Matta 19 - Ṯarifiṯ 2020

Ṭṭalaq ƹlaḥsab mammec iqqar Siḏiṯneɣ Ƹisa

¹ Wami ikemmeȓ Ƹisa awaȓ nnes, iffeɣ zi ṯmurṯ n Ljalil yuweḍ ɣar jwayeh n Yahuḏiya ḏ ujemmaḍ-in n yiɣzar n Lʼurdun.

² Ḏfaren-ṯ ijjen n lƹadad n yiwḏan, isgenfa imehȓac nsen ḏinni.

³ Qarrben-d ɣares can yiwḏan zi ȓḥizeb n ifarrisiyen ḥima aṯ jarrben. Nnan-as: "Ma ḥalal aḏ iǧef can uryaz i ṯemɣarṯ nnes ḏi ayyi ȓḥajeṯ?"

⁴ Indeq-d Ƹisa inna-asen: "Ma war ṯeɣrim min iqqar Lkitab? Zeg wami ṯeǧa ddunect ixȓeq Lxaliq aryaz ḏ ṯemɣarṯ.

⁵ Inna Arebbi: Aqa aryaz aḏ ijj babas ḏ yemmas aḏ imun ak ṯemɣarṯ nnes, aḏ ḏewȓen s ṯnayen iḏsen ḏ ijjen.

⁶ X manaya war tiȓin ca ḏ ṯnayen; Lla, aḏ iȓin ḏ ijjen. Iḏen, min ismun Arebbi war ṯ isfarreq ca bnaḏem."

⁷ Nnan-as ifarrisiyen: "Iwa, mayemmi iweṣṣa Musa aryaz aḏ yuc ṯabrat n waǧaf i ṯemɣarṯ nnes aḏas iǧef?"

⁸ Inna-asen Ƹisa: "Ijji-kenniw Musa aḏ teǧfem i ṯemɣarin nwem minzi ɣarwem uȓ iqseḥ, walakin ḏeg umezwaru war tuɣa ca ammu.

⁹ Qqareɣ-awem nec: Marra wenni ɣa iǧfen i ṯemɣarṯ nnes amen war ṯezni, yuwi can icten nneɣni, ataf izna."

¹⁰ Nnan-as imeḥḍaren nnes: "Meȓa ammu lḥala n uryaz ak ṯemɣarṯ nnes, ḥsen-as ataf war imeǧec ca."

¹¹ Inna-asen Ƹisa: "Zemmaren aḏ qebȓen awaȓ-a ɣir yinni umi yuca Arebbi ṯizemmar aṯ qebȓen.

¹² Ḏinni ȓebƹaḍ zeg wami xeȓqen war zemmaren aḏ meȓcen. Ḏinni ȓebƹaḍ nneɣni qqnen-ṯen yiwḏan. U ḏinni ȓebƹaḍ nneɣni ugin aḏ meȓcen x ssabab n ȓmulk ujenna. Wenni izemmaren aḏ iqbeȓ ṯimesȓayin-a aṯent iqbeȓ."

Siḏiṯneɣ Ƹisa itbarek iḥenjiren imezyanen

¹³ Uwin-d yiwḏan can iḥenjiren ḏ imezyanen ɣar Ƹisa ḥima axasen isers ifassen axasen iẓẓaǧ, walakin ƹarrḍen-asen imeḥḍaren nnes.

¹⁴ Ikkar Ƹisa inna-asen: "Jjem iḥenjiren imezyanen aɣari d asen. War ḏasen tƹarraḍem ca ȓaḥeqqac ȓmulk ujenna itiȓi ɣar yinni iy iǧan am yina."

¹⁵ Igga xasen ifassen nnes yuyur ssenni.

Aḥenjir ig iǧan ḏ ttajar

¹⁶ Iqarreb ijjen n uḥenjir ɣar Ƹisa inna-as: "A Lmuƹallim, min ɣa ggeɣ ḏ aṣebḥan ḥima aɣari ṯiȓi ṯuḏarṯ n ȓebda?"

¹⁷ Inna-as Ƹisa: "Mayemmi iy ḏayi tesseqsiḏ x min iṣebḥan? Ɣir ijjen ig iǧan ḏ aṣebḥan. Meȓa ṯexseḏ aḏ taḏfeḏ ṯuḏarṯ n ȓebda, egg array s ȓuṣiyaṯ."

¹⁸ Inna-as uḥenjir nni: "Man ȓuṣiyaṯ?" Inna-as Ƹisa: "War neqq, war zenni, war tacar, war cehheḏ bu ẓẓur,

¹⁹ weqqar babac ḏ yemmac, xes ajjar nnec amecnaw ixef nnec."

²⁰ Inna-as uḥenjir nni: "Tweqqareɣ marra manaya. Min ḏayi iqqimen aṯ ggeɣ?"

²¹ Inna-as Ƹisa: "Meȓa ṯexseḏ aḏ teggeḏ kuȓci nican, ruḥ zenz marra min ɣarek ḏ agȓa ṣeddeq-iṯ x ȓmusakin. Ssenni aɣarek yiȓi ijjen n ȓkenz ḏeg ujenna, ȓexddenni araḥ-d cek ḏfar-ayi-d."

²² Aḥenjir nni, wami isȓa i manayenni iruḥ ixeyyeq aṭṭas ȓaḥeqqac ɣares aṭṭas n wagȓa.

²³ Inna-asen Ƹisa i imeḥḍaren nnes: "Aqa tesȓam ȓḥaqq: Mecḥaȓ iqseḥ xas x ttajar aḏ yaḏef ȓmulk ujenna."

²⁴ Qqareɣ-awem ƹaweḏ: Aqa isheȓ aḏ iƹḏu ijjen n uȓɣem zi ṯiṭṭ n ṯseynefṯ qbeȓ ma aḏ yaḏef ijjen n ttajar ḏi ȓmulk n Arebbi."

²⁵ Imeḥḍaren setƹejjben aṭṭas wami sȓin manayenni, nnan-as: "Xyar, ug izemmaren aḏ injem!?"

²⁶ Ixzar ɣarsen Ƹisa inna-asen: "Manaya war ḏas zemmaren ca yiwḏan, walakin kuȓci izemmar-as Arebbi."

²⁷ Indeq-d Buṭrus inna-as: "Aqa neccin nesmeḥ ḏi kuȓci neḏfar-ic, min ɣarneɣ ɣa yiȓin?"

²⁸ Inna-asen Ƹisa: "Aqa tesȓam ȓḥaqq: Ḏi ṯuḏarṯ nneɣni xmi ɣa iqqim Mmis n bnaḏem x lƹarc nnes n lƹaḍama, uȓa ḏ kenniw ḏayi d iḏfaren aḏ teqqimem x ṯenƹac n lƹarcaṯ ḥima aḏ tḥekmem x ṯenƹac n ṯqebbaȓ n Ayṯ-Israʼil.

²⁹ U marra yinni isemmḥen ḏi ṯuḏrin nsen niɣ ḏi ayṯmas niɣ ḏi suyṯmas niɣ ḏi babas ḏ yemmas niɣ ḏi ṯarwa nsen niɣ ḏeg imarjeƹiwen nsen x ssabab inu nec, ataf aɣarsen ṯiȓi miyya n ṯseqqar ktar, aḏ warṯen ṯuḏarṯ n ȓebda.

³⁰ Aṭṭas iy iǧan ḏ imezwura aḏ ḏewȓen ḏ ineggura, ineggura aḏ ḏewȓen ḏ imezwura."