Matta 21 - Ṯarifiṯ 2020

Siḏiṯneɣ Ƹisa itaḏaf x usnus ɣar Lquds

¹ Wami qarrben ɣar ṯendint n Lquds uwḍen ɣar ubilaj n Bayt Faji zzaṯ i Uḏrar n Zzitun, ikkar Ƹisa issekk ṯnayen zeg imeḥḍaren nnes,

² inna-asen: "Ruḥem ɣar ubilaj-in iǧan zzaṯwem, aḏ tafem ḏinni ṯaɣyuȓṯ ṯeqqen akiḏes asnus. Fsim-asen awim-ṯen-d ɣari.

³ Meȓa issiweȓ ɣarwem can yijjen inna-awem ca, inim-as qa Iḥḏaj-iṯen Siḏiṯneɣ. Ȓexddenni akiwem-ṯen-d issekk."

⁴ Ammu iwqeƹ ḥima aḏ ikemmeȓ wawaȓ iy inna Siḏi Arebbi i nnabi Zakariya ḏeg yijjen n zman:

⁵ "Inim-as i yeǧis n Lquds: Xzar, azeǧiḏ nnem yusa-d ɣarem, war ḏayes bu ttakebbur. Inya x yijjen n ṯeɣyuȓṯ, ḏ usnus mmis n ṯeɣyuȓṯ."

⁶ Ruḥen ṯnayen nni imeḥḍaren, ggin mamc ḏasen inna Ƹisa.

⁷ Uwin-d ṯaɣyuȓṯ ḏ usnus, ggin xasen izeǧuba nsen ȓexddenni inya Ƹisa.

⁸ Aṭṭas n yiwḏan ssun-as abriḏ s izeǧuba nsen. Inneɣni qessen ȓefruƹ n ȓcejjur ssun zzaysen abriḏ.

⁹ Yinni igguren zzaṯes ḏ yinni iy ṯ iḏeffaren qqaren: "Lƹaḍama i Mmis n Ayṯ-Dawed! Ssaƹḏ n wenni iy d yusin ƹlaḥsab isem n Siḏi Arebbi. Lḥamdu i Arebbi yuƹȓan."

¹⁰ Wami yuḏef Ƹisa ɣar ṯendint n Lquds, kkaren-d ayṯbab n ṯendint nnan: "Min iƹna wa?"

¹¹ Nnan ȓɣaci qa wanita ḏ nnabi Ƹisa zeg ubilaj n Naṣira ḏi ṯmurṯ n Ljalil."

Siḏiṯneɣ Ƹisa ḏi ṯemziḏa ṯameqqrant n Ayṯ-Israʼil

¹² Yuḏef Ƹisa ɣar ṯemziḏa ṯameqqrant yuzzeȓ x marra x yinni issaɣen ḏ yinni iznuzan. Iqȓeb-asen missaṯ n yinni itṣarrafen tmenyaṯ ḏ ȓekrasa n yinni iznuzan iḏbiren.

¹³ Inna-asen: "Lkitab iqqar: <Ṯaddarṯ inu aḏ tiȓi ḏ ṯaddarṯ n ṯẓaǧiṯ.> Walakin kenniw ṯarrim-teṯ ḏ ifri n ixewwanen."

¹⁴ Ḏi ṯemziḏa ṯameqqrant qarrben-d ɣar Ƹisa iḍarɣaȓen ḏ izeḥḥafen uca isgenfa-ṯen.

¹⁵ Ƹeṣṣben arruyas n ȓfuqaha ḏ imseȓmaḏen n ccariƹa wami ẓrin Ƹisa lmuƹjizaṯ iy igga, ḏ iḥenjiren ṭṭarf i ṯemziḏa ṯameqqrant tȓaɣan s jjheḏ qqaren: "Lƹaḍama i Mmis n Ayṯ-Dawed!"

¹⁶ Nnan-as i Ƹisa: "Ma tesȓiḏ min xak qqaren?" Inna-asen Ƹisa: "Wah, ma war ṯeɣrim min iǧan ḏi Lkitab? <Ṯeggiḏ, ay Arebbi, ac ḥemḏen iḥenjiren ḏ iseyman s uqemmum nsen.>"

¹⁷ Ssenni ismeḥ ḏaysen, iffeɣ zi ṯendint nni iruḥ ɣar ubilaj n Bayt Ƹanya isens ḏinni.

Ṯacejjarṯ n ṯazarṯ yuzɣen

¹⁸ Ɣar ṣbaḥ zic igaƹƹeḏ Ƹisa ɣar ṯendint, netta iǧuz.

¹⁹ Iẓra ijjen n ṯcejjarṯ n ṯazarṯ x ubriḏ iruḥ ɣares yufi-t ḏayes ṯifray waha. Inna-as: "Cem zi ssa aȓ ṯsawent ƹemmarṣ aḏ tarweḏ." Ȓexddenni ṯuzeɣ ṯcejjarṯ nni n ṯazarṯ.

²⁰ Imeḥḍaren nnes wami ẓrin min iweqƹen, tƹejjben nnan-as i Ƹisa: "Mammec ṯegga ṯcejjarṯ-a ṯuzeɣ ḏeg umcan?"

²¹ Indeq-d Ƹisa inna-asen: "Aqa tesȓam ȓḥaqq: Mȓi ḏaywem lʼiman war ṯcekkim ca, ataf aḏ teggem ktar zi min itwaggen i ṯcejjarṯ-a. Meȓa ṯennim i uḏrar-a: Neqȓeƹ-d cek ssanita ṯmenḍareḏ ḏi ȓebḥar, ataf aḏ ineqȓeƹ.

²² Inna-asen: Meȓa ṯumnem, aɣarwem yiȓi marra min ɣa ṯettarem i Arebbi ḏi ṯẓaǧiṯ nwem."

Ssulṭa n Siḏiṯneɣ Ƹisa

²³ Yuḏef Ƹisa ḏi ṯemziḏa ṯameqqrant iseȓmaḏ ḏinni. Qarrben-d ɣares arruyas n ȓfuqaha ḏ imeqqranen zi Ayṯ-Israʼil nnan-as: "Cek manis ḏac d ṯekka ssulṭa nni iy zi teggeḏ ṯimesȓayin-a? Wi ḏac yucin ssulṭa nni?"

²⁴ Indeq-d Ƹisa inna-asen: "Uȓa ḏ nec akenniw sseqsiɣ x yijjen n ṯmesȓayṯ. Meȓa ṯjawbem-ayi-d xas, ataf aḏawem iniɣ zi manis ḏayi d ṯekka ssulṭa-ya iy zi teggeɣ ṯimesȓayin-a.

²⁵ Yaḥya, man ssulṭa iy zi iṭehhar s waman, ma zi Arebbi ma zeg yiwḏan?" Ssiwȓen jarasen nnan: "Meȓa nenna-as zi Arebbi, ataf aḏaneɣ yini Ƹisa mayemmi war zzayes ṯuminem ca?

²⁶ Meȓa nenna-as ssulṭa nni ṯekka-d zeg yiwḏan, ataf neccin a neggweḏ zi ccaƹb minzi marra ccaƹb twaȓan belli Yaḥya netta ḏ nnabi."

²⁷ Kkaren nnan-as i Ƹisa: "War nessin ca." Indeq-d Ƹisa inna-asen: "Iwa uȓa ḏ nec war ḏawem qqareɣ ca manis ḏayi d ṯekka ssulṭa-ya iy zi teggeɣ ṯimesȓayin-a."

Ȓmaƹna n ṯnayen n wawmaṯen

²⁸ "Min ḏawem imeḍharen? Ijjen n bnaḏem ɣares ṯnayen n ṯarwa nnes. Iruḥ ɣar umezwaru inna-as: A mmi, ruḥ aḏ txeḏmeḏ nhara ḏeg umarjeƹ inu uḍiȓ.

²⁹ Indeq-d mmis inna-as: Lla, war traḥeɣ ca. Walakin menbaƹd cwayt indem, iruḥ ɣar umarjeƹ.

³⁰ Iruḥ ɣar mmis nneɣni inna-as min ḏas inna i mmis nni amezwaru. Yarra xas inna-as: Waxxa a Baba inu. Walakin war iruḥ ca.

³¹ Uw iggin min ixes babaṯsen zi ṯnayen-a?" Nnan-as: "Amezwaru." Inna-asen Ƹisa: "Aqa tesȓam ȓḥaqq: Iƹeccaren ḏ ṯemɣarin iffɣen abriḏ aḏawem izwaren ɣar ȓmulk n Arebbi.

³² Ȓaḥeqqac yusa-d ɣarwem Yaḥya iseḍhar-awem-d abriḏ n ȓḥaqq, war zzayes ṯuminem ca. Walakin iƹeccaren ḏ ṯemɣarin iffɣen abriḏ umnen zzayes. Kenniw ṯeẓrim manayenni, walakin war tubem ca ḥima azzayes ṯamnem."

Ȓmaƹna n ixemmasen iy ḏi iǧa ccarr

³³ "Ṣennṭeṯ i yijjen n ȓmaƹna nneɣni. Ijjen n bab n ṯeddarṯ iẓẓu aḍiȓ ḏeg yijjen n umarjeƹ nnes. Inneḍ-as-d ȓḥiḍ, igga ḏayes ṯasirṯ uḍiȓ. Ibna ḏayes ijjen n ṯsumƹeṯ i ȓƹasseṯ. Igga ḏayes ixemmasen iruḥ isafar.

³⁴ Wami d yuweḍ ȓweqṯ n uȓqeḍ n uḍiȓ, ikkar issekk ixeddamen nnes ɣar ixemmasen nni bac aḏas d ucen ȓḥaqq nnes n uḍiȓ.

³⁵ Walakin min ggin ixemmasen nni? Ṭṭfen ixeddamen nnes, ijjen uwṯin-ṯ, ijjen nɣin-ṯ, ijjen rejmen-ṯ.

³⁶ Ikkar issekk ixeddamen nneɣni ktar zeg umezwaru. Ggin-asen ixemmasen nni min ggin i imezwura.

³⁷ Ɣar uneggaru ikkar issekk ɣarsen mmis. Inna aqa aḏ ggwḏen memmi.

³⁸ Wami ufin ixemmasen nni mmis yusa-d, nnan i wayawya: Aṯ nneɣ bac aḏas nawi amarjeƹ-a n uḍiȓ!

³⁹ Ṭṭfen-ṯ, nɣin-ṯ, nḍaren-ṯ-iḏ ɣar barra i umarjeƹ uḍiȓ.

⁴⁰ Iwa xmi iy d ɣa iḏweȓ bab n umarjeƹ, min ḏasen ɣa igg i ixemmasen nni?"

⁴¹ Nnan-as: "Iwḏan nni iƹeffanen aṯen ineɣ, uca aḏ ijj amarjeƹ uḍiȓ i ixemmasen nneɣni iy ḏas ɣa ucen ȓḥaqq nnes uḍiȓ ḏi ȓweqṯ."

⁴² Inna-asen Ƹisa: "Ma ƹemmarṣ war ṯeɣrim min yurin ḏi Lkitab?

⁴³ S manaya qqareɣ-awem: Ȓmulk n Arebbi aḏawem itwakkes aḏ immuc i yijjen n ccaƹb ig iteggen ȓxir.

⁴⁴ Wenni ɣa iwḍan x uzru-ya aḏ irez. Wenni xef ɣa iwḍa uzru-ya aḏ ineȓbeẓ."

⁴⁵ Wami sȓin arruyas n ȓfuqaha ḏ ȓḥizeb n ifarrisiyen i ȓemƹani n Ƹisa fehmen belli issawaȓ xasen.

⁴⁶ Rezzun aṯ ṭṭfen, walakin ggwḏen zi ccaƹb minzi twaȓan Ƹisa ḏ nnabi.