Marqus 5 - Ṯarifiṯ 2020

Ijjen ḏayes jnun ḏi ṯmurṯ n ijariṯiyen

¹ Iẓwa Ƹisa ɣar ujemmaḍ-in n ȓebḥar ɣar ṯmurṯ n ijariṯiyen.

² Wami iḍra zi ṯɣarrabut iȓqa ijjen n uryaz ḏayes jjenn ḏ aƹeffan yusa-d zeg imeḍȓan.

³ Izeddeɣ ḏinni ḏeg imeḍȓan. War izemmar uȓa ḏ ijjen aṯ iqqen waxxa s snaseȓ.

⁴ Aṭṭas n ṯwaȓaṯin carrfen-ṯ zeg ifassen ḏ iḍaren s snaseȓ ḏ leqtina, walakin iqeṭṭew snaseȓ itrezza leqtina. War izemmar uȓa ḏ ijjen aṯ iṭṭef.

⁵ Itiȓi ǧiȓeṯ ḏ nhar ḏeg imeḍȓan ḏ iḏurar isnekkar ṯɣuyyeṯ ijarreḥ ixef nnes s uzru.

⁶ Wami iẓra Ƹisa zi ȓeggwaj, yuzzeȓ ɣares isejjeḏ-as.

⁷ Indeq-d s yijjen n ṯmijja ṯejheḏ inna-as: "A Ƹisa a Mmis n Arebbi yuƹȓan, min ṯexseḏ zzayi? Tettareɣ zzayek i Arebbi ḥima war ḏayi tƹeddibeḏ ca!"

⁸ Inna manaya minzi Ƹisa tuɣa inna-as: "A jjenn aƹeffan ffeɣ zeg uryaz-a!"

⁹ Isseqsa-ṯ Ƹisa inna-as: "Mammec ḏac qqaren?" Inna-as: "Nec qqaren-ayi Aberru minzi neccin aṭṭas iḏneɣ."

¹⁰ Iḥeccem-iṯ aṭṭas ḥima war ṯen issekki barra i jjiheṯ nni.

¹¹ Ḏi ȓweqṯ nni ḏinni ijjen n ṯḥimerṯ ḏ ṯameqqrant n yiȓfan ṯarwes x uḏrar.

¹² Ttaren zzayes jnun nni nnan-as: "Sekk-aneɣ ɣar yiȓfan-in ḥima aḏaysen naḏef."

¹³ Wami ṯen ijja, ffɣen jnun nni iƹeffanen uḏfen ḏeg yiȓfan nni. Ṯuzzeȓ ṯḥimerṯ nni ṯehwa x uḏrar ɣar ȓebḥar ṯeɣreq ḏinni. Tuɣa lƹadad nsen ƹȓayen aȓefayen.

¹⁴ Yinni yarewwsen arewȓen sufɣen ȓexbar ḏi ṯendint ḏ ȓedcuraṯ. Ffɣen-d yiwḏan ḥima aḏ xzaren min iweqƹen.

¹⁵ Usin-d ɣar Ƹisa ufin aryaz nni iy ḏi tuɣa iǧa aberru n jnun yareḍ arruḍ nnes iqqim igenfa s ȓaƹqeȓ nnes. Uca ggwḏen aṭṭas.

¹⁶ Xbaren-ṯen ȓechuḏ x min iweqƹen i uryaz nni iy ḏi tuɣa ǧan jnun ḏ min ḏasen iweqƹen i yiȓfan.

¹⁷ Uca bḏan tettaren zzayes ḥima axasen ibeƹƹeḏ zi jjiheṯ nsen.

¹⁸ Wami tuɣa innay ḏi ṯɣarrabut, ittar zzayes uryaz nni iy ḏi tuɣa ǧan jnun inna-as: "Ejj-ayi akic raḥeɣ."

¹⁹ Walakin Ƹisa yugi, inna-as: "Ruḥ ɣar ṯeddarṯ nnec ḏ ȓeḥbab nnec sxebbar-iṯen s min ḏac igga Siḏi Arebbi ḏ mammec cek irḥem."

²⁰ Iruḥ uryaz nni ibḏa itxebbar ḏi lʼiqlim umi qqaren Dikaplis zi min ḏas igga Ƹisa. Qqimen iwḏan nni marra ḏehhcen.

Siḏiṯneɣ Ƹisa isgenfa yeǧis n Yagrus

²¹ Wami iḏweȓ Ƹisa ḏi ṯɣarrabut ɣar jjiheṯ nni manis d yusa, munen-d xas ȓɣaci ḏ ameqqran x cceṭṭ n ȓebḥar.

²² Yusa-d ɣares ijjen zi arruyas n ṯemziḏa n Ayṯ-Israʼil qqaren-as Yagrus. Wami iẓra Ƹisa iwḍa-yas ɣar iḍaren nnes

²³ iḥeccem-iṯ aṭṭas inna-as qa yeǧi ṯamezyant aqa tmetta. Araḥ-d sers xas ifassen nnec ḥima aḏ tgenfa aḏ teddar.

²⁴ Iruḥ akiḏes ḏfaren-ṯ aṭṭas n ȓɣaci temzaḥamen xas.

²⁵ Ḏinni ijjen n ṯemɣarṯ ṯenƹac iseggwusa zeg wami iy ṯehȓec tazzeȓ s iḏammen.

²⁶ Ṯƹeddeb aṭṭas x ifassen n waṭṭas n iḍbiben. Marra min ɣares ḏ agȓa ṯḍeyyeƹ-iṯ bȓa nnfaƹ. Waxxa amenni lḥala nnes ṯarni.

²⁷ Tesȓa x Ƹisa ṯeḏfar-iṯ ak ȓɣaci ṯḥaḏa-yas aseȓham nnes.

²⁸ Ṯenna ḏeg wuȓ nnes aqa meȓa ḥaḏiɣ ɣir aseȓham nnes ataf aḏ genfiɣ.

²⁹ Ȓexddenni ṯgenfa ḏeg umcan ṯessen belli ddat nnes ṯgenfa zi ȓehȓac nni.

³⁰ Ƹisa isḥess ḏi nnefs nnes belli ijjen n jjheḏ nnes iffeɣ, ineqȓeb ɣar ȓɣaci nni inna-asen: "Wi ḏayi iḥaḏan arruḍ inu?"

³¹ Nnan-as imeḥḍaren nnes: "Xzar mecḥaȓ n yiwḏan iy ḏanita temzaḥamen xak u cek ṯeqqareḏ wi ḏayi iḥaḏan?"

³² Walakin iqqim ƹaḏ ixezzar ammu ḏ wammu ḥima aḏ iẓer wi iggin manayenni.

³³ Wami ṯessen ṯemɣarṯ nni min ḏas iweqƹen ṯeggweḏ terjiji, ṯusa-d ṯewḍa ɣar iḍaren nnes ṯƹaweḏ-as marra lḥaqiqa.

³⁴ Inna-as: "A yeǧi, cem lʼiman nnem isgenfa-cem. Ruḥ ḏi ȓehna ṯgenfiḏ zi ȓeḥȓac nnem."

³⁵ Wami ƹaḏ issawaȓ Ƹisa, usin-d can yiwḏan zi ṯeddarṯ n arrayes nni n ṯemziḏa nnan-as: "Yeǧic cek ṯemmuṯ, mayemmi ƹaḏ ṯseddaƹeḏ lmuƹallim?"

³⁶ Isȓa-yasen Ƹisa i min qqaren, inna-as i arrayes nni n ṯemziḏa: "War teggweḏ ca! Itxeṣṣa aḏ tamneḏ waha."

³⁷ Ssenni war ijji uȓa ḏ ijjen aṯ iḏfar, iḏfar-iṯ ɣir Buṭrus ḏ Yaƹqub ḏ Yuḥanna iǧan ḏ umas n Yaƹqub.

³⁸ Wami uwḍen ɣar ṯeddarṯ n arrayes nni n ṯemziḏa, itwaȓa Ƹisa ḏinni lharaj ḏ yiwḏan trun sɣuyiwen aṭṭas.

³⁹ Wami yuḏef inna-asen: "Mayemmi ṯesɣuyiwem, mayemmi ṯetrum? Aqa ṯaḥenjirṯ-a war ṯemmuṯ ca, ṯeṭṭeṣ waha!"

⁴⁰ Ḍeḥcen xas, ikkar Ƹisa isufeɣ-iṯen marra ssenni. Yuwi akiḏes ḏinni babas ḏ yemmas n ṯḥenjirṯ nni ḏ yinni iruḥen akiḏes. Yuḏef mani ṯeǧa ṯḥenjirṯ nni.

⁴¹ Iṭṭef-as ḏeg ufus i ṯḥenjirṯ nni inna-as: Ṭaliṯa qumi, iƹni A ṯaḥenjirṯ kkar.

⁴² Ȓexddenni ṯekkar ṯḥenjirṯ nni ṯebḏa ṯeggur. Ɣares ṯenƹac iseggwusa. Qqimen tƹejjben aṭṭas.

⁴³ Yumar-iṯen Ƹisa inna-asen war tƹawaḏem i ḥadd min iweqƹen. Ƹaweḏ inna-asen ucem-as aḏ tecc.