Lwaḥi 18 - Ṯarifiṯ 2020

Ṯandint n Babil ṯweṭṭa

¹ Menbaƹd i manaya ẓriɣ ijjen n lmalak nneɣni ihwa-d zeg ujenna ɣares ssulṭa ḏ ṯameqqrant. Ṯceƹceƹ ṯmurṯ s nnur n lƹaḍama n lmalak nni.

² Isnekkar ṯɣuyyeṯ s jjheḏ inna: "Qa ṯewḍa qa ṯewḍa Babil ṯameqqrant! Ṯeḏweȓ ḏ ṯazeddiɣṯ n ccayaṭin, ḏ ṯanwaȓṯ i mkuȓ jjenn aƹeffan, ḏ axbuc i mkuȓ ajḍiḍ ig iǧan ḥram ig iƹiffen.

³ Ȓaḥeqqac marra ȓegnus swin zeg waman n uḍiȓ n lfasad nnes war iḥȓi, fesḏen akiḏes izeǧiḏen n ṯmurṯ. Isebbaben n ṯmurṯ uwin-d aṭṭas n wagȓa zeg ufelles nnes ameqqran."

⁴ Sȓiɣ i yijjen n ṯmijja nneɣni zeg ujenna ṯeqqar: "Ffɣem zi ṯendint nni ya ccaƹb inu ḥima war ṯcarrcem ca ḏi ȓmuƹṣiyaṯ nnes, ḥima war kenniw teȓqifent ca lmuṣibaṯ nnes.

⁵ Ȓmuƹṣiyaṯ nnes arnint ḥetta aȓ wami uwḍent ɣar ujenna, Arebbi war ittu ca ccarr nnes.

⁶ Arrem-as min ḏawem ṯegga nettaṯ, dublam-as ṯnayen n ṯwaȓaṯin ȓefƹayeȓ nnes. Ȓkas nni iy zi ṯsessew i yiwḏan, sesswem-as-ṯ marrṯayen.

⁷ Mecḥaȓ ma ṯsemɣer ixef nnes, mecḥaȓ ma ṯƹic ḏi ccehweṯ nnes, anectenni iy t ɣa ṯƹeddbem, anectenni iy t ɣa ṯesxeyyqem. Liʼanna nettaṯ ṯeqqar ḏeg wuȓ nnes: Aqa qqimeɣ ḏa am lmalika, nec war ǧiɣ ca ḏ ṯajjaȓṯ, ƹemmarṣ aḏ ḥezneɣ.

⁸ X manaya axas d munent ȓmuṣibaṯ ḏeg yijjen n nhar, iƹni ȓmewṯ ḏ lḥuzen ḏ buheyyuf. Aḏ teḥreq s ṯmessi ȓaḥeqqac Siḏi Arebbi iy xas ɣa iḥekmen netta ijheḏ.

⁹ Izeǧiḏen n ṯmurṯ iy kiḏes ifessḏen iy kiḏes itƹicen ḏi ccehweṯ nnes, axas run axas ḥeznen xmi ɣa ẓren ddexxan n ṯmessi nnes.

¹⁰ Aḏ bedden ɣar ȓeggwaj s ṯiggwḏi n ȓaƹḏab nnes niṯni qqaren: Ya Laṭif, ya Laṭif! Ya ṯandint ṯameqqrant, ya Babil ṯandint ijehḏen! Ḏeg yijjen n ṯsaƹƹat ihwa-d xam lḥisab ḏ lƹiqab!

¹¹ Isebbaben n ṯmurṯ axas run axas ḥeznen ȓaḥeqqac sseȓƹaṯ nsen war tifen wi t ɣa isɣen.

¹² Sseȓƹaṯ nni n ddheb, ḏ nnuqarṯ, ḏ lwiz, ḏ jjuwhar, ḏ ȓkettan n lulan aṣebḥan, ḏ ȓkettan gruna, ḏ ȓeḥrir, ḏ ȓkettan azeggwaɣ iḥeḏqen, ḏ marra min itwaṣennƹen s ukeccuḍ n umeḍzi, ḏ marra min itwaṣennƹen s iɣemmuzen n lfil, ḏ marra min itwaṣennƹen s ukeccuḍ iɣran, ḏ nneḥḥas, ḏ ȓeḥḏiḏ, ḏ marmu,

¹³ ḏ ȓqarfa, ḏ lƹiṭar, ḏ tbaxur, ḏ murr, ḏ tbaxur lluban, ḏ waman n uḍiȓ, ḏ zzect, ḏ waren lfurs, ḏ yirḏan, ḏ ifunasen, ḏ iḥuȓiyen, ḏ yiysan, ḏ ikarruṯen, ḏ isemɣan iƹni yiwḏan.

¹⁴ Aḏas inin isebbaben: Min ṯƹecceq ccehweṯ nnem war ṯ tifeḏ ca. Marra agȓa ḏ ȓxir nnem aḏ iqḍa, ƹemmarṣ aḏ d iḏweȓ.

¹⁵ Isebbaben nni iy kiḏes ggin agȓa s sseȓƹaṯ nni aḏ bedden ɣar ȓeggwaj s ṯiggwḏi zi ȓaƹḏab nni, aḏ run aḏ ḥeznen.

¹⁶ Aḏ inin: Ya Laṭif, ya Laṭif! Qa ṯandint-a ṯameqqrant, tuɣa xas ȓkettan n lulan aṣebḥan ḏ ȓkettan gruna ḏ ȓkettan azeggwaɣ iḥeḏqen, ṯzewweq ixef nnes s ddheb ṯegga lwiz ḏ jjuwhar!

¹⁷ Iruḥ marra manayenni ḏeg yijjen n ṯsaƹƹat waha! Arruyas n iɣarruba ḏ yinni itsafaren ḏeg uɣarrabu ḏ ibeḥriyen ḏ marra yinni itƹicen zi ȓebḥar bedden ɣar ȓeggwaj,

¹⁸ xzaren ɣar ddexxan n uḥraq nnes. Qqaren s jjheḏ: Man ṯandint ig iǧan nettaṯ am ṯendint-a ṯameqqrant?

¹⁹ Neṭṭaren caȓ x izeǧifen nsen, sɣuyiwen, trun, ḥezznen, qqaren: Ya Laṭif, ya Laṭif n ṯendint ṯameqqrant! Ayṯbab n iɣarruba ḏi ȓebḥar tuɣa ḏewȓen ḏ twajar liʼanna ṯandint ḏayes agȓa aṭṭas! Ḏeg yijjen n ṯsaƹƹat kuȓci iruḥ!

²⁰ Ay ajenna, fareḥ x uhḏam nnes. Farḥem a ȓmuminin ṣṣaliḥin ḏ arrusul ḏ lʼanbiya! Aqa iḥaseb-it Arebbi x min ḏawem ṯegga."

²¹ Ijjen n lmalak ijheḏ iysi-d ijjen n uzru igga am uzru n ṯsirṯ ṯameqqrant, inḍar-iṯ ḏi ȓebḥar inna: "Ammu s jjheḏ iy ɣa ṯmenḍar Babil ṯandint ṯameqqrant, war itiȓi ca ƹemmarṣ.

²² Zi ssa aȓ ṯsawent ƹemmarṣ aḏayem tesȓan i ṣṣut n imeḏyazen ḏ yinni iccaṯen ḏi ṯgambrit ḏ yinni itṣuḍen ḏi zzammar ḏ ṯemja. Ƹemmarṣ aḏayem yiȓin yinni itṣennaƹen mammec ma ṯegga ṣṣenƹaṯ nsen. Ƹemmarṣ aḏayem tesȓan i ṣṣut n ṯsirṯ.

²³ Ƹemmarṣ aḏayem ṯceƹƹeȓ ṯfawṯ n ȓqendiȓ. Ƹemmarṣ aḏayem tesȓan i ṣṣut n muȓay ḏ ṯsȓiṯ. Aqa isebbaben nnem tuɣa ǧan ḏ imeqqranen n ṯmurṯ, s ssiḥer nnem ṯxeḏƹeḏ marra ȓegnus.

²⁴ Iwa ḏi ṯendint-a ig ufin iḏammen n lʼanbiya ḏ ȓmuminin ṣṣaliḥin ḏ marra yinni itwanɣen ḏi ṯmurṯ."