay ifiɣeran! A ṯarwa n ṯfiɣerawin! Mamc ṯfekkarem aḏ tarewȓem zi lƹiqab n jahennama?

³⁴ X manaya xzarem! Tsekkiɣ-awem-d lʼanbiya ḏ imiɣisen ḏ imseȓmaḏen. Ijjen zzaysen aṯ ṯenɣem ijjen aṯ ṯṣellbem. Ijjen zzaysen aṯ ṯuwṯem s usɣun ḏi ṯemziḏawin, ijjen axas ṯazzȓem zi ṯendint ɣar ṯendint.

³⁵ X manayenni aḏ twaƹaqbem x marra iḏammen iy yuzzȓen n ȓmuminin ḏi ddunect-a. Zeg iḏammen n Habil ȓmumen aȓ iḏammen n Zakariya mmis n Barxiya iy ṯenɣim jar ȓmeḏbaḥ ḏ ṯemziḏa ṯameqqrant.

³⁶ Aqa tesȓam ȓḥaqq: Marra lƹiqab-a aḏ d ihwa x yiwḏan n ȓweqṯ-a!

Siḏiṯneɣ Ƹisa itxeyyaq x ṯendint n Lquds

³⁷ Ya Lquds ya Lquds! Ḏ cem ig ineqqen lʼanbiya, ḏ cem ig irejjmen yinni ɣarem d issekk Arebbi! Nec mecḥaȓ n ṯwaȓaṯin xseɣ aḏ smuneɣ ṯarwa nnem am can ṯyaziṭ iteḥbubuḍen x ifiǧusen nnes walakin kenniw ṯugim.

³⁸ Aqa ṯaddarṯ nwem aḏawem ṯeqqim ḏ ȓxirbeṯ.

³⁹ Aḏawem iniɣ belli war ḏayi ṯẓerrem ca ƹaweḏ ḥetta aȓ Nhar nni iy ɣa ṯinim: Ssaƹḏ ya wenni iy d yusin ƹlaḥsab isem n Siḏi Arebbi!"