Lwaḥi 14 - Ṯarifiṯ 2020

Izmar ḏ yinni iy ṯ iḏeffaren

¹ Wami xzareɣ, twaȓiɣ Izmar ibedd x uḏrar n Lquds akiḏes miyya u arbeƹa u arbeƹin aȓaf. Yura x ṯenyarṯ nsen isem n Yizmar ḏ yisem n Babas.

² Sȓiɣ i yijjen n ṯmijja zeg ujenna ṯegga am ṣṣut n waṭṭas n waman niɣ am wajjaj ijehḏen. Ƹaweḏ ṯmijja nni umi sȓiɣ ṯegga am ṣṣut n yinni iccaṯen ḏi ṯgambrit.

³ Tɣennajen ijjen n yizȓi ḏ jḏiḏ zzaṯ i lƹarc ḏ arbeƹa nni n lmexluqaṯ ḏ imɣaren. War izemmar uȓa ḏ ijjen aḏ iȓmeḏ izȓi nni illa ḏ miyya u arbeƹa u arbeƹin aȓaf nni iy itwasnejmen zi ddunect-a.

⁴ Yina ḏ yinni war iẓrin ƹemmarṣ ṯimɣarin qqimen ḏ iƹzriyen. Yina ḏ yinni iḏeffaren Izmar mani ma iruḥ. Twasnejmen niṯni zi ȓwesṭ n yiwḏan ḥima aḏ twaqeddmen ḏ imezwura i Arebbi ḏ Yizmar.

⁵ Ƹemmarṣ war sxerriqen, niṯni aqaṯen bȓa ȓƹib.

Ȓexbar aṣebḥan n ṯȓaṯa n lmalaʼikaṯ

⁶ Ẓriɣ ijjen n lmalaʼika nneɣni ṯeṭṭaw ḏi ȓwesṭ n ujenna. Ɣares Lʼinjil war ifennin aḏ tbeccar zzayes imezḏaɣ n ṯmurṯ zi mkuȓ ȓgens ḏ ȓqum ḏ lluɣa ḏ ccaƹb.

⁷ Ṯeqqar s jjheḏ: "Ggwḏem Arebbi semɣarem-ṯ, aqa ṯuweḍ-d ṯsaƹƹat nnes aḏ igg lḥisab ḏ lƹiqab. Sejjḏeṯ i wenni iy d ixeȓqen ajenna ḏ ṯmurṯ ḏ ȓebḥar ḏ ȓaƹnaṣer."

⁸ Ṯekkar ṯeḏfar-it ijjen n lmalaʼika nneɣni wis ṯnayen ṯeqqar: "Qa ṯewḍa qa ṯewḍa ṯendint n Babil ṯameqqrant ṯenni ig isesswen marra ȓegnus s waman nnes n uḍiȓ, iƹni lfasad nnes ameqqran."

⁹ Ṯekkar ṯeḏfar-iṯent ijjen n lmalaʼika nneɣni wis ṯȓaṯa ṯeqqar s jjheḏ: "Wenni ɣa isejjḏen i ȓwaḥc ḏ lʼaṣnam nnes, iqbeȓ ƹaweḏ ṭṭabaƹ x ṯenyarṯ nnes niɣ x ufus nnes,

¹⁰ ataf aḏ isew zeg waman uḍiȓ iqesḥen ig iǧan ḏ aɣḍab n Arebbi iƹni ḏ ȓkas n lƹiqab nnes. Aḏ iƹeddeb s ṯmessi ḏ ȓekbriyeṯ zzaṯ i lmalaʼikaṯ iṣfan ḏ Yizmar.

¹¹ Ddexxan n ȓaƹḏab nsen itgaƹƹaḏ i ȓebda n ȓebdaṯ. Yinni isejjḏen i ȓwaḥc ḏ lʼaṣnam nnes qebȓen ƹaweḏ ṭṭabaƹ n yisem nnes ataf war ɣarsen itiȓi bu arraḥeṯ s ǧiȓeṯ niɣ ḏ nhar."

¹² Ḏi lḥala nni itxeṣṣa-yasen i ȓmuminin ṣṣaliḥin aḏ ṣbaren aḏ ggen array s ȓuṣiyaṯ n Arebbi aḏ amnen zi Ƹisa.

¹³ Sȓiɣ i yijjen n ṯmijja zeg ujenna ṯeqqar: "Ari manaya: Ssaƹḏ n imettinen iy ɣa immṯen ssa aȓ ṯsawent umnen zi Siḏiṯneɣ." Arruḥ n Arebbi iqqar: "Wah, ḥima aḏ reyyḥen zi tamara nsen ȓaḥeqqac ḏeffarent-ṯen lḥasanaṯ nsen."

Ȓweqṯ n umjar n ṯmurṯ

¹⁴ Wami xzareɣ, twaȓiɣ ijjen n useynu ḏ acemȓaȓ, wenni xas iqqimen itcabbah ḏi mmis n bnaḏem, x uzeǧif nnes ijjen n ttaj n ddheb, ḏeg ufus nnes ijjen n umjar iqḍeƹ.

¹⁵ Ikkar iffeɣ-d ijjen n lmalak nneɣni zi ṯemziḏa ṯameqqrant, iqqar-as s jjheḏ i wenni iqqimen x useynu: "Ysi amjar nnec, mjar. Aqa ṯsaƹƹat n umjar ṯuweḍ-d, ṯafeǧaḥṯ n ṯmurṯ qa ṯewjeḏ."

¹⁶ Wenni iqqimen x useynu yuwṯa s umjar x ṯmurṯ, ṯemjar ṯfeǧaḥṯ nnes.

¹⁷ Ikkar iffeɣ-d ijjen n lmalak nneɣni zi ṯemziḏa ṯameqqrant iǧan ḏeg ujenna, uȓa ḏ netta ɣares ijjen n umjar iqḍeƹ.

¹⁸ Ikkar iffeɣ-d ijjen n lmalak nneɣni zi ȓmeḏbaḥ n ṯemziḏa ṯameqqrant ɣares ssulṭa x ṯmessi, iȓaɣa s jjheḏ inna-as i lmalak nni ɣar iǧa umjar iqḍeƹ: "Ysi amjar nnec, jmeƹ-d zzayes izekkunen n ṯzayarṯ n ṯmurṯ ȓaḥeqqac aḍiȓ ṯuweḍ-d ȓweqṯ nnes."

¹⁹ Lmalak nni yuwṯa s umjar nnes x ṯmurṯ, ijmeƹ-d izekkunen n uḍiȓ n ṯmurṯ inḍar-iṯen ḏi ṯsirṯ ṯameqqrant iy iǧan n uɣḍab n Arebbi.

²⁰ Ƹeffsent ḏi ṯsirṯ n uḍiȓ barra i ṯendint. Ḥemȓen-d zzayes iḏammen ar wami d yuwḍen ɣar sȓimeṯ n uyis, uyuren iḏammen nni can ṯeȓtmiyyat kilumit.