Lwaḥi 13 - Ṯarifiṯ 2020

Ȓwaḥc iy d iteffɣen zi ȓebḥar

¹ Ẓriɣ ijjen n ȓwaḥc iffeɣ-d zi ȓebḥar, ɣares sebƹa n iqeyyuƹen ḏ ƹecra n waccawen, x waccawen nnes ƹecra n ttajaṯ. Urin x iqeyyuƹen nnes isemawen war iḥȓin x Arebbi.

² Ȓwaḥc-a iy ẓriɣ itcabbah ḏeg uɣiȓas, iḍaren nnes ggin am iḍaren n ddub, aqemmum nnes igga am uqemmum n ssbaƹ. Wenni iǧan am ddaynaṣur yuca-as i ȓwaḥc-a jjheḏ nnes ḏ lƹarc nnes ḏ ijjen n ssulṭa ṯemɣar.

³ Ijjen zeg iqeyyuƹen nnes iḍhar-d ḏayes ij ujarriḥ axmi immuṯ, walakin igenfa zeg ujarriḥ nni n ȓmewṯ. U marra imezḏaɣ n ṯmurṯ tƹejjben, ḏeffaren ȓwaḥc-a.

⁴ Sejjḏen-as yiwḏan i wenni iggin am ddaynaṣur ȓaḥeqqac yuca-as i ȓwaḥc-a ssulṭa nnes. Ƹaweḏ sejjḏen-as i ȓwaḥc-a nnan: "Uw ɣa yiȓin am ȓwaḥc-a? Ug izemmaren aṯ iḥareb?"

⁵ Immuc-as uqemmum i ȓwaḥc-a iy zi ɣa issiweȓ s ttakebbur ḏ wawaȓ war iḥȓin x Arebbi. Ṯemmuc-as ssulṭa iy zi ɣa ixḏem ṯnayen u arbeƹin n churaṯ.

⁶ Ibḏa issawaȓ s wawaȓ war iḥȓin x Arebbi, iƹni s wawaȓ war iḥȓin x yisem nnes ḏ ṯzeddiɣṯ nnes ḏ imezḏaɣ ujenna.

⁷ Itwasmeḥ-as aḏ iḥareb ȓmuminin ṣṣaliḥin, aṯen iɣȓeb. Ṯemmuc-as ssulṭa x kuȓ ȓqum ḏ ccaƹb ḏ lluɣa ḏ ȓgens.

⁸ Marra imezḏaɣ n ṯmurṯ aḏas sejjḏen i ȓwaḥc-a, iƹni kuȓ ijjen zzaysen isem nnes war izemmem ca ḏi Lkitab n Ṯuḏarṯ zeg wami ṯeǧa ddunect-a, iƹni ḏi Lkitab n Yizmar itwanɣen.

⁹ Ṣenneṭ mliḥ a wenni itsȓan.

¹⁰ Wenni minxef yura aḏ itwaḥebbes, ataf aḏ itwaḥebbes. Wenni minxef yura aḏ itwaneɣ s ssif, ataf aḏ itwaneɣ s ssif. Ḏi lḥala nni itxeṣṣa ȓmuminin ṣṣaliḥin aḏ ṣbaren aḏ amnen.

Ȓwaḥc iy d itgaƹƹaḏen zi ṯmurṯ

¹¹ Ẓriɣ ijjen n ȓwaḥc nneɣni iffeɣ-d zi ṯmurṯ, ɣares ṯnayen n waccawen am waccawen n yizmar walakin netta issaweȓ am ddaynaṣur.

¹² Isexḏem marra ssulṭa n ȓwaḥc amezwaru u netta aqaṯ zzaṯes. Yarra marra ṯamurṯ ḏ imezḏaɣ nnes aḏas sejjḏen i ȓwaḥc nni amezwaru iy igenfan zeg ujarriḥ nni n ȓmewṯ.

¹³ Igga lmuƹjizaṯ ḏ ṯimeqqranin, ishewwa-d ṯimessi zeg ujenna ɣar ṯmurṯ zzaṯ i yiwḏan.

¹⁴ Ixeddeƹ imezḏaɣ n ṯmurṯ s lmuƹjizaṯ nni iy ḏas itwasemḥen aṯent igg zzaṯ i ȓwaḥc amezwaru. Yumar imezḏaɣ n ṯmurṯ aḏ ṣenƹen ijjen n lʼaṣnam am ȓwaḥc nni iy ḏi iǧa ujarriḥ n ssif walakin netta iddar.

¹⁵ Itwasmeḥ-as aḏ igg buḥbeȓ ḏi lʼaṣnam-a itwaṣenƹen x ṣṣifeṯ n ȓwaḥc amezwaru ḥima aḏ issiweȓ aḏ ineɣ marra yinni war isejjḏen ca i lʼaṣnam-a am ȓwaḥc nni.

¹⁶ Igga bezzez x marra iwḏan s imeqqranen ḏ imezyanen, ḏ twajar ḏ imesƹan, ḏ yinni ɣarsen bab nsen ḏ yinni ɣarsen lḥurriya nsen aḏ ggen ijjen n ṭṭabaƹ x ufus afusi nsen niɣ x ṯenyarṯ nsen.

¹⁷ Uȓa ḏ ijjen war izemmar aḏ iseɣ niɣ aḏ izzenz illa wenni ɣar iǧa ṭṭabaƹ nni, iƹni isem n ȓwaḥc nni niɣ ḏ rraqem n yisem nnes.

¹⁸ Ḏi manaya txeṣṣa ȓefhameṯ. Wenni ɣar iǧa ȓaƹqeȓ aḏ irzu x ȓmaƹna n rraqem n ȓwaḥc-a ȓaḥeqqac netta ḏ rraqem n yijjen n bnaḏem. Rraqem nni netta ḏ settmiyya u setta u settin.