Marqus 14 - Ṯarifiṯ 2020

Ijjen n ṯemɣarṯ ṯḏehhen Siḏiṯneɣ Ƹisa s waman n lwarḏ

¹ Iqqim-as yumayen i Ȓƹiḏ Ameqqran n Ayṯ-Israʼil ḏ ȓƹiḏ nni umi qqaren Ȓƹiḏ n Ṯefḍirṯ. Arruyas n ȓfuqaha ḏ imseȓmaḏen n ccariƹa rezzun mammec ḏas ɣa ggen ḥima aḏ ṭṭfen Ƹisa s ṯeḥraymiṯ aṯ nɣen.

² Nnan jarasen: "Itxeṣṣa war ṯ nteṭṭef ca ḏi Ȓƹiḏ ḥima ccaƹb war itegg ca lfawḍa."

³ Ƹisa aqaṯ ḏeg ubilaj n Bayt Ƹanya ḏi ṯeddarṯ n yijjen qqaren-as Simƹan bu-jḏam. Wami iqqim ḏinni itett, ṯqarreb-d ɣares ijjen n ṯemɣarṯ ɣares ijjen n ṯzeyyat ḏayes aman n lwarḏ iṣfan, iɣȓan s waṭṭas. Ṯerzem-it ṯferreɣ-as-ṯen x uzeǧif nnes.

⁴ Can iḏsen zzaysen iqess-asen ȓḥaȓ nnan jarasen: "Mayemmi qaƹ aḍeyyeƹ-a n waman n lwarḏ?

⁵ Ataf aman nni iȓi menzen s yijjen n ttaman ḏ ameqqran ktar zi ṯeȓtmiyya n ṯpeyyasin n nnuqarṯ aḏ mmucent i imesƹan!" Qqimen niṯni nehhan-t aṭṭas.

⁶ Inna-asen Ƹisa: "Ejjem-t! Mayemmi t ṯesxeyyaqem? Aqa min ḏayi ṯegga ḏ aṣebḥan aṭṭas.

⁷ Imesƹan aqaṯen akiḏwem ȓebda. Meȓmi ma ṯexsem ṯzemmarem aḏaysen ṯeggem ȓxir, nec war kiḏwem tɣimiɣ ca i ȓebda.

⁸ Ṯegga min xas. Ṯferreɣ-ayi aman-a n lwarḏ x ddat inu ḥima aḏayi ṯsewjeḏ i ṯenḍeȓṯ inu.

⁹ Aqa tesȓam ȓḥaqq: Mani ma yuweḍ Lʼinjil ḏi ddunect-a amen-ṯekmaȓ, ataf aḏ ƹawḏen x ṯemɣarṯ-a ḏ min ḏayi ṯegga am yijjen n ḏikra xas."

¹⁰ Uca ikkar Yahuḏa Isxaryuṭi wenni zi ṯenƹac n arrusul iruḥ netta ɣar arruyas n ȓfuqaha ḥima aḏasen izzenz Ƹisa.

¹¹ Sȓin manaya farḥen weƹḏen-ṯ aḏas ucen tmenyaṯ. Ssenni irezzu Yahuḏa lfurṣa mammec iy ɣa igg aḏasen ṯ izzenz.

Amensi n Ȓƹiḏ Ameqqran n Ayṯ-Israʼil

¹² Nhar amezwaru n Ȓƹiḏ n Ṯefḍirṯ, nhar nni iy ḏi ɣarrṣen i ȓƹiḏ, sseqsan imeḥḍaren Ƹisa nnan-as: "Mani ṯexseḏ a nraḥ aḏac nsewjeḏ amensi n Ȓƹiḏ Ameqqran?"

¹³ Ikkar Ƹisa ixḍar ṯnayen zeg imeḥḍaren nnes issekk-iṯen inna-asen: "Ruḥem ɣar ṯendint, akiḏwem imeȓqa ijjen n uryaz iysi-d aqnuc n waman, ḏfarem-ṯ.

¹⁴ Mani ma yuḏef inim-as i bab n ṯeddarṯ nni, Qa inna-ac lmuƹallim: Mani iǧa uxxam inu iy ḏi ɣa ƹeyyḏeɣ nec ḏ imeḥḍaren inu?

¹⁵ Akenniw yawi ɣar yijjen n ṯɣurfat ḏ ṯameqqrant ṯessu, ṯeƹḏeȓ. Ḏinni iy ḏaneɣ ɣa ṯeswejḏem."

¹⁶ Ruḥen imeḥḍaren nnes uḏfen ɣar ṯendint, ufin nican mamc ḏasen inna. Ṣafi swejḏen amensi n Ȓƹiḏ.

¹⁷ Ṯuweḍ-d ṯmeddiṯ, yusa-d Ƹisa ak ṯenƹac n arrusul nnes.

¹⁸ Qqimen tetten inna-asen Ƹisa: "Aqa tesȓam ȓḥaqq: Ijjen zzaywem ittet akiḏi aḏayi izzenz."

¹⁹ Iqqim ḏaysen ȓḥaȓ imeḥḍaren nnes tseqsan-ṯ ij-ij nnan-as: "War iǧi bu ḏ nec, yac?"

²⁰ Indeq-d Ƹisa inna-asen: "Ijjen zi kenniw zi ṯenƹac iḏwem, wenni iy kiḏi issisnen ḏi ṭṭebṣi."

²¹ Inna-asen: "Mmis n bnaḏem aḏas iwqeƹ ƹlaḥsab mamc xas iqqar Lkitab, walakin ya ȓefḍiḥeṯ n nni iy ṯ ɣa izzenzen! Ḥsen i netta mȓi war d ixȓiq ca."

²² Wami ƹaḏ tetten, iysi-d aɣrum icekkar Arebbi irza aɣrum nni yuca-asen-ṯ i imeḥḍaren nnes inna-asen: "Ysim-ṯ, ḏ wa ig iǧan ḏ ddat inu."

²³ Iysi-d ȓkas icekkar Arebbi yuca-asen-ṯ, swin zzayes marra iḏsen.

²⁴ Inna-asen: "Ȓkas-a ḏayes iḏammen n ȓƹaheḏ, iƹni ḏ iḏammen inu iy ɣa yazzȓen ƹlaḥsab aṭṭas n yiwḏan.

²⁵ Aqa tesȓam ȓḥaqq: Zi ssa aȓ ṯsawent war sesseɣ ca zeg waman-a uḍiȓ ḥetta aȓ Nhar nni iy ṯen ɣa sweɣ zi jḏiḏ ḏi ȓmulk n Arebbi."

²⁶ Ɣennjen ijjen n yizȓi n Ȓƹiḏ, ssenni ffɣen ruḥen ɣar Uḏrar n Zzitun.

Siḏiṯneɣ Ƹisa issawaȓ x unkar n Buṭrus

²⁷ Inna-asen Ƹisa i imeḥḍaren nnes: "Aḏayi ṯsemḥem marra iḏwem minzi iqqar Lkitab:

²⁸ Walakin xmi d ɣa kkareɣ zi ȓmewṯ, aḏawem izwareɣ ɣar ṯmurṯ n Ljalil."

²⁹ Inna-as Buṭrus: "Waxxa aḏayec ɣa semḥen marra, nec war ḏayec semḥeɣ ca."

³⁰ Yarra xas Ƹisa inna-as: "Aqa tesȓiḏ ȓḥaqq: Ṯa, ǧiȓeṯ-a qbeȓ ma aḏ idden uyaziḍ marrṯayen ataf aḏayi ṯenkareḏ ṯȓaṯa n ṯwaȓaṯin."

³¹ Inna-as Buṭrus netta metʼakkad: "Nec war c nekkareɣ ca waxxa akiḏec iy ɣa mmṯeɣ." Amenni iy nnan marra imeḥḍaren.

Siḏiṯneɣ Ƹisa itẓaǧa ḏeg Uḏrar n Zzitun

³² Yusa-d Ƹisa ak imeḥḍaren nnes ɣar yijjen n umcan qqaren-as Inna-asen: "Qqimem ḏa, nec aḏ raḥeɣ ḏiha aḏ ẓẓaǧeɣ."

³³ Yuwi akiḏes Buṭrus ḏ Yaƹqub ḏ Yuḥanna, ibḏa itnexȓeƹ itxeyyaq.

³⁴ Inna-asen: "Ȓaƹmar inu ƹȓayen aḏ idduqqez s lḥuzen. Qqimem ḏa ṯfaqem."

³⁵ Ibeƹƹeḏ xasen cwayt, isejjeḏ ɣar ṯmurṯ ibḏa itettar i Arebbi irezzu axas twakkes ṯsaƹƹat nni.

³⁶ Inna: "A Baba cek kuȓci ṯzemmareḏ-as, sbeƹƹeḏ-iṯ xafi ȓkas-a n ȓaƹḏab. Maci mamc xseɣ nec; Lla, mamc ixes ȓxaḍar nnec cek."

³⁷ Iḏweȓ ɣar imeḥḍaren-a yufi-ṯen ṭṭṣen, inna-as i Buṭrus: "Ma teṭṭṣeḏ a Simƹan? Ma war ṯzemmareḏ ca akiḏi ṯfaqeḏ waxxa ḏ ijjen n ṯsaƹƹat waha?

³⁸ Iȓim ƹlabal ẓẓaǧem ḥima war tiḏfem ca ḏi ȓemḥayen. Uȓ n bnaḏem iwjeḏ walakin ddat nnes ṯeḍƹef."

³⁹ Ibeƹƹeḏ xasen ƹaweḏ ittar i Arebbi amecnaw amezwaru.

⁴⁰ Iḏweȓ-d ƹaweḏ ɣarsen yufi-ṯen ṭṭṣen ȓaḥeqqac iɣelleb xasen yiḍeṣ. Niṯni ƹaweḏ war ufin min ḏas ɣa inin.

⁴¹ Iḏweȓ-d ɣarsen wis ṯeȓt-marraṯ inna-asen: "Ƹaḏ ṯeṭṭṣem, ƹaḏ ṯreyyḥem? Ṣafi, baraka! Aqa ṯuweḍ-d ȓweqṯ nni iy ḏi ɣa itwasellem Mmis n bnaḏem ɣar ifassen n yinni iƹeṣṣan.

⁴² Kkarem a nuyurem qa wenni iy ḏayi ɣa izzenzen aqaṯ yusa-d."

Israʼiliyen ḏ irumaniyen teṭṭfen Siḏiṯneɣ Ƹisa

⁴³ Yallah Ƹisa issawaȓ yuweḍ-d Yahuḏa, ijjen zi ṯenƹac nni n arrusul nnes. Yuwi-d akiḏes ȓɣaci aṭṭas ysin ȓesyuf ḏ idebbuzen. Ssekken-ṯen-d arruyas n ȓfuqaha ḏ imseȓmaḏen n ccariƹa ḏ imeqqranen n Ayṯ-Israʼil.

⁴⁴ Wenni iy ṯ ɣa izzenzen iƹni Yahuḏa qbeȓ tuɣa itafeq akiḏsen x yijjen n lƹalama inna-asen: Wenni xef ɣa seǧmeɣ ḏ wenni iy xef ṯrezzum. Ṭṭfem-ṯ, awim-ṯ iḥḍa.

⁴⁵ Ṣafi yusa-d Yahuḏa iqarreb ɣar Ƹisa inna-as: "A Siḏi." Uca iseǧem xas.

⁴⁶ Ȓexddenni sersen xas ifassen nsen ṭṭfen-ṯ.

⁴⁷ Ijjen zeg yinni ḏinni iǧan ijbeḏ-d ssif yuwṯa zzayes ismeɣ n arrayes n ȓfuqaha iqess-as amezzuɣ.

⁴⁸ Inna-asen Ƹisa: "Ma tɣir-awem qa nec ḏ lmujrim wami d ṯeysim ȓesyuf ḏ idebbuzen ḥima aḏayi ṯeṭṭfem niɣ?

⁴⁹ Tuɣa tɣimiɣ akiḏwem mkuȓ nhar ḏi ṯemzida ṯameqqrant seȓmaḏeɣ ḏinni, war ḏayi ṯeṭṭifem ca. Walakin marra manaya iwqeƹ ḥima aḏ ikemmeȓ min yurin ḏi Lkutub."

⁵⁰ Uca semḥen ḏayes marra arewȓen.

⁵¹ Iḏfar-iṯ ijjen n uḥenjir, xas čammir waha. Ṭṭfen-ṯ

⁵² walakin netta yarweȓ-asen ḏ aƹeryan ijja ḏinni čammir nnes.

Siḏiṯneɣ Ƹisa zzaṯ i lḥukkam n Ayṯ-Israʼil

⁵³ Uwin Ƹisa ɣar arrayes n ȓfuqaha. Munen akiḏes marra arruyas n ȓfuqaha, ḏ imeqqranen n Ayṯ-Israʼil, ḏ imseȓmaḏen n ccariƹa.

⁵⁴ Iḏfar-iṯ Buṭrus zi ȓeggwaj, yuḏef ɣar ȓemraḥ n ṯeddarṯ n arrays nni. Iqqim ak iƹessasen izɣar ɣar ṯmessi.

⁵⁵ Arruyas n ȓfuqaha ḏ marra Jmaƹṯ n lḥukkam n Ayṯ-Israʼil rezzun chaḏeṯ ḍed i Ƹisa ḥima aṯ nɣen walakin war ufin walu.

⁵⁶ Aṭṭas iy xas icehhḏen ẓẓur, walakin ɣarsen tanaquḍ ḏi chaḏeṯ nsen kuȓ ijjen min iqqar.

⁵⁷ Kkaren ȓebƹaḍ cehḏen xas ẓẓur nnan:

⁵⁸ "Netsȓa-yas iqqar qa nec aḏ heḏmeɣ ṯamziḏa-ya ṯameqqrant iy bnan yiwḏan s ifassen, aḏ bniɣ ijjen n ṯemziḏa ḏi ṯeȓtiyyam war t bnin yiwḏan s ifassen."

⁵⁹ Walakin ƹaweḏ ɣarsen tanaquḍ ḏi chaḏeṯ nni nsen kuȓ ijjen min iqqar.

⁶⁰ Uca ibedd arrays n ȓefuqaha ḏi ȓwesṭ n jmaƹṯ inna-as i Ƹisa: "Ma war ṯeqqareḏ walu cek? Min xac cehhḏen yiwḏan-a?"

⁶¹ Iqqim Ƹisa isqar war xas yarri ca. Ikkar isseqsa-ṯ ƹaweḏ arrayes n ȓefuqaha inna-as: "Ma cek ḏ Lmasiḥ Mmis n Arebbi iy iǧan mubarik?"

⁶² Inna-as Ƹisa: "Wah, ḏ nec. Kenniw aḏ teẓrem Mmis n bnaḏem iqqim x ufusi n Lqawi. Aṯ ṯeẓrem ƹaweḏ ihewwa-d ak useynu n ujenna."

⁶³ Arrays nni n ȓfuqaha iɣareṣ arruḍ x yixef nnes inna-asen: "War neḥḏij bu ȓechuḏ!

⁶⁴ Ma ṯesȓim-as iqqar lmunkar x Siḏi Arebbi? Min ḏawem imeḍharen?" Marra ḥekmen xas belli isḏaheǧ ȓmewṯ.

⁶⁵ Ssenni bḏan ȓebƹaḍ zzaysen ssusufen xas. Ȓeḥḥfen-as x uɣembub nnes ccaṯen-ṯ s ȓpunyaṯ qqaren-as: Iwa a nnabi siweȓ! Uwin-ṯ-id iƹassasen ccaṯen-ṯ s iseqqiȓen.

Buṭrus inekkar Siḏiṯneɣ Ƹisa

⁶⁶ Buṭrus iqqim ɣar barra awedday ḏi ȓemraḥ. Ṯqarreb ɣares ijjen n ṯxeddant n arrays n ȓfuqaha.

⁶⁷ Ṯeẓri-ṯ izɣar ɣar ṯmessi, ṯexzar ḏayes mliḥ ṯenna-as: "Uȓa ḏ cek ṯeǧiḏ ak Ƹisa zi Naṣira."

⁶⁸ Inkar Buṭrus inna-as: "War fhimeɣ ca war ssineɣ ca minxef ṯessawaȓeḏ!" Iffeɣ Buṭrus iruḥ ṭṭarf n ṯewwarṯ n ȓemraḥ. {Ȓexddenni idden uyaziḍ.}

⁶⁹ Ṯeẓri-ṯ ṯxeddant nni ḏinni ṯenna-asen ƹaweḏ i yinni ibedden ḏeg umcan nni: "Qa aryaz-a wanita zzaysen."

⁷⁰ Inkar Buṭrus ƹaweḏ. Menbaƹd cwayt nnan-as yinni ibedden ḏeg umcan nni: "Iwa nican, cek ḏ ijjen zzaysen minzi cek zi Ljalil."

⁷¹ Ikkar Buṭrus ibḏa itḥarrem ixef nnes itjaǧa iqqar-asen: "Aryaz-a iy xef ṯessawaȓem nec war ṯ ssineɣ ca!"

⁷² Ȓexddenni idden uyaziḍ ṯwaȓa wis ṯnayen, ifekkar-d Buṭrus awaȓ nni n Ƹisa wami ḏas inna: Qbeȓ ma aḏ idden uyaziḍ marrṯayen aḏayi ṯenkareḏ ṯȓaṯa n ṯwaȓaṯin. Wami ifekkar ḏi manayenni iru imeṭṭawen ḏ imeǧaḥen aṭṭas.