Matta 11 - Ṯarifiṯ 2020

Siḏiṯneɣ Ƹisa ḏ Siḏna Yaḥya

¹ Wami ikemmeȓ Ƹisa ȓuṣiyaṯ i ṯenƹac n imeḥḍaren nnes, yuyur ssenni iruḥ ḥima aḏ iseȓmeḏ aḏ iḥeddeṯ ḏi ṯneddam iy d yuḏsen jjiheṯ nni.

² Wami Yaḥya aqaṯ ḏi ȓeḥbes, isȓa x ȓexḏayem n Lmasiḥ. Issekk can imeḥḍaren nnes ɣar Ƹisa

³ ḥima aḏas inin: "Ma ḏ cek iy xef netsȓa aḏ d taseḏ niɣ a nraja can yijjen nneɣni?"

⁴ Indeq-d Ƹisa inna-asen: "Ƹeqbeṯ ɣar Yaḥya ƹawḏem-as min tesȓam ḏ min twaȓam:

⁵ iḍarɣaȓen twaȓan, izeḥḥafen gguren, yinni iy ḏi iǧa jḏam genfan, iḏehcuren tesȓan, yinni immuṯen tnekkaren-d, ȓmusakin twabeccaren.

⁶ Ssaƹḏ n yinni war ḏayi itcekkin ca."

⁷ Wami rewwḥen imeḥḍaren n Yaḥya, Ƹisa ibḏa issawaȓ x Yaḥya iqqar-asen i ȓɣaci nni: "Minxef ṯeffɣem aḏ teẓrem ḏi ȓexȓa? Ma ɣar yij uɣanim ithezza-ṯ arriḥ? Lla!

⁸ Meȓa lla, minxef ṯeffɣem aḏ teẓrem? Ma ḏ ijjen n uryaz yareḍ arruḍ ḏ aṣebḥan? Lla, yinni iy ɣar iǧa warruḍ ḏ aṣebḥan tƹicen mliḥ tiȓin ḏi ȓquṣur n izeǧiḏen!

⁹ Meȓa lla, minxef ṯeffɣem aḏ teẓrem? Ma ḏ ijjen n nnabi? Qqareɣ-awem: Wah, netta ktar zeg yijjen n nnabi.

¹⁰ Ḏ Yaḥya iy xef issawaȓ Lkitab: Aqa tsekkiɣ-d ijjen n arrasul inu zzaṯec, ḥima aḏac isewjeḏ abriḏ nnec.

¹¹ Aqa tesȓam ȓḥaqq: Zi min d jjint ṯemɣarin, war iǧi ḥadd ḏ ameqqran zi Yaḥya, walakin wenni iy iǧan ḏ amezyan qaƹ ḏi ȓmulk n ujenna netta ḏ ameqqran zi Yaḥya.

¹² Zi ȓweqṯ n Yaḥya aȓ ȓexxu iwḏan temḏeḥḥasen aḏ aḏfen ḏi ȓmulk ujenna, iryazen tmenɣan bac aɣarsen yiȓi.

¹³ Aqa Ccariƹa n Musa ḏ qaƹ lʼanbiya ssiwȓen x ȓmulk ujenna ḥetta aȓ ȓweqṯ n Yaḥya.

¹⁴ U meȓa ṯexsem aḏ tfehmem, Yaḥya netta ḏ nnabi Ilyas nni iy netraja.

¹⁵ Ṣenneṭ mliḥ a wenni itsȓan.

¹⁶ X manaya wi ḏi ɣa cabbheɣ iwḏan n ȓweqṯ-a? Niṯni am ca n iḥenjiren iy iqqimen ḏi saḥa tȓaɣan i wayawya qqaren:

¹⁷ Netṣuḍ ḏi ṯemja, war ṯecḍiḥem ca. Netƹezza-kenniw, war ṯetrum ca.

¹⁸ Minzi Yaḥya yusa-d itẓumma war isess aman n uḍiȓ, nnan aqa ḏayes jnun!

¹⁹ Yusa-d Mmis n bnaḏem itett isess war itẓummi ca, nnan qa wanita itett isess aṭṭas, ƹaweḏ netta ḏ ameddukeȓ n iƹeccaren ḏ yinni iƹeṣṣan. Innama, ȓefhameṯ n Arebbi qebbȓen-teṯ marra yinni ifehhmen."

Ṯineddam ikeffaren

²⁰ Ssenni ibḏa Ƹisa itƹeyyab ṯineddam nni iy ḏi igga aṭṭas n lmuƹjizaṯ nnes, war tuben ca ayṯbab nsent.

²¹ Inna Ƹisa: "Ya ȓefḍiḥeṯ nnec ya abilaj n Kurazim! Ya ȓefḍiḥeṯ nnec ya abilaj n Bayt Ṣayda! Maƹlik lmuƹjizaṯ-a iy ḏaywem iweqƹen, weqƹent ḏi ṯneddam ṯiƹeffanin n Ṣur ḏ Ṣayda, ataf ayṯbab nsent tuben mecḥaȓ zeg wami, iȓi ggin arruḍ n lḥuzen qqimen x yiɣɣeḏ ḥima aḏ d tban tuba nsen.

²² X manayenni aḏawem iniɣ: Aqa ṯineddam ṯiƹeffanin nni n Ṣur ḏ Ṣayda aḏ iȓint ḥsen zzaywem ḏi Yum Lḥisab ḏ Lƹiqab.

²³ Y cek, ay abilaj n Kafernaḥum! Ma tɣir-ac aḏ tgaƹƹḏeḏ ɣar ujenna? Lla, qa cek aḏ tehwiḏ ɣar Ljaḥim. Ȓaḥeqqac lmuƹjizaṯ nni iy ḏayec iweqƹen mȓi weqƹent ḏi ṯendint ṯaƹeffant nni n Sadum, iȓi ƹaḏ aqat ḏ ṯandint aȓ nhara.

²⁴ X manayenni aḏawem iniɣ: Aqa ṯandint ṯaƹeffant nni n Sadum aḏ tiȓi ḥsen zzayec ḏi Yum Lḥisab ḏ Lƹiqab!"

Arraḥeṯ i yinni yuḥȓen

²⁵ Ȓexddenni issiweȓ Ƹisa inna: "Ḥemḏeɣ-cek a Baba a Siḏi Arebbi n ujenna ḏ ṯmurṯ ȓaḥeqqac ṯesnuffareḏ manaya x imiɣisen ḏ lƹulama, ṯseḍhareḏ-ṯ-id i iḥenjiren imezyanen.

²⁶ Wah a Baba, ȓaḥeqqac ammu iy xak yarḍa.

²⁷ Immuc-ayi kuȓci zi Baba. War issin ḥadd min iƹna Mmis menɣir Babas. War issin ḥadd min iƹna Babas menɣir Mmis. Babas, aṯ ssnen ɣir yinni umi ixes Mmis aḏasen ṯiḏ ismeḍhar.

²⁸ A yinni yuḥȓen s dqeȓ iy ṯarbum, araḥem-d ɣari marra kenniw nec akenniw sreyyḥeɣ.

²⁹ Arbuṯ xawem ṯzayȓut inu, ȓemḏeṯ zzayi ȓaḥeqqac nec ḏ aṣebbar, war ḏayi bu ttakebbur. Ȓexddenni aḏ tafem arraḥeṯ i yixef nwem.

³⁰ Ȓaḥeqqac meȓa ṯarbum ṯzayȓut inu nettaṯ aqa ṯehwan, dqeȓ inu ifsus.