Matta 10 - Ṯarifiṯ 2020

Siḏiṯneɣ Ƹisa ixḍar ṯenƹac n arrusul

¹ Iȓaɣa-d Ƹisa x ṯenƹac nni n imeḥḍaren nnes yuca-asen ssulṭa iy zi ɣa sufɣen jnun aḏ sgenfan marra ȓehȓacaṯ ḏ ȓeḥriqaṯ n yiwḏan.

² Ḏ yina ḏ isemawen n ṯenƹac n arrusul: Amezwaru nsen qqaren-as Simƹan maƹruf s Buṭrus ḏ wumas qqaren-as Andrus, ḏ mmis n Zabadi qqaren-as Yaƹqub ḏ wumas qqaren-as Yuḥanna,

³ ḏ Filippas, ḏ Bartulumay, ḏ Tuma, ḏ Matta zeg iƹeccaren, ḏ Yaƹqub mmis n Ḥalfa, ḏ Taddi,

⁴ ḏ Simƹan umi qqaren , ḏ Yahuḏa Isxaryuṭi iƹni wenni izzenzen Ƹisa.

Siḏiṯneɣ Ƹisa issekk arrusul aḏ ḥeddṯen

⁵ Ṯenƹac-a n iryazen issekk-iṯen Ƹisa iweṣṣa-ṯen inna-asen: "War traḥem ca ɣar ṯmura n ȓegnus. War tiḏfem bu ṯineddam n ṯmurṯ n Samarya.

⁶ Lla, ruḥeṯ ɣar iḥuȓiyen nni iweddaren iƹni iwḏan n Ayṯ-Israʼil.

⁷ Xmi ɣa ṯraḥem, ḥeddṯem s ȓmulk ujenna aqa yuḏes-d.

⁸ Sgenfam imehȓac, sfaqem-d yinni immuṯen, siṣfam yinni ig iǧa jḏam, sufɣem jnun. Manaya immuc-awem baṭeȓ, uȓa ḏ kenniw ucem-ṯ baṭeȓ!

⁹ War debbarem walu: lla ddheb, lla nnuqarṯ, lla nneḥḥas ḏeg uḥezzam nwem.

¹⁰ War debbarem bu uqrab x ubriḏ uȓa ḏ ṯnayen ičammiren, uȓa ḏ ṯisiȓa, uȓa ḏ aƹekkaz. Minzi wenni itbeccaren ɣares ȓḥaqq aḏ itxaȓes aɣrum nnes.

¹¹ Xmi ɣa ṯaḏfem can ṯendint niɣ can dcar, rzum x wenni kenniw ɣa iqebȓen ɣar ṯeddarṯ nnes. Qqimeṯ ḏayes aȓ ɣa ṯuyurem ssenni.

¹² Xmi ɣa ṯaḏfem ɣar can ṯeddarṯ, seǧmem x ayṯbab nnes.

¹³ Meȓa qebȓen-kenniw ayṯbab nnes, ataf akiḏsen ṯiȓi lbaraka nwem. Meȓa war kenniw qbiȓen ca, ataf war kisen tɣimi ca lbaraka nwem.

¹⁴ Meȓa war kenniw qbiȓen ca ḏi can ṯeddarṯ niɣ ḏi can ṯendint niɣ meȓa war xsen aɣarwem ṣennṭen, ffɣeṯ ssenni mesḥeṯ ṯaƹejjact zeg iḍaren nwem.

¹⁵ Aqa tesȓam ȓḥaqq: Ḏi Yum Lḥisab ḏ Lƹiqab aḏ yiȓi lƹiqab n ṯendint nni ktar zi lƹiqab n ṯendint ṯaƹeffant n Sadum ḏ ṯendint ṯaƹeffant n Ƹamura.

Aƹeddeb ig itekken x imeḥḍaren

¹⁶ Nec aqa ssekkiɣ-kenniw amecnaw iḥuȓiyen jar wuccanen. Iȓim ṯfaqem amecnaw ifiɣeran, iȓim ḏ nniyyeṯ amecnaw iḏbiren.

¹⁷ Ḥḍam ixef nwem zeg yiwḏan. Akenniw sellmen i lmaḥkamaṯ; akenniw uwṯen ḏi ṯemziḏawin nsen.

¹⁸ Akenniw jarren ɣar lḥukkam ḏ izeǧiḏen ƹlaḥsab isem inu ḥima axafi ṯcehḏem ɣar niṯni ḏ yinni zi ȓegnus.

¹⁹ Xmi kenniw ɣa sellmen, bȓa ma aḏ teysim amnus ḏi ȓaƹquȓaṯ nwem min ɣa ṯinim niɣ ḏ mammec iy ɣa ṯessiwȓem; Lla, awaȓen nni iy ɣa ṯinim ḏ Arebbi iy ḏawem ṯen ɣa yucen ḏi ṯsaƹƹat nni.

²⁰ War iǧi bu ḏ kenniw iy ɣa issiwȓen; Lla, ḏ Arruḥ n Babaṯwem iy ɣa issiwȓen ḏeg umcan nwem.

²¹ Umas aḏ isellem umas i ȓmewṯ. Babas aḏ isellem mmis. Ṯarwa aḏ raḥen ḍed i lwalidin nsen, aṯen sellmen i yinni iy ṯen ɣa nɣen.

²² Akenniw ƹiffen marra ƹlaḥsab isem inu, walakin wenni ɣa iṣbaren ɣar uneggaru ataf aḏ injem.

²³ Meȓa ƹeddben-kenniw ḏi can ṯendint, arewȓem ɣar ṯenneɣni. Aqa tesȓam ȓḥaqq: Aḏ d yas Mmis n bnaḏem, ataf kenniw ƹaḏ war ṯkemmȓem x min kenniw weṣṣiɣ ḏi ṯneddam n Ayṯ-Israʼil.

²⁴ Ameḥḍar war iǧi ca ḏ ameqqran x lmuƹallim nnes. Axeddam war iǧi ca ḏ ameqqran x uweqqaf nnes.

²⁵ Baraka ɣir aḏ yiȓi umeḥḍar am lmuƹallim nnes, aḏ yiȓi uxeddam am uweqqaf nnes. Meȓa ȓaɣan i bab n ṯeddarṯ , iwa mammec ɣa ȓaɣan i ȓeḥbab n ṯeddarṯ nnes?

26 War teggwḏem ca zzaysen. Marra min itwasnuffaren aḏ inefḍeḥ. Marra min inuffaren aḏ itwassen!

²⁷ Min ḏawem qqareɣ ḏi ṯaǧest, ƹawḏem-as ḏi ṯfawṯ n nhar. Min tesȓam s ȓḥess, ƹeyyḍeṯ zzayes x ṯzeqqa.

²⁸ War teggwḏeṯ ca zeg yinni ineqqen ddat war zemmaren aḏ nɣen uȓa ḏ ȓaƹmar; Lla, ggwḏeṯ zi Arebbi iƹni wenni izemmaren aḏ idemmar ddat ḏ ȓaƹmar ḏi jahennama.

²⁹ Ma war tmenzin ṯnayen n izawjiwen s duru? Walakin, war zzaysen iweṭṭi uȓa ḏ ijjen ɣar ṯmurṯ meȓa war ixis ca Babaṯwem.

³⁰ Uȓa ḏ izuṭṭan iy ɣarwem x uzeǧif nwem iḥseb-iṯen Arebbi marra.

³¹ War teggwḏem ca. Kenniw ṯseggwam ktar s waṭṭas x izawjiwen.

Wenni icehhḏen x Siḏiṯneɣ Ƹisa

³² Wenni zzayi ɣa icehḏen nec zzaṯ i yiwḏan, ataf azzayes cehḏeɣ nec zzaṯ i Baba iǧan ḏeg ujenna.

³³ Wenni ḏayi ɣa inkaren zzaṯ i yiwḏan, ataf aṯ nkareɣ nec zzaṯ i Baba iǧan ḏeg ujenna.

³⁴ War tfekkarem ca belli usiɣ-d aḏ ggeɣ ȓehna ḏi ddunect-a. War d usiɣ ca aḏ ggeɣ ȓehna; Lla, usiɣ-d aḏ ggeɣ amenɣi.

³⁵ Usiɣ-d aḏ smenɣeɣ mmis ak babas, ḏ yeǧis ak yemmas, ḏ ṯsȓiṯ ak lallas.

³⁶ Aḏ yiȓi ȓaƹḏu n bnaḏem ḏ ȓeḥbab iy kis izeddɣen ḏi ṯeddarṯ nnes.

³⁷ Wenni xef iƹizz babas niɣ ḏ yemmas ktar zzayi nec, ataf war ḏayi isḏiheǧ ca. Wenni xef iƹizz mmis niɣ ḏ yeǧis ktar zzayi nec, ataf war ḏayi isḏiheǧ ca.

³⁸ Wenni itagin aḏ iysi ṣṣalib nnes aḏayi iḏfar nec, ataf war ḏayi isḏiheǧ ca.

³⁹ Wenni ɣa irebḥen ṯuḏarṯ nnes, ataf at ixsar. Wenni ɣa ixsaren ṯuḏarṯ nnes x ssabab inu, ataf at irbeḥ.

Lʼajar

⁴⁰ Wenni kenniw iqebbȓen, ataf iqbeȓ-ayi. Wenni ḏayi iqebbȓen, ataf iqbeȓ wenni ḏayi d issekken.

⁴¹ Wenni iqebbȓen can n nnabi ȓaḥeqqac issekk-iṯ-iḏ Arebbi, ataf aɣares yiȓi lʼajar amecnaw can n nnabi. Wenni iqebbȓen can n ȓmumen ȓaḥeqqac ḏ ȓmumen, ataf aɣares yiȓi lʼajar amecnaw can n ȓmumen.

⁴² Aqa tesȓam ȓḥaqq: Wenni ɣa yucen ɣir ȓkas n waman ḏ asemmaḍ i can yijjen zeg imezyanen-a ȓaḥeqqac ḏ ameḥḍar inu, ataf aḏ yawi lʼajar nnes war ṯ itḍeyyiƹ ca."