Marqus 16 - Ṯarifiṯ 2020

Siḏiṯneɣ Ƹisa ikkar-d zi ȓmewṯ

¹ Wami iƹḏu nhar n ssebṯ n lƹibada, Maryam ṯamagdaliṯ, ḏ Salumi, ḏ Maryam yemmas n Yaƹqub ruḥent sɣint lƹiṭar uwint-ṯ-id aḏas ḏehnent.

² Nhar amezwaru n ssimana zic ak ȓefjar ruḥent ɣar unḍeȓ nnes.

³ Ssawaȓent jarasent ak ubriḏ qqarent: "Wi ḏaneɣ ɣa ikksen azru x uqemmum n unḍeȓ aṯ iseqnunni?"

⁴ Wami xzarent, ufint azru nni itwakkes u netta ḏ ameqqran aṭṭas.

⁵ Uḏfent ɣar yifri n unḍeȓ nni ufint ijjen n uḥenjir iqqim x jjiheṯ ṯafusiṯ, igga arruḍ ḏ acemȓaȓ u qqiment ḏehhcent aṭṭas.

⁶ Inna-asent: "War ḏehhcent ca! Kennint ṯrezzunt x Ƹisa Naṣiri itwaṣellben. Netta war ḏa iǧi ca, ikkar-d zi ȓmewṯ. Haqa amcan nnes mani tuɣa ṯ sersen.

⁷ Ruḥent kennint ȓexxu ɣar imeḥḍaren nnes ḏ Buṭrus inint-asen aqa Ƹisa iruḥ aḏawem izwar ɣar ṯmurṯ n Ljalil akenniw iraja ḏinni. Aṯ tafem ḏinni mammec ɣarwem d iweṣṣa zi qbeȓ."

⁸ Ṯimɣarin nni terjijint ḏehhcent, kkarent ruḥent ḏeɣya zeg unḍeȓ nni arewȓent. War ƹawḏent manayenni i ḥadd minzi niṯenti ggwḏent.

Siḏiṯneɣ Ƹisa itwarfeƹ ɣar ujenna

⁹ {Ƹisa wami d ikkar zi ȓmewṯ zic nhar amezwaru n ssimana imeḍhar-d ḏ amezwaru i Maryam ṯamagdaliṯ ṯenni iy zi tuɣa isufeɣ sebƹa n jnun.

¹⁰ Ṯruḥ nettaṯ aḏ tsiweḍ ȓexbar-a i yinni tuɣa iǧan ak Ƹisa, ṯufi-ṯen ḥeznen trun.

¹¹ Wami ḏasen ṯƹaweḏ ṯenna-asen qa ẓriɣ-ṯ iddar, war t uminen ca.

¹² Menbaƹd i manaya imeḍhar-asen-d Ƹisa s yijjen n ṣṣifeṯ nneɣni i ṯnayen iḏsen wami tuɣa gguren ɣar ȓkampu.

¹³ Ḏewȓen-d aḏ ƹawḏen ȓexbar-a i ayṯmaṯsen, war ṯen uminen ca.

¹⁴ Menbaƹd wami qqimen tetten ḥiṭac n arrusul nnes, imeḍhar-asen-d inha-ṯen minzi lʼiman nsen ḏ uqlil uȓawen nsen qesḥen. Tuɣa niṯni ƹaweḏ war uminen ca yinni iy ṯ iẓrin wami d ikkar zi ȓmewṯ.

¹⁵ Inna-asen: "Ruḥem ɣar marra ddunect, beccarem marra ȓegnus s Lʼinjil.

¹⁶ Wenni yumnen aḏ itwaṭehhar s waman ataf aḏ injem. Wenni war yuminen ca ataf aḏ itwaḥkem.

¹⁷ Ḏ ṯina ḏ lƹalamaṯ iy d ɣa imeḍharen ak yinni itamnen: Aqa niṯni aḏ sufɣen jnun ƹlaḥsab isem inu, aḏ ssiwȓen s yiȓesawen ḏ jḏiḏ,

¹⁸ aḏ ysin ifiɣeran s ifassen nsen. Meȓa swin min ineqqen, ataf war ṯen iḍarri ca. Aḏ sersen ifassen nsen x imehȓac aḏ genfan."

¹⁹ Issiweȓ akiḏsen Siḏiṯneɣ Ƹisa ssenni itwarfeƹ ɣar ujenna iqqim x ufusi n Arebbi.

²⁰ Niṯni ffɣen beccaren iwḏan ḏi mkuȓ amcan. Siḏiṯneɣ aqaṯ akiḏsen, ismeḍhar-d ȓḥaqq n yinni itbeccaren s waṭṭas n lƹalamaṯ iy ṯen iḏeffaren.}