Matta 15 - Ṯarifiṯ 2020

Lƹadaṯ iy war d yusin ca zi Arebbi

¹ Ssenni usin-d ȓḥizeb n ifarrisiyen ḏ imseȓmaḏen n ccariƹa ɣar Ƹisa zi ṯendint n Lquds nnan-as:

² "Mayemmi imeḥḍaren nnec beṭṭȓen lƹadaṯ n ȓejḏuḏ nneɣ? Mayemmi war siriḏen ca ifassen nsen qbeȓ ma aḏ ccen aɣrum?"

³ Indeq-d Ƹisa inna-asen: "Iwa mayemmi kenniw ṯbeṭṭaȓem ȓuṣiyeṯ n Arebbi ḥima aḏ tesxeḏmem lƹadaṯ nwem?

⁴ Minzi Arebbi inna: Weqqar babac ḏ yemmac. Aqa wenni ɣa yukkaren babas niɣ ḏ yemmas, ataf itxeṣṣa-yas aḏ immeṯ.

^5-6 Walakin kenniw ṯeqqarem belli war iǧi bu labud i yiwḏan aḏ weqqaren niɣ aḏ ƹawnen lwalidin. Tmenyaṯ nni iy ɣa ucen i lwalidin nsen aṯent ucen i ṯemziḏa. Ammu kenniw ṯbeddȓem ȓmaƹna n wawaȓ n Arebbi ḥima aḏ teggem mammec ḏawem iƹjeb ȓḥaȓ s lƹadaṯ nwem.

⁷ A lmunafiqin! Qa nnabi Icaƹya inna ȓḥaqq wami xawem issiweȓ ḏeg yijjen n zman:

⁸

⁹ Iwḏan-a ƹebbḏen-ayi ḏi ȓxawi, ȓaḥeqqac seȓmaḏen ṯimesȓayin iǧan ḏ ȓuṣiyaṯ n bnaḏem waha.>"

¹⁰ Iȓaɣa-d Ƹisa i ȓɣaci inna-asen: "Sennṭeṯ mliḥ, fehmeṯ:

¹¹ Ma ḏinni ca n ṯmesȓayṯ itaḏfen aqemmum tḥarram bnaḏem?" Inna-asen: "Lla, min d iteffɣen zeg uqemmum aqa manayenni ig itḥarramen bnaḏem."

¹² Qarrben-d ɣares imeḥḍaren nnes nnan-as: "Ma ṯessneḏ belli ifarrisiyen war ḏasen iƹjib bu ȓḥaȓ wami sȓan i wawaȓ nnec?"

¹³ Indeq-d Ƹisa inna-asen: "Kuȓ arbiƹ war ṯ iẓẓu ca Baba iǧan ḏeg ujenna aḏ ineqȓeƹ s iẓewran nnes.

¹⁴ Jjem-ṯen! Niṯni ḏ iḍarɣaȓen tjarran iḍarɣaȓen. Meȓa aḍarɣaȓ ijarr aḍarɣaȓ, ataf aḏ wḍan s ṯnayen iḏsen ḏi can ṯesrafṯ."

¹⁵ Inna-as Buṭrus: "Fesser-aneɣ ȓmaƹna-ya."

¹⁶ Inna-as Ƹisa: "Uȓa ḏ kenniw ƹaḏ war ṯefhimem ca?

¹⁷ Ma war ṯessinem belli min itaḏfen ḏeg uqemmum itraḥ ɣar uƹeddis iteffeɣ zi ddat?

¹⁸ Walakin min d iteffɣen zeg uqemmum itas-d zeg wuȓ, u ḏ manaya itḥarramen bnaḏem.

¹⁹ Ȓaḥeqqac zeg wuȓ iy zi d tekkant lʼafkar ṯiƹeffanin ḏ ṯmenɣiwṯ ḏ zzna ḏ lfasad ḏ ṯukkarḏa ḏ ẓẓur ḏ ȓbaṭeȓ.

²⁰ Ḏ ṯimesȓayin-a ig itḥarramen bnaḏem. Walakin meȓa icca s ifassen bȓa ma ṯen isireḏ ataf war itḥarrim bu bnaḏem."

Lʼiman n ṯemɣarṯ n Ayṯ-Kanƹan

²¹ Ikkar Ƹisa yuyur ssenni iruḥ ɣar jwayeh n ṯendint n Ṣur ḏ ṯendint n Ṣayda.

²² Ṯusa-d ɣares ijjen n ṯemɣarṯ zi Ayṯ-Kanƹan ṯzeddeɣ ḏinni. Traɣa ṯeqqar-as i Ƹisa: "Rḥem-ayi a Siḏi, a Mmis n Ayṯ-Dawed! Qa yeǧi ḏayes ijjen n jjenn ḏ aƹeffan itƹeddab-it aṭṭas."

²³ War ḏas inni Ƹisa uȓa ḏ ijjen n wawaȓ. Qarrben ɣares imeḥḍaren nnes nnan-as: "Ṯamɣarṯ-a sufeɣ-it xaneɣ, zi ṣbaḥ nettaṯ ṯḏeffar-aneɣ ṯesɣuyiw xaneɣ."

²⁴ Inna-asen Ƹisa: "Qa nec twassekkeɣ-d ɣir ɣar iḥuȓiyen iweddaren, iƹni iwḏan n Ayṯ-Israʼil."

²⁵ Walakin ṯamɣarṯ nni ṯusa-d ɣares ṯsejjeḏ-as ṯenna-as: "A Siḏi, ƹawen-ayi!"

²⁶ Indeq-d Ƹisa inna-as: "Maci maƹqul aḏ itwakkes uɣrum n iḥenjiren aḏ imenḍar i iqzinen."

²⁷ Ṯenna-as ṯemɣarṯ nni: "Ɣarek ȓḥaqq a Siḏi, walakin uȓa ḏ iqzinen nni tetten ifetwitten n uɣrum ig itweṭṭan zi ṭabȓa n ayṯbab nsen."

²⁸ Ikkar Ƹisa inna-as: "Cem a ṯamɣarṯ, lʼiman nnem ijheḏ s waṭṭas!" Inna-as: "Min ṯrezzuḏ aḏ tafeḏ." Ḏi ṯsaƹƹat nni ṯgenfa yeǧis.

Siḏiṯneɣ Ƹisa isecc arbeƹaȓaf n iryazen

²⁹ Ibeƹƹeḏ ssenni Ƹisa, yuyur x cceṭṭ n ȓebḥar n Ljalil. Igaƹƹeḏ ɣar yijjen n uḏrar iqqim ḏinni.

³⁰ Usin-d ɣares aṭṭas n ȓɣaci. Uwin-d akiḏsen izeḥḥafen ḏ iḍarɣaȓen ḏ izeynunen ḏ inecrufen ḏ waṭṭas n imehȓac nneɣni. Sersen-ṯen ɣar iḍaren nnes isgenfa-ṯen.

³¹ Tƹejjben yiwḏan nni wami ẓrin izeynunen ssawaȓen, inecrufen genfan, izeḥḥafen gguren, iḍarɣaȓen twaȓan. Kkaren ḥemḏen Arebbi n Ayṯ-Israʼil.

³² Iȓaɣa-d Ƹisa i imeḥḍaren nnes inna-asen: "Nec qqsen-ayi yiwḏan-a. Ṯeȓtiyyam zeg wami aqaṯen akiḏi war ɣarsen ca min ɣa ccen. War xseɣ ca aṯen ssekkeɣ niṯni war ccin ca ḥima war tesxiffen x ubriḏ."

³³ Nnan-as imeḥḍaren nnes: "Ḏi ȓexȓa-ya mani ɣa naf aɣrum iy zi ɣa nsecc qaƹ lƹadad-a n yiwḏan?"

³⁴ Inna-asen Ƹisa: "Cḥaȓ ɣarwem n uɣrum?" Nnan-as: "Ɣarneɣ sebƹa n ṯecnifin ḏ ca n iseȓman ḏ imezyanen."

³⁵ Yumar Ƹisa ȓɣaci aḏ qqimen ḏi ṯmurṯ.

³⁶ Iṭṭef sebƹa nni n ṯecnifin ḏ iseȓman nni, icekkar Arebbi. Irzi-ṯen yuci-ṯen i imeḥḍaren nnes, imeḥḍaren nnes ferqen-ṯen x ȓɣaci nni.

³⁷ Marra ccin jjiwnen, ceṭṭent sebƹa n ṯeqrabin ƹemmarent s iȓeqquzen.

³⁸ Marra iryazen nni ig iccin niṯni arbeƹaȓaf iḏsen bȓa ṯimɣarin bȓa iḥenjiren.

³⁹ Wami imsafaḍ xasen Ƹisa x ȓɣaci nni, inya ḏeg yijjen n ṯɣarrabut iruḥ ɣar jwayeh n Magdala.