Lwaḥi 11 - Ṯarifiṯ 2020

Ṯnayen n ȓechuḏ

¹ Immuc-ayi ijjen n uɣanim am ḏ ȓaƹbar inna-ayi yijjen: "Kkar, ƹbar ṯamziḏa ṯameqqrant n Arebbi ḏ ȓmeḏbaḥ, ḥseb mecḥaȓ iy ƹebbḏen ḏinni.

² Walakin ȓemraḥ iǧan ɣar barra i ṯemziḏa ejj-iṯ waḥḏes, war ṯ teƹbar ca ȓaḥeqqac immuc-asen i ȓegnus. Aḏ ƹeffsen ṯandint iqeddsen ḏi ṯnayen u arbeƹin n churaṯ.

³ Aḏ ssekkeɣ ṯnayen n ȓechuḏ inu aḏ ggen arruḍ n lḥuzen aḏ xbaren iwḏan s min ƹeȓmen zi Arebbi aȓaf u miyyatayen u settin yum."

⁴ Ȓechuḏ nni niṯni ḏ ṯnayen n ȓcejjur n zzitun, u ƹaweḏ niṯni ḏ ṯnayen n ȓeqnaḏeȓ ig ibedden zzaṯ i Siḏi Arebbi n ddunect-a.

⁵ Meȓa can yijjen irzu aḏ iḍarr ȓechuḏ nni, ataf aḏ teffeɣ ṯmessi zeg uqemmum nsen aḏ tecc ȓƹaḏyan nsen. Meȓa can yijjen irzu aṯen iḍarr, amenni iy ɣa immeṯ.

⁶ Ḏi ȓiyamaṯ nni iy ḏi ɣa xbaren ȓechuḏ-a s min ƹeȓmen zi Arebbi ataf aɣarsen ṯiȓi ssulṭa zi ɣa bellƹen ajenna war d icciṯ bu unẓar qaƹ. Ataf ƹaweḏ aɣarsen ṯiȓi ssulṭa aḏ arren aman ḏ iḏammen aḏ ḍeȓqen i marra lmuṣibaṯ x ṯmurṯ meȓmi ma xsen.

⁷ Xmi ɣa kemmȓen ȓexbar nsen iy zi ɣa cehḏen, aḏ d igaƹƹeḏ ȓwaḥc zi ȓaǧeɣ bȓa ȓaḥedd aṯen iḥareb, aṯen iɣȓeb, aḏ ineɣ ȓechuḏ nni.

⁸ Aḏ teqqim ddat nsen ḏi ccariƹ n ṯendint ṯameqqrant umi qqaren s ȓmaƹna Sadum niɣ Miṣra iƹni mani itwaṣelleb Siḏiṯsen.

⁹ Iwḏan zi mkuȓ ccaƹb ḏ ȓqum ḏ lluɣa ḏ ȓgens aḏaysen xzaren ḏi ddat nsen ṯeȓtiyyam ḏ uzyen, war tejjin ḥadd aḏ inḍeȓ ȓechuḏ-a.

¹⁰ Imezḏaɣ n ṯmurṯ aḏ farḥen aḏ zhun s ȓmewṯ nsen. Aḏ ucen ikaduṯen i wayawya ȓaḥeqqac lʼanbiya nni s ṯnayen, iƹni ȓechuḏ nni, ƹeddben aṭṭas imezḏaɣ n ṯmurṯ.

¹¹ Wami ṯeƹḏu ṯeȓtiyyam ḏ uzyen nni, yuḏef ḏaysen ijjen n buḥbeȓ zi Arebbi ḏi ȓechuḏ-a, kkaren bedden x iḍaren nsen. Yinni ṯen iẓrin ṯuḏef ḏaysen ṯiggwḏi ḏ ṯameqqrant.

¹² Sȓin i yijjen n ṯmijja ṯejheḏ tȓaɣa-d xasen zeg ujenna ṯeqqar-asen: "Gaƹƹḏem-d ḏanita!" Ȓechuḏ nni gaƹƹḏen ɣar ujenna ḏeg useynu, ȓƹaḏyan nsen xzaren ḏaysen.

¹³ Ḏi ȓweqṯ nni iwqeƹ ijjen n zzinzal ḏ ameqqran, ṯnehḏem ƹecra ḏi miyya zi ṯendint. Mmuṯen ḏi zzinzal-a sebƹaȓaf n yiwḏan. Yinni iqqimen ggwḏen, bḏan semɣaren Arebbi ig iǧan ḏeg ujenna.

¹⁴ Ṯeƹḏu tamara wis ṯnayen, ṯenni wis ṯȓaṯa ƹȓayen aḏ d tas.

Zzammar wis sebƹa

¹⁵ Ṯekkar lmalaʼika wis sebƹa ṯṣuḍ ḏi zzammar nnes, uca ṯimijjawin ḏeg ujenna qqarent s jjheḏ: "Iḏweȓ ȓeḥkam n ddunect-a ḏeg ifassen n Siḏi Arebbi nneɣ ḏ Lmasiḥ nnes, aḏ iḥkem i ȓebda n ȓebdaṯ."

¹⁶ Kkaren arbeƹa u ƹicrin nni imɣaren iy qqimen x lƹarcaṯ nsen zzaṯ i Arebbi, hwan x uɣembub nsen sejjḏen-as i Arebbi,

¹⁷ qqaren: "Netcekkar-icek a Siḏi Arebbi ig izemmaren i kuȓci, cek ig iǧan, cek iy tuɣa iǧan, ȓaḥeqqac ṯesxeḏmeḏ jjheḏ nnec, ṯebḏiḏ tḥekkmeḏ.

¹⁸ Ȓegnus ɣeḍben, yuweḍ-d uɣḍab nnec. Yuweḍ-d Nhar n Lḥisab ḏ Lƹiqab n yinni immuṯen. Aḏ tjaziḏ yinni ḏac ixeddmen iƹni lʼanbiya ḏ ȓmuminin nnec ṣṣaliḥin, ḏ yinni itweqqaren isem nnec s imezyanen ḏ imeqqranen. Aḏ teqḍiḏ x yinni isefsaḏen ṯamurṯ."

¹⁹ Ṯnurzem ṯemziḏa ṯameqqrant n Arebbi ḏeg ujenna, imeḍhar-d tabut n ȓƹaheḏ n Arebbi ḏi ṯemziḏa nni. Iwqeƹ wassam ḏ iɣuyan ḏ wajjaj ḏ zzinzal ḏ icarra aṭṭas.