Marqus 8 - Ṯarifiṯ 2020

Siḏiṯneɣ Ƹisa isecc arbeƹaȓaf n yiwḏan

¹ Ḏi ȓiyyam nni, munen-d xas ƹaweḏ ȓɣaci aṭṭas u niṯni war ɣarsen min ɣa ccen. Iȓaɣa-d Ƹisa i imeḥḍaren nnes inna-asen:

² "Nec qqsen-ayi yiwḏan-a. Ṯeȓtiyyam zeg wami aqaṯen akiḏi war ɣarsen ca min ɣa ccen.

³ Meȓa ssekkeɣ-ṯen ɣar ṯuḏrin nsen war ccin ca ataf aḏ sexfen ḏeg ubriḏ, ḏinni ca zzaysen usin-d zi ȓeggwaj."

⁴ Nnan-as imeḥḍaren nnes: "Ḏi ȓexȓa-ya mani ɣa naf aɣrum iy zi ɣa nsecc qaƹ lƹadad-a n yiwḏan?"

⁵ Inna-asen Ƹisa: "Cḥaȓ ɣarwem n uɣrum?" Nnan-as: "Ɣarneɣ sebƹa n ṯecnifin."

⁶ Yumar Ƹisa ȓɣaci nni aḏ qqimen ḏi ṯmurṯ. Iṭṭef sebƹa nni n ṯecnifin icekkar Arebbi, irzi-ṯent yuci-ṯent i imeḥḍaren nnes aṯent ferqen x yiwḏan nni. Ȓexddenni ferqen-ṯent.

⁷ Ɣarsen ḏinni ƹaweḏ ȓebƹaḍ n iseȓman ḏ imezyanen. Ƹisa icekkar Arebbi inna-asen: "Ferqem uȓa ḏ yina x yiwḏan-a."

⁸ Ccin jjiwnen, ceṭṭent sebƹa n ṯeqrabin ƹemmarent s iȓeqquzen.

⁹ Tuɣa ḏinni can arbeƹaȓaf n yiwḏan. Ssenni imsafaḍ xasen uyuren.

¹⁰ Ȓexddenni inya Ƹisa ḏeg yijjen n ṯɣarrabut ak imeḥḍaren nnes iruḥ ɣar jwayeh n Dalmanyuṯa.

Iwḏan war tefhimen ca min ƹnant lmuƹjizaṯ n Siḏiṯneɣ Ƹisa

¹¹ Usin-d ɣares ȓḥizeb n ifarrisiyen bḏan tmenɣan akiḏes, ttaren zzayes ijjen n lƹalama ṯameqqrant zeg ujenna bac aṯ jarrben.

¹² Iḥreq wuȓ nnes aṭṭas inna-asen: "Mayemmi iwḏan n ȓweqṯ-a tettaren lƹalama ṯameqqrant? Aqa tesȓam ȓḥaqq: Iwḏan n ȓweqṯ-a war ḏasen ticc bu lƹalama ṯameqqrant, qaƹ."

¹³ Ijji-ṯen Ƹisa inya ḏi ṯɣarrabut iruḥ ɣar ujemmaḍ-in n ȓebḥar.

¹⁴ Imeḥḍaren ttun aɣrum war ṯ ysin ca, ɣarsen ɣir ijjen n ṯecnifṯ waha ḏi ṯɣarrabut.

¹⁵ Iweṣṣa-aṭen Ƹisa inna-asen: "Cuf! Ḥḍam ixef nwem zeg untun n ȓḥizeb n ifarrisiyen ḏ untun n uzeǧiḏ Hirudus."

¹⁶ Bḏan ssawaȓen jarasen nnan qa neccin war ɣarneɣ ḏanita bu uɣrum.

¹⁷ Issen Ƹisa minxef tuɣa ssawaȓen inna-asen: "Mayemmi ṯeqqarem jarawem war ɣarneɣ bu uɣrum? Ma ƹaḏ war ṯessinem? Ma ƹaḏ war ṯefhimem? Uȓawen nwem, ma twaqsḥen niɣ?

¹⁸ Ɣarwem ṯiṭṭawin, ma war twiȓim ca niɣ? Ɣarwem imejjunen, ma war tesȓim ca niɣ? Ma war ṯeƹqiȓem ca niɣ?

¹⁹ Wami rziɣ xemsa nni n ṯecnifin i xemsaȓaf nni n yiwḏan, mecḥaȓ n ṯeqrabin iy ṯeccurem s iȓeqquzen iceṭṭen?" Nnan-as: "Ṯenƹac n ṯeqrabin."

²⁰ Inna-asen: "Iwa ƹaweḏ, wami rziɣ sebƹa nni n ṯecnifin i arbeƹaȓaf nni n yiwḏan, mecḥaȓ n ṯeqrabin iy ṯeccurem s iȓeqquzen iceṭṭen?" Nnan-as: "Sebƹa n ṯeqrabin."

²¹ Inna-asen: "Ma ƹaḏ war ṯefhimem ca?"

Siḏiṯneɣ Ƹisa isgenfa ij uḍarɣaȓ ḏi Bayt Ṣayda

²² Wami uwḍen ɣar ubilaj n Bayt Ṣayda, uwin-as-d ijjen n uḍarɣaȓ i Ƹisa ttaren zzayes aṯ iḥaḏa.

²³ Iṭṭef aḍarɣaȓ nni s ufus isufeɣ-iṯ ɣar barra n ubilaj nni. Issusef-as x ṯiṭṭawin nnes igga xas ifassen nnes inna-as: "Ma twaȓiḏ can ȓḥajeṯ ma lla?"

²⁴ Ixzar inna-as: "Twaȓiɣ iwḏan ggin am ȓcejjur gguren-d."

²⁵ Igga xas ƹaweḏ ifassen nnes x ṯiṭṭawin n uḍarɣaȓ nni. Ṣafi igenfa, ṯiṭṭawin nnes nurzment ibḏa itwaȓa mliḥ.

²⁶ Issekk-iṯ ɣar ṯeddarṯ nnes inna-as: "War trewwaḥ ca ɣar ubilaj n Bayt Ṣayda."

Arrasul Buṭrus icehheḏ x Lmasiḥ

²⁷ Iruḥ Ƹisa netta ḏ imeḥḍaren nnes ɣar ȓedcuraṯ n ṯendint n Qayṣariya n Filippas. Gguren x ubriḏ isseqsa imeḥḍaren nnes inna-asen: "Min xafi qqaren yiwḏan?"

²⁸ Arrin xas nnan-as: "Ijjen iqqar cek ḏ Yaḥya, ijjen iqqar cek ḏ Ilyas, ijjen iqqar cek zi lʼanbiya."

²⁹ Inna-asen Ƹisa: "Y kenniw, min ḏayi d tarram nec?" Indeq-d Buṭrus inna-as: "Cek ḏ Lmasiḥ."

³⁰ Iƹȓem-asen Ƹisa inna-asen: "War qqarem ca manaya xafi i ḥadd."

Siḏiṯneɣ Ƹisa issawaȓ x ȓmewṯ nnes

³¹ Ibḏa iseȓmaḏ-iṯen inna-asen: "Aqa Mmis n bnaḏem itxeṣṣa-yas aḏ itwaƹeddeb x waṭṭas n ṯmesȓayin, aṯ ƹiffen imeqqranen n Ayṯ-Israʼil ḏ arruyas n ȓfuqaha ḏ imseȓmaḏen n ccariƹa. Aṯ nɣen, wis ṯeȓtiyyam aḏ d ikkar zi ȓmewṯ."

³² Issiweȓ akiḏsen nican x manaya. Isbeƹƹeḏ-iṯ Buṭrus inha-ṯ.

³³ Walakin Ƹisa ineqȓeb ɣares ixzar ɣar imeḥḍaren nnes, inha Buṭrus inna-as: "Aggwej xafi ɣar ḏeffar a Cciṭan! Cek war tfekkareḏ ca amecnaw Arebbi; Lla, cek tfekkareḏ amecnaw bnaḏem."

³⁴ Iȓaɣa-d x imeḥḍaren nnes ḏ ȓɣaci inna-asen: "Wenni ixsen aḏayi iḏfar nec, labud aḏ ismeḥ ḏeg yixef nnes aḏ ikessi ṣṣalib nnes minxef ɣa iƹeddeb aḏayi iḏfar.

³⁵ Ȓaḥeqqac wenni ixsen aḏ isenjem ṯuḏarṯ nnes ataf at ixsar. Wenni iy ɣa ixsaren ṯuḏarṯ nnes x ssabab inu ḏ ssabab n Lʼinjil ataf at isenjem.

³⁶ Mizi ɣa ṯenfeƹ bnaḏem meȓa irbeḥ ddunect-a qaƹ, wa ixsar ȓaƹmar nnes?

³⁷ Cuf, bnaḏem war izemmar aḏ ibeddeȓ walu ḏeg umcan n ȓaƹmar nnes.

³⁸ Wenni xafi ɣa iƹeffaren nec niɣ aḏ iƹeffar x wawaȓ inu ḏi zman-a aƹeffan ixeddƹen Arebbi, ataf axas iƹeffar Mmis n bnaḏem xmi d ɣa yas s lƹaḍama n Babas ak lmalaʼikaṯ iqeddsen.