Marqus 15 - Ṯarifiṯ 2020

Tawin Siḏiṯneɣ Ƹisa ɣar lḥakem Bilaṭus

¹ Wami iṣbeḥ ȓḥaȓ, munen arruyas n ȓfuqaha, ḏ imeqqranen n Ayṯ-Israʼil, ḏ imseȓmaḏen n ccariƹa, ḏ marra Jmaƹṯ n lḥukkam nsen mcawaren jarasen. Carfen Ƹisa uwin-ṯ aṯ sellmen i lḥakem arrumani umi qqaren Bilaṭus.

² Isseqsa-ṯ Bilaṭus inna-as: "Ma ḏ cek ḏ azeǧiḏ n Ayṯ-Israʼil?" Inna-as Ƹisa: "Aqa ṯenniḏ-t cek."

³ Qqimen ḏinni arruyas n ȓfuqaha tahamen-ṯ aṭṭas.

⁴ Inna-as Bilaṭus i Ƹisa: "Ma war ṯqarreḏ walu? Qa xzar mecḥaȓ xak tceṯcan!"

⁵ Iqqim Bilaṭus itƹejjeb wami war xasen yarri bu wawaȓ Ƹisa.

⁶ Ḏi mkuȓ Ȓƹiḏ Ameqqran inum Bilaṭus iḍeǧeq-asen-d i yijjen n umeḥbus ƹlaḥsab wenni ixes ccaƹb.

⁷ Ijjen n umeḥbus qqaren-as Barabas ggin-ṯ ḏi ȓeḥbes ak yinni itḥerraben ḍed i ȓmexzen minzi nɣin ijjen n bnaḏem ḏi ȓfawḏa.

⁸ Gaƹƹḏen ȓɣaci ɣar Bilaṭus, bḏan tettarren zzayes aḏasen igg min inum itegg-asen.

⁹ Inna-asen Bilaṭus: "Ma ṯexsem aḏawem d ḍeȓqeɣ i uzeǧiḏ n Ayṯ-Israʼil?"

¹⁰ Issen Bilaṭus belli arruyas nni n ȓfuqaha sellmen-as Ƹisa ȓaḥeqqac ḥesḏen-ṯ.

¹¹ Kkaren arruyas nni n ȓfuqaha qeȓben azeǧif i ȓɣaci nni ḥima aḏasen d iḍȓeq i Barabas.

¹² Indeq-d Bilaṭus inna-asen: "Iwa min ḏas ɣa ggeɣ i bnaḏem-a umi ṯeqqarem qa netta ḏ Azeǧiḏ n Ayṯ-Israʼil?"

¹³ Snekkaren ṯɣuyyeṯ s jjheḏ qqaren: "Ṣelleb-iṯ!"

¹⁴ Inna-asen Bilaṭus: "Mayemmi? Man ljarima ig igga wanita?" Walakin arennin snekkaren ṯɣuyyeṯ s jjheḏ qqaren: "Ṣelleb-iṯ!"

¹⁵ Bilaṭus wami irezzu aḏ iseƹƹef ȓɣaci nni, iḍȓeq-asen-d i Barabas. Ssenni uwṯin Ƹisa s usɣun isellem-asen-ṯ ḥima aṯ ṣellben x ṣṣalib.

¹⁶ Uwin-ṯ ȓƹaskar ɣar ḏaxeȓ ɣar ȓemraḥ n ȓeqṣar n lḥakem, smunen-d ḏinni marra lfirqa n ȓƹaskar nni.

¹⁷ Ggin xas aseȓham ḏ azeggwaɣ. Muḏen-as ijjen n ttaj n isennanen ggin-as-ṯ x uzeǧif nnes.

¹⁸ Bḏan tseǧamen xas qqaren-as ssalam ay azeǧiḏ n Ayṯ-Israʼil.

¹⁹ Ccaṯen-ṯ s yijjen n uɣanim ɣar uzeǧif nnes, ssusufen xas, terkaƹen-as tsejjaḏen-as.

Tawin Siḏiṯneɣ Ƹisa ḥima aṯ ṣellben

²⁰ Wami xas kemmȓen abuṣar, kksen-as aseȓham nni azeggwaɣ ggin-as arruḍ nnes uwin-ṯ ḥima aṯ ṣellben.

²¹ Ijjen n uryaz ikka-d zi ȓkampu iƹḏu-d ssenni. Aryaz nni zi ṯendint n Lqurina qqaren-as Simƹan, netta ḏ babas n Iskander ak Arufus. Ggin xas ȓƹaskar ṣṣalib s bezzez ḥima aṯ yarbu.

²² Uwin Ƹisa ɣar yijjen n umcan qqaren-as (Ȓmaƹna n yisem-a: Amcan n Jumjuma.)

²³ Ucin-as aman uḍiȓ ixelleṭ ḏaysen ijjen n ddwa ḏ amerzag qqaren-as murr, walakin yugi Ƹisa aṯen isew.

²⁴ Ṣellben-ṯ, ferqen arruḍ nnes jarasen. Ggin lqurƹa ḥima kuȓ ijjen min ɣa iysi.

²⁵ Tuɣat ḏ tesƹa n ṣbaḥ wami ṯ ṣellben.

²⁶ Ɣar uzeǧif nnes ggin-as ijjen n ṯeȓwiḥet ṯura ḏayes ttuhma nni iqqaren: "Wanita ḏ azeǧiḏ n Ayṯ-Israʼil."

²⁷ Ṣellben akiḏes ṯnayen n iceffaren, ijjen x ufusi ijjen x uẓeȓmaḍ nnes.

²⁸ {S manayenni ikemmeȓ min yurin ḏi Lkitab qa ḥesben-ṯ zi lmujrimin.}

²⁹ Iwḏan iy tekken ssenni tukkaren-ṯ thezzan azeǧif nsen qqaren-as: "Ma ḏ cek iy ɣa iheḏmen ṯamziḏa ṯameqqrant at tebniḏ ḏi ṯeȓtiyyam!?

³⁰ Nejja ixef nnec hwa-d zeg ujenna zi ṣṣalib-a!"

³¹ Uȓa ḏ arruyas n ȓfuqaha ḏ imseȓmaḏen n ccariƹa tbuṣaren xas ƹaweḏ qqaren i wayawya: "Isenjem inneɣni walakin war izemmar ca ȓexxu aḏ isenjem ixef nnes!

³² Hwa-d a Lmasiḥ ay azeǧiḏ n Ayṯ-Israʼil ȓexxu zeg ujenna zi ṣṣalib-a ḥima a nẓer manaya azzayek namen!" Amenni ƹaweḏ iy ṯ zawaren lmujrimin nni iy kiḏes ṣellben.

Siḏiṯneɣ Ƹisa immuṯ

³³ Ɣar ṯenƹac n uziȓ, ṯehwa-d ṯaǧest x ṯmurṯ amen-ṯekmaȓ aȓ wami ḏ ṯȓaṯa uƹecci.

³⁴ Ɣar ṯȓaṯa uƹecci iȓaɣa Ƹisa s jjheḏ inna: "Iliy, Iliy, lma sbaqṯani? "Ȓmaƹna n wawaȓ-a: "Ya Arebbi, ya Arebbi, mayemmi ḏayi ṯsemḥeḏ?"

³⁵ Sȓin-as ȓebƹaḍ zeg yinni iḥḍaren ḏinni nnan: "Aqa itȓaɣa x nnabi Ilyas."

³⁶ Ȓexddenni iruḥ ijjen zzaysen iqȓeƹ itazzeȓ, iysi ijjen n spunxa iseɣḏeṣ-it ḏeg waman uḍiȓ ḏ isemmamen, iggi-t x yij ukeccuḍ yuca-as aḏ isew. Inna: "Ȓexxu jjem-ṯ, a nẓer ma aḏ d yas nnabi Ilyas aṯiḏ isihwa!"

³⁷ Iȓaɣa Ƹisa s yijjen n ṯmijja ṯemɣar yarra nnefs ṣafi immuṯ.

³⁸ Ȓexddenni ig iqqarṣ arrwaq n ṯemziḏa ṯameqqrant x ṯnayen zeg ujenna aȓ ṯmurṯ.

³⁹ Ijjen n uƹaskari ḏ ameqqran n arrumanus ibedd ḏinni zzaṯes iẓra ȓmewṯ ig igga Ƹisa inna: "Aṯarras-a ḏ ṣṣaḥ ḏ Mmis n Arebbi."

⁴⁰ Ḏinni can n ṯemɣarin xezzarent-id zi ȓeggwaj, ḏaysent Maryam ṯamagdaliṯ, ḏ Salumi, ḏ Maryam yemmas n Yaƹqub amezyan ḏ Yusis.

⁴¹ Niṯenti tuɣa ḏeffarent-ṯ, tsexxarent xas wami tuɣaṯ iǧa ḏi ṯmurṯ n Ljalil. Ƹaweḏ ḥḍarent akiḏes aṭṭas n ṯemɣarin nneɣni zi ṯinni kis igaƹƹḏen ɣar Lquds.

Neṭṭȓen Siḏiṯneɣ Ƹisa

⁴² Nhar nni sewjaḏen i nhar n ssebṯ n lƹibada. Wami d ṯuweḍ ṯmeddiṯ,

⁴³ yusa-d ijjen n uryaz qqaren-as Yusef, zi dcar n Arimatya. Netta ḏ ijjen n uryaz muhim jar Jmaƹṯ n lḥukkam n Ayṯ-Israʼil, itreḥḥab ƹaweḏ zi ȓmulk n Arebbi. Izƹem yuḏef ɣar lḥakem Bilaṭus ittar-as ddat n Ƹisa.

⁴⁴ Bilaṭus iḏhec wami isȓa Ƹisa ḏeɣya immuṯ. Iȓaɣa-d x uƹaskari nni ameqqran innas-as ma immuṯ ma ƹaḏ?

⁴⁵ Wami issen Bilaṭus zeg uƹaskari nni Ƹisa immuṯ, isellem ddat nnes i Yusef.

⁴⁶ Yusef isɣa-d ȓecfen, isehwa-d ddat nnes ikeffen-it s ȓecfen. Isers-it ḏeg yijjen n unḍeȓ iɣzin ḏeg uzru igga am yifri. Iseqnunni ijjen n uzru ḏ ameqqran yarri-ṯ x uqemmum n unḍeȓ nni.

⁴⁷ Maryam ṯamagdaliṯ ḏ Maryam yemmas n Yusis xezzarent mani inḍeȓ.