Lwaḥi 10 - Ṯarifiṯ 2020

Lmalak ak Lkitab Amezyan

¹ Ẓriɣ ijjen n lmalak nneɣni ijheḏ ihwa-d zeg ujenna, inneḍ-as-d useynu. X uzeǧif nnes ijjen n ṯesȓiṯ n unẓar, aɣembub nnes igga am ṯfuct, iḍaren nnes ggin am ipilaren n ṯmessi.

² Iysi ḏeg ufus nnes ijjen n lkitab ḏ amezyan irzem. Isers ḍar nnes afusi x ȓebḥar, ƹaweḏ ḏ ḍar nnes aẓeȓmaḍ x ȓbarr.

³ Isɣuy s jjheḏ axmi ihirriw ijjen n ssbaƹ. Wami isɣuy, arrin-d xas sebƹa n wajjajen s ṣṣut nsen.

⁴ Wami d arrin sebƹa nni n wajjajen, nec xseɣ aḏ ariɣ manayenni walakin sȓiɣ i yijjen n ṯmijja zeg ujenna ṯenna-ayi-d: "Lla, min nnan sebƹa-ya n wajjajen ejj-iṯ ɣarek ḏ ssirr, war ṯ tari ca."

⁵ Ẓriɣ lmalak nni ibedden x ȓebḥar ḏ ȓbarr iysi fus nnes afusi ɣar ujenna.

⁶ Ijjuǧ s wenni iddaren i ȓebda n ȓebdaṯ iƹni wenni iy d ixeȓqen ajenna ḏ min ḏayes ḏ ȓbarr ḏ ȓebḥar ḏ min ḏaysen. Uca inna: "Ṣafi, war ṯeqqim bu ȓweqṯ ƹaḏ ktar.

⁷ Aqa ḏi nhuraṯ nni xmi ɣa ṯṣuḍ lmalaʼika wis sebƹa ḏi zzammar nnes qa ṣafi ssirr n Arebbi ikemmeȓ mammec ḏasen ṯ iƹaweḏ i lƹibad nnes lʼanbiya."

⁸ Ṯmijja nni umi sȓiɣ zeg ujenna zi qbeȓ ṯendeq-d ƹaweḏ ṯessiweȓ-d akiḏi wis marrṯayen ṯenna-ayi-d: "Ruḥ, ysi lkitab nni irezmen ḏeg ufus n lmalak ig ibedden x ȓebḥar ḏ ȓbarr."

⁹ Ruḥeɣ ɣar lmalak nni nniɣ-as: "Uc-ayi-d Lkitab nni amezyan!" Inna-ayi: "Aqaṯ, ecc-iṯ. Aḏ yiȓi ḏeg uƹeddis nnec ḏ amerzag, walakin ḏeg uqemmum nnec netta ḏ miziḍ am ṯamment."

¹⁰ Ysiɣ Lkitab nni amezyan zeg ufus nnes, cciɣ-ṯ. Ufiɣ-ṯ ḏeg uqemmum inu ḏ miziḍ am ṯamment. Walakin wami ṯ seɣȓiɣ iḏweȓ ḏ amerzag ḏeg uƹeddis inu.

¹¹ Ȓexddenni itwanna-ayi: "U labud aḏ tessiwȓeḏ ƹaweḏ s min iwḥa Arebbi x waṭṭas n ccuƹub ḏ ȓegnus ḏ lluɣaṯ ḏ izeǧiḏen."