Lwaḥi 9 - Ṯarifiṯ 2020

¹ Ṯekkar lmalaʼika wis xemsa ṯṣuḍ ḏi zzammar nnes uca ẓriɣ ijjen n yiṯri tuɣa iwḍa-d zeg ujenna x ṯmurṯ. Immuc-as i yiṯri nni ȓmeftaḥ n wanu nni itawin ɣar ȓaǧeɣ bȓa ȓaḥedd.

² Irzem anu nni itawin ɣar ȓaǧeɣ bȓa ȓaḥedd, yuȓi-d zzayes ddexxan amecnaw ddexxan n yijjen n ȓkuceṯ ḏ ṯameqqrant. Ddexxan n ȓaǧeɣ nni iɣeṭṭa ṯfucṯ ḏ ljuw.

³ Zi ddexxan-a ṯeffeɣ-d ssenni ṯmurɣi ɣar ṯmurṯ, immuc-asent jjheḏ am ṯɣirḏemiwin n ṯmurṯ.

⁴ Nnan-asent war tḍeyyaƹent arbiƹ n ṯmurṯ uȓa ḏ min iǧan ḏ azeyza uȓa ḏ ȓcejjur, ɣir iwḏan nni iy war ɣar iǧi ca ṭṭabaƹ n Arebbi x ṯenyarṯ nsen.

⁵ Maci mesmuḥ aṯen nɣent, walakin aṯen ƹeddbent xems chur. Ȓaƹḏab-a iy teggent amecnaw ṯiɣirḏemiwin xmi teqqsent i bnaḏem.

⁶ Ḏi ȓweqṯ nni aḏ arzun yiwḏan x ȓmewṯ war t tifen ca, aḏ ttaren ȓmewṯ azzaysen ṯarweȓ.

⁷ Ṯmurɣi-ya tcabbah ḏeg yiysan nni iy wejḏen aḏ ḥarben. Ɣarsent x izeǧifen nsent am ttaj n ddheb, aɣembub nsent am uɣembub n bnaḏem.

⁸ Ɣarsent acewwaf amecnaw acewwaf n ṯemɣarin. Ṯiɣmas nsent amecnaw ṯiɣmas n ssbaƹ.

⁹ Ṯijiliṯin nsent ggint am ṯjiliṯin n ȓeḥḏiḏ. Ssdaƹ n wafriwen nsent igga am ssdaƹ n waṭṭas n ikarruṯen n yiysan iy tazzȓen ɣar ȓḥarb.

¹⁰ Ɣarsent ṯicceṭ am ṯenni n ṯɣirḏent, teqqsent zzayes. Ɣarsent jjheḏ aḏ ḍarrent iwḏan xems chur s ṯicceṭ nni.

¹¹ Azeǧiḏ nsent netta ḏ lmalak n ȓaǧeɣ bȓa ȓaḥedd, s lƹibriya qqaren-as Abaddun, s ṯyunaniṯ qqaren-as Abulyun.

¹² Ṯeƹḏu tamara ṯamezwarut, ƹaḏ aḏ d asent ṯnayen nneɣni.

¹³ Ṯekkar lmalaʼika wis setta ṯṣuḍ ḏi zzammar nnes uca sȓiɣ i yijjen n ṯmijja ṯendeq-d zi arbeƹa nni n waccawen n ȓmeḏbaḥ n ddheb iy iǧan zzaṯ i Arebbi.

¹⁴ Ṯenna-as ṯmijja nni i lmalaʼika wis setta iy ɣar ṯeǧa zzammar: "Ḍȓeq-d i arbeƹa n lmalaʼikaṯ itwacedden ḏeg yiɣzar n Lfurat ameqqran."

¹⁵ Uca twaḍeȓqent-id arbeƹa-ya n lmalaʼikaṯ iy tuɣa twassewjḏent i ṯsaƹƹat-a ḏ nhar-a ḏ char-a ḏ useggwas-a ḥima aḏ nɣent tuluṯ n yiwḏan.

¹⁶ Sȓiɣ x lƹadad n ȓƹaskar iy inyin x yiysan: lƹadad nsen miyyatayen milyun.

¹⁷ Ẓriɣ ḏi lwaḥi-ya inu iysan ḏ yinni xasen inyin, ɣarsen ṯijiliṯin n ȓeḥḏiḏ ḏ ṯizeggwaɣin am ṯmessi, ḏ ṯizeyzawin am lyaqut, ḏ ṯiwraɣin am ȓekbriyeṯ. Izeǧifen n yiysan-a am uzeǧif n ssbaƹ, teffeɣ-d zeg uqemmum nsen ṯmessi ḏ ddexxan ḏ ȓekbriyeṯ.

¹⁸ Mmuṯen tuluṯ n yiwḏan s ṯraṯa n lmuṣibaṯ-a iƹni s ṯmessi ḏ ddexxan ḏ ȓekbriyeṯ iy d iteffɣen zeg uqemmum nsen.

¹⁹ Jjheḏ n yiysan-a aqaṯ ḏeg uqemmum nsen ḏ iƹennaben nsen. Iƹennaben nsen tcabbahen ḏeg ifiɣeran, tḍarran s izeǧifen nsen.

²⁰ Walakin iwḏan ig inejmen zi lmuṣibaṯ-a war tuben ca s min ggin s ifassen nsen. Qqimen ƹaḏ ƹebbḏen ccayaṭin ḏ lʼaṣnam n ddheb ḏ nnuqarṯ ḏ nneḥḥas ḏ uzru ḏ ukeccuḍ iy war itwiȓin ca iy war itsȓin ca iy war igguren ca.

²¹ War tuben ca wami nɣin iwḏan niɣ wami ggin ssḥur ḏ lfasad ḏ ṯukkarda.