Matta 2 - Ṯarifiṯ 2020

Yinni iqqaren lƹilem n yiṯran

¹ Wami d ixȓeq Ƹisa ḏeg ubilaj n Bayt Laḥm ḏi ṯmurṯ n Yahuḏiya ḏi ȓweqṯ n uzeǧiḏ Hirudus, usin-d can yiwḏan zeg yinni iqqaren lƹilem n yiṯran zi ccarq ɣar ṯendint n Lquds.

² Nnan: "Mani iǧa uḥenjir nni iy d ixeȓqen aḏ yiȓi ḏ azeǧiḏ n Ayṯ-Israʼil? Aqa neẓra iṯri nnes ḏi ccarq, qa nusa-d aḏas nsejjeḏ."

³ Wami isȓa uzeǧiḏ Hirudus manaya, ixeyyeq iysi ijjen n umnus ḏ ameqqran netta ḏ imezḏaɣ n Lquds.

⁴ Ismun marra arruyas n ȓfuqaha n Ayṯ-Israʼil ḏ imseȓmaḏen n ccariƹa isseqsa-ṯen inna-asen: "Mani d ɣa ixȓeq Lmasiḥ?"

⁵ Arrin xas nnan-as: "Ḏi Bayt Laḥm ḏi ṯmurṯ n Yahuḏiya, mammec yura nnabi Mixa ḏeg yijjen n zman:

⁶ Arebbi inna: "

⁷ Ȓexddenni iȓaɣa-yasen-d uzeǧiḏ Hirudus s ṯnufra i yinni iqqaren lƹilem n yiṯran, isseqsa-ṯen issen zzaysen meȓmi tuɣa d imeḍhar yiṯri-ya.

⁸ Ssenni issekk-iṯen ɣar Bayt Laḥm inna-asen: "Ruḥem ḏinni rzum mliḥ x uḥenjir nni. Xmi ṯ ɣa ṯafem, ƹeȓmem-ayi bac aḏ raḥeɣ uȓa ḏ nec aḏas sejjḏeɣ."

⁹ Sȓin min inna uzeǧiḏ, kkaren ruḥen ḏinni. Iṯri nni iy ẓrin ḏi ccarq iggur ɣar zzaṯ. Wami yuweḍ yiṯri nni, ibedd ḏeg ujenna ɣar mani iǧa uḥenjir nni.

¹⁰ Wami ẓrin iṯri nni farḥen aṭṭas.

¹¹ Uḏfen ṯaddarṯ nni, ufin aḥenjir nni ak yemmas Maryam, wḍan x ifadden nsen sejjḏen-as. Kksen-d ȓeknuz nsen, iƹni ddheb ḏ tbaxur lluban ḏ yijjen n ȓḥajeṯ ḏ tufuḥ qqaren-as murr, ucin-as-ṯen ḏ lhadiyaṯ.

¹² Iƹȓem-asen Arebbi ḏi ṯirjiṯ inna-asen war teƹqibem ca ɣar uzeǧiḏ Hirudus. Ṣafi kkaren ḏewȓen ɣar ṯmurṯ nsen x yijjen n ubriḏ nneɣni.

Ṯarweȓa ɣar Miṣra

¹³ Wami uyuren yiwḏan nni iqqaren lƹilem n yiṯran, ṯbedd-d ijjen n lmalaʼika n Siḏi Arebbi ḏi ṯirjiṯ ɣar Yusef ṯenna-as: "Kkar ysi aḥenjir ḏ yemmas arweȓ ɣar Miṣra, zeḏɣem ḏinni aȓ ḏac ɣa iniɣ ḏweȓ-d. Aqa azeǧiḏ Hirudus irezzu x uḥenjir-a bac aṯ ineɣ."

¹⁴ Ikkar Yusef yuyur s ǧiȓeṯ ɣar Miṣra yuwi aḥenjir nni ḏ yemmas akiḏes.

¹⁵ Iqqim ḏinni ḥetta aȓ wami immuṯ Hirudus. Qaƹ manaya iwqeƹ ḥima aḏ ikemmeȓ wawaȓ ig inna Siḏi Arebbi i nnabi umi qqaren Hucaƹ ḏeg yijjen n zman:

Ȓmewṯ n iḥenjiren n Bayt Laḥm

¹⁶ Wami d yarra ȓexbar Hirudus belli yinni iqqaren lƹilem n yiṯran cemṯen-ṯ, iƹeṣṣeb aṭṭas iɣḍeb. Issekk bac aḏ ineɣ iḥenjiren nni marra ḏi Bayt Laḥm ḏ nnawaḥi nnes iy ɣar ṯeǧa qell zi ƹamayen. Manaya ƹlaḥsab ȓweqṯ iy ḏasen d imeḍhar yiṯri nni i yinni iqqaren lƹilem n yiṯran.

¹⁷ Ȓexddenni ikemmeȓ wawaȓ nni iy inna Siḏi Arebbi i nnabi umi qqaren Irmiya ḏeg yijjen n zman:

¹⁸ <Ṯɣuyyiṯ tesȓan-as zi dcar n Rama, ḏ imeṭṭawen ḏ waṭṭas n lḥuzen, ḏ Ayṯ-Raḥil ig itrun x ṯarwa nsen, war xsen aṯen iƹezza ḥadd x ṯarwa nsen immuṯen.>

Teƹqaben-d zi Miṣra ɣar Naṣira

¹⁹ Wami immuṯ uzeǧiḏ Hirudus ṯbedd-d ijjen n lmalaʼika n Siḏi Arebbi ɣar Yusef ḏi ṯirjiṯ ḏi Miṣra.

²⁰ Ṯenna-as: "Kkar ƹqeb, awi akiḏec aḥenjir-a ḏ yemmas ɣar ṯmurṯ n Ayṯ-Israʼil, aqa yinni ixsen aḏ nɣen aḥenjir-a qa mmuṯen."

²¹ Ssenni ikkar Yusef yuwi akiḏes aḥenjir nni ḏ yemmas iḏweȓ ɣar ṯmurṯ nnes n Ayṯ-Israʼil.

²² Walakin wami isȓa belli azeǧiḏ Arxilawus ixȓef babas Hirudus ḏi ȓeḥkam n Yahuḏiya, iggweḏ aḏ iraḥ ḏinni. Siḏi Arebbi iƹȓem-as-d ƹaweḏ ḏeg yijjen n ṯirjiṯ, ikkar iruḥ ɣar jjiheṯ n ṯmurṯ n Ljalil.

²³ Izḏeɣ ḏeg yijjen n ubilaj qqaren-as Naṣira ḥima aḏ ikemmeȓ wawaȓ nni iy inna Siḏi Arebbi i lʼanbiya ḏeg yijjen n zman: