Lwaḥi 8 - Ṯarifiṯ 2020

Acemmaƹ wis sebƹa

¹ Izmar wami irzem acemmaƹ wis sebƹa, ineqḍeƹ ȓḥess ḏeg ujenna can uzyen n ṯsaƹƹat.

² Ẓriɣ sebƹa n lmalaʼikaṯ iy itbeddan zzaṯ i Arebbi, immuc-asent sebƹa n zzwammar.

³ Yusa-d ijjen n lmalak nneɣni ibedd ɣar ȓmeḏbaḥ, iysi-d ṯimejmarṯ nni itwaṣenƹen s ddheb. Immuc-as aṭṭas n tbaxur ḥima aḏ iqeddem tbaxur nni ak ṯẓaǧiṯ n ȓmuminin ṣṣaliḥin x ȓmeḏbaḥ n ddheb iǧan zzaṯ i lƹarc.

⁴ Ddexxan n tbaxur-a ak ṯẓaǧiṯ n ȓmuminin ṣṣaliḥin igaƹƹeḏ zeg ufus n lmalak-a wanita ɣar ujenna zzaṯ i Arebbi.

⁵ Iysi lmalak-a ṯimejmarṯ nni n tbaxur, iƹemmar-it s ṯmessi n ȓmeḏbaḥ, izeǧeƹ-it ɣar ṯmurṯ. Iwqeƹ wajjaj ḏ iɣuyan ḏ wassam ḏ zzinzal.

Sebƹa n zzwammar

⁶ Sebƹa n lmalaʼikaṯ nni iy ɣar ǧant sebƹa n zzwammar sewjaḏent ixef nsent ḥima aḏaysen ṣuḍent.

⁷ Ṯekkar lmalaʼika ṯamezwarut ṯṣuḍ ḏi zzammar nnes uca yusa-d icarra ḏ ṯmessi mxellṭen ak iḏammen menḍaren ɣar ṯmurṯ. Ṯecmeḍ tuluṯ n ṯmurṯ ḏ tuluṯ n ȓcejjur ḏ marra arbiƹ azeyza.

⁸ Ṯekkar lmalaʼika wis ṯnayen ṯṣuḍ ḏi zzammar nnes uca ṯmenḍar-d can ȓḥajeṯ ḏi ȓebḥar amecnaw can uḏrar ḏ ameqqran itceƹƹaȓ s ṯmessi. Tuluṯ n ȓebḥar iḏweȓ ḏ iḏammen.

⁹ Tuluṯ n lmexluqaṯ ig itƹican ḏi ȓebḥar mmuṯen, tuluṯ n iɣarruba twarzen.

¹⁰ Ṯekkar lmalaʼika wis tȓaṯa ṯṣuḍ ḏi zzammar nnes uca iwḍa-d ijjen n yiṯri ḏ ameqqran zeg ujenna itceƹƹaȓ amecnaw asfeḍ. Iwḍa-d x tuluṯ n yiɣzran ḏ ȓaƹnaṣer n waman.

¹¹ Iṯri nni qqaren-as Cciḥ. Tuluṯ n waman nni ḏewȓen ḏ imerzagen. Aṭṭas zeg yinni iswin zzaysen mmuṯen minzi aman nni ḏ imarzagen.

¹² Ṯekkar lmalaʼika wis arbeƹa ṯṣuḍ ḏi zzammar nnes uca tuluṯ n ṯfucṯ ḏ ṯziri ḏ yiṯran twasenhezzen ḥima tuluṯ nni aḏ tiȓi ḏ ṯaǧesṯ, aḏ tenqes ijjen n tuluṯ n ṯfawṯ ḏi nhar uȓa ḏ ǧiȓeṯ.

¹³ Xzareɣ, sȓiɣ i yijjen n nser iṭṭaw ḏi ȓwesṭ n ujenna iȓaɣa s jjheḏ inna: "Ya tamara, ya tamara, ya tamara x imezḏaɣ n ṯmurṯ ƹlaḥsab ṯȓaṯa n lmalaʼikaṯ nni ig iqqimen ƹaḏ war ṣuḍent ca ḏi zzwammar nsent."