Lwaḥi 6 - Ṯarifiṯ 2020

Sebƹa nni n icemmaƹen x Lkitab n Lmuṣibaṯ

¹ Ṯumma ẓriɣ Izmar nni wami irzem ijjen zi sebƹa n icemmaƹen nni, sȓiɣ i yijjen zi arbeƹa nni n lmexluqaṯ iqqar s jjheḏ am wajjaj: "Araḥ-d!"

² Wami xzareɣ, twaȓiɣ ijjen n uyis ḏ acemȓaȓ, wenni xas inyin ɣares ijjen n neccab n fȓiča. Ucin-as ijjen n ttaj, iffeɣ irebbeḥ ḏi ȓḥarb u ƹaḏ aḏ irbeḥ.

³ Izmar nni wami irzem acemmaƹ wis ṯnayen, sȓiɣ i lmexluq wis ṯnayen iqqar: "Araḥ-d!"

⁴ Ṯumma iffeɣ-d ijjen n uyis ḏ azeggwaɣ, wenni xas inyin ucin-as aḏ ikkes ssalam zi ṯmurṯ, aḏ nɣen yiwḏan ayawya. Ƹaweḏ ucin-as ijjen n ssif ḏ ameqqran.

⁵ Izmar nni wami irzem acemmaƹ wis ṯȓaṯa, sȓiɣ i lmexluq wis ṯȓaṯa iqqar: "Araḥ-d!" Wami xzareɣ, twaȓiɣ ijjen n uyis ḏ abercan, wenni xas inyin ɣares ȓmizan ḏeg ufus nnes.

⁶ Ṯumma sȓiɣ amecnaw ijjen n ṯmijja ṯusa-d zi jjiheṯ n arbeƹa n lmexluqaṯ nni ṯeqqar: "Kilu n yirḏan iseggwa nhar ufeǧaḥ. Ƹaweḏ ṯȓaṯa n kilu n imendi iseggwa nhar ufeǧaḥ. Walakin zzect ḏ waman uḍiȓ war ṯen tḍeyyaƹ ca."

⁷ Izmar nni wami irzem acemmaƹ wis arbeƹa, sȓiɣ i lmexluq wis arbeƹa iqqar: "Araḥ-d!"

⁸ Wami xzareɣ, twaȓiɣ ijjen n uyis ḏ awraɣ, wenni xas inyin semman-ṯ Ȓmewṯ, teḏfar-iṯ Lʼaxira. Ṯemmuc-asen ssulṭa aḏ nɣen arbaƹ n imezḏaɣ n ṯmurṯ s ssif ḏ jjuƹ ḏ ṭṭaƹun ḏ ȓuḥuc n ṯmurṯ.

⁹ Izmar nni wami irzem acemmaƹ wis xemsa, ẓriɣ swadday i ȓmeḏbaḥ buḥbeȓ n yinni itwanɣen ƹlaḥsab awaȓ n Arebbi ḏ chaḏeṯ iy cehḏen.

¹⁰ Snekkaren ṯɣuyyeṯ s jjheḏ nnan: "Ya Mawlana ya wenni ƹaḍim iǧan ḏ ȓḥaqq, mecḥaȓ ɣa ṯekkeḏ war tḥisibeḏ imezḏaɣ n ddunect-a, aṯen ṯƹaqbeḏ x iḏammen nneɣ?"

¹¹ Ṯumma immuc-asen marra ij-ij, čammir ḏ acemȓaȓ itwanna-yasen ƹaḏ aḏ teṣbarem cwayt aȓ ɣa itwakemmeȓ lƹadad nican n ayṯmaṯwem iy ɣa itwanɣen amecnaw kenniw, iƹni yinni iy iƹebbḏen am kenniw.

¹² Ẓriɣ Izmar nni wami irzem acemmaƹ wis setta, ȓexddenni iwqeƹ ijjen n zzinzal ḏ ameqqran. Ṯfuct ṯeḏweȓ ḏ ṯabercant am ȓefḥam, ṯaziri ṯeḏweȓ am iḏammen.

¹³ Iṯran n ujenna weṭṭan-d ɣar ṯmurṯ amecnaw ṯazarṯ xmi ṯweṭṭa zi ṯcejjarṯ xmi t isenhezza arriḥ ijehḏen.

¹⁴ Ajenna inejmeƹ am mammec itwabelleƹ ijjen n lkitab. Iḏurar ḏ ṯeyzirin marra nhezzent zeg umcan nsent.

¹⁵ Kkaren izeǧiḏen n ṯmurṯ ḏ imeqqranen nsen ḏ arruyas n ȓƹaskar ḏ twajar ḏ yinni ijehḏen ḏ yinni ɣarsen bab nsen ḏ yinni ɣarsen lḥurriya nsen, ruḥen marra tnuffaren ḏeg yifran ḏ jar yizra n iḏurar.

¹⁶ Niṯni qqaren i iḏurar ḏ yizra: "Wḍam-d xaneɣ, snuffarem-aneɣ zeg wuḏem n wenni iqqimen x lƹarc ḏ lƹiqab iy ɣa igg Yizmar.

¹⁷ Aqa yusa-d Lyawm ameqqran n lƹiqab nsen, ug izemmaren aḏ ibedd?"