Matta 12 - Ṯarifiṯ 2020

Min iǧan ḥalal ḏi nhar n ssebṯ n lƹibada

¹ Ḏeg wussan nni ḏi nhar n ssebṯ n lƹibada iƹḏu Ƹisa ḏeg ubriḏ ḏi ȓwesṭ n imendi, imeḥḍaren nnes ǧuzen gguren tekksen ṯiyḏerin tetten-ṯent.

² Wami ṯen ẓrin ca n yiwḏan zi ȓḥizeb n ifarrisiyen nnan-as i Ƹisa: "Xzar! Imeḥḍaren nnec teggen min iǧan ḥram ḏi nhar n ssebṯ n lƹibada."

³ Indeq-d Ƹisa inna-asen: "Ma war ṯeɣrim ca min igga Dawed wami tuɣa iǧuz netta ḏ yinni akiḏes?

⁴ Yuḏef ɣar ṯemziḏa n Arebbi yufa ḏinni aɣrum nni iy iǧan ḏ ṣṣeḏqeṯ icci-ṯ netta ḏ yinni iy kiḏes; waxxa manayenni war iǧi ca ḥalal ɣir i ȓfuqaha waha.

⁵ Niɣ war ṯeɣrim ca ḏi Ccariƹa n Musa belli ȓfuqaha txaȓafen zaƹma nhar n ssebṯ n lƹibada ḏi ṯemziḏa n Arebbi bȓa ma ṯen iḥasseb ḥadd?

⁶ Qqareɣ-awem: Ḏanita ḏinni ijjen ktar zi ṯemziḏa n Arebbi.

⁷ Mȓi ṯfehmem ȓmaƹna n wawaȓ-a iy iqqar Arebbi: , ataf war ṯḥekkmem ca x yinni war iggin minxef.

⁸ Ȓaḥeqqac Mmis n bnaḏem ig iǧan ḏ lḥakem x nhar n ssebṯ."

⁹ Yuyur ssenni Ƹisa, yuḏef ɣar yijjen n ṯemziḏa n Ayṯ-Israʼil.

¹⁰ Yufa ḏinni ijjen n uryaz fus nnes immuṯ. Ȓexddenni sseqsan Ƹisa rezzun aṯ tahmen nnan-as: "Ma ḥalal aḏ tesgenfiḏ can yijjen ḏi nhar n ssebṯ n lƹibada ma lla?"

¹¹ Inna-asen Ƹisa: "Meȓa can yijjen zzaywem ɣares ij uḥuȓi iwḍa-yas ḏi ṯsrafṯ ḏi nhar n lƹibada, ma ṯiḏ iṭṭef aṯiḏ isiȓi ma lla?

¹² Iwa bnaḏem iseggwa aṭṭas s waṭṭas zeg yij uḥuȓi! Ƹlaḥsab manaya ḥalal aḏ teggeḏ ȓxir ḏi nhar n lƹibada."

¹³ Ȓexddenni inna-as Ƹisa i lmuƹaq nni: "Sarreḥ fus nnec." Isarreḥ-iṯ uca iḏweȓ ufus nnes igenfa, mliḥ am ufus nneɣni.

¹⁴ Ffɣen yiwḏan n ȓḥizeb n ifarrisiyen ciṭṭnen jarasen mammec ɣa ggen aḏ nɣen Ƹisa.

Siḏiṯneɣ Ƹisa itwajah yinni iǧan ḍed nnes

¹⁵ Issen Ƹisa manayenni yuyur ssenni. Ḏfaren-ṯ aberru n yiwḏan, isgenfa marra imehȓac nsen.

¹⁶ Iweṣṣa-ṯen inna-asen war txebbarem ḥadd xafi.

¹⁷ Manaya ḥima aḏ iffeɣ wawaȓ iy inna Siḏi Arebbi i nnabi Icaƹya ḏeg yijjen n zman:

¹⁸ <Ḏ wanita ḏ axeddam inu ig ixḍareɣ, wenni iy xafi iƹizzen iy xef arḍiɣ. Aḏayes ggeɣ Arruḥ iqeddsen, aḏ ixebbar yinni zi ȓegnus s ȓḥaqq.

¹⁹ War itmenɣi ak ḥadd, war isnekkar bu ṯɣuyyeṯ, war itsȓi ḥadd i wawaȓ nnes ḏeg ibriḏen.

²⁰ War itrezzi bu ɣanim imeyyȓen, war isexsay ṯfawṯ n ṯefṯiȓt iteggen ddexxan, aȓ ɣa irbeḥ ȓḥaqq.

²¹ Ḏeg yisem nnes ȓegnus aḏ ggen lʼamal.>

²² Ssenni can yiwḏan uwin-as-d i Ƹisa ijjen n uryaz ḏ aḍarɣaȓ ḏ azeynun ḏayes jjenn. Isgenfa-ṯ Ƹisa ḥima aḏ issiweȓ aḏ itwaȓa.

²³ Qqimen ȓɣaci nni tƹejjben marra nnan: "Maci ḏ wanita ig iǧan ḏ Mmis n Dawed niɣ?"

²⁴ Tesȓan ȓḥizeb n ifarrisiyen i wawaȓ nsen nnan-asen: "Bnaḏem-a isufuɣ jnun minzi arrayes n jnun umi qqaren Bƹalzabul yuca-as jjheḏ-a."

²⁵ Issen Ƹisa min nwan inna-asen: "Mkuȓ lmemlaka iy ḏi tmenɣan ayṯbab nnes ijjen ak unneɣni aḏ tnehḏem. Mkuȓ ṯandint niɣ ḏ ṯaddarṯ iy ḏi tmenɣan ayṯbab nnes ijjen ak unneɣni war ṯzemmar aḏ teqqim.

²⁶ Meȓa Cciṭan isufuɣ Cciṭan, ataf aḏ iqḍa x yixef nnes. Mammec ɣa ṯegg aḏ teqqim lmemlaka nnes?

²⁷ Nec meȓa sufuɣeɣ jnun s jjheḏ n Bƹalzabul nni zaƹma, inim-ayi kenniw mammec teggen yiwḏan nwem sufuɣen-ṯen uȓa ḏ niṯni? Niṯni s yixef nsen tbeyyanen belli kenniw war ɣarwem bu ȓḥaqq ḏi min ṯeqqarem.

²⁸ Nec, meȓa sufuɣeɣ jnun s Arruḥ n Arebbi, aqa ȓmulk n Arebbi yusa-d ɣarwem.

²⁹ Iwa mammec? War izemmar ḥadd aḏ ihjem x ṯeddarṯ n can yijjen ijheḏ bac aḏ yacar agȓa nnes illa meȓa icedd-iṯ ḏ amezwaru. Uca aḏas yawi marra min ɣares ḏi ṯeddarṯ.

³⁰ Wenni war kiḏi iǧin ca, ataf aqaṯ ḍed inu. Wenni war kiḏi ismunen, ataf netta itzeǧaƹ.

³¹ Aqa qqareɣ-awem: Aḏ twaɣfarent marra ȓmuƹṣiyaṯ iy teggen yiwḏan ḏ kuȓ awaȓ nni war iḥȓin iy qqaren x Arebbi. Walakin wenni ɣa yinin can wawaȓ war iḥȓin x Arruḥ iqeddsen, ataf war ḏas iɣeffar ca.

³² Wenni ɣa yinin can wawaȓ war iḥȓin x Mmis n bnaḏem, ataf axas iɣfar. Walakin wenni ɣa yinin can wawaȓ war iḥȓin x Arruḥ iqeddsen, ataf war xas iɣeffar ca lla ḏi ddunect-a u lla ḏi lʼaxira.

³³ Meȓa ṯacejjarṯ ḏ ṯaṣebḥant, ataf aḏ tarew min iǧan ḏ aṣebḥan. Meȓa ṯacejjarṯ ḏ ṯaƹeffant, ataf aḏ tarew min iǧan ḏ aƹeffan. Ṯacejjarṯ ṯḍehhar-d s min tarew.

³⁴ A ṯarwa ifiɣeran, mammec ɣa ṯeggem aḏ tinim awaȓ aṣebḥan u kenniw ḏ iƹeffanen? Ȓaḥeqqac aqemmum n bnaḏem issawaȓ min iǧan ḏeg wuȓ nnes.

³⁵ Bnaḏem aṣebḥan isufuɣ-d min iǧan ḏ aṣebḥan zi ȓkenz aṣebḥan n wuȓ nnes. Bnaḏem aƹeffan isufuɣ-d min iǧan ḏ aƹeffan zi ȓkenz aƹeffan n wuȓ nnes.

³⁶ Aḏawem iniɣ: Aqa Yum Lḥisab ḏ Lƹiqab aḏ twaḥasben yiwḏan x mkuȓ awaȓ ixwan iy ssiwȓen.

³⁷ Ȓaḥeqqac ƹlaḥsab awaȓen nnec aqac bariʼ, niɣ ƹlaḥsab awaȓen nnec aḏ twaƹaqbeḏ."

Lƹalama ṯameqqrant n Siḏna Yunes

³⁸ Ȓebƹaḍ n imseȓmaḏen n ccariƹa ḏ ȓḥizeb n ifarrisiyen nnan-as i Ƹisa: "A Lmuƹallim, nexs a nẓer ijjen n lƹalama ḏ ṯameqqrant zzayek."

³⁹ Indeq-d Ƹisa inna-asen: "Iwḏan iƹeffanen n ȓweqṯ-a ixeddƹen Arebbi rezzun lƹalama. Inna-asen: Lla, war ḏasen itmucci illa lƹalama nni n nnabi Yunes.

⁴⁰ Amec iseƹḏu Yunes ṯeȓtiyyam jar ǧiyaȓi ḏ wussan ḏeg uƹeddis n usȓem ameqqran, amenni iy ɣa iseƹḏu Mmis n bnaḏem ṯeȓtiyyam jar ǧiyaȓi ḏ wussan ḏeg uƹeddis n ṯmurṯ.

⁴¹ Yum Lḥisab ḏ Lƹiqab aḏ d kkaren imezḏaɣ n ṯendint n Ninwa ak yiwḏan n ȓweqṯ-a axasen ceṯcan, ȓaḥeqqac ayṯbab n ṯendint n Ninwa tuben wami ṯen inha nnabi Yunes. U ḏanita ijjen ḏ ameqqran zi Yunes.

⁴² Yum Lḥisab ḏ Lƹiqab aḏ tekkar lmalika n ljanub ak yiwḏan n ȓweqṯ-a axasen ṯceṯca, ȓaḥeqqac ṯusa-d nettaṯ zi ṯmurṯ yugjen ḥima aḏ tṣenneṭ i ȓefhameṯ n Suliman. U ḏanita ijjen ḏ ameqqran zi Suliman.

⁴³ Cuf, xmi ɣa itwasufeɣ jjenn aƹeffan zi can bnaḏem, ataf aḏ iggur ḏeg imucan yuzɣen irezzu amcan mani ɣa ireyyeḥ. Meȓa war yufi ca,

⁴⁴ ataf aḏ yini aqa nec aḏ raḥeɣ aḏ ḏewȓeɣ ɣar ṯeddarṯ inu manis iy ffɣeɣ. Ssenni aɣares iḏweȓ at yaf ṯexwa, ṯeƹḏeȓ, ṯenqa.

⁴⁵ Uca aḏ iraḥ aḏ d yawi sebƹa n jnun nneɣni ḏ iƹeffanen ktar zzayes ḥima aḏ ḏewȓen kuȓci aḏayes zeḏɣen. Ataf aḏ tiȓi lḥala ṯaneggarut n bnaḏem nni ḏ ṯaƹeffant ktar zi lḥala nnes ṯamezwarut. Amenni iy ḏasen ɣa ṯewqeƹ i yiwḏan iƹeffanen n ȓweqṯ-a."

⁴⁶ Ƹaḏ issawaȓ Ƹisa ak ȓɣaci wami ɣares d tusa yemmas ḏ ayṯmas, bedden barra i ṯeddarṯ rezzun akiḏes ssiwȓen.

⁴⁷ Inna-as can yijjen i Ƹisa: "Aqa yemmac ḏ ayṯmac bedden ɣar barra rezzun akiḏec ssiwȓen."

⁴⁸ Indeq-d Ƹisa inna-as i wenni iy kiḏes issiwȓen: "Min ƹnan yemma ḏ ayṯma?"

⁴⁹ Iswiẓẓeḏ s ufus nnes ɣar imeḥḍaren nnes inna: "Aqa yemma ḏ ayṯma."

⁵⁰ Inna-as: "Wenni iteggen s min ixes Baba iy iǧan ḏeg ujenna, ataf netta ḏ uma ḏ učma ḏ yemma."