Matta 14 - Ṯarifiṯ 2020

Ȓmewṯ n Siḏna Yaḥya

¹ Ḏi ȓweqṯ nni azeǧiḏ Hirudus yarra-d ȓexbar x Ƹisa.

² Inna-asen i ixeddamen nnes: "Wanita iƹenni ḏ Yaḥya nni, itwasekkar-d netta zi ȓmewṯ! S manaya iy ɣares jjheḏ iy zi itegg lmuƹjizaṯ-a."

³ Qbeȓ i manaya, azeǧiḏ Hirudus tuɣa iṭṭef Yaḥya icedd-iṯ iggi-ṯ ḏi ȓeḥbes x ssabab n Hirudiya ṯamɣarṯ n wumas Filippas.

⁴ Ȓaḥeqqac iqqar-as Yaḥya i uzeǧiḏ Hirudus: "Ḥram cek aḏ tawiḏ ṯamɣarṯ n wumac."

⁵ Azeǧiḏ Hirudus irezzu aḏ ineɣ Yaḥya, walakin iggweḏ zi ccaƹb ȓaḥeqqac Yaḥya twaȓan-ṯ ḏ nnabi.

⁶ Wami igga uzeǧiḏ Hirudus ȓƹiḏ lmilad nnes, ṯekkar yeǧis n ṯemɣarṯ nnes Hirudiya ṯecḍeḥ zzaṯ i inewjiwen, iƹjeb-as ȓḥaȓ i uzeǧiḏ Hirudus.

⁷ X manaya ijjuǧ inna-as Ttar-ayi min ṯexseḏ, aḏam ṯ uceɣ.

⁸ Nettaṯ ƹlaḥsab min ḏas ṯweṣṣa yemmas, ṯekkar ṯenna-as i uzeǧiḏ Hirudus: "Uc-ayi-d ḏa azeǧif n Yaḥya x ssiniyyeṯ!"

⁹ Ȓexddenni indem uzeǧiḏ, walakin iweṣṣa aḏas ṯ yuc ȓaḥeqqac tuɣa ijjuǧ zzaṯ i inewjiwen ḏi ȓfarḥ nnes.

¹⁰ Issekk ɣar ȓeḥbes wenni ḏas ɣa iqessen azeǧif i Yaḥya.

¹¹ Yuwi-d azeǧif nnes ḏi ssiniyyeṯ yuca-as-ṯ i ṯḥenjirṯ nni, ṯruḥ ṯuwi-yas-ṯ i yemmas.

¹² Kkaren imeḥḍaren n Yaḥya usin-d ysin ddat nnes ggin-t ḏeg unḍeȓ. Ssenni uyuren, xbaren Ƹisa s min iweqƹen.

Siḏiṯneɣ Ƹisa isecc xemsaȓaf n iryazen

¹³ Wami d yarra Ƹisa ȓexbar nni, iruḥ ssenni waḥḏes ḏi ṯɣarrabut ɣar yijjen n umcan ixȓa. Arrin-d ȓexbar ȓɣaci, ḏfaren-ṯ zi ṯneddam x iḍaren.

¹⁴ Wami d iḍra Ƹisa zi ṯɣarrabut yufa qaƹ anect nni n yiwḏan, qqsen-as isgenfa imehȓac nsen.

¹⁵ Wami iƹḏu ȓḥaȓ, qarrben ɣares imeḥḍaren nnes nnan-as: "Ȓweqṯ ṯeƹḏu, amcan-a ḏ ȓexȓa waha. Sekk iwḏan-a ɣar ȓedcuraṯ bac aḏ d sɣen min ɣa ccen."

¹⁶ Inna-asen Ƹisa: "Mayemmi ɣa raḥen? Ucem-asen kenniw min ɣa ccen."

¹⁷ Nnan-as imeḥḍaren nnes: "Neccin ɣarneɣ ḏa ɣir xemsa n ṯxebbazin ḏ ṯnayen n iseȓman."

¹⁸ Inna-asen: "Awim-ayi-d manayenni ɣari nec."

¹⁹ Yumar ȓɣaci nni aḏ qqimen x arbiƹ. Iṭṭef xemsa n ṯxebbazin nni ḏ ṯnayen n iseȓman nni, iysi ṯiṭṭawin nnes ɣar ujenna icekkar Arebbi. Irza ṯixebbazin nni x ṯnayen yuca-asen-ṯent i imeḥḍaren nnes, ȓexddenni ferqen-ṯent x yiwḏan nni marra.

²⁰ Marra ccin jjiwnen. Kkaren jemƹen min xasen iceṭṭen, ṯenƹac n ṯeqrabin ƹemmarent s iȓeqquzen.

²¹ Lƹadad n yinni iccin niṯni xemsaȓaf n iryazen bȓa ṯimɣarin bȓa iḥenjiren.

Siḏiṯneɣ Ƹisa iggur x ȓemwaj n ȓebḥar

²² Ȓexddenni yumar Ƹisa imeḥḍaren nnes aḏ nyen ḏi ṯɣarrabut aḏ ẓwan ɣar ujemmaḍ-in n ȓebḥar, netta itemsafaḍ x ȓɣaci.

²³ Wami xasen imsafaḍ x ȓɣaci nni, igaƹƹeḏ ɣar uḏrar aḏ iẓẓaǧ ḏinni waḥḏes. Ɣar ṯmeddiṯ ƹaḏ aqaṯ ḏinni waḥḏes.

²⁴ Ṯaɣarrabut nni ṯeggwej aṭṭas zi ȓbarr, ȓemwaj tawin-teṯ tarran-teṯ ȓaḥeqqac arriḥ itṣuḍ-d zi jjiheṯ nneɣni.

²⁵ Ƹȓayen iqarreb-d ȓefjar, iruḥ Ƹisa ɣar imeḥḍaren nnes iggur x iḍaren x waman n ȓebḥar.

²⁶ Wami ṯ ufin iggur x iḍaren x waman n ȓebḥar, nxeȓƹen nnan qa wanita ḏ ȓexyaȓ! Snekkaren ṯɣuyyeṯ s ṯiggwḏi.

²⁷ Ȓexddenni inna-asen Ƹisa: "Ahnam! Aqa ḏ nec, war teggwḏem ca!"

²⁸ Inna-as Buṭrus: "A Siḏi meȓa ḏ cek, ȓaɣa-ayi-d aɣarek d aseɣ x waman."

²⁹ Inna-as Ƹisa: "Araḥ-d!" Ikkar ihwa-d Buṭrus zi ṯɣarrabut iggur x iḍaren x waman ɣar Ƹisa.

³⁰ Walakin iggweḏ wami iẓra arriḥ itṣuḍ s jjheḏ, ibḏa iɣarreq. Isnekkar ṯɣuyyeṯ inna: "A Siḏi, ƹṯeq-ayi!"

³¹ Ȓexddenni yuca-as Ƹisa fus nnes iṭṭef-iṯ inna-as: "Lʼiman nnec ḏ uqlil waha, mayemmi iy ḏayi ṯcekkeḏ?"

³² Ṣafi nyan ḏi ṯɣarrabut irsa arriḥ nni.

³³ Uca sejjḏen-as yinni iǧan ḏi ṯɣarrabut nnan: "Ḏ ṣṣaḥ, cek ḏ Mmis n Arebbi!"

³⁴ Wami iẓwa Ƹisa netta ḏ imeḥḍaren nnes ȓebḥar, uwḍen ɣar ṯmurṯ n Ganisarat.

³⁵ Ayṯbab n ṯmurṯ nni ẓrin Ƹisa ƹeqȓen-ṯ. Ȓexddenni sufɣen ȓexbar ḏi marra ṯamurṯ nni, uwin-as-d imehȓac marra.

³⁶ Ttaren-as aṯen ijj aḏ ḥaḏan ɣir ṭṭarf n warruḍ nnes. Ṣafi marra yinni ṯ iḥaḏan genfan.