Marqus 13 - Ṯarifiṯ 2020

Lƹalamaṯ n ȓfana n ddunect

¹ Wami d iffeɣ Ƹisa zi ṯemziḏa ṯameqqrant iqarreb-d ɣares ijjen n zeg imeḥḍaren nnes inna-as: "A Lmuƹallim, xzar izra-ya ḏ ȓebni-ya mecḥaȓ ḏ iṣebḥanen!"

² Indeq-d Ƹisa inna-as: "Twaȓiḏ ȓebni-ya mecḥaȓ d itas ḏ aṣebḥan, yac? Walakin war ḏa itɣimi uȓa ḏ ijjen n uzru x unneɣni, marra manaya aḏ inehḏem."

³ Wami iqqim Ƹisa ḏeg Uḏrar n Zzitun zzaṯ i ṯemziḏa ṯameqqrant, sseqsan-ṯ Buṭrus ḏ Yaƹqub ḏ Yuḥanna ḏ Andrus waḥḏes nnan-as:

⁴ "Ini-yaneɣ cek, meȓmi ɣa iwqeƹ manaya? Min ṯeƹna lƹalama nni xmi ƹȓayen ɣa weqƹent marra ṯimesȓayin-a?"

⁵ Ijaweb-iṯen Ƹisa inna-asen: "Ḥḍam ixef nwem ḥima war kenniw ixeddeƹ ḥadd.

⁶ Aṭṭas iy d ɣa yasen s yisem inu zaƹma aḏ inin qa nec ḏ Lmasiḥ! Aḏ xeḏƹen aṭṭas n yiwḏan.

⁷ Xmi ɣa ṯesȓam x lḥuȓub ḏ ȓexbar n lḥurub war teggwḏeṯ ca, labud zi manaya. Walakin ddunect-a ƹaḏ war ṯfenni ca.

⁸ Dduwla aḏ tehjem x dduwla, lmemlaka aḏ tehjem x lmemlaka. Aḏ yiȓi jjuƹ aḏ iwqeƹ zzinzal ḏeg waṭṭas n imucan. Manaya aḏ yiȓi amecnaw ȓeḥriq amezwaru n ṯemɣarṯ itarwen.

⁹ Ḥḍam ixef nwem! Akenniw sellmen i lmaḥkamaṯ, akenniw uwṯen ḏi ṯemziḏawin nsen. Aḏ tbeddem zzaṯ i lḥukkam ḏ izeǧiḏen ƹlaḥsab isem inu ḥima axafi ṯcehḏem.

¹⁰ Aqa ḏ amezwaru itxeṣṣa aḏ itwabeccar Lʼinjil i marra ȓegnus.

¹¹ Xmi kenniw ɣa awin ḥima akenniw sellmen ɣar ccraƹ, bȓa ma aḏ teysim amnus ḏ amezwaru ḏi ȓaƹquȓaṯ nwem min ɣa ṯinim; Lla, awaȓen nni iy ɣa ṯinim ḏ Arebbi iy ḏawem ṯen ɣa yucen ḏi ṯsaƹƹat nni. War iǧi bu ḏ kenniw iy ɣa issiwȓen; Lla, aḏ issiweȓ Arruḥ iqeddsen.

¹² Umas aḏ isellem umas i ȓmewṯ. Babas aḏ isellem mmis. Ṯarwa aḏ raḥen ḍed i lwalidin nsen, aṯen sellmen i yinni iy ṯen ɣa nɣen.

¹³ Akenniw ƹiffen marra iwḏan ƹlaḥsab isem inu, walakin wenni ɣa iṣbaren ɣar uneggaru ataf aḏ injem.

¹⁴ Xmi ɣa ṯeẓrem , netta ibedd mani ixeṣṣa war itbeddi ca, ȓexddenni yinni iǧan ḏi ṯmurṯ n Yahuḏiya itxeṣṣa aḏ arewȓen ɣar iḏurar. (A fhem a wenni iɣrin manaya!)

¹⁵ Wenni ɣa yiȓin x ṯzeqqa nnes itxeṣṣa-as war ihewwi ca ɣar ṯeddarṯ, war ḏayes itiḏef ca ḥima aḏ iysi can ȓḥajeṯ.

¹⁶ Wenni ɣa yiȓin ḏeg umarjeƹ itxeṣṣa-as war iteƹqib ca ɣar ṯeddarṯ aḏ iysi čammir nnes.

¹⁷ Ya tamara iy ɣa yiȓin x ṯemɣarin nni s iƹeddisen ḏeg wussan nni ḏ ṯinni issuṭuḍen!

¹⁸ Ttareṯ i Arebbi bac manaya war itiȓi ca ḏi ȓmecta.

¹⁹ Ḏi ȓweqṯ nni ataf aḏ tewqeƹ ijjen n tamara ḏ ṯameqqrant iy war iweqiƹen ƹemmarṣ zeg wami ṯeǧa ddunect-a iy d ixȓeq Arebbi aȓ ȓexxu, u ƹemmarṣ aḏ tewqeƹ ƹaweḏ.

²⁰ Maƹlik Siḏi Arebbi war isenqis ca ḏi ȓiyyam nni n tamara-ya iy d ɣa yasen, ataf war inejjem uȓa ḏ ijjen. X ssabab n yinni ixḍar Arebbi, ataf aḏ isenqes ȓiyyam nni iy d ɣa yasen.

²¹ Ssenni meȓa inna-awem can yijjen: Xzarem! Aqaṯ ḏanita Lmasiḥ! Niɣ, Aqaṯ ḏiha! War ṯ tamnem ca.

²² Aqa aṭṭas iy d ɣa imeḍharen s ixarriqen aḏ inin aqa nec ḏ Lmasiḥ niɣ nec zi lʼanbiya. Aḏ ggen lmuƹjizaṯ ḏ ṯimeqqranin ḏ ȓaƹjayeb zaƹma ḥima aḏ xeḏƹen iwḏan. Maƹlik zemmaren iȓi xeḏƹen uȓa ḏ yinni ixḍar Arebbi.

²³ Iȓim ƹlabal kenniw! Aqa nec ƹeȓmeɣ-awem x marra manaya qbeȓ ma aḏ iwqeƹ.

²⁴ Menbaƹd i tamara n ȓiyyam nni, ȓexddenni ṯfuct aḏ teḏweȓ ḏ ṯaǧest, ṯaziri war ticc bu ṯfawṯ.

²⁵ Iṯran aḏ d wḍan zeg ujenna, yinni ijehḏen ḏeg ujenna aṯen isenhezz Arebbi.

²⁶ Ȓexddenni iy ɣa ẓren Mmis n bnaḏem ihewwa-d ḏeg useynu s lƹaḍama ḏ jjheḏ nnes imɣaren.

²⁷ Aḏ d issekk lmalaʼikaṯ nnes ɣar arbeƹa n imucan n ṯmurṯ manis d itekk arriḥ: zi ccarq ḏ lɣarb ḏ ljanub ḏ ccamal. Aḏ d ismun yinni ixḍar zi ȓaḥedd n ddunect-a aȓ ȓaḥedd n ujenna.

²⁸ Ȓemḏem ijjen n ȓmaƹna zi ṯcejjarṯ n ṯazarṯ. Ɣir ȓefruƹ nnes aḏ ḥebbben aḏ ggen ṯifray, ataf aḏ tessnem yallah anebḏu iqarreb-d.

²⁹ Amenni uȓa ḏ kenniw. Xmi ɣa ṯeẓrem ṯimesȓayin-a itewqiƹen ataf aḏ tessnem illa manaya yuḏes-d, aqaṯ zzaṯ i ṯewwarṯ.

³⁰ Aqa tesȓam ȓḥaqq: Yiwḏan n ȓweqṯ-a war tmettin ca aȓ ɣa iwqeƹ marra manaya.

³¹ Aḏ ifna ujenna ḏ ṯmurṯ, walakin awaȓen inu war fennin ca ƹemmarṣ.

³² Cuf, nhar nni niɣ ṯsaƹƹat nni war t issin uȓa ḏ ijjen, lla lmalaʼikaṯ ḏeg ujenna uȓa ḏ Mmis. Issen-it ɣir Baba waḥḏes.

³³ Ḥḍam ixef nwem, iȓim ƹlabal ȓaḥeqqac war ṯessinem ca meȓmi d ɣa ṯas ȓweqṯ nni.

³⁴ Nhar nni aḏ yiȓi am yijjen n ssiyyed irezzu aḏ isafer. Iffeɣ zi ṯeddarṯ nnes, ixeddamen nnes ikellef-iṯen x wagȓa nnes kuȓ ijjen x ȓxeḏmeṯ nnes. Iweṣṣa aƹessas n ṯewwarṯ aḏ iqqim ifaq.

³⁵ X manaya faqem baƹda, qa war ṯessinem meȓmi d ɣa iḏweȓ bab n ṯeddarṯ. War ṯessinem ma ag uƹecci niɣ ɣar ȓwesṭ n ǧiȓeṯ niɣ xmi ɣa idden uyaziḍ niɣ ɣar ȓefjar.

³⁶ Ɣarwem aḏ d yas ƹlaɣafla akenniw yaf ṯeṭṭṣem!

³⁷ Min ḏawem qqareɣ, qqareɣ-ṯ i marra: Iȓim ƹlabal!"