Lwaḥi 21 - Ṯarifiṯ 2020

Ijjen n ujenna ḏ ṯmurṯ ḏ jḏiḏ

¹ Ẓriɣ ijjen n ujenna ḏ jḏiḏ ḏ ijjen n ṯmurṯ ḏ jḏiḏ, ȓaḥeqqac ajenna amezwaru ḏ ṯmurṯ ṯamezwarut ṣafi twakksen, ȓebḥar war iqqim ca.

² Ẓriɣ ṯandint iqeddsen nettaṯ ḏ Lquds ḏ jḏiḏ. Ṯehwa-d zeg ujenna zi Arebbi ṯegga am ṯsȓiṯ ṯeƹḏeȓ ixef nnes bac aḏ teȓqa muȓay.

³ Sȓiɣ i yijjen n ṯmijja zi lƹarc ṯeqqar s jjheḏ: "Aqa ṯazeddiɣṯ n Arebbi ak yiwḏan, aḏ izḏeɣ jarasen aḏ iȓin ḏ ccaƹb nnes. Arebbi s yixef nnes akiḏsen yiȓi, u ƹaweḏ aḏ yiȓi ḏ Arebbi nsen.

⁴ Aḏ imseḥ kuȓ ameṭṭaw zi ṯiṭṭawin nsen. War tɣimi ca ƹaḏ ȓmewṯ niɣ ḏ lḥuzen niɣ ḏ imeṭṭawen niɣ ḏ ȓeḥriq. Aqa ṯimesȓayin nni ṯimezwura ṣafi twakksent."

⁵ Inna-ayi wenni iqqimen x lƹarc: "Aḏ ggeɣ kuȓci ḏ jḏiḏ!" Uca inna: "Ari manaya qa awaȓen-a ḏaysen ȓaman ḏaysen ȓḥaqq."

⁶ Inna-ayi: "Ṣafi, itwakemmeȓ. Nec ḏ lʼalif nec ḏ lyaʼ. Nec kuȓci zzayi ig ibḏa, nec kuȓci zzayi iy ɣa ikemmeȓ. Aḏ uceɣ i wenni iffuḏen zi ȓƹunṣar n waman n ṯuḏarṯ baṭeȓ.

⁷ Wenni ɣa irebḥen aḏ iwareṯ ḏi ṯmesȓayin-a. Nec aḏ iȓiɣ ḏ Arebbi nnes, netta aḏ yiȓi ḏ mmi.

⁸ Walakin ccmayeṯ ḏ yinni war yuminen ca ḏ yinni iǧan ḏ iƹeffanen ḏ yinni ineqqen iwḏan ḏ yinni ifessḏen ḏ iseḥḥaren ḏ yinni iƹebbḏen lʼaṣnam ḏ marra yinni isxerriqen aqa amcan nsen aḏ yiȓi ḏi ȓebḥar ireqqen s ṯmessi ḏ ȓekbriyeṯ. Qa ṯenni ḏ ȓmewṯ wis ṯnayen."

Ṯandint n Lquds ḏ jḏiḏ

⁹ Yusa-d ɣari ijjen zi sebƹa n lmalaʼikaṯ nni iy ɣar ǧant sebƹa n ṯmejmarin ig iƹemmaren s sebƹa n lmuṣibaṯ nni ṯineggura, inna-ayi: "Araḥ-d, aḏac d smeḍhareɣ ṯasȓiṯ, iƹni ṯenni ɣa yawin Izmar."

¹⁰ Iysi-ayi arruḥ ɣar yijjen n uḏrar ḏ ameqqran yuƹȓa, ismeḍhar-ayi-d ṯandint iqeddsen iƹni Lquds, ṯehwa-d zeg ujenna zi Arebbi.

¹¹ Ḏayes lƹaḍama n Arebbi, nnur nnes amecnaw ṯazrut ṯaṣebḥant, amecnaw ṯazrut n lyaceb ṯeṣfa aṭṭas.

¹² Ɣares ijjen n ȓḥiḍ ḏ ameqqran yuƹȓa ɣares ṯenƹac n ṯewwura, ṯenƹac n ṯewwura nni xasent ṯenƹac n lmalaʼikaṯ. Yura x ṯewwura nni isemawen n ṯenƹac n ṯqebbaȓ n Ayṯ-Israʼil.

¹³ Ḏi ccarq ṯȓaṯa n ṯewwura, ḏi ccamal ṯȓaṯa n ṯewwura, ḏi ljanub ṯȓaṯa n ṯewwura, ḏi ȓɣarb ṯȓaṯa n ṯewwura.

¹⁴ Ȓḥiḍ n ṯendint ibedd x ṯenƹac n dsasaṯ, yura xasen isemawen n ṯenƹac n arrusul n Yizmar.

¹⁵ Lmalak nni wenni iy ɣari d issiwȓen ɣares ḏeg ufus nnes ijjen n ȓaƹbar n uɣanim n ddheb iƹebbar zzayes ṯandint ḏ ṯiwwura nnes ḏ ȓḥiḍ nnes.

¹⁶ Ṯandint murebbaƹ, am ṯuzeggarṯ nnes am ṯiriwṯ nnes. Iƹbar ṯandint s uɣanim nni yufa ḏayes aȓefayen u arbeƹmiyyat n kilumit, am ṯuzeggarṯ nnes am ṯiriwṯ nnes am ṯuƹȓat nnes.

¹⁷ Iƹbar ȓḥiḍ nnes yufa ḏayes miyya u arbeƹa u arbeƹin n ḏerraƹ, iƹni ȓaƹbar n lmalak nni am ȓaƹbar n bnaḏem.

¹⁸ Ȓḥiḍ nnes ibna s ṯezra n lyaceb, ṯandint ṯebna s ddheb iṣfan amecnaw jjaj iṣfan.

¹⁹ Dsasaṯ n ȓḥiḍ n ṯendint zewwqen s mkuȓ nnuƹ n ṯezra ṯiṣebḥanin. Dsas amezwaru netta ḏ ṯazrut n lyaceb, dsas wis ṯnayen ḏ lyaqut azeyza, dsas wis ṯȓaṯa ḏ lƹaqiq acemȓaȓ, dsas wis arbeƹa ḏ ṯazrut ṯazeyzawṯ n zzumurrud,

²⁰ dsas wis xemsa ḏ jjazeƹ azeggwaɣ, dsas wis setta ḏ lƹaqiq azeggwaɣ, dsas wis sebƹa ḏ ṯazrut n zzabarjad, dsas wis ṯmenya ḏ ṯazrut n birril, dsas wis tesƹa ḏ lyaqut awraɣ, dsas wis ƹecra ḏ lƹaqiq amerbiƹ, dsas wis ḥiṭac ḏ ṯazrut n fayruz, dsas wis ṯenƹac ḏ ṯazrut n jjamact.

²¹ Ṯenƹac nni n ṯewwura niṯenti ḏ ṯenƹac n jjuwharaṯ, kuȓ ṯawwarṯ nettaṯ ḏ jjuwhar. Ccariƹ n ṯendint netta ḏ ddheb iṣfan amecnaw jjaj iṣfan.

²² War ẓriɣ ca Ṯamziḏa ṯameqqrant ḏi ṯendint nni, mayemmi? Liʼanna Siḏi Arebbi ig izemmaren i kuȓci ak Yizmar niṯni ig iǧan ḏ Ṯamziḏa-ya ṯameqqrant.

²³ Ṯandint-a war teḥḏiji ca ṯfawṯ n ṯfucṯ niɣ n ṯziri ȓaḥeqqac lƹaḍama n Arebbi nettaṯ iy iteggen ḏinni ṯfawṯ, Izmar ḏ netta ḏ ȓefnar nnes.

²⁴ Aḏ uyuren ȓegnus ḏi ṯfawṯ nnes, qa izeǧiḏen n ṯmurṯ aḏ siḏfen lhimma nsen ḏi ṯendint-a.

²⁵ Ṯiwwura nnes war tbelliƹent ca nhar ikmaȓ qaƹ ȓaḥeqqac war ḏinni bu ǧiȓeṯ.

²⁶ Ḏinni aḏ siḏfen lhimma ḏ uweqqar n ȓegnus.

²⁷ War ḏinni taḏef uȓa ḏ ijjen n ṯmesȓayṯ ṯwessex niɣ ḏ ikrucaren niɣ ḏ yinni iqqaren ixerriqen. Aḏ aḏfen ḏinni ɣir yinni ɣar ǧan isemawen nsen zemmmen ḏi Lkitab n Ṯuḏarṯ n Yizmar.